Amós 4 - Li Santil hu

¹ Abihomak ex ixk aj Samaria. Chanchanex li cuacax aran Basán, li ni̱nkeb ut chꞌolaninbil chi us. La̱ex nequerahobtesi li ma̱cꞌaꞌeb xcuanquil ut eb li nebaꞌ. Ut nequetaklaheb le̱ be̱lom chixcꞌambal e̱vino re te̱rucꞌ.

² Li Ka̱cuaꞌ Dios quixba̱nu li juramento saꞌ xcꞌabaꞌ lix ti̱quilal xchꞌo̱l ut quixye chi joꞌcaꞌin: —Relic chi ya̱l ta̱cuulak xkꞌehil nak texchapekꞌ la̱ex joꞌ nak nequeꞌchapeꞌ li car riqꞌuin li chapleb chꞌi̱chꞌ. Ut teꞌchapekꞌ ajcuiꞌ le̱ ralal e̱cꞌajol.

³ Tex-isi̱k saꞌ le̱ palacio ut tzololnakex nak tex-e̱lk saꞌ lix jachalal li tzꞌac, chan li Ka̱cuaꞌ.

⁴ Ayukex aran Bet-el ut ba̱nuhomak li cꞌaꞌru te̱raj xba̱nunquil. Ayukex Gilgal chixba̱nunquil le̱ ma̱usilal. Rajlal ekꞌela texmayejak chiru le̱ yi̱banbil dios, ut rajlal oxib cutan te̱qꞌue le̱ mayej li junju̱nk saꞌ xlaje̱tkil.

⁵ Ayukex. Chemayeja le̱ caxlan cua li cuan xchꞌamal ut yehomak resil li joꞌ qꞌuial xemayeja xban nak aꞌan li nacuulac che̱ru xba̱nunquil, la̱ex aj Israel, chan li Ka̱cuaꞌ Dios.

⁶ Xexinqꞌue chixcuybal le̱ saꞌ yalak bar saꞌ eb li tenamit. Ut eb li cuanqueb saꞌ cꞌaleba̱l ma̱cꞌaꞌ chic xtzacae̱mkeb. Abanan riqꞌuin chixjunil li raylal aꞌin incꞌaꞌ xeraj sukꞌi̱c cuiqꞌuin, chan li Ka̱cuaꞌ.

⁷ —La̱in incꞌaꞌ chic xinqꞌue li hab nak oxib po chic ma̱ nacuulac xkꞌehil li kꞌoloc. Xinqꞌue li hab saꞌ jun li tenamit ut saꞌ li jun chic incꞌaꞌ xinqꞌue. Saꞌ jun li cꞌaleba̱l xinqꞌue li hab ut saꞌ li jun chic xchakic li acui̱mk xban nak incꞌaꞌ xinqꞌue li hab.

⁸ La̱ex quexco̱ex chixsicꞌbal le̱ haꞌ saꞌ eb li tenamit quixqꞌue cuiꞌ li hab, ut incꞌaꞌ quitzꞌakloc e̱re re tixnumsi le̱ chaki el. Ut riqꞌuin chixjunil li raylal li xecꞌul incꞌaꞌ xeraj sukꞌi̱c cuiqꞌuin, chan li Ka̱cuaꞌ.

⁹ Ut quixye ajcuiꞌ: —Xintakla li tikcual ikꞌ ut quichakic le̱ racui̱mk xban. Ut xintaklaheb li motzoꞌ chixsachbal ru le̱ racui̱mk. Eb laj sa̱cꞌ queꞌxcꞌux le̱ racui̱mk ut queꞌxcꞌux ajcuiꞌ xto̱nal le̱ uvas ut queꞌxcꞌux lix xak le̱ cheꞌ higo ut olivo. Abanan ma̱ jaruj xeraj sukꞌi̱c cuiqꞌuin, chan li Ka̱cuaꞌ.

¹⁰ Ut quixye ajcuiꞌ: —Xintakla li raylal saꞌ e̱be̱n joꞌ quintakla saꞌ xbe̱neb laj Egipto. Xebincanab chi camsi̱c saꞌ li ple̱t le̱ ralal li toj sa̱jeb. Aꞌ chic li xicꞌ nequeꞌiloc e̱re queꞌe̱chanin re le̱ cacua̱y. Ut queꞌchuhoꞌ le̱ camenak saꞌ li naꞌajej queꞌpletic cuiꞌ. Ut la̱ex querutzꞌ lix chuhil. Abanan riqꞌuin chixjunil li raylal aꞌin incꞌaꞌ xeraj sukꞌi̱c cuiqꞌuin.

¹¹ La̱in xinsachoc e̱re joꞌ nak quinsacheb laj Sodoma ut eb laj Gomorra. Ut li joꞌ qꞌuialex quexcoleꞌ, chanchan li cheꞌ li qui-isi̱c saꞌ xam. Ut riqꞌuin chixjunil li raylal aꞌin, incꞌaꞌ ajcuiꞌ nequecꞌoxla sukꞌi̱c cuiqꞌuin.

¹² Joꞌcan nak la̱in tinqꞌuehok e̱re chixtojbal rix le̱ ma̱usilal, la̱ex laj Israel. Cauresihomak e̱rib xban nak la̱in tinrakok a̱tin saꞌ e̱be̱n, chan li Ka̱cuaꞌ.

¹³ Li Ka̱cuaꞌ, aꞌan li quiyi̱ban re li tzu̱l ut aꞌan li quiyi̱ban re li ikꞌ. Aꞌan nacꞌutuc re chiruheb li cui̱nk cꞌaꞌru naxcꞌoxla xba̱nunquil. Aꞌan nasukꞌisin re li kꞌojyi̱n chokꞌ cutan. Aꞌan nacuan yalak bar saꞌ chixjunil li ruchichꞌochꞌ. Lix cꞌabaꞌ li Ka̱cuaꞌ, aꞌan lix Dioseb li qꞌuila okꞌob chi ángel.