Apocalipsis 10 - Li Santil hu

Li chꞌina botbil hu li cuan riqꞌuin li ángel

¹ Quicuil nak quichal jun chic li ángel cau rib. Yo̱ chak chi cubec saꞌ choxa sutsu saꞌ chok. Ut lix jolom sutsu xban jun li xo̱quikꞌab. Li riloba̱l nalemtzꞌun joꞌ li sakꞌe ut li rok chanchan jun okech yo̱ xxamlel.

² Cuan chak saꞌ rukꞌ jun li chꞌina hu teto. Lix nim ok quixxakab saꞌ xbe̱n li palau ut lix tzꞌe ok quixxakab saꞌ xbe̱n li ruchichꞌochꞌ.

³ Ut quixjap re chi cau xya̱b xcux chanchan nak naxjap re li cakcoj. Ut qui-abi̱c cuukub xya̱b cux chanchan ca̱k nak queꞌecꞌan.

⁴ Oc raj cue chixtzꞌi̱banquil retalil li cꞌaꞌru queꞌxye li chanchan cuukub chi ca̱k. Abanan quicuabi jun quia̱tinac saꞌ choxa ut quixye cue: —Ma̱tzꞌi̱ba li cꞌaꞌru xeꞌxye li cuukub chi xya̱b cux chanchan ca̱k. Li cꞌaꞌru xacuabi ma̱ bar ta̱ye resil. Xocxo̱k ban saꞌ a̱chꞌo̱l, chan.

⁵ Ut li ángel li quicuil xakxo saꞌ xbe̱n li palau ut saꞌ xbe̱n li ruchichꞌochꞌ, quixtaksi lix nim ukꞌ,

⁶ ut quixba̱nu li juramento saꞌ xcꞌabaꞌ li Jun li yoꞌyo chi junelic, li quiyoꞌobtesin re li choxa joꞌ ajcuiꞌ li ruchichꞌochꞌ ut chixjunil li cuan chiru, joꞌ ajcuiꞌ li palau ut chixjunil li cuan chi saꞌ. Quixye nak ac xcuulac xkꞌehil. Incꞌaꞌ chic ta̱ba̱yk.

⁷ Nak tixya̱basi lix trompeta li xcuuk ángel, saꞌ eb li cutan aꞌan ta̱tzꞌaklok ru lix cꞌaꞌux li Dios, li mukmu nak quicuan. Ta̱tzꞌaklok ru joꞌ quixye reheb li profeta li queꞌcꞌanjelac chiru, chan.

⁸ Ut li jun li quia̱tinac cuiqꞌuin saꞌ choxa, quixye cuiꞌchic cue: —Ayu. Cꞌul li hu li teto, li cuan saꞌ rukꞌ li ángel, li xakxo saꞌ xbe̱n li palau ut saꞌ xbe̱n li ruchichꞌochꞌ.—

⁹ La̱in co̱in riqꞌuin li ángel ut quinye re nak tixqꞌue cue li chꞌina hu. Ut aꞌan quixye cue: —Cueꞌ. Chap li hu ut ta̱nukꞌ. Saꞌ a̱cue quiꞌak joꞌ xquiꞌal lix yaꞌal cab, abanan cꞌahak saꞌ la̱ saꞌ, chan cue.

¹⁰ Quincꞌul li chꞌina hu saꞌ rukꞌ li ángel ut quinnukꞌ. Nak cuan saꞌ cue chanchan xquiꞌal li xyaꞌal cab. Ut nak ac xinnukꞌ quicꞌahoꞌ saꞌ lin saꞌ xban.

¹¹ Quixye cue: —Tenebanbil saꞌ a̱be̱n la̱at xyebal resil li cꞌaꞌru ta̱cꞌulma̱nk. Toj ta̱ye cuiꞌchic resil cꞌaꞌru teꞌxcꞌul eb li tenamit, joꞌ ajcuiꞌ li xni̱nkal ru tenamit joꞌ ajcuiꞌ lix reyeb. Ta̱ye ajcuiꞌ resil li cꞌaꞌru teꞌxcꞌul saꞌ eb li tenamit li jalan jala̱nk ra̱tinoba̱leb.—