Apocalipsis 12 - Li Santil hu

Li ixk ut li joskꞌ aj xul dragón xcꞌabaꞌ

¹ Ut quicuil jun li sachba chꞌo̱lej saꞌ choxa. Quicuil jun li ixk. Nalemtzꞌun li rakꞌ joꞌ nalemtzꞌun li sakꞌe. Li po cuan rubel rok ut cuan jun corona saꞌ xjolom ut chiru li corona cuan cablaju li chahim.

² Li ixk aꞌan yaj aj ixk. Ac oc re chi qꞌuira̱c. Yo̱ chixjapbal re xban lix raylal.

³ Ut jun chic sachba chꞌo̱lej quicꞌutbesi̱c chicuu saꞌ choxa. Quicuil jun nimla joskꞌ aj xul cak rix dragón xcꞌabaꞌ. Cuan cuukub lix jolom ut laje̱b lix xucub. Ut saꞌ eb lix jolom cuukub cuan junju̱nk lix corona.

⁴ Ut riqꞌuin lix ye yo̱ chixquelonquil nabal li chahim chiru choxa. Caꞌchꞌin chic ma̱ yijach li chahim li yo̱ chixquelonquil. Ut quixcut saꞌ ruchichꞌochꞌ li chahim. Li nimla joskꞌ aj xul quixakli chiru li ixk li oc re chi qꞌuira̱c re nak tixnukꞌ li cꞌulaꞌal nak ta̱yoꞌla̱k.

⁵ Quiyoꞌla lix cꞌulaꞌal li ixk chꞌina te̱lom. Ut aꞌan chic ta̱takla̱nk saꞌ xbe̱neb li cuanqueb saꞌ ruchichꞌochꞌ. Chanchan riqꞌuin li xukꞌ chꞌi̱chꞌ ta̱takla̱nk saꞌ xbe̱neb xban nak aꞌanak chic li yal re saꞌ xbe̱neb. Li cꞌulaꞌal quisapu̱c ut quicꞌameꞌ riqꞌuin li Dios bar cꞌojcꞌo cuiꞌ saꞌ lix lokꞌlaj cꞌojariba̱l.

⁶ Li ixk quie̱lelic ut co̱ saꞌ li chaki chꞌochꞌ bar ma̱cꞌaꞌ cuan saꞌ li naꞌajej ac cauresinbil chokꞌ re xban li Dios. Ut aran ta̱chꞌolani̱k xban li Dios chiru oxib chihab riqꞌuin cuakib po (1,260 cutan).

⁷ Chirix aꞌan quicuan jun nimla ple̱t saꞌ choxa ut li ángel Miguel rochbeneb li ángel li nequeꞌta̱ken re queꞌpletic riqꞌuin li joskꞌ aj xul dragón. Ut eb li ángel li nequeꞌta̱ken re li dragón queꞌxtenkꞌa aꞌan chi pletic.

⁸ Incꞌaꞌ queꞌxcuy pletic li dragón ut incꞌaꞌ chic queꞌqꞌueheꞌ xnaꞌajeb saꞌ choxa.

⁹ Quicuteꞌ saꞌ ruchichꞌochꞌ xban li Dios li joskꞌ aj dragón. Li dragón, aꞌan li cꞌantiꞌ li ac cuan ajcuiꞌ chak najter. Aꞌan laj tza li nabalakꞌin reheb li cuanqueb saꞌ ruchichꞌochꞌ. Satanás nayeman re. Quicuteꞌ saꞌ ruchichꞌochꞌ laj tza ut queꞌcuteꞌ ajcuiꞌ li ángel li queꞌta̱ken re.

¹⁰ Ut quicuabi jun xya̱b cux yo̱ chi a̱tinac chi cau saꞌ choxa ut quixye: Anakcuan xcꞌulun chak li kacolbal. Anakcuan li Ka̱cuaꞌ chic ta̱cua̱nk xcuanquil ut aꞌan chic ta̱takla̱nk. Quicꞌutun lix cuanquilal li Cristo nak qui-isi̱c saꞌ choxa laj tza li quijitoc reheb li kech aj pa̱banelil chiru li Dios chi kꞌek chi cutan.

¹¹ Eb li kech aj pa̱banelil xeꞌnumta saꞌ xbe̱n laj tza saꞌ xcꞌabaꞌ lix quiqꞌuel li Jun li chanchan carner ut xban nak queꞌxchꞌolob xya̱lal nak aꞌan laj Colol reheb. Incꞌaꞌ queꞌxra xyuꞌameb, toj retal queꞌxcꞌul ca̱mc.

¹² Joꞌcan nak chisahokꞌ taxak saꞌ e̱chꞌo̱l la̱ex li cuanquex saꞌ choxa. Abanan li cuanqueb saꞌ ruchichꞌochꞌ ut saꞌ li palau tokꞌobeb ru xban nak laj tza quicuteꞌ saꞌ ruchichꞌochꞌ chi cua̱nc riqꞌuineb. Cꞌajoꞌ lix joskꞌil xban nak naxnau nak cuulac re xkꞌehil nak ta̱sachekꞌ ru, chan.

¹³ Ut li joskꞌ aj dragón quixqꞌue retal nak quicuteꞌ saꞌ ruchichꞌochꞌ. Qui-oc xta̱kenquil li ixk li quiyoꞌla jun xcꞌulaꞌal te̱lom.

¹⁴ Quiqꞌueheꞌ cuib lix xicꞌ li ixk re ta̱rupupik chanchan xxicꞌ li nimla cꞌuch re nak ta̱e̱lelik ut ta̱xic toj saꞌ li chaki chꞌochꞌ saꞌ li naꞌajej ac cauresinbil chokꞌ re bar ma̱cꞌaꞌ cuan. Ut aran ta̱chꞌolani̱k xban li Dios chiru oxib chihab riqꞌuin cuakib po. Ut aran tixmuk rib chiru li cꞌantiꞌ.

¹⁵ Ut li cꞌantiꞌ quixxaꞌcua haꞌ chirix li ixk. Ut li quixxaꞌcua chanchan jun nimaꞌ re nak ta̱cꞌamekꞌ xban li rok li nimaꞌ li ixk.

¹⁶ Li ixk quitenkꞌa̱c xban li chꞌochꞌ. Quixte rib li chꞌochꞌ ut quixtzꞌub li haꞌ li quixxaꞌcua li joskꞌ aj dragón.

¹⁷ Cꞌajoꞌ nak quijoskꞌoꞌ li dragón saꞌ xbe̱n li ixk. Co̱ chi pletic riqꞌuineb li ralal xcꞌajol, li joꞌ qꞌuial chic queꞌcana. Aꞌaneb li nequeꞌba̱nun re lix chakꞌrab li Dios ut nequeꞌpa̱ban re lix ya̱lal li quixchꞌolob li Jesucristo.