Apocalipsis 17 - Li Santil hu

Li ixk li naxcꞌayi rib, aꞌan retalil li tenamit Babilonia

¹ Ut jun reheb li cuukub chi ángel, li cuanqueb li cuukub chi secꞌ riqꞌuineb, quixye cue: —Quim arin. Tincꞌut cha̱cuu jun li ixk li naxcꞌayi rib chunchu saꞌ xbe̱n li haꞌ retalil li nimal tenamit Babilonia li cuan xcuanquil saꞌ xbe̱neb nabal chi tenamit. Tincꞌut cha̱cuu li tojba ma̱c li xchal saꞌ xbe̱n li tenamit aꞌan xban li ma̱usilal nequeꞌxba̱nu.

² Chixjunileb li rey li cuanqueb saꞌ ruchichꞌochꞌ nequeꞌcuulac saꞌ li tenamit aꞌan chixba̱nunquil li ma̱usilal. Chanchan nak ac xeꞌcaltesi̱c xban li ma̱usilal yo̱queb chixba̱nunquil, chan li ángel.

³ Saꞌ li visión li quixcꞌutbesi chicuu li Santil Musikꞌej, quicuil nak li ángel quinixcꞌam saꞌ jun li naꞌajej bar ma̱cꞌaꞌ cuan. Aran quicuil li ixk chunchu chirix jun li joskꞌ aj xul cak rix. Tzꞌi̱banbil nabal li a̱tin chirix re xmajecuanquil li Dios. Cuan cuukub xjolom ut cuan laje̱b xxucub.

⁴ Li ixk tikibanbil riqꞌuin rakꞌ púrpura ut cak. Lix sahob ru li rakꞌ yi̱banbil riqꞌuin oro ut terto̱quil pec ut riqꞌuin perla. Cuan chak riqꞌuin jun li secꞌ oro nujenak riqꞌuin li ma̱usilal ut li yumbe̱tac coꞌbe̱tac.

⁵ Ut tzꞌi̱banbil saꞌ lix pe̱quem jun li cꞌabaꞌej mukmu xya̱lal. Aꞌan aꞌin li tzꞌi̱banbil: Li nimla tenamit Babilonia aꞌaneb li nequeꞌcꞌamoc be chi coꞌbe̱tac yumbe̱tac ut chixba̱nunquil chixjunil li ma̱usilal.

⁶ Ut quicuil li ixk chanchan ta̱cala̱k xban xquiqꞌueleb li ralal xcꞌajol li Dios li queꞌcamsi̱c xban. Ut queꞌcamsi̱c ajcuiꞌ nabaleb li cristian li queꞌxchꞌolob resil li Cristo. Nak quicuil aꞌan, sachso inchꞌo̱l quincana.

⁷ Ut li ángel quixpatzꞌ cue: —¿Cꞌaꞌut nak sachso a̱chꞌo̱l xatcana? La̱in tinchꞌolob cha̱cuu lix ya̱lal li mukmu nak xcuan. Tinye a̱cue cꞌaꞌru xya̱lal li ixk aꞌan joꞌ ajcuiꞌ li joskꞌ aj xul li yo̱ chi i̱ka̱nc re. Ut tinye ajcuiꞌ a̱cue cꞌaꞌru xya̱lal lix jolom cuukub ut lix xucub laje̱b.

⁸ Li joskꞌ aj xul li xacuil, aꞌan li quicuan, ut anakcuan ma̱ ani chic. Abanan ta̱e̱lk cuiꞌchic chak saꞌ li chamal jul ut ta̱sachekꞌ ru chi junaj cua. Ut li joꞌ qꞌuialeb li incꞌaꞌ tzꞌi̱banbileb xcꞌabaꞌeb chalen saꞌ xticlajic li ruchichꞌochꞌ saꞌ li hu li tzꞌi̱banbil cuiꞌ xcꞌabaꞌeb li cuanqueb xyuꞌam chi junelic, eb aꞌan ta̱sachk xchꞌo̱leb chirilbal li joskꞌ aj xul li quicuan chak junxil ut ma̱ ani chic anakcuan. Abanan ta̱cha̱lk cuiꞌchic.

⁹ Tento nak cua̱nk a̱naꞌleb re nak ta̱tau ru lix ya̱lal. Li cuukub chi jolom, aꞌan retalil li cuukub chi cocꞌ tzu̱l li cuan cuiꞌ li tenamit.

¹⁰ Ut retalileb ajcuiꞌ li cuukub chi rey. O̱b li rey ac xeꞌcuan ut xeꞌsacheꞌ ruheb, jun cuan anakcuan ut li jun chic toj ma̱jiꞌ na-oc saꞌ xcuanquil. Ut nak ta̱oc, incꞌaꞌ najt ta̱ba̱yk.

¹¹ Ut li joskꞌ aj xul li quicuan ut ma̱ ani chic anakcuan, aꞌan li xcuakxak li rey ut xcomoneb rib riqꞌuineb li cuukub chi rey. Aꞌan ta̱sachekꞌ ru.

¹² Ut li laje̱b chi xucub li xacuil, aꞌan retalileb li laje̱b chi rey li teꞌcua̱nk. Teꞌxcꞌul xcuanquileb chi cua̱nc chokꞌ rey, rochbeneb li joskꞌ aj xul li cak rix. Abanan incꞌaꞌ najt ta̱cua̱nk xcuanquil eb aꞌan.

¹³ Eb aꞌin junajak xcꞌaꞌuxeb ut teꞌxqꞌue lix cacuilal ut lix cuanquilal re li joskꞌ aj xul.

¹⁴ Eb li rey teꞌpletik riqꞌuin li Jun li chanchan carner. Abanan aꞌan ta̱numta̱k saꞌ xbe̱neb xban nak aꞌan li Ka̱cuaꞌ, li kꞌaxal nim xcuanquil saꞌ xbe̱n chixjunil. Ut aꞌan li tzꞌakal rey li nim xcuanquil saꞌ xbe̱neb chixjunileb li cuanqueb xcuanquil saꞌ ruchichꞌochꞌ. Ut li sicꞌbileb ru, li ti̱queb xchꞌo̱l chixta̱kenquil, teꞌnumta̱k ajcuiꞌ saꞌ xbe̱neb li rey, rochbeneb li Jun li chanchan carner.—

¹⁵ Quixye cue li ángel: —Li haꞌ li xacuil li chunchu cuiꞌ li ixk, aꞌan retalileb li xni̱nkal ru tenamit, aꞌ yal ani xte̱paleb xxeꞌto̱nil yucuaꞌeb, ut aꞌ yal chanru li ra̱tinoba̱leb.

¹⁶ Li laje̱b chi xxucub li joskꞌ aj xul li xacuil, xicꞌ teꞌril li ixk li naxcꞌayi rib. Teꞌxtzꞌekta̱na li ixk ut teꞌxcanab chi ma̱cꞌaꞌ cuan re. Tꞌustꞌu teꞌxcanab. Teꞌxtiu lix tibel ut li joꞌ qꞌuial chic incꞌaꞌ teꞌxchoy teꞌxcꞌat saꞌ xam.

¹⁷ Li Dios quiqꞌuehoc re saꞌ xchꞌo̱leb li rey nak joꞌcan teꞌxba̱nu. Joꞌcan nak junajakeb lix cꞌaꞌux chixqꞌuebal lix cuanquileb re li joskꞌ aj xul re nak ta̱takla̱nk toj ta̱tzꞌaklok ru li quixye li Dios.

¹⁸ Li ixk li xacuil, aꞌan retalil li nimla tenamit, li cuan xcuanquil saꞌ xbe̱neb chixjunileb li tenamit saꞌ ruchichꞌochꞌ.—