Apocalipsis 7 - Li Santil hu

Li ca̱hib xcuakxakcꞌa̱l mil (144,000) laj Israel li qꞌuebileb retalil xban li Dios

¹ Ut chirix chixjunil aꞌin quicuil ca̱hib li ángel xakxo̱queb saꞌ xca̱ pacꞌalil li ruchichꞌochꞌ li nachal cuiꞌ li ikꞌ. Yo̱queb chixkꞌusbal li ikꞌ re nak incꞌaꞌ ta̱numekꞌ chi cau saꞌ xbe̱n li ruchichꞌochꞌ joꞌ ajcuiꞌ saꞌ xbe̱n li palau ut saꞌ xbe̱neb li cheꞌ.

² Ut quicuil jun chic li ángel yo̱ chak chi cha̱lc na-el cuiꞌ chak li sakꞌe. Cuan chak lix sello li yoꞌyo̱quil Dios riqꞌuin. Ut quia̱tinac chi cau xya̱b xcux riqꞌuineb li ca̱hib chi ángel li ac qꞌuebileb xcuanquil re xba̱nunquil raylal reheb li cuanqueb saꞌ ruchichꞌochꞌ, joꞌqueb ajcuiꞌ li cuanqueb saꞌ li palau.

³ Quixye reheb: —Me̱ba̱nu raylal reheb li cuanqueb saꞌ ruchichꞌochꞌ chi moco reheb li cuanqueb saꞌ li palau chi moco reheb li cheꞌ. Toj takaqꞌue retalileb saꞌ xpe̱quemeb riqꞌuin li sello eb laj cꞌanjel chiru li Dios.

⁴ Ut quicuabi lix qꞌuialeb li queꞌqꞌueheꞌ retalileb saꞌ xpe̱quemeb riqꞌuin li sello, aꞌan ca̱hib xcuakxakcꞌa̱l mil (144,000) chi cristian. Aꞌaneb li quiqꞌueheꞌ retalileb saꞌ xpe̱quemeb saꞌ xya̱nkeb lix te̱paleb li ralal xcꞌajol laj Israel.

⁵ Cablaju mil (12,000) li quiqꞌueheꞌ retalileb saꞌ xpe̱quemeb saꞌ xya̱nkeb li ralal xcꞌajol laj Judá; ut saꞌ xya̱nkeb li ralal xcꞌajol laj Rubén, cablaju mil li quiqꞌueheꞌ retalileb saꞌ xpe̱quemeb. Saꞌ xya̱nkeb li ralal xcꞌajol laj Gad, cablaju mil li quiqꞌueheꞌ retalileb saꞌ xpe̱quemeb.

⁶ Cablaju mil (12,000) li quiqꞌueheꞌ retalileb saꞌ xpe̱quemeb saꞌ xya̱nkeb li ralal xcꞌajol laj Aser; ut saꞌ xya̱nkeb li ralal xcꞌajol laj Neftalí, cablaju mil li quiqꞌueheꞌ retalileb saꞌ xpe̱quemeb. Ut saꞌ xya̱nkeb li ralal xcꞌajol laj Manasés, cablaju mil li quiqꞌueheꞌ retalileb saꞌ xpe̱quemeb.

⁷ Cablaju mil (12,000) li quiqꞌueheꞌ retalileb saꞌ xpe̱quemeb saꞌ xya̱nkeb li ralal xcꞌajol laj Simeón: ut saꞌ xya̱nkeb li ralal xcꞌajol laj Leví, cablaju mil li quiqꞌueheꞌ retalileb saꞌ xpe̱quemeb. Ut saꞌ xya̱nkeb li ralal xcꞌajol laj Isacar, cablaju mil li quiqꞌueheꞌ retalileb saꞌ xpe̱quemeb.

⁸ Cablaju mil (12,000) li quiqꞌueheꞌ retalileb saꞌ xpe̱quemeb saꞌ xya̱nkeb li ralal xcꞌajol laj Zabulón; ut saꞌ xya̱nkeb li ralal xcꞌajol laj José, cablaju mil li quiqꞌueheꞌ retalileb saꞌ xpe̱quemeb. Ut saꞌ xya̱nkeb li ralal xcꞌajol laj Benjamín, cablaju mil li quiqꞌueheꞌ retalileb saꞌ xpe̱quemeb.

Nabaleb li tenamit tikibanbileb riqꞌuin saki akꞌ

⁹ Ut chirix aꞌan, quicuil ajcuiꞌ nabaleb chi tenamit xakxo̱queb chiru li cꞌojcꞌo saꞌ lix lokꞌlaj cꞌojariba̱l ut chiru li Jun li chanchan carner. Incꞌaꞌ naru rajlanquileb xban xqꞌuialeb. Cuanqueb aran aꞌ yal ani xte̱paleb xxeꞌto̱nil xyucuaꞌeb ut aꞌ yal bar xtenamiteb ut aꞌ yal chanru li ra̱tinoba̱leb. Tikibanbileb riqꞌuin saki akꞌ ut cuan chak saꞌ rukꞌeb li rukꞌ cheꞌ palma.

¹⁰ Ut japjo̱queb re chixyebal: Li kacolbal riqꞌuin li Dios nachal chak, li cꞌojcꞌo saꞌ lix lokꞌlaj cꞌojariba̱l, ut riqꞌuin ajcuiꞌ li Jun li chanchan carner.

¹¹ Ut chixjunileb li ángel li cuanqueb chi xjun sutam li lokꞌlaj cꞌojariba̱l ut li ca̱hib li chanchaneb ángel, joꞌqueb ajcuiꞌ li ca̱hib xcaꞌcꞌa̱l li cꞌojcꞌo̱queb aran, queꞌxcuikꞌib ribeb chiru li lokꞌlaj cꞌojariba̱l ut queꞌxlokꞌoni li Dios.

¹² Ut queꞌxye: Lokꞌoninbil taxak li kaDios. Chinima̱k taxak ru. Chiqꞌuehekꞌ taxak xlokꞌal xban nak numtajenak xcuanquil, xnaꞌleb ut xcacuilal. Xcꞌulub nak tobantioxi̱nk chiru chi junelic kꞌe cutan. Joꞌcan taxak.

¹³ Ut jun reheb li ca̱hib xcaꞌcꞌa̱l li cꞌojcꞌo̱queb aran quixpatzꞌ cue: —¿Aniheb aꞌin li tikibanbileb riqꞌuin saki akꞌ? Ut, ¿bar xeꞌchal chak?—

¹⁴ Ut la̱in quinchakꞌoc ut quinye re: —Ka̱cuaꞌ, la̱at nacatnaꞌoc re.— Ut aꞌan quixye cue: —Aꞌaneb aꞌin li xeꞌcuyuc chak xnumsinquil li nimla raylal xeꞌxcꞌul. Aꞌaneb li cuybil sachbil lix ma̱queb xban nak quihoyeꞌ xquiqꞌuel li Jun li chanchan carner nak quicam saꞌ xcꞌabaꞌeb.

¹⁵ Joꞌcan ut nak cuanqueb chiru lix lokꞌlaj cꞌojariba̱l li Dios ut nequeꞌcꞌanjelac chiru chi kꞌek chi cutan saꞌ lix templo. Ut li cꞌojcꞌo saꞌ lix lokꞌlaj cꞌojariba̱l, aꞌan ta̱ilok reheb xban nak aꞌan cua̱nk riqꞌuineb.

¹⁶ Incꞌaꞌ chic teꞌtzꞌoca̱k chi moco ta̱chakik reheb. Incꞌaꞌ chic teꞌxcꞌul xtikcual li sakꞌe chi moco teꞌlubk xban tik.

¹⁷ Ut li Jun li chanchan carner li cꞌojcꞌo aran saꞌ xyiheb li cꞌojariba̱l, aꞌan ta̱ilok reheb joꞌ jun li cha̱bil pastor narileb lix carner. Ut aꞌan ta̱qꞌuehok re lix yuꞌameb chi junelic. Incꞌaꞌ chic teꞌya̱bak xban nak li Dios ta̱cꞌojoba̱nk xchꞌo̱leb.—