Cantares 3 - Li Santil hu

¹ Nak cuanquin saꞌ lin cuarib chi kꞌek, quinsicꞌ li narahoc cue. Quinsicꞌ ut incꞌaꞌ quintau.

² Ut quinye: —Tincuacli̱k ut tinxic chixsicꞌbal saꞌ li tenamit. Tinsiqꞌui chak saꞌ eb li be. Tinsiqꞌui yalak bar, chanquin. Ut xinsiqꞌui li narahoc cue, abanan ma̱ bar xintau.

³ Eb li nequeꞌcꞌacꞌalen re li tenamit quineꞌril ut quinye reheb: —¿Ma incꞌaꞌ xeril ru li narahoc cue? chanquin reheb.

⁴ Tojeꞌ ajcuiꞌ tine̱lk riqꞌuineb nak quintau li narahoc cue. Quinchap chi rukꞌ ut incꞌaꞌ chic quicuachꞌab toj retal quincꞌam saꞌ rochoch lin naꞌ.

Li cui̱nk:

⁵ Ex tukꞌ ixk aj Jerusalén, saꞌ xcꞌabaꞌeb li quej ut li yuc li nequeꞌcuan saꞌ li qꞌuicheꞌ, nintzꞌa̱ma che̱ru nak incꞌaꞌ te̱rajsi ru li ixk li ninra. Checanab ban chi cua̱rc joꞌ najtil ta̱raj.

Li rox bich Li ixk:

⁶ ¿Ani li yo̱ chak chi cha̱lc saꞌ li chaki chꞌochꞌ? Nak nachal cuiqꞌuin chanchan nak yo̱ chi takecꞌ li sib. Chanchan xsibel li mirra ut li incienso ut li qꞌuila pa̱y ru li sununquil ban.

⁷ Aꞌan laj Salomón, chunchu chak saꞌ lix cꞌojariba̱l. Oxcꞌa̱l li soldados li cauheb rib yo̱queb chi pako̱nc re. Aꞌaneb li kꞌaxal cha̱bileb saꞌ xya̱nkeb chixjunileb li soldado aj Israel.

⁸ Chixjunileb nequeꞌxnau pletic chi us. Ut chixjunileb cuanqueb xchꞌi̱chꞌ saꞌ xcꞌa̱maleb xsaꞌeb re xcolbal li rey xban nak xiu xiu be̱c chiru kꞌojyi̱n.

⁹ Li rey Salomón quixqꞌue chi yi̱ba̱c jun lix cꞌojariba̱l riqꞌuin li cha̱bil cheꞌ re Líbano.

¹⁰ Li rok li cꞌojariba̱l letzbil plata chirix. Ut li nahilan cuiꞌ li rix yi̱banbil riqꞌuin oro. Li naꞌajej li nachunla cuiꞌ yi̱banbil riqꞌuin li cha̱bil tꞌicr púrpura. Lix sahob ru yi̱banbil xbaneb li tukꞌ ixk aj Jerusalén xban nak nequeꞌxra.

¹¹ Ex tukꞌ ixk li cuanquex Sión, quimkex chirilbal li rey Salomón. Cuan saꞌ xjolom li corona li quiqꞌueheꞌ re xban lix naꞌ saꞌ li cutan nak quisumla. Quiqꞌueheꞌ re saꞌ li cutan nak kꞌaxal sa saꞌ xchꞌo̱l.