Amós 3 - Li Santil hu

¹ La̱ex laj Israel, cherabihak li naxye li Ka̱cuaꞌ che̱rix che̱junilex la̱ex li quexrisi chak saꞌ li tenamit Egipto nak quixye chi joꞌcaꞌin:

² —Saꞌ xya̱nkeb chixjunileb li tenamit saꞌ ruchichꞌochꞌ, caꞌaj cuiꞌ la̱ex sicꞌbil e̱ru inban. Joꞌcan nak tento texinqꞌue chixtojbal rix le̱ ma̱usilal, chan li Ka̱cuaꞌ.

³ ¿Ma ta̱ru̱k ta biꞌ teꞌcua̱nk chi sum a̱tin cuibak cui incꞌaꞌ junajak ru lix cꞌaꞌuxeb?

⁴ ¿Ma tixjap ta biꞌ re li cakcoj saꞌ qꞌuicheꞌ cui incꞌaꞌ tixchap xtib? ¿Ma ho̱n ta biꞌ nacꞌut xjoskꞌil li chꞌina cakcoj nak toj ma̱jiꞌ naxtau lix tib?

⁵ ¿Ma naru ta biꞌ ta̱chapekꞌ li xul li narupupic, cui incꞌaꞌ teꞌxqꞌue li raꞌal re teꞌxchap? Ut, ¿ma ta̱ecꞌa̱nk ta biꞌ li raꞌal cui ma̱cꞌaꞌ tixchap?

⁶ Cui ta̱ecꞌa̱nk li trompeta saꞌ tenamit, ¿ma incꞌaꞌ ta biꞌ teꞌxucuak li tenamit chirabinquil? Ut, ¿ma ta̱cha̱lk ta biꞌ li raylal saꞌ xbe̱n junak li tenamit cui li Dios incꞌaꞌ tixcanabeb re teꞌxcꞌul?

⁷ Li Ka̱cuaꞌ incꞌaꞌ tixqꞌue chak li raylal saꞌ xbe̱neb li tenamit chi incꞌaꞌ ta tixye xbe̱n cua reheb lix profeta re nak teꞌxye resil.

⁸ ¿Ani ta biꞌ incꞌaꞌ ta̱xucuak nak tixjap re li cakcoj? Cui nequeꞌxucuac xban li cakcoj nak naxjap re, ¿ma tojaꞌ ta chic incꞌaꞌ teꞌxucuak chiru li Dios? Cui junak ta̱a̱tina̱k xban li Ka̱cuaꞌ, ¿ma incꞌaꞌ ta biꞌ tixye resil li cꞌaꞌru quicꞌutbesi̱c chiru?

⁹ Joꞌcaꞌin te̱ye reheb li cuanqueb saꞌ eb li palacio aran Asdod ut reheb ajcuiꞌ li cuanqueb saꞌ eb li palacio aran Egipto: —Chꞌutubomak e̱rib saꞌ eb li tzu̱l aran Samaria. Ilomak li rahobtesi̱nc ut li ma̱usilal li yo̱queb chixba̱nunquil aran.

¹⁰ Joꞌcaꞌin quixye li Ka̱cuaꞌ: —Incꞌaꞌ nequeꞌxnau xba̱nunquil li ti̱quilal. Nujenak lix palacio riqꞌuin li cꞌaꞌak re ru nequeꞌrelkꞌa riqꞌuin pletic ut numtajenak li ma̱usilal nequeꞌxba̱nu.

¹¹ Joꞌcan nak li Ka̱cuaꞌ quixye chi joꞌcaꞌin: —Eb li xicꞌ nequeꞌiloc e̱re la̱ex aj Israel teꞌcha̱lk ut teꞌxsut le̱ tenamit. Teꞌxjucꞌ li cab xeyi̱b re xcolbal e̱rib ut teꞌrelkꞌa li cꞌaꞌru e̱re cuan saꞌ le̱ palacio, chan.

¹² Ut quixye ajcuiꞌ li Ka̱cuaꞌ: —Nak junak laj ilol xul tixyal xmakꞌbal lix carner saꞌ re li cakcoj, ma̱re caꞌaj cuiꞌ li rok cuib tixcol malaj ut jun pedasak xxic. Joꞌcan ajcuiꞌ te̱cꞌul la̱ex aj Israel. Moco qꞌuihex ta li texcolekꞌ saꞌ li naꞌajej Samaria. Anakcuan nequexhilan saꞌ li cha̱bil chꞌa̱t aran Damasco. Abanan ta̱cha̱lk raylal saꞌ e̱be̱n.

¹³ Joꞌcaꞌin quixye li Ka̱cuaꞌ lix Dioseb li qꞌuila okꞌob chi ángel: —Qꞌuehomak retal ut yehomak resil li raylal ta̱cha̱lk saꞌ xbe̱neb li ralal xcꞌajol laj Jacob.

¹⁴ Nak ta̱cuulak xkꞌehil la̱in tebinqꞌue laj Israel chixtojbal rix lix ma̱queb. Ut tinsacheb ajcuiꞌ lix artal aran Bet-el. Tinjor lix xucub li cuanqueb saꞌ li artal ut teꞌtꞌanekꞌ chi chꞌochꞌ.

¹⁵ La̱in tinsach lix naꞌajeb bar nequeꞌcuan cuiꞌ saꞌ li sakꞌehil. Ut tinsach ajcuiꞌ li nequeꞌcuan cuiꞌ saꞌ li habalkꞌe. Teꞌosokꞌ li rochocheb yi̱banbil riqꞌuin marfil. Tinsacheb chixjunileb lix palacio, chan li Ka̱cuaꞌ.