Apocalipsis 18 - Li Santil hu

Nak quisacheꞌ ru li tenamit Babilonia

¹ Chirix aꞌan quicuil jun chic li ángel quicube chak saꞌ choxa. Kꞌaxal nim xcuanquil ut chixjunil li ruchichꞌochꞌ quicutanoꞌ xban lix lokꞌal.

² Quixjap re chi cau xya̱b xcux ut quixye: X-osoꞌ li tenamit Babilonia. Xsacheꞌ xcuanquil li nimla tenamit Babilonia. Li tenamit aꞌan xcana chokꞌ xnaꞌajeb laj tza ut eb li ma̱us aj musikꞌej. Xcana chokꞌ xnaꞌajeb laj xicꞌanel xul li kꞌaxal yibeb ru li incꞌaꞌ nequeꞌtiꞌeꞌ.

³ Xsacheꞌ xcuanquil xban nak numtajenak li ma̱c nequeꞌxba̱nu. Chixjunileb li rey li cuanqueb saꞌ ruchichꞌochꞌ nequeꞌcuulac Babilonia chixba̱nunquil li ma̱usilal riqꞌuineb. Chanchan calajenakeb xban li ma̱usilal yo̱queb chixba̱nunquil. Ut eb laj cꞌay queꞌbiomoꞌ aran xban nak nabal li cꞌaꞌak re ru queꞌxcꞌayi chi terto xtzꞌak, chan.

⁴ Ut quicuabi jun chic yo̱ chak chi a̱tinac saꞌ choxa ut quixye: Ex ralal xcꞌajol li Dios, elenkex saꞌ li tenamit aꞌan re nak incꞌaꞌ textzꞌako̱nk riqꞌuin lix ma̱queb ut re nak incꞌaꞌ textzꞌako̱nk riqꞌuin li raylal li teꞌxcꞌul.

⁵ Xnumta lix ma̱queb. Chanchan xcuulac toj saꞌ choxa lix qꞌuial. Li Dios yo̱ chak chixqꞌuebal retal lix ma̱usilaleb.

⁶ Cheꞌqꞌuehekꞌ chixtoj li joꞌ qꞌuial li raylal xeꞌxba̱nu reheb li jalaneb xtenamit. Chiqꞌuehekꞌ re̱kaj li queꞌxba̱nu reheb. Caꞌ sut xqꞌuial li raylal ta̱ba̱nu̱k reheb chiru li queꞌxba̱nu eb aꞌan.

⁷ Cheꞌrahobtesi̱k xban nak queꞌxnimobresi ribeb ut queꞌxba̱nu li ma̱usilal. Eb aꞌan nequeꞌxye, “La̱o chanchano li reina. Moco nebaꞌo ta joꞌ junak xma̱lcaꞌan. La̱o ma̱ jun cua takacꞌul rahil chꞌo̱lej,” chanqueb.

⁸ Joꞌcan nak chiru jun cutan talajeꞌcha̱lk li raylal saꞌ xbe̱n li tenamit aꞌan. Ta̱cha̱lk ca̱mc, ut ya̱bac ut cueꞌej saꞌ xbe̱neb. Li tenamit ta̱sachekꞌ ru riqꞌuin xam xban nak kꞌaxal nim xcuanquil li Ka̱cuaꞌ li ta̱rakok a̱tin saꞌ xbe̱neb, chan.

⁹ Eb li rey li cuanqueb saꞌ ruchichꞌochꞌ li queꞌcuulac aran Babilonia chixba̱nunquil li ma̱usilal rochbeneb ut queꞌsahoꞌ saꞌ xchꞌo̱leb riqꞌuineb, ta̱rahokꞌ saꞌ xchꞌo̱leb chirilbal nak yo̱k chi sachecꞌ ru li tenamit. Teꞌya̱bak xban xrahil xchꞌo̱leb nak teꞌril xsibel li tenamit nak yo̱k chi cꞌatc.

¹⁰ Cꞌajoꞌ nak teꞌxucuak chirilbal li cꞌaꞌru tixcꞌul li tenamit. Teꞌxakli̱k chi najt riqꞌuin xban xxiuheb ut teꞌxye: Tokꞌob ru li tenamit Babilonia li nim xcuanquil nak quicuan. Tokꞌob ru lix nimal ru tenamit. Chiru jun cꞌamoc xrakeꞌ a̱tin saꞌ xbe̱neb.

¹¹ Eb laj cꞌay ta̱rahokꞌ saꞌ xchꞌo̱leb ut teꞌya̱bak chirix li tenamit xban nak ma̱ ani chic ta̱lokꞌok re lix cꞌayeb.

¹² Ma̱ ani chic ta̱lokꞌok re li oro, chi moco li plata, chi moco li cha̱bil pec li terto xtzꞌak, chi moco li perlas. Ma̱ ani chic ta̱lokꞌok re li cha̱bil tꞌicr lino, chi moco li púrpura, chi moco li seda, chi moco li escarlata. Ma̱ ani chic ta̱lokꞌok re li qꞌuila pa̱y ru chi sununquil cheꞌ. Ut ma̱ ani chic ta̱lokꞌok re li cꞌaꞌak re ru yi̱banbil riqꞌuin marfil, chi moco riqꞌuin li cha̱bil cheꞌ, chi moco riqꞌuin li chꞌi̱chꞌ hierro ut cobre, chi moco li yi̱banbil riqꞌuin li pec mármol.

¹³ Ma̱ ani chic ta̱lokꞌok re li canela, li sununquil ban, li incienso, li mirra ut li olíbano. Ma̱ ani chic ta̱lokꞌok re li vino, li aceite, li trigo ut li cha̱bil cꞌaj. Ut ma̱ ani chic ta̱lokꞌok re li cuacax, li carner ut li cacua̱y, chi moco teꞌxlokꞌ li carruajes, chi moco teꞌxlokꞌ chic li rech cristianil chokꞌ mo̱seb.

¹⁴ Eb laj cꞌay teꞌxye reheb li tenamit: —Chixjunil li cha̱bil li quera ru, aꞌan ac xsach che̱ru. Ma̱cꞌaꞌ chic le̱ biomal chi moco e̱chꞌinaꞌusal. Ma̱ jokꞌe chic te̱tau li cꞌaꞌak re ru aꞌan.—

¹⁵ Ut eb li nequeꞌcꞌayin li cꞌaꞌak re ru aꞌin teꞌxakli̱k chi najt riqꞌuin li tenamit xban xxiuheb nak teꞌril li raylal li yo̱keb chixcꞌulbal li tenamit. Eb laj cꞌay li queꞌbiomoꞌ xbaneb, teꞌya̱bak ut teꞌxye:

¹⁶ Tokꞌobeb ru. Tokꞌobeb ru li cuanqueb saꞌ li nimla tenamit aꞌan. Junxil queꞌxtikib ribeb riqꞌuin li cha̱bil tꞌicr lino ut púrpura ut caki tꞌicr. Ut queꞌxqꞌue chokꞌ xsahob ru li oro, ut li terto̱quil pec ut li perla.

¹⁷ Ut yal chiru junpa̱t x-osoꞌ chixjunil lix biomaleb, chaꞌakeb. Ut eb laj e̱chal jucub ut eb li nequeꞌxberesi li jucub saꞌ li palau ut chixjunileb li nequeꞌtrabajic saꞌ li ni̱nki jucub, joꞌqueb laj cꞌay li nequeꞌxic saꞌ li jucub, queꞌxakli chi najt chi rilbal.

¹⁸ Ut queꞌxjap re nak queꞌril nak yo̱ chi cꞌatc li tenamit ut queꞌxye: —Ma̱ jun chic tenamit juntakꞌe̱t riqꞌuin li tenamit aꞌin nak quicuan, chanqueb.

¹⁹ Queꞌxqꞌue poks saꞌ xjolomeb retalil lix rahil xchꞌo̱leb ut queꞌya̱bac ut queꞌxjap reheb chixyebal: ¡Tokꞌobeb ru! ¡Tokꞌobeb ru li cuanqueb saꞌ li tenamit aꞌan! Riqꞌuin lix biomaleb li tenamit aꞌan xobiomoꞌ la̱o li nococꞌanjelac saꞌ jucub. Ut chiru junpa̱t quisacheꞌ ru li tenamit, chanqueb.

²⁰ Chisahokꞌ saꞌ e̱chꞌo̱l la̱ex li cuanquex saꞌ choxa. La̱ex laj pa̱banel, la̱ex profeta ut la̱ex apóstol, chisahokꞌ taxak saꞌ e̱chꞌo̱l xban nak li Dios xrakoc a̱tin saꞌ xbe̱neb saꞌ e̱cꞌabaꞌ la̱ex, chan li yo̱ chak chi a̱tinac saꞌ choxa.

²¹ Ut jun li ángel cau rib quixchap jun li nimla pec, chanchan li nimla pec li nequeꞌrocsi re li molino, ut quixcut saꞌ li palau ut quixye: Joꞌ nak xsach li pec aꞌin saꞌ li palau, joꞌcan ajcuiꞌ nak ta̱sachekꞌ ru li tenamit Babilonia. Incꞌaꞌ chic ta̱ilekꞌ ru.

²² Incꞌaꞌ chic ta̱abi̱k saꞌ li tenamit aꞌan lix ya̱b li cuajb chi moco lix ya̱b li arpa, chi moco li xya̱b li xo̱lb ut li trompeta. Ut incꞌaꞌ chic teꞌcua̱nk saꞌ li tenamit aꞌan li nequeꞌxnau trabajic chi us riqꞌuin li cꞌaꞌak re ru, ut incꞌaꞌ chic ta̱abi̱k xya̱b junak molino saꞌ li tenamit aꞌan.

²³ Incꞌaꞌ chic ta̱ilma̱nk junak xam saꞌ li tenamit aꞌan. Ut incꞌaꞌ ajcuiꞌ ta̱abi̱k xya̱b xcuxeb li nequeꞌsahoꞌ saꞌ xchꞌo̱leb saꞌ junak sumla̱c. Teꞌxcꞌul chi joꞌcan xban nak eb laj cꞌay li queꞌcuan saꞌ li tenamit aꞌan queꞌxnimobresi ribeb, ut riqꞌuin li tu̱lac queꞌxba̱nu, queꞌxbalakꞌi chixjunileb li tenamit.

²⁴ Saꞌ ajcuiꞌ li tenamit aꞌan queꞌcamsi̱c li ralal xcꞌajol li Dios ut eb li profeta. Li tenamit aꞌan quicꞌamoc be chiruheb li tenamit saꞌ ruchichꞌochꞌ chixcamsinquileb laj pa̱banel yalak bar.