Cantares 1 - Li Santil hu

¹ Aꞌan aꞌin li lokꞌlaj bich li quixtzꞌi̱ba li rey Salomón.

Li xbe̱n bich Li ixk:

² Ta̱cuutzꞌ taxak cuu xban nak la̱ rahom, aꞌan kꞌaxal lokꞌ chicuu chiru li vino.

³ Kꞌaxal sa rutzꞌbal li sununquil ban nacacuocsi. Ut la̱ cꞌabaꞌ chanchan li sununquil ban. Joꞌcan nak eb li tukꞌ ixk nacateꞌxra.

⁴ China̱cꞌam cha̱cuix chi junpa̱t. La̱atak lin rey. China̱cꞌam saꞌ la̱ cuochoch. Chisahokꞌ taxak kachꞌo̱l saꞌ cuibal. Nacuaj nak tina̱ra. Aꞌan li kꞌaxal lokꞌ chiru li vino. Xban nak kꞌaxal nim la̱ rahom, joꞌcan nak cateꞌxra li tukꞌ ixk.

⁵ Ex ixk aj Jerusalén, la̱in kꞌek caꞌchꞌin intibel, abanan chꞌinaꞌusin. Lin kꞌekal chanchan xkꞌekal li muheba̱l aran Cedar. Ut lin chꞌinaꞌusal chanchan xchꞌinaꞌusal li tꞌicr li cuan saꞌ rochoch laj Salomón.

⁶ Me̱qꞌue retal lin kꞌekal. Li sakꞌe quicꞌatoc cue. Joꞌcan nak kꞌek nincꞌutun. Queꞌjoskꞌoꞌ cuiqꞌuin li cuas ut quineꞌxqꞌue chi trabajic saꞌ xnaꞌaj lix uvas. Joꞌcan nak incꞌaꞌ xcuil cuib chi us.

⁷ At cui̱nk, la̱in nacatinra. Ye cue bar nacacꞌam la̱ queto̱mk re teꞌcuaꞌak. ¿Bar nacaqꞌueheb chi hila̱nc cuaꞌleb? ¿Cꞌaꞌut nak tento nak tinbeni cuib cha̱sicꞌbal saꞌ lix naꞌajeb lix queto̱mkeb laj ilol xul?

Li cui̱nk:

⁸ La̱at li kꞌaxal chꞌinaꞌusat saꞌ xya̱nkeb chixjunileb li ixk. Cui incꞌaꞌ nacanau li naꞌajej li nincꞌameb cuiꞌ lin queto̱mk, ta̱qꞌue retal bar xeꞌnumeꞌ cuiꞌ li queto̱mk ut ta̱qꞌueheb la̱ chiba̱t nachꞌ riqꞌuineb lix muheba̱leb laj ilol queto̱mk.

⁹ At ixk, cꞌajoꞌ nak nacatinra. Nacatinjuntakꞌe̱ta riqꞌuineb li cha̱bil ixki cacua̱y li nequeꞌquelon re lix carruajeb laj faraón.

¹⁰ Cꞌajoꞌ xchꞌinaꞌusal lix co a̱cue. Chꞌinaꞌus li caꞌxic nacacuocsi. Ut cꞌajoꞌ xchꞌinaꞌusal la̱ cux nacꞌutun riqꞌuin la̱ kꞌol.

¹¹ Takayi̱b la̱ caꞌxic riqꞌuin tzꞌakal oro ut takaqꞌue xsahob ru riqꞌuin plata.

Li ixk:

¹² Lin rey chunchu chire li me̱x. Ut li naꞌajej xnuja̱c riqꞌuin xbo̱c lin sununquil ban nardo.

¹³ Li cui̱nk li ninra, aꞌan chanchan li xsununquil li mirra li ninqꞌue saꞌ xya̱nk lin tuꞌ.

¹⁴ Li cui̱nk li ninra, aꞌan chanchan xchꞌinaꞌusal li utzꞌuꞌuj alheña, li cuan saꞌ lix naꞌaj li uvas aran En-gadi.

Li cui̱nk:

¹⁵ At ixk, nacatinra. Cꞌajoꞌ xchakꞌal a̱cuu. Kꞌaxal chꞌinaꞌus li xnakꞌ a̱cuu. Chanchan xchꞌinaꞌusal cuib li mucuy.

Li ixk:

¹⁶ At cui̱nk, kꞌaxal nacatinra. Cꞌajoꞌ xchakꞌal a̱cuu. Nasahoꞌ inchꞌo̱l a̱cuiqꞌuin. Li kanaꞌaj bar tohila̱nk cuiꞌ utzꞌuꞌujinbil ru.

¹⁷ Li cha̱bil cheꞌ chacalteꞌ, aꞌan chanchan lix tzꞌambahil li kochoch. Ut li ciprés, aꞌan chanchan li xbe̱n li kochoch.