Amós 2 - Li Santil hu

¹ Ut quixye ajcuiꞌ li Ka̱cuaꞌ: —Nabal sut ac xincuy xma̱queb laj Moab. Anakcuan incꞌaꞌ chic tincuyeb xma̱c xban nak numtajenak cuiꞌchic li ma̱usilal yo̱queb chixba̱nunquil. Queꞌxcꞌat lix bakel lix reyeb laj Edom toj retal quichair.

² Tinqꞌue xxamlel li tenamit Moab, ut tincꞌat ajcuiꞌ eb lix palacio aran Queriot. Ta̱ecꞌa̱nk li trompeta ut japjo̱keb re nak yo̱k li ple̱t ut talajeꞌcamsi̱k chixjunileb.

³ Tincuisi chiruheb li tenamit lix reyeb ut tincamsi rochbeneb li nequeꞌcꞌanjelac chiru, chan li Ka̱cuaꞌ.

Ta̱rakekꞌ ajcuiꞌ a̱tin saꞌ xbe̱neb laj Judá ut eb laj Israel

⁴ Ut quixye cuiꞌchic li Ka̱cuaꞌ: —Nabal sut ac xincuy xma̱queb laj Judá. Anakcuan incꞌaꞌ chic tincuyeb xma̱c xban nak numtajenak cuiꞌchic li ma̱usilal yo̱queb chixba̱nunquil. Queꞌxtzꞌekta̱na lin chakꞌrab ut incꞌaꞌ nequeꞌxba̱nu li cꞌaꞌru ninye reheb. Queꞌxlokꞌoni li yi̱banbil dios joꞌ queꞌxba̱nu lix naꞌ xyucuaꞌeb.

⁵ Tinqꞌue xxamlel li tenamit Judá ut tincꞌateb ajcuiꞌ lix palacio aran Jerusalén.

⁶ Ut quixye cuiꞌchic li Ka̱cuaꞌ: —Nabal sut ac xincuy xma̱queb laj Israel. Anakcuan incꞌaꞌ chic tincuyeb xma̱c xban nak numtajenak cuiꞌchic li ma̱usilal yo̱queb chixba̱nunquil. Eb li ti̱queb xchꞌo̱l nequeꞌqꞌueheꞌ chokꞌ rahobtesinbil mo̱s nak incꞌaꞌ nequeꞌru xtojbal lix cꞌaseb. Ut eb li nebaꞌ, usta yal jun sumal chi xa̱b nequeꞌxcꞌas ut incꞌaꞌ nequeꞌru xtojbal, nequeꞌcanaba̱c chokꞌ lokꞌbil mo̱s.

⁷ Cꞌajoꞌ nak nequeꞌxrahobtesi li tenamit. Chanchan nak nequeꞌxyekꞌi saꞌ chꞌochꞌ li nebaꞌeb ut chanchan nequeꞌxyocosi ru xbeheb li tu̱laneb nak nequeꞌxram chiruheb li ti̱quilal. Li yucuaꞌbej ut li alalbej nequeꞌma̱cob riqꞌuin li jun chi ixk. Ut riqꞌuin li ma̱usilal nequeꞌxba̱nu, nequeꞌxsach xcuanquil lin santil cꞌabaꞌ.

⁸ Chixcꞌatkeb li artal nequeꞌxhel chokꞌ xnaꞌajeb li tꞌicr li nacanaba̱c riqꞌuineb chokꞌ prenda xbaneb laj toꞌ tumin. Nequeꞌxlokꞌ lix vino li nequeꞌrucꞌ saꞌ rochoch lix dioseb riqꞌuin li tumin li nequeꞌxmakꞌ chiruheb li ma̱cꞌaꞌeb xma̱c.

⁹ Abanan re e̱colbal la̱ex aj Israel xebinsach laj amorreo, usta kꞌaxal ni̱nkeb rok, joꞌ li caki cheꞌ chacalteꞌ. Usta kꞌaxal cau ribeb joꞌ li ji, xebinsach chi junaj cua.

¹⁰ La̱in xin-isin chak e̱re aran Egipto ut caꞌcꞌa̱l (40) chihab xexinberesi saꞌ li chaki chꞌochꞌ. Ut la̱in xinqꞌuehoc e̱re lix naꞌajeb laj amorreo.

¹¹ Saꞌ xya̱nkeb le̱ ralal e̱cꞌajol la̱ex aj Israel xinsiqꞌueb ru li teꞌcua̱nk chokꞌ profeta ut xinsiqꞌueb ru li toj sa̱jeb li queꞌxkꞌaxtesi rib chi cꞌanjelac chicuu chokꞌ Nazareo. ¿Ma incꞌaꞌ ta biꞌ ya̱l nak joꞌcan quinba̱nu? chan li Ka̱cuaꞌ.

¹² Ut quixye ajcuiꞌ: —Abanan la̱ex quemin ruheb laj nazareo chi ucꞌac vino, ut quetacchiꞌiheb li profeta nak incꞌaꞌ teꞌxye li cua̱tin reheb li tenamit.

¹³ Joꞌcan nak la̱in tintakla raylal saꞌ e̱be̱n. Ayaynakex chic xban li raylal li tinqꞌue saꞌ e̱be̱n. Chanchan xya̱b li carre̱t nak yo̱ chiri̱kanquil li kꞌaxal a̱l.

¹⁴ Ma̱ ani ta̱ru̱k ta̱e̱lelik chicuu. Li kꞌaxal cau naa̱linac incꞌaꞌ ta̱ru̱k ta̱e̱lelik chicuu. Li kꞌaxal cau rib tixsach lix cacuilal ut li cau xchꞌo̱l chi pletic incꞌaꞌ ta̱ru̱k tixcol rib.

¹⁵ Li naxnau pletic riqꞌuin tzimaj incꞌaꞌ ta̱ru̱k tixcol rib. Ut li naa̱linac chi cau incꞌaꞌ ta̱ru̱k tixcol rib, chi moco ta̱ru̱k tixcol rib li ta̱e̱lelik chirix cacua̱y.

¹⁶ Saꞌ eb li cutan aꞌan li soldado li kꞌaxal cau rib tixcanab lix chꞌi̱chꞌ re pletic re nak ta̱ru̱k ta̱e̱lelik, chan li Ka̱cuaꞌ.