Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Apocalipsis 9 - Li Santil hu

1 Ut li roꞌ ángel quixya̱basi lix trompeta ut quicuil nak jun li chahim quitꞌaneꞌ chak saꞌ choxa ut quinak saꞌ ruchichꞌochꞌ. Ut quiqꞌueheꞌ re li chahim lix lacuil li chamal jul nak quicuil.

2 Nak quixte li re li chamal jul, cꞌajoꞌ li sib qui-el chak. Chanchan li sib li na-el saꞌ junak nimla horno. Quikꞌojyi̱noꞌ ru li sakꞌe ut li ikꞌ xban li sib li qui-el chak saꞌ li chamal jul.

3 Saꞌ li sib aꞌan queꞌel chak nabaleb li xul chanchaneb laj sa̱cꞌ ut queꞌxjeqꞌui ribeb saꞌ ruchichꞌochꞌ. Queꞌqꞌueheꞌ xcuanquil re nak teꞌtiꞌok. Lix may li teꞌxtiu, aꞌan chanchan xmay li nequeꞌxtiu laj xo̱cꞌ.

4 Queꞌyeheꞌ reheb nak incꞌaꞌ teꞌxchꞌeꞌ li pim chi moco li acui̱mk saꞌ ruchichꞌochꞌ, chi moco junak cheꞌ. Caꞌaj cuiꞌ eb li cristian li ma̱cꞌaꞌ retalileb saꞌ xpe̱quemeb xban li Dios, caꞌaj cuiꞌ eb aꞌan li teꞌtiꞌekꞌ.

5 Ut queꞌyeheꞌ ajcuiꞌ reheb nak incꞌaꞌ teꞌxcamsi li cristian. Caꞌaj cuiꞌ teꞌxrahobtesiheb chiru o̱b po. Ut lix rahil li teꞌxtiu li xul aꞌan, chanchan xmay naxtiu laj xo̱cꞌ.

6 Saꞌ eb li cutan aꞌan, eb li cristian teꞌxsicꞌ raj xcamiqueb xban li raylal yo̱keb chixcꞌulbal. Teꞌxra raj ru ca̱mc, abanan incꞌaꞌ teꞌca̱mk.

7 Eb laj sa̱cꞌ chanchaneb li cacua̱y ac cauresinbileb chi pletic. Chanchan cuanqueb xcorona yi̱banbil riqꞌuin oro saꞌ xjolomeb. Ut li riloba̱leb chanchan riloba̱leb cui̱nk.

8 Li rismal xjolomeb chanchan rismal xjolomeb ixk ut li ruch reheb, chanchan ruch reheb cakcoj.

9 Chanchan chꞌi̱chꞌ cuan chire xchꞌo̱leb re xcolbaleb rib. Ut lix xiqꞌueb nequeꞌecꞌan joꞌ nequeꞌecꞌan qꞌuila carruaje quelonbil xban cacua̱y nak ac yo̱queb chi xic chi pletic.

10 Eb li xul aꞌan cuanqueb xmay saꞌ ruꞌujeb xye. Ut riqꞌuin lix ye nequeꞌtiꞌoc joꞌ laj xo̱cꞌ. Ut riqꞌuineb lix ye teꞌxrahobtesiheb li tenamit chiru o̱b po.

11 Cuan jun li nataklan saꞌ xbe̱neb. Aꞌan li ángel li kꞌaxal nim xcuanquil chi takla̱nc saꞌ li chamal jul. Aj Abadón xcꞌabaꞌ saꞌ li a̱tinoba̱l hebreo, ut saꞌ griego aj Apolión xcꞌabaꞌ. (Chi jalbil ru li cꞌabaꞌej aꞌin naraj naxye “aj sachonel”.)

12 Aꞌin li xbe̱n raylal li quicꞌulman nak quicuil. Abanan toj cuan cuib chic li raylal li teꞌcha̱lk saꞌ xbe̱neb li tenamit.

13 Li xcuak ángel quixya̱basi lix trompeta ut quicuabi jun xya̱b cux quia̱tinac chak saꞌ xya̱nkeb li ca̱hib chi xucub li cuanqueb saꞌ xca̱ xucu̱til li artal li yi̱banbil riqꞌuin oro, li cuan chiru li Dios.

14 Quixye re li xcuak ángel li cuan xtrompeta riqꞌuin: —Hiteb li ca̱hib chi ángel li bacꞌbo̱queb chire li nimaꞌ Éufrates, chan.

15 Queꞌachꞌaba̱c li ca̱hib chi ángel li ac xakabanbileb re li ho̱nal aꞌan ut re li cutan aꞌan ut re li po aꞌan ut re li chihab aꞌan re nak teꞌxic xcamsinquileb nabaleb li cristian. Caꞌchꞌin chic ma̱ yijach li cristian li teꞌcamsi̱k.

16 La̱in quicuabi joꞌ qꞌuialeb li soldado li teꞌxic chi pletic chirix cacua̱y. Cuib ciento millón (200,000,000) lix qꞌuialeb.

17 Joꞌcaꞌin nak queꞌcuil saꞌ li visión eb li cacua̱y ut eb li yo̱queb chi xic chirix. Eb li yo̱queb chi xic chirix li cacua̱y cuanqueb xcolbal li re xchꞌo̱leb. Chanchan xcakal li xam, chanchan xraxil li cha̱bil pec zafiro ut chanchan xkꞌanal li azufre. Lix jolomeb li cacua̱y chanchan lix jolomeb li cakcoj. Ut saꞌ reheb yo̱ chi e̱lc xam, sib ut azufre.

18 Xban li oxib chi raylal aꞌin caꞌchꞌin chic ma̱ yijach li cristian queꞌcamsi̱c. Nabaleb li cristian queꞌcamsi̱c xban li xam, li sib ut li azufre li qui-el chak saꞌ reheb li cacua̱y.

19 Saꞌ reheb cuanqueb xmay ut cuanqueb ajcuiꞌ saꞌ ruꞌujeb xye. Lix yeheb chanchan xjolomeb li cꞌantiꞌ ut riqꞌuin aꞌan nequeꞌxrahobtesiheb li cristian.

20 Ut li joꞌ qꞌuial chic li cristian li incꞌaꞌ queꞌcamsi̱c xban li raylal aꞌan incꞌaꞌ ajcuiꞌ queꞌyotꞌeꞌ xchꞌo̱leb ut incꞌaꞌ queꞌxcanab xba̱nunquil li ma̱usilal. Incꞌaꞌ queꞌxcanab xlokꞌoninquil li ma̱us aj musikꞌej chi moco queꞌxcanab xlokꞌoninquileb li jalanil dios yi̱banbil riqꞌuin oro, plata, kꞌan chꞌi̱chꞌ bronce joꞌ ajcuiꞌ riqꞌuin pec ut cheꞌ. Incꞌaꞌ queꞌxcanab xlokꞌoninquileb li yi̱banbil dios aꞌin, li incꞌaꞌ nequeꞌiloc, chi moco nequeꞌabin, chi moco nequeꞌbe̱c.

21 Incꞌaꞌ queꞌxjal xcꞌaꞌuxeb chi moco queꞌyotꞌeꞌ xchꞌo̱leb xban nak incꞌaꞌ queꞌxcanab xcamsinquil ras ri̱tzꞌineb ut incꞌaꞌ queꞌxcanab li tu̱lac, chi moco queꞌxcanab li coꞌbe̱tac yumbe̱tac ut incꞌaꞌ ajcuiꞌ queꞌxcanab li elkꞌac.

© 2019, Wycliffe Bible Translators. All rights reserved.

Wycliffe Bible Translators, Inc.
ကြှနျုပျတို့နောကျလိုကျပါ:



ကြော်ငြာတွေ