Cantares 2 - Li Santil hu

¹ La̱in chanchanin li rosa re Sarón. Ut chanchanin li azucena li cuan saꞌ li ru takꞌa.

Li cui̱nk:

² Li ixk li ninra, aꞌan li kꞌaxal chꞌinaꞌus chiruheb chixjunileb li tukꞌ ixk. Chanchan jun li utzꞌuꞌuj saꞌ xya̱nkeb li qꞌuix.

Li ixk:

³ Li cui̱nk li ninra, aꞌan li kꞌaxal lokꞌ chiruheb chixjunileb li chꞌajom. Chanchan lix cheꞌel li manzano saꞌ xya̱nkeb li qꞌuila pa̱y ru chi cheꞌ. Nacuulac chicuu hila̱nc saꞌ xmu li rukꞌ. Ut cꞌajoꞌ xsahil nak ninlou li ru.

⁴ Li cui̱nk quinixcꞌam saꞌ lix ninkꞌe. Ut quixqꞌue lix bandera saꞌ inbe̱n re xcꞌutbal nak niquinixra.

⁵ Qꞌuehomak chak inchaki uvas. Qꞌuehomak chak inmansana re nak ta̱cꞌulu̱nk inchꞌo̱l. Nacuecꞌa nak ca̱mc cue xban nak kꞌaxal nacuaj ru li cui̱nk aꞌin.

⁶ Tixqꞌue taxak lix tzꞌe ukꞌ rubel lin jolom ut riqꞌuin lix nim ukꞌ tinixkꞌalu.

Li cui̱nk:

⁷ Ex tukꞌ ixk aj Jerusalén, saꞌ xcꞌabaꞌeb li quej ut li yuc li nequeꞌcuan saꞌ qꞌuicheꞌ, nintzꞌa̱ma che̱ru nak incꞌaꞌ te̱rajsi ru li ixk li ninra. Checanab ban chi cua̱rc joꞌ najtil ta̱raj.

Li xcab bich Li ixk:

⁸ Nacuabi xya̱b xcux li cui̱nk li ninra. Yo̱ chak chi cha̱lc. Yo̱ chak chi a̱linac saꞌ eb li tzu̱l ut saꞌ xbe̱n bol re nak ta̱cha̱lk cuiqꞌuin saꞌ junpa̱t.

⁹ Li cui̱nk li ninra, aꞌan chanchan jun li quej. Chanchan jun li yuc. Xakxo chiru li tzꞌac ut yo̱ chak chi iloc saꞌ li ventana. Yo̱ chak chi chꞌu̱qui̱nc.

¹⁰ Li cui̱nk li ninra quia̱tinac cuiqꞌuin ut quixye cue: —Cuaclin. Quim cuiqꞌuin. Kꞌaxal nacatinra. Cꞌajoꞌ a̱chꞌinaꞌusal.

¹¹ Ac xnumeꞌ li habalkꞌe. Incꞌaꞌ chic tixqꞌue li hab.

¹² Li utzꞌuꞌuj xeꞌoc chi puqꞌuecꞌ saꞌ qꞌuicheꞌ. Ac xcuulac xkꞌehil li bicha̱nc. Yo̱queb chi bicha̱nc li mucuy xban xsahil xchꞌo̱leb.

¹³ Ac xeꞌoc chi u̱chi̱nc li cheꞌ higo. Ut cꞌajoꞌ xsununquil li ratzꞌum li uvas. Cuaclin, at ixk. Kꞌaxal nacatinra ut cꞌajoꞌ la̱ chꞌinaꞌusal. Quim cuiqꞌuin.

¹⁴ La̱at chanchanat jun li mucuy li naxmuk rib saꞌ eb li sako̱nac ut saꞌ eb li naꞌajej chꞌaꞌaj xtaubal. China̱canab chirilbal la̱ cuu. China̱canab chirabinquil lix ya̱b la̱ cux. Cꞌajoꞌ xchꞌinaꞌusal la̱ cuu. Ut cꞌajoꞌ nak nacuulac chicuu rabinquil xya̱b la̱ cux.

Chi cabichaleb:

¹⁵ Me̱qꞌueheb xlese̱ns li nequeꞌajoc xpoꞌbal ru li karahom. Eb aꞌan chanchaneb li cocꞌ yac li nequeꞌxpoꞌ li acui̱mk uvas li yo̱queb chi u̱chi̱nc.

Li ixk:

¹⁶ Li cui̱nk li ninra, aꞌan cue la̱in ut la̱in rehin aꞌan. Aꞌan naxberesiheb lix queto̱mk saꞌ xya̱nkeb li utzꞌuꞌuj.

¹⁷ Nak yo̱ chi numecꞌ li kꞌojyi̱n ut nak yo̱ chi sake̱uc, tatcha̱lk cuiqꞌuin, la̱at li raro̱cat inban. Chanchanakat li quej ut li yuc li nequeꞌcuan saꞌ li tzu̱l Beter.