Apocalipsis 11 - Li Santil hu

Li cuib chi cui̱nk li teꞌyehok resil li cꞌaꞌru ta̱cꞌulma̱nk

¹ Ut quiqꞌueheꞌ cue jun li cheꞌ re bisoc ut quiyeheꞌ cue: —Ayu, bis chak lix templo li Dios joꞌ ajcuiꞌ li artal ut ta̱cuajlaheb jarubeb li cristian li nequeꞌlokꞌonin aran.

² Abanan ma̱bis li neba̱l li cuan chiru lix templo li Dios xban nak aꞌan kꞌaxtesinbil reheb li ma̱cuaꞌeb aj judío. Eb aꞌan teꞌxmux ru li santil tenamit chiru oxib chihab riqꞌuin media (42 po).

³ La̱in tintaklaheb cuib aj cꞌanjel chicuu. Cua̱nk rakꞌeb chirix kꞌes ru retalil li rahil chꞌo̱lej. Eb aꞌan teꞌxye cuesilal chiru oxib chihab riqꞌuin cuakib po.—

⁴ Chiru li Ka̱cuaꞌ li cuib chi cui̱nk aꞌin chanchanakeb li cuib chi cheꞌ olivo ut chanchanakeb li cuib chi candelero li cuanqueb chiru li Dios, laj e̱chal re li ruchichꞌochꞌ. (Zac. 4:3, 11, 14)

⁵ Ut cui ani ta̱ajok xrahobtesinquileb, chanchan xam li ta̱e̱lk saꞌ reheb li cuib chi cui̱nk xban nak yal riqꞌuin li ra̱tineb teꞌca̱mk li xicꞌ nequeꞌiloc reheb. Joꞌcaꞌin nak teꞌca̱mk li ani teꞌajok re xrahobtesinquileb li cuib chi cui̱nk aꞌin.

⁶ Eb li cuib chi cui̱nk aꞌin qꞌuebileb xcuanquil chixba̱nunquil re nak incꞌaꞌ tixqꞌue li hab chiruheb li cutan nak yo̱keb chixyebal li cꞌaꞌru ta̱cꞌulma̱nk. Ut cuanqueb xcuanquil re xsukꞌisinquil li haꞌ chokꞌ quicꞌ ut cuanqueb ajcuiꞌ xcuanquil re xrahobtesinquileb li cuanqueb saꞌ ruchichꞌochꞌ riqꞌuin chixjunil li raylal aꞌ yal jarub sut teꞌraj xba̱nunquil.

⁷ Nak acak xeꞌrakeꞌ xyebal resilal li cꞌaꞌru ta̱cꞌulma̱nk, jun li chanchan joskꞌ aj xul ta̱e̱lk chak saꞌ li chamal jul ut ta̱pletik riqꞌuineb aꞌan. Ta̱numta̱k saꞌ xbe̱neb toj retal tixcamsiheb.

⁸ Li camenak teꞌcana̱k chi tꞌantꞌo saꞌ eb li be re li nimla tenamit bar quicamsi̱c cuiꞌ chiru cruz li Ka̱cuaꞌ Jesucristo. Cuan nak nequeꞌxjuntakꞌe̱ta li tenamit aꞌan riqꞌuineb li tenamit Sodoma ut Egipto xban li ma̱usilal queꞌxba̱nu.

⁹ Oxib cutan riqꞌuin jun cuaꞌleb teꞌcua̱nk aran chi tꞌantꞌo li camenak ut incꞌaꞌ teꞌqꞌuehekꞌ chi mukecꞌ. Ut yalak ani teꞌilok reheb, aꞌ yal ani xte̱paleb lix xeꞌto̱nil yucuaꞌeb, ut aꞌ yal bar xtenamiteb, ut aꞌ yal chanru li ra̱tinoba̱leb.

¹⁰ Ut li cuanqueb saꞌ ruchichꞌochꞌ ta̱sahokꞌ saꞌ xchꞌo̱leb nak teꞌca̱mk li cuib chi cui̱nk ut ta̱cꞌojla̱k xchꞌo̱leb. Joꞌcan nak teꞌoc chixsihinquil cꞌaꞌru reheb chi ribileb rib. Ta̱sahokꞌ xchꞌo̱leb nak teꞌca̱mk li cuib chi cui̱nk xban nak chꞌaꞌaj queꞌrecꞌa nak queꞌyeheꞌ reheb nak ta̱cha̱lk raylal saꞌ xbe̱neb.

¹¹ Ut quicuil ajcuiꞌ nak ac xnumeꞌ li oxib cutan riqꞌuin jun cuaꞌleb, queꞌyoꞌobtesi̱c cuiꞌchic li cuib chi cui̱nk xban li Dios ut queꞌxakli cuiꞌchic chi yoꞌyo chiruheb li tenamit. Ut cꞌajoꞌ nak qui-oc xxiuheb li queꞌiloc reheb.

¹² Ut li cuib chi cui̱nk queꞌrabi jun yo̱ chi a̱tinac saꞌ choxa. Chi cau xya̱b xcux quixye reheb: —Takenkex chak arin, chan. Ut queꞌtakeꞌ saꞌ choxa saꞌ jun li chok chiruheb li xicꞌ nequeꞌiloc reheb.

¹³ Ut saꞌ li ho̱nal aꞌan quicuan jun nimla hi̱c ut li xlaje jachalal li tenamit qui-ukꞌeꞌ. Cuukub mil (7,000) xqꞌuial li cristian queꞌcam xban li hi̱c. Ut li joꞌ qꞌuial chic incꞌaꞌ queꞌcam, queꞌxucuac ut queꞌxqꞌue xlokꞌal li Dios cuan saꞌ choxa.

¹⁴ Aꞌin li xcab li raylal ac xnumeꞌ. Abanan toj cuan jun chic li raylal ta̱cha̱lk chi se̱b saꞌ xbe̱neb.

Nak quiya̱basi̱c li xcuuk li trompeta

¹⁵ Ut li xcuuk ángel quixya̱basi lix trompeta. Ut qui-abi̱c nabal li xya̱b cux saꞌ choxa. Yo̱queb chixyebal chi cau: Anakcuan teꞌcana̱k rubel xcuanquil li Ka̱cuaꞌ chixjunileb li cuanqueb saꞌ ruchichꞌochꞌ. Aꞌ chic li Ka̱cuaꞌ Dios ut li Cristo teꞌtakla̱nk saꞌ xbe̱neb chixjunileb chi junelic kꞌe cutan, chanqueb.

¹⁶ Ut eb li ca̱hib xcaꞌcꞌa̱l li cꞌojcꞌo̱queb saꞌ lix cꞌojariba̱l queꞌxcuikꞌib ribeb ut queꞌxlokꞌoni li Dios.

¹⁷ Ut queꞌxye: At Ka̱cuaꞌ, at nimajcual Dios, nocobantioxin cha̱cuu. La̱at li ac cuancat ajcuiꞌ chak junxil ut cuancat anakcuan ut cua̱nkat chi junelic. La̱at cuan a̱cuanquil chi junelic ut la̱at chic tattakla̱nk saꞌ xbe̱neb chixjunileb li cuanqueb saꞌ ruchichꞌochꞌ.

¹⁸ Cꞌajoꞌ nak queꞌjoskꞌoꞌ li tenamit li xicꞌ nequeꞌiloc a̱cue. Abanan xcuulac xkꞌehil nak ta̱cꞌut la̱ joskꞌil chiruheb. Xcuulac xkꞌehil nak tatrakok a̱tin saꞌ xbe̱neb li camenak. Ut ta̱qꞌueheb xkꞌajca̱munquileb laj cꞌanjel cha̱cuu li queꞌyehoc resil li cꞌaꞌru ta̱cꞌulma̱nk. Ut ta̱qꞌueheb ajcuiꞌ xkꞌajca̱munquileb laj pa̱banel li queꞌqꞌuehoc a̱lokꞌal, usta cuanqueb xcuanquil usta ma̱cꞌaꞌ. Ut la̱at ta̱sach ruheb li queꞌba̱nun raylal reheb li cuanqueb saꞌ ruchichꞌochꞌ, chanqueb.

¹⁹ Ut quicuil nak quiteheꞌ lix templo li Dios cuan saꞌ choxa. Ut quicꞌutun li Lokꞌlaj Ca̱x li cuan cuiꞌ li contrato saꞌ lix templo li Dios. Nareploc li rakꞌ ca̱k ut nabal li choki̱nc. Quicuan jun li hi̱c ut nabal li sakbach quitꞌaneꞌ nak quicuil.