Apocalipsis 5 - Li Santil hu

Li botbil hu ut li carner

¹ Ut saꞌ lix nim ukꞌ li Dios li cꞌojcꞌo saꞌ li lokꞌlaj cꞌojariba̱l quicuil jun li botbil hu tzꞌi̱banbil chi saꞌ ut chirix ut tzꞌapbil riqꞌuin cuukub li sello.

² Ut quicuil jun li ángel kꞌaxal cau rib ut chi cau xya̱b xcux quixye: —¿Ani li xcꞌulub risinquil li sello ut xtebal li hu? chan.

³ Xban nak moco xcꞌulubeb ta, ma̱ jun reheb saꞌ choxa, chi moco saꞌ ruchichꞌochꞌ, chi moco saꞌ xnaꞌajeb li camenak quiru xtebal li hu chi moco rilbal xsaꞌ li hu.

⁴ Ut cꞌajoꞌ nak quinya̱bac chirilbal nak ma̱ jun reheb xcꞌulubeb xtebal li hu chi moco xcꞌulubeb rilbal xsaꞌ.

⁵ Ut jun reheb li chunchu̱queb saꞌ li ca̱hib xcaꞌcꞌa̱l chi cꞌojariba̱l quixye cue: —Matya̱bac xban nak cuan jun ta̱ru̱k tixte li hu aꞌin. Cuan jun aj Judá chanchan li cakcoj. Aꞌan xcomoneb li ralal xcꞌajol li rey David. Aꞌan xcꞌulub risinquil li cuukub chi sello ut xcꞌulub xtebal li hu xban nak aꞌan quixcuy xnumsinquil li ra xi̱cꞌ, chan.

⁶ Quicuil Jun xakxo aran chiru li lokꞌlaj cꞌojariba̱l li sutsu xbaneb li ca̱hib li chanchaneb ángel joꞌqueb ajcuiꞌ li ca̱hib xcaꞌcꞌa̱l li cꞌojcꞌo̱queb aran. Quicꞌutun nak li jun aꞌan ac camsinbil. Chanchan carner. Cuan cuukub xxucub ut cuan ajcuiꞌ cuukub xnakꞌ ru retalil li Santil Musikꞌej li quitakla̱c saꞌ chixjunil li ruchichꞌochꞌ.

⁷ Li Jun li chanchan carner quichal ut quixchap li botbil hu li cuan saꞌ xnim ukꞌ li cꞌojcꞌo saꞌ li lokꞌlaj cꞌojariba̱l.

⁸ Nak quixchap li botbil hu, li ca̱hib li chanchaneb ángel ut li ca̱hib xcaꞌcꞌa̱l li cꞌojcꞌo̱queb aran queꞌxcuikꞌib ribeb chiru li Jun li chanchan carner. Cuanqueb x-arpa chi xju̱nkaleb ut cuanqueb xsecꞌ yi̱banbil riqꞌuin oro ut cuan li sununquil ban chi saꞌ retalil lix tijeb li ralal xcꞌajol li Dios.

⁹ Queꞌxbicha jun li acꞌ bich ut queꞌxye: A̱cꞌulub xchapbal li botbil hu ut xtebal li sello xban nak la̱at catcamsi̱c. Riqꞌuin la̱ quiqꞌuel xalokꞌeb nabal re nak teꞌoc chokꞌ ralal xcꞌajol li Dios. Yalak ani xacoleb aꞌ yal ani xte̱paleb xxeꞌto̱nil yucuaꞌeb, ut aꞌ yal bar xtenamiteb ut aꞌ yal chanru li ra̱tinoba̱leb.

¹⁰ Xaqꞌueheb xcuanquil chi cꞌanjelac chiru li kaDios joꞌ aj tij, ut ta̱qꞌueheb ajcuiꞌ chi takla̱nc saꞌ ruchichꞌochꞌ.

¹¹ Ut saꞌ li visión quicuileb li qꞌuila okꞌob chi ángel li cuanqueb chi xjun sutam li lokꞌlaj cꞌojariba̱l ut li ca̱hib li yoꞌyo̱queb li chanchaneb ángel joꞌqueb ajcuiꞌ li ca̱hib xcaꞌcꞌa̱l li cꞌojcꞌo̱queb aran. Quicuabi nak yo̱queb chi a̱tinac li qꞌuila okꞌob chi ángel.

¹² Queꞌxye chi cau xya̱b xcux: Li Jun li chanchan carner li quicamsi̱c, aꞌan xcꞌulub nak ta̱qꞌuehekꞌ xlokꞌal xban nak numtajenak xcuanquil, xbiomal, xnaꞌleb, ut xcacuilal. Ut xcꞌulub nak ta̱qꞌuehekꞌ xlokꞌal, ta̱nima̱k ru ut ta̱lokꞌoni̱k.

¹³ Ut quicuabi ajcuiꞌ nak queꞌa̱tinac chixjunil li cꞌaꞌak re ru quiyoꞌobtesi̱c xban li Dios, joꞌ li cuanqueb saꞌ choxa, joꞌ li cuanqueb saꞌ ruchichꞌochꞌ, joꞌ ajcuiꞌ li cuanqueb saꞌ li palau, joꞌqueb ajcuiꞌ li cuanqueb saꞌ xnaꞌajeb li camenak. Chixjunileb li queꞌyoꞌobtesi̱c xban li Dios queꞌxye: Aꞌ taxak li Dios li cꞌojcꞌo saꞌ xcꞌojariba̱l joꞌ ajcuiꞌ li Jun li chanchan carner, chilokꞌoni̱k ut chiqꞌuehekꞌ xlokꞌal. Chiqꞌuehekꞌ xcuanquil ut chinima̱k ru chi junelic kꞌe cutan.

¹⁴ Ut li ca̱hib li yoꞌyo̱queb li chanchaneb ángel, yo̱queb chixyebal: —Joꞌcan taxak.— Ut eb li ca̱hib xcaꞌcꞌa̱l li cꞌojcꞌo̱queb aran queꞌxcuikꞌib ribeb ut queꞌxlokꞌoni li yoꞌyo chi junelic kꞌe cutan.