Amós 6 - Li Santil hu

Ta̱sachekꞌ ruheb laj Israel

¹ Raylal ta̱cha̱lk saꞌ xbe̱neb li sa cuanqueb aran Sión. Raylal ta̱cha̱lk saꞌ xbe̱neb li cꞌojcꞌo̱queb xchꞌo̱l chi cua̱nc saꞌ li tzu̱l Samaria. Aꞌaneb li cuib chi tenamit li kꞌaxal nim xcuanquil saꞌ xya̱nkeb chixjunileb. Ut junes riqꞌuineb aꞌan cauheb xchꞌo̱l chixjunileb laj Israel.

² Ayukex aran Calne ut ilomak chak li tenamit aꞌan. Tex-e̱lk aran ut texxic saꞌ li nimla tenamit Hamat, tojoꞌnak texxic saꞌ lix tenamiteb laj filisteo, Gat xcꞌabaꞌ. Ilomak chak li tenamit aꞌan. ¿Ma kꞌaxal nim ta biꞌ xcuanquileb li tenamit aꞌan chiru le̱ cuanquil la̱ex? ¿Ma kꞌaxal cha̱bil ta biꞌ lix tenamiteb aꞌan chiru le̱ re la̱ex?

³ Incꞌaꞌ nequecꞌoxla nak ta̱cuulak xkꞌehil li rakba a̱tin saꞌ e̱be̱n ut riqꞌuin li ma̱usilal nequeba̱nu kꞌaxal cuiꞌchic nabal li raylal yo̱quex chixbokbal saꞌ e̱be̱n.

⁴ Nequexcuar saꞌ le̱ cha̱bil chꞌa̱t yi̱banbil riqꞌuin marfil ut nequexhilan saꞌ le̱ cha̱bil hiloba̱l nak nequexcuaꞌac. Nequetiu li ral li carner nequechap chak saꞌ xya̱nkeb li queto̱mk joꞌ ajcuiꞌ li ral cuacax li cuanqueb saꞌ corral.

⁵ Nequexbichan nak nequerabi xya̱b li xo̱lb. Nequeyi̱b le̱ cuajb re te̱ya̱basi ut nequeba̱nu e̱rib joꞌ li rey David.

⁶ Ni̱nki secꞌ nequerucꞌ cuiꞌ le̱ vino. Ut nequerocsi li sununquil ban li kꞌaxal terto xtzꞌak. Abanan incꞌaꞌ nayotꞌeꞌ e̱chꞌo̱l xban li raylal li yo̱queb chixcꞌulbal le̱ ras e̱ri̱tzꞌin la̱ex laj Israel.

⁷ Joꞌcan nak anakcuan la̱ex xbe̱n cua texcꞌamekꞌ nak teꞌnumta̱k saꞌ e̱be̱n li xicꞌ nequeꞌiloc e̱re. Incꞌaꞌ chic ta̱cua̱nk le̱ ninkꞌe li naqꞌuehoc xsahil e̱chꞌo̱l.

⁸ Li Ka̱cuaꞌ Dios quixba̱nu li juramento saꞌ xcꞌabaꞌ ajcuiꞌ aꞌan ut quixye: —La̱in li Ka̱cuaꞌ li nimajcual Dios. Xicꞌ nequeꞌcuil li ralal xcꞌajol laj Jacob xban nak nequeꞌxnimobresi ribeb. Nintzꞌekta̱naheb lix ni̱nkal ru cab. Joꞌcan nak tincanabeb li xicꞌ nequeꞌiloc reheb chi numta̱c saꞌ xbe̱neb lix tenamiteb laj Israel jun xiquic chixjunil li cꞌaꞌru cuan reheb.

⁹ Usta laje̱b chi cui̱nk teꞌcana̱k saꞌ li jun chi cab, teꞌca̱mk ajcuiꞌ chixjunileb aꞌan.

¹⁰ Ut nak ta̱oc junak li rechꞌalal chirisinquil li camenak saꞌ li cab re tixcꞌat, tixye: ¿Ma toj cuan junak yoꞌyo xcana? Ut li jun li cuan chak toj saꞌ cab ta̱chakꞌok ut tixye: Ma̱cꞌaꞌ. Caꞌaj chic la̱in xincana. Ut ma̱patzꞌ xcꞌabaꞌ li Ka̱cuaꞌ, chaꞌak.

¹¹ Quixye chi joꞌcan xban nak li Ka̱cuaꞌ quixye nak teꞌosokꞌ li ni̱nkeb xcuanquil joꞌqueb ajcuiꞌ li ma̱cꞌaꞌeb xcuanquil. Jun xiquic nak teꞌosokꞌ chixjunileb.

¹² ¿Ma ta̱ru̱k ta biꞌ teꞌa̱linak li cacua̱y saꞌ xbe̱n ni̱nki pec? ¿Ma naru ta biꞌ xbecbal li palau riqꞌuin chꞌi̱chꞌ joꞌ nabecman li chꞌochꞌ? ¿Cꞌaꞌut nak la̱ex xesukꞌisi li us chokꞌ re camsi̱nc? Ut, ¿cꞌaꞌut nak xesukꞌisi li ti̱quilal chokꞌ ma̱usilal?

¹³ La̱ex nasahoꞌ saꞌ e̱chꞌo̱l riqꞌuin li ma̱cꞌaꞌ na-oc cuiꞌ ut nequeye: ¿Ma incꞌaꞌ ta biꞌ cau kib kajunes? chanquex.

¹⁴ Cheqꞌuehak retal la̱ex aj Israel. Li Ka̱cuaꞌ, li nimajcual Dios, naxye chi joꞌcaꞌin: —La̱in tintakla jun li tenamit chi numta̱c saꞌ e̱be̱n. Eb aꞌan teꞌrahobtesi̱nk e̱re la̱ex li cuanquex toj saꞌ li naꞌajej Hamat li cuan saꞌ li norte ut toj chire li haꞌ li cuan saꞌ li sur, chan li Ka̱cuaꞌ.