Amós 9 - Li Santil hu

Ma̱ ani ta̱colekꞌ chiru li raylal li tixqꞌue li Ka̱cuaꞌ

¹ Laj Amós quixye: —Chanchan matqꞌuenbil quinba̱nu nak quicuil li Ka̱cuaꞌ xakxo chiru li artal. Quixye cue: —Ta̱jucꞌ li templo. Ta̱cuecꞌasi li rokechal toj retal ta̱tꞌanekꞌ saꞌ xbe̱neb li tenamit. Ut eb li incꞌaꞌ teꞌca̱mk, la̱in tinqꞌuehok reheb chi camsi̱c riqꞌuin chꞌi̱chꞌ saꞌ li ple̱t re nak ma̱ ani chic ta̱colekꞌ.

² Usta teꞌxyal chak xmukbal ribeb toj saꞌ xchamal li xbalba, toj aran toxebintau la̱in. Ut usta teꞌxic toj saꞌ choxa chixmukbal ribeb, la̱in tebintau aran.

³ Ut cui ta teꞌxyal xmukbal ribeb saꞌ xbe̱n li tzu̱l Carmelo toxebinsicꞌ aran ut tebinchap. Ut cui ta teꞌxyal xmukbal ribeb saꞌ xchamal li palau, tintakla li nimla xul li cuan saꞌ li haꞌ chixtiubaleb.

⁴ Ut cui ta teꞌchapekꞌ ut teꞌcꞌamekꞌ xbaneb li xicꞌ nequeꞌiloc reheb, tintakla xcamsinquileb riqꞌuin chꞌi̱chꞌ. La̱in tebinsach ut incꞌaꞌ tincoleb, chan li Ka̱cuaꞌ.

⁵ Li Ka̱cuaꞌ, li nimajcual Dios, aꞌan li na-ecꞌasin re li ruchichꞌochꞌ ut nahaꞌoꞌ. Ut chixjunileb li tenamit teꞌya̱bak xban xrahil xchꞌo̱leb. Nak teꞌsachekꞌ chanchan nak nasachoc li nimaꞌ Nilo li cuan Egipto nak nabutꞌin.

⁶ Li Ka̱cuaꞌ quixyi̱b lix naꞌaj saꞌ choxa ut quixyi̱b ajcuiꞌ lix sahob ru li choxa. Aꞌan li nachꞌutuban ru li haꞌ li cuan saꞌ li palau ut riqꞌuin aꞌan naxtꞌakresi li ruchichꞌochꞌ. Ka̱cuaꞌ lix cꞌabaꞌ.

⁷ Joꞌcaꞌin naxye li Ka̱cuaꞌ reheb laj Israel: —Chicuu la̱in, la̱ex juntakꞌe̱tex riqꞌuineb laj Etiopía. ¿Ma ma̱cuaꞌ ta biꞌ la̱in quin-isin chak e̱re aran Egipto? Ut, ¿ma ma̱cuaꞌ ta biꞌ la̱in quin-isin reheb laj filisteo saꞌ li naꞌajej Creta ut eb laj arameo saꞌ li naꞌajej Kir? chan li Ka̱cuaꞌ Dios.

⁸ La̱in yo̱quin chirilbal li ma̱usilal li yo̱queb chixba̱nunquil lin tenamit. La̱in tinsach ruheb saꞌ li ruchichꞌochꞌ. Abanan incꞌaꞌ tinsacheb chixjunileb li ralal xcꞌajol laj Jacob.

⁹ Tincanabeb laj Israel chi chapecꞌ xbaneb li jalan xtenamit. Chanchan nak nachikꞌeꞌ li ru li trigo saꞌ li naꞌajej li natzꞌilman cuiꞌ ut ma̱ jun li ru cha̱bil natzꞌekeꞌ saꞌ chꞌochꞌ.

¹⁰ Teꞌcamsi̱k riqꞌuin chꞌi̱chꞌ chixjunileb laj ma̱c saꞌ xya̱nkeb lin tenamit Israel. Teꞌcamsi̱k li nequeꞌxye chi joꞌcaꞌin: Ma̱cꞌaꞌ takacꞌul la̱o, chi moco toloxtau li raylal toj arin, chanqueb.

Li Dios quixye nak tixcoleb laj Israel

¹¹ Li Ka̱cuaꞌ naxye: —Ta̱cuulak xkꞌehil nak la̱in tincuaclesi̱k cuiꞌchic lix tenamit laj David, li tꞌanenak anakcuan. Tinyi̱b cuiꞌchic li tzꞌac li sutsu cuiꞌ ut tinyi̱b cuiꞌchic li juqꞌuinbil. Tinyi̱b chi chꞌinaꞌus joꞌ nak quicuan junxil.

¹² Ut eb lin tenamit Israel teꞌnumta̱k cuiꞌchic saꞌ xbe̱neb laj Edom. Ut teꞌre̱chani cuiꞌchic li naꞌajej li ac qꞌuebil reheb junxil inban la̱in, chan li Ka̱cuaꞌ. Ut li Ka̱cuaꞌ li quiyehoc re aꞌin, aꞌan li ta̱ba̱nu̱nk re.

¹³ Li Ka̱cuaꞌ naxye chi joꞌcaꞌin: —Ta̱cuulak xkꞌehil nak li acui̱mk tixqꞌue chi nabal li ru. Ma̱jiꞌak ajcuiꞌ nequeꞌrakeꞌ chi kꞌoloc nak teꞌoc cuiꞌchic chi a̱uc. Ut toj ma̱jiꞌak ajcuiꞌ nequeꞌrakeꞌ chixyatzꞌbal li ru li uvas nak teꞌoc cuiꞌchic chi a̱uc. Ut li uvas li cuanqueb yalak bar saꞌ eb li tzu̱l teꞌu̱chi̱nk chi us ut nabal li xyaꞌal ta̱e̱lk.

¹⁴ Ut tincꞌameb cuiꞌchic lin tenamit Israel saꞌ lix naꞌajeb. Ut teꞌxyi̱b cuiꞌchic lix tenamiteb li qui-osoꞌ ut aran teꞌcua̱nk. Teꞌa̱uk cuiꞌchic uvas ut teꞌrucꞌ lix yaꞌal. Teꞌrau cuiꞌchic li racui̱mk ut teꞌxtzaca li ru li naxqꞌue.

¹⁵ La̱in tinqꞌueheb cuiꞌchic chi cua̱nc saꞌ li naꞌajej li quinqꞌue reheb junxil ut ma̱ ani chic ta̱isi̱nk reheb saꞌ lix naꞌajeb, chan li Ka̱cuaꞌ Dios.