Abdías 1 - Li Santil hu

Li Ka̱cuaꞌ tixqꞌueheb laj Edom chixtojbal rix lix ma̱queb

¹ Aꞌan aꞌin li quicꞌutbesi̱c chiru laj Abdías saꞌ li visión xban li Dios chirixeb laj Edom: Xkabi resil li quixye li Ka̱cuaꞌ. Jun li takl co̱ saꞌ eb li jalan tenamit chixyebal reheb: —Cauresihomak e̱rib ut yo̱keb chi pletic riqꞌuineb laj Edom.

² Li Ka̱cuaꞌ Dios quixye reheb laj Edom li ralal xcꞌajol laj Esaú: —La̱in tincuisi le̱ cuanquil chiruheb li jalan tenamit. Ut tzꞌekta̱nanbilakex chic xbaneb.

³ Xebalakꞌi e̱rib e̱junes xban le̱ kꞌetkꞌetil. Xeyi̱b le̱ naꞌaj toj saꞌ xbe̱n li tzu̱l saꞌ xya̱nkeb li ni̱nki pec ut nequeye saꞌ e̱chꞌo̱l, ¿Ani ta biꞌ ta̱ru̱k ta̱taꞌok ke arin? Arin ma̱ ani ta̱numta̱k saꞌ kabe̱n, chanquex.

⁴ Usta nequeyi̱b le̱ naꞌaj toj takecꞌ joꞌ nak naxyi̱b xsoc li cꞌuch, abanan toj aran texintau chak. Ut usta te̱yi̱b le̱ naꞌaj toj saꞌ xya̱nkeb li chahim, abanan toj aran texincubsi chak, chan li Ka̱cuaꞌ.

⁵ Li Ka̱cuaꞌ quixye: —Us raj chokꞌ e̱re nak aj e̱lkꞌ ta teꞌcha̱lk chiru kꞌojyi̱n chi elkꞌa̱c e̱riqꞌuin. Teꞌxcꞌam raj caꞌaj cuiꞌ li joꞌ qꞌuial teꞌraj. Ut cui teꞌxsicꞌ li ru li uvas, ¿ma incꞌaꞌ ta biꞌ teꞌxcanab raj caꞌchꞌinak chic e̱re? Abanan, eb li xicꞌ nequeꞌiloc e̱re, teꞌcha̱lk ut teꞌxsach e̱ru chi junaj cua.

⁶ Chixjunil ta̱makꞌekꞌ che̱ru la̱ex li ralal xcꞌajol laj Esaú. Usta mukmu̱k raj e̱ban li kꞌaxal lokꞌ che̱ru, abanan teꞌxsicꞌ toj retal teꞌxcꞌam che̱ru chixjunil.

⁷ Eb li xni̱nkal ru tenamit li queꞌtenkꞌan e̱re junxil, xicꞌ chic texril ut aꞌaneb ajcuiꞌ teꞌisi̱nk e̱re saꞌ le̱ tenamit. Le̱ rami̱g li nequeꞌcuaꞌac e̱riqꞌuin, xicꞌ chic texril. Cꞌojcꞌo raj e̱chꞌo̱l riqꞌuineb, abanan aꞌaneb ajcuiꞌ teꞌqꞌuehok li raꞌal re nak texchapekꞌ chi incꞌaꞌ te̱qꞌue retal.

⁸ Li Ka̱cuaꞌ quixye: —Nak tebinqꞌue chixtojbal rix lix ma̱queb laj Edom, tinsach ruheb li cuanqueb xnaꞌleb saꞌ xya̱nkeb aꞌan. La̱in tinsach ruheb laj qꞌuehol naꞌleb li cuanqueb saꞌ li tzu̱l saꞌ lix naꞌajeb li ralal xcꞌajol laj Esaú.

⁹ Sicsotkeb xbaneb xxiu li cauheb rib chi pletic saꞌ li tenamit Temán. Ut telajeꞌsachekꞌ ruheb chixjunileb li cuanqueb saꞌ li tzu̱l saꞌ lix naꞌajeb li ralal xcꞌajol laj Esaú.

¹⁰ La̱ex aj Edom, ralal xcꞌajolex laj Esaú, ta̱cꞌutekꞌ e̱xuta̱n ut texsachekꞌ chi junaj cua xban li ma̱usilal li queba̱nu reheb li ralal xcꞌajol laj Jacob, li ri̱tzꞌin le̱ xeꞌto̱nil yucuaꞌ.

¹¹ Li queꞌchal saꞌ jalan tenamit, li xicꞌ nequeꞌiloc reheb, queꞌxtꞌan li oqueba̱l re li tenamit Jerusalén ut queꞌnumta saꞌ xbe̱neb. La̱ex cuanquex aran ut ma̱cꞌaꞌ queba̱nu re xtenkꞌanquileb laj Judá. Chanchan ajcuiꞌ la̱ex jun saꞌ xya̱nkeb li xicꞌ nequeꞌiloc reheb xban nak incꞌaꞌ quetenkꞌaheb nak queꞌmakꞌeꞌ chiruheb li cꞌaꞌru cuan reheb.

¹² Incꞌaꞌ raj xsahoꞌ e̱chꞌo̱l saꞌ li cutan nak li ralal xcꞌajol li ri̱tzꞌin le̱ xeꞌto̱nil yucuaꞌ yo̱queb chixcꞌulbal li raylal. Incꞌaꞌ raj xsahoꞌ saꞌ e̱chꞌo̱l chirilbaleb laj Judá nak queꞌrahobtesi̱c. Ut incꞌaꞌ raj xehobeb nak xeꞌnumta li xicꞌ nequeꞌiloc reheb saꞌ xbe̱neb.

¹³ Incꞌaꞌ raj xex-oc Jerusalén saꞌ xtenamiteb li cualal incꞌajol saꞌ eb li cutan nak yo̱queb chixcꞌulbal li raylal. Incꞌaꞌ raj xsahoꞌ saꞌ e̱chꞌo̱l nak queꞌsacheꞌ. Ut incꞌaꞌ raj xerelkꞌa li cꞌaꞌruheb re nak xeꞌxcꞌul li raylal.

¹⁴ Incꞌaꞌ raj xexakab e̱rib saꞌ xa̱la be chixrambaleb li yo̱queb chi e̱lelic. Ut incꞌaꞌ raj xecamsiheb. Incꞌaꞌ raj xechapeb li queꞌcana ut incꞌaꞌ raj xekꞌaxtesiheb cuiꞌchic saꞌ rukꞌeb li xicꞌ nequeꞌiloc reheb saꞌ li cutan nak yo̱queb chixcꞌulbal li raylal.

¹⁵ Joꞌ xeba̱nu reheb laj Judá, joꞌcan ajcuiꞌ te̱cꞌul la̱ex. La̱ex te̱cꞌul le̱ kꞌajca̱munquil. Cuulac re xkꞌehil nak la̱in li Ka̱cuaꞌ tinrakok a̱tin saꞌ xbe̱neb chixjunileb li jalanil tenamit. Ut tinrakok ajcuiꞌ a̱tin saꞌ e̱be̱n la̱ex.

¹⁶ Joꞌ nak xerecꞌa xcꞌahil li rahobtesi̱c la̱ex saꞌ lin tzu̱l Sión, joꞌcan ajcuiꞌ nak teꞌrecꞌa xcꞌahil li rahobtesi̱c chixjunileb li tenamit toj retal teꞌosokꞌ.

Li Ka̱cuaꞌ tixqꞌueheb cuiꞌchic laj Israel chi cua̱nc saꞌ lix tenamiteb

¹⁷ Abanan eb li cuanqueb saꞌ li tzu̱l Sión teꞌcolekꞌ. Ut teꞌsantobresi̱k. Ut eb li ralal xcꞌajol laj Jacob teꞌre̱chani cuiꞌchic lix naꞌajeb.

¹⁸ Eb li ralal xcꞌajol laj Jacob chanchanakeb li xam. Eb li ralal xcꞌajol laj José chanchanakeb li rakꞌ xam. Ut eb li ralal xcꞌajol laj Esaú chanchan nak nacꞌat li qꞌuim nak teꞌosokꞌ. Teꞌsachekꞌ ruheb chi junaj cua li ralal xcꞌajol laj Esaú. Ma̱ jun saꞌ xya̱nkeb teꞌcolekꞌ. La̱in li Ka̱cuaꞌ xinyehoc re aꞌin.

¹⁹ Eb laj Israel li cuanqueb aran Neguev, aꞌaneb li teꞌe̱chani̱nk re li tzu̱l saꞌ lix naꞌajeb laj Esaú. Ut eb laj Israel li cuanqueb saꞌ li ru takꞌa Sefela, aꞌaneb li teꞌe̱chani̱nk re lix chꞌochꞌeb laj filisteo. Ut aꞌaneb ajcuiꞌ li teꞌe̱chani̱nk re lix chꞌochꞌeb laj Efraín ut lix chꞌochꞌeb laj Samaria. Ut eb li ralal xcꞌajol laj Benjamín, aꞌaneb li teꞌe̱chani̱nk re li naꞌajej Galaad.

²⁰ Eb laj Israel li queꞌchapeꞌ ut queꞌcꞌameꞌ chi najt, aꞌaneb li teꞌe̱chani̱nk re lix chꞌochꞌeb laj cananeo. Ta̱cuulak toj saꞌ li tenamit Sarepta. Ut eb laj Jerusalén li queꞌchapeꞌ, li cuanqueb aran Sefarad, aꞌaneb li teꞌe̱chani̱nk reheb li tenamit li cuanqueb Neguev.

²¹ Ut eb laj Israel li queꞌnumta saꞌ xbe̱neb laj Edom teꞌxic saꞌ li tzu̱l Sión chi takla̱nc saꞌ xbe̱neb li cuanqueb saꞌ xya̱nkeb li tzu̱l saꞌ lix chꞌochꞌ laj Esaú. Ut li Ka̱cuaꞌ, aꞌan ta̱cua̱nk xcuanquil saꞌ xbe̱neb.