Amós 1 - Li Santil hu

Ta̱rakekꞌ a̱tin saꞌ xbe̱neb li xicꞌ nequeꞌiloc reheb laj Israel

¹ Quicuan jun li cui̱nk aj Amós xcꞌabaꞌ saꞌ li naꞌajej Tecoa. Aꞌan jun reheb laj ilol xul. Quia̱tina̱c xban li Dios saꞌ eb li cutan nak cua̱nk chokꞌ rey aran Judá laj Uzías ut cua̱nk chokꞌ rey aran Israel laj Jeroboam ralal laj Joás. Cuib chihab chic ma̱ nanumeꞌ li hi̱c nak laj Amós quixtiquib xyebal resil li quicꞌutbesi̱c chiru xban li Dios chirixeb laj Israel.

² Quixye: —Li nimajcual Dios ta̱a̱tinak chak chi cau xya̱b xcux toj Sión. Toj aran Jerusalén ta̱a̱tinak chak li Ka̱cuaꞌ. Ut nak ta̱a̱tinak chak, talajeꞌchakik li pim. Ut talajeꞌchakik ajcuiꞌ li pachꞌayaꞌ saꞌ li tzu̱l Carmelo.

³ Joꞌcaꞌin quixye li Ka̱cuaꞌ: —Nabal sut ac xincuy xma̱queb laj Damasco. Anakcuan incꞌaꞌ chic tincuyeb xma̱c xban nak numtajenak cuiꞌchic li ma̱usilal li yo̱queb chixba̱nunquil. Queꞌxrahobtesiheb laj Israel li cuanqueb Galaad. Chanchan tenbileb riqꞌuin chꞌi̱chꞌ joꞌ nequeꞌxba̱nu riqꞌuin li trigo nak queꞌxrahobtesiheb laj Israel.

⁴ Tinqꞌue xxamlel li rochoch laj Hazael ut ta̱cꞌatk ajcuiꞌ lix palacio laj Ben-adad.

⁵ Tintꞌaneb li oqueba̱l re li tzꞌac li sutsu cuiꞌ li tenamit Damasco ut tinsacheb li cuanqueb saꞌ li ru takꞌa Avén ut tinsacheb ajcuiꞌ li nequeꞌtaklan aran Bet-edén. Ut li tenamit cuanqueb Siria teꞌcꞌamekꞌ chi pre̱xil toj saꞌ li tenamit Kir, chan li Ka̱cuaꞌ.

⁶ Ut quixye ajcuiꞌ li Ka̱cuaꞌ: —Nabal sut ac xincuy xma̱queb laj Gaza. Anakcuan incꞌaꞌ chic tincuyeb xma̱c xban nak numtajenak cuiꞌchic li ma̱usilal yo̱queb chixba̱nunquil. Quilajeꞌnumta saꞌ xbe̱neb li tenamit ut queꞌxcꞌayiheb chokꞌ rahobtesinbil mo̱s reheb laj Edom.

⁷ Tinqꞌue xxamlel li tzꞌac li sutsu cuiꞌ li tenamit Gaza ut tincꞌat ajcuiꞌ li palacio.

⁸ Ut tinsacheb li cuanqueb saꞌ li tenamit Asdod. Tinsacheb ajcuiꞌ li nequeꞌtaklan saꞌ li tenamit Ascalón, joꞌ ajcuiꞌ eb li cuanqueb saꞌ li tenamit Ecrón. Chixjunileb laj filisteo teꞌosokꞌ, chan li Ka̱cuaꞌ Dios.

⁹ Ut quixye ajcuiꞌ li Ka̱cuaꞌ: —Nabal sut ac xincuy xma̱queb laj Tiro. Anakcuan incꞌaꞌ chic tincuyeb xma̱c xban nak numtajenak cuiꞌchic li ma̱usilal yo̱queb chixba̱nunquil. Queꞌnumta saꞌ xbe̱neb li tenamit ut queꞌxkꞌaxtesiheb saꞌ rukꞌeb laj Edom. Ut incꞌaꞌ chic quijulticoꞌ reheb li contrato queꞌxba̱nu re xcꞌambaleb rib saꞌ usilal.

¹⁰ Tinqꞌue xxamlel li tzꞌac li sutsu cuiꞌ li tenamit Tiro ut tincꞌat ajcuiꞌ li palacio.

¹¹ Ut quixye ajcuiꞌ li Ka̱cuaꞌ: —Nabal sut ac xincuy xma̱queb laj Edom. Anakcuan incꞌaꞌ chic tincuyeb xma̱c xban nak numtajenak cuiꞌchic li ma̱usilal yo̱queb chixba̱nunquil. Eb laj Edom queꞌpletic riqꞌuineb laj Israel ut incꞌaꞌ queꞌril xtokꞌoba̱l ruheb. Junelic ban yo̱queb xjoskꞌileb saꞌ xbe̱neb ut junelic xicꞌ nequeꞌril.

¹² Tinqꞌue xxamlel li tenamit Temán ut ta̱cꞌatk ajcuiꞌ li palacio aran Bosra.

¹³ Ut quixye ajcuiꞌ li Ka̱cuaꞌ: —Nabal sut ac xincuy xma̱queb laj Amón. Anakcuan incꞌaꞌ chic tincuyeb xma̱c xban nak numtajenak cuiꞌchic li ma̱usilal yo̱queb chixba̱nunquil. Queꞌpletic riqꞌuineb laj Galaad re xmakꞌbal lix chꞌochꞌeb. Ut nak yo̱queb chi pletic, jachbil queꞌxba̱nu reheb li yaj aj ixk nak queꞌxcamsiheb.

¹⁴ Joꞌcan nak tinqꞌue xxamlel li tzꞌac sutsu cuiꞌ li tenamit Rabá ut ta̱cꞌatk li palacio. Teꞌxjap re chi cau nak yo̱keb chi numta̱c saꞌ xbe̱neb li tenamit Rabá. Chanchan nak nachal li ca̱k-sut-ikꞌ nak tintaklaheb li xicꞌ nequeꞌiloc reheb chi pletic riqꞌuineb.

¹⁵ Li rey ut eb li nequeꞌcꞌanjelac chiru teꞌchapekꞌ ut teꞌcꞌamekꞌ chi pre̱xil, chan.