Cantares 4 - Li Santil hu

¹ At ixk, la̱at li kꞌaxal nacatinra. Cꞌajoꞌ xchakꞌal a̱cuu. Li xnakꞌ a̱cuu chꞌinaꞌus, usta mukmu riqꞌuin la̱ tꞌicr. Chanchaneb li paloma xban xchꞌinaꞌusal. Li rismal a̱jolom nalemtzꞌun. Chanchan jun chꞌu̱tal chi chiba̱t li yo̱queb chi cubec saꞌ li tzu̱l Galaad.

² Cꞌajoꞌ xchꞌinaꞌusal li ruch a̱cue ut tzꞌakal re ru. Ma̱ jun isinbil. Chanchan xsakal li carner li nequeꞌtususnac chak chi e̱lc saꞌ li naꞌajej li nequeꞌchꞌajeꞌ cuiꞌ. Ac cauresinbileb re teꞌbesekꞌ li rix.

³ Cak cak lix tzꞌu̱mal a̱cue. Chanchan li caki nokꞌ. Ut cꞌajoꞌ xchꞌinaꞌusal nacat-a̱tinac. Lix co a̱cue nalemtzꞌun. Chanchan li granada, usta tzꞌaptzꞌo riqꞌuin la̱ tꞌicr.

⁴ Cꞌajoꞌ xchꞌinaꞌusal la̱ cux. Chanchan li cab li najt xteram li quixyi̱b laj David re tixcol cuiꞌ rib. La̱ kꞌol nalemtzꞌun. Chanchan jun mil chi chꞌi̱chꞌ li nequeꞌxram cuiꞌ re xchꞌo̱leb li soldado li cauheb rib.

⁵ Ut eb la̱ tuꞌ chanchaneb li cuib chi quej lakꞌlo̱queb chi cuaꞌac saꞌ xya̱nkeb li utzꞌuꞌuj.

⁶ Nak toj na-icꞌnac li cutan, la̱in tinxic saꞌ eb li tzu̱l li cuan cuiꞌ li mirra ut li incienso.

⁷ At ixk, kꞌaxal nacatinra. Cꞌajoꞌ la̱ chꞌinaꞌusal ut kꞌaxal cha̱bilat. Ma̱cꞌaꞌ a̱paltil.

⁸ Quim cuiqꞌuin, at cuixakil, ut toxic. E̱lko saꞌ li naꞌajej Líbano li cuanqueb cuiꞌ eb li tzu̱l Amana, Senir ut Hermón, lix naꞌajeb li cakcoj ut li hix.

⁹ Xco̱ inchꞌo̱l cha̱cuix, at cuixakil, at xsum li cua̱m. Jun sut ajcuiꞌ xina̱cuil ut xco̱ inchꞌo̱l cha̱cuix. Cꞌajoꞌ xchꞌinaꞌusal la̱ kꞌol cuan cha̱cux.

¹⁰ At cuixakil, cꞌajoꞌ nak nasahoꞌ saꞌ inchꞌo̱l nak niquina̱kꞌalu. At xsum li cua̱m, la̱ rahom kꞌaxal lokꞌ chicuu chiru li cha̱bil vino. Li sununquil ban li nacacuocsi kꞌaxal sunu̱nc chiruheb li cha̱bil sununquil ban.

¹¹ At cuixakil, cꞌajoꞌ nak nacuulac chicuu nak nacacuutzꞌ cuu. Chanchan xyaꞌal cab na-el saꞌ xtzꞌu̱mal a̱cue. Ut chanchan leche cuan rubel ruꞌuj a̱cuakꞌ. Sunu̱nc ru la̱ cuakꞌ chanchan xsununquil li naꞌajej Líbano.

¹² At cuixakil, at xsum li cua̱m, la̱at tzꞌakal cue injunes. Chanchanat jun lix cha̱bil naꞌaj li acui̱mk li tzꞌaptzꞌo saꞌ tzꞌac. Chanchanat li yuꞌam haꞌ tzꞌaptzꞌo.

¹³ Saꞌ li naꞌajej aꞌan, cuan lix cheꞌel li granada ut cha̱bil nau̱chin. Ut cuan ajcuiꞌ li utzꞌuꞌuj alheña ut nardo.

¹⁴ Ut na-el ajcuiꞌ li azafrán ut li sununquil claux ut li canela. Na-el nabal pa̱y ru li cheꞌ li naxqꞌue li incienso ut li mirra ut li áloes. Chixjunil li sununquil ban na-el saꞌ li naꞌajej aꞌan.

¹⁵ Li yuꞌam haꞌ li cuan saꞌ li naꞌajej aꞌan naxtꞌakresi li acui̱mk. Na-el chak chi nabal saꞌ eb li tzu̱l re Líbano.

Li ixk:

¹⁶ Chicha̱lk ta li ikꞌ saꞌ li norte. Chicha̱lk ta li ikꞌ saꞌ li sur. Ut chinumekꞌ ta saꞌ lix naꞌaj li acui̱mk re nak ta̱e̱lk xbo̱c li sununquil ban saꞌ li naꞌajej. Chicha̱lk ta saꞌ li naꞌajej aꞌin li cui̱nk li ninra. Chixtzaca ta li cha̱bil ru li cheꞌ li kꞌaxal quiꞌ ut sa xloubal.