Apocalipsis 15 - Li Santil hu

Li cuukub chi ángel li queꞌcꞌamoc chak re li cuukub chi raylal saꞌ ruchichꞌochꞌ

¹ Ut quicuil saꞌ choxa jun chic li sachba chꞌo̱lej rilbal. Quicuil cuukub li ángel ut cuan riqꞌuineb cuukub chi raylal. Aꞌan li raylal li ta̱cꞌulma̱nk saꞌ rosoꞌjiqueb li cutan. Riqꞌuin li cuukub chi raylal aꞌan ta̱tzꞌaklok ru lix joskꞌil li Dios.

² Ut quicuil jun li palau chanchan lem yo̱ xxamlel. Ut chire aꞌan xakxo̱queb li ac queꞌxcuy xco̱loninquil li raylal ut cuanqueb lix arpa li Dios riqꞌuineb. Incꞌaꞌ queꞌxqꞌue xcuanquil li joskꞌ aj xul chi moco lix jalam u̱ch, chi moco queꞌxcꞌul lix numbril lix cꞌabaꞌ. Incꞌaꞌ queꞌxqꞌue rib chi balakꞌi̱c xban li xul.

³ Yo̱queb chixbichanquil li bich li quixbicha laj Moisés laj cꞌanjel chiru li Dios re xlokꞌoninquil li Jun li chanchan carner. Ut yo̱queb chixyebal: At Ka̱cuaꞌ, at nimajcual Dios, nim a̱cuanquil ut sachba chꞌo̱lej rilbal li nacaba̱nu. Kꞌaxal ti̱c a̱chꞌo̱l ut junelic nacaye li ya̱l. La̱at li tzꞌakal rey. Kꞌaxal nim a̱cuanquil saꞌ xbe̱neb chixjunileb li tenamit.

⁴ ¿Ma cuan ta biꞌ junak incꞌaꞌ tixxucua a̱cuu? Chixjunileb teꞌxnima a̱cuu, at Ka̱cuaꞌ, xban nak caꞌaj cuiꞌ la̱at ti̱c a̱chꞌo̱l. Chixjunileb li cuanqueb saꞌ li xni̱nkal ru tenamit teꞌcha̱lk ut teꞌxcuikꞌib ribeb cha̱cuu ut tateꞌxlokꞌoni xban nak teꞌxqꞌue retal nak la̱at tatrakok a̱tin saꞌ ti̱quilal.

⁵ Ut chirix chic aꞌan quicuil nak quiteheꞌ li Lokꞌlaj Santil Naꞌajej saꞌ choxa bar xocxo cuiꞌ li contrato li quixba̱nu li Dios.

⁶ Ut li cuukub chi ángel queꞌel chak saꞌ xtemplo li Dios li yo̱queb chak chixcꞌambal li cuukub chi raylal. Tikibanbileb riqꞌuin li saki tꞌicr lino li nalemtzꞌun. Ut bacꞌbo̱queb li re xchꞌo̱l riqꞌuin cꞌa̱mal saꞌ yi̱banbil riqꞌuin oro.

⁷ Ut jun reheb li ca̱hib li yoꞌyo̱queb li chanchaneb ángel, quixqꞌue reheb li cuukub chi ángel li cuukub chi secꞌ oro nujenak riqꞌuin xjoskꞌil li Dios, li yoꞌyo chi junelic kꞌe cutan.

⁸ Ut chanchan quinujac chi sib lix templo li Dios nak quinujac riqꞌuin xlokꞌal ut xcuanquilal li Dios. Ut ma̱ ani quiru qui-oc aran toj retal quinumeꞌ li cuukub chi raylal li yo̱queb chixcꞌambal chak li cuukub chi ángel.