2 Timoteo 4 - Li Santil hu

¹ Nintzꞌa̱ma cha̱cuu saꞌ xcꞌabaꞌ li Dios nak ta̱chꞌolob lix ya̱lal. Ut nintzꞌa̱ma ajcuiꞌ saꞌ xcꞌabaꞌ li Ka̱cuaꞌ Jesucristo, li ta̱rakok a̱tin saꞌ xbe̱neb li yoꞌyo̱queb ut li camenakeb nak ta̱cha̱lk cuiꞌchic riqꞌuin lix nimal xcuanquil.

² La̱in nintzꞌa̱ma cha̱cuu nak ta̱chꞌolob xya̱lal li ra̱tin li Dios. Chayal a̱kꞌe chixba̱nunquil chi junelic usta naxqꞌue rib cha̱cuu usta incꞌaꞌ. Chatijeb ut chakꞌuseb. Chaqꞌue xcacuilal xchꞌo̱leb ut chicua̱nk a̱cuyum ut incꞌaꞌ ta̱canab xcꞌutbal lix ya̱lal chiruheb.

³ Tento nak ta̱cꞌut lix ya̱lal chiruheb xban nak ta̱cuulak xkꞌehil nak incꞌaꞌ chic teꞌraj rabinquil li tijleb tzꞌakal ya̱l. Aꞌ chic li jun tu̱beb chi aj tzolonel, aꞌan chic li teꞌxta̱ke re nak ta̱yehekꞌ reheb cꞌaꞌru li teꞌraj rabinquil ut aꞌan chic li teꞌxqꞌue xchꞌo̱l chirabinquil.

⁴ Incꞌaꞌ chic teꞌraj rabinquil lix ya̱lal. Aꞌ chic li serakꞌ li ma̱cꞌaꞌ na-oc cuiꞌ, aꞌan chic li teꞌraj rabinquil.

⁵ Aꞌut la̱at, Timoteo, chaqꞌuehak retal chi us li cꞌaꞌru ta̱ba̱nu. Chacuyak xnumsinquil li raylal ut chajultica̱k resil li santil evangelio ut chaba̱nuhak la̱ cꞌanjel chi tzꞌakal.

⁶ Ut la̱in, saꞌ xcꞌabaꞌ li Ka̱cuaꞌ ta̱osokꞌ lin yuꞌam joꞌ jun li mayej chiru. Yo̱ chi cuulac xkꞌehil nak tincamsi̱k.

⁷ Xinyal inkꞌe chixba̱nunquil li cha̱bil cꞌanjel. Xinqꞌue inchꞌo̱l chixba̱nunquil chi tzꞌakal li tenebanbil saꞌ inbe̱n xba̱nunquil ut chi anchal inchꞌo̱l xinpa̱ban.

⁸ Anakcuan caꞌaj chic lin ma̱tan nacuoybeni li naqꞌueheꞌ reheb li ti̱queb xchꞌo̱l. Li Ka̱cuaꞌ li narakoc a̱tin saꞌ ti̱quilal, aꞌan ta̱qꞌuehok cue saꞌ li cutan nak tol-e̱lk cuiꞌchic. Ut moco caꞌaj cuiꞌ ta cue la̱in tixqꞌue. Tixqꞌue aj ban cuiꞌ reheb chixjunileb li yo̱keb chi oybeni̱nc re lix cꞌulunic chi anchaleb xchꞌo̱l.

Laj Pablo naxye re laj Timoteo cꞌaꞌru tixba̱nu

⁹ Cha̱lkat chicuilbal chi junpa̱t.

¹⁰ Cuanquin injunes arin. Laj Demas xinixcanab xban xrahinquil ru li cꞌaꞌak re ru cuan saꞌ ruchichꞌochꞌ ut xco̱ saꞌ li tenamit Tesalónica. Laj Crescente xco̱ Galacia chi cꞌanjelac ut laj Tito xco̱ saꞌ li naꞌajej Dalmacia.

¹¹ Chixjunileb li nequeꞌtenkꞌan cue ma̱ aniheb chic. Caꞌaj chic laj Lucas cuan cuiqꞌuin. Joꞌcan nak nintzꞌa̱ma cha̱cuu nak ta̱numeꞌbok chak laj Marcos ut ta̱cꞌam chak cha̱cuix nak tatcha̱lk. Aꞌan tinixtenkꞌa chi cha̱bil saꞌ li cꞌanjel.

¹² Ut laj Tíquico xintakla saꞌ li tenamit Éfeso.

¹³ Nak tatcha̱lk, chacꞌamak chak cue li capa quincanab chak saꞌ li tenamit Troas saꞌ rochoch laj Carpo. Ut chacꞌamak ajcuiꞌ chak li hu. Li kꞌaxal nacuaj ru, aꞌan li tzꞌu̱m li tzꞌi̱banbil ru.

¹⁴ Laj Alejandro, laj tenol chꞌi̱chꞌ, nabal chi raylal xba̱nu cue. Li Ka̱cuaꞌ, aꞌan li ta̱kꞌajca̱mu̱nk re riqꞌuin li cꞌaꞌru naxba̱nu.

¹⁵ Chacolak ajcuiꞌ a̱cuib la̱at chiru aꞌan xban nak kꞌaxal xi̱cꞌ narabi resil li colba-ib li nakaye.

¹⁶ Nak quinbokeꞌ xbe̱n cua riqꞌuin laj rakol a̱tin, ma̱ ani quia̱tinac chicuix. Quineꞌxcanab injunes chixjunileb. Miqꞌueheꞌ ta li ma̱c aꞌin saꞌ xbe̱neb.

¹⁷ Abanan li Ka̱cuaꞌ quitenkꞌan cue ut quixqꞌue xcacuilal inchꞌo̱l re xjulticanquil chi tzꞌakal resil li colba-ib re nak chixjunileb li ma̱cuaꞌeb aj judío teꞌrabi resil li evangelio. Joꞌcan nak quincoleꞌ saꞌ rukꞌ li cakcoj.

¹⁸ Ut li Ka̱cuaꞌ ta̱colok cue chiru li ma̱usilal nequeꞌxcꞌoxla xba̱nunquil cue ut tinixcꞌam saꞌ lix nimajcual cuanquilal aran saꞌ choxa. Aꞌan taxak chilokꞌonima̱nk chi junelic kꞌe cutan. Joꞌcan taxak.

Laj Pablo naxtakla xsahil xchꞌo̱leb laj pa̱banel li cuanqueb Éfeso

¹⁹ Chaqꞌueheb xsahil xchꞌo̱leb lix Prisca ut laj Aquila joꞌqueb ajcuiꞌ chixjunileb li cuanqueb saꞌ rochoch laj Onesíforo.

²⁰ Laj Erasto quicana chak aran Corinto. Ut laj Trófimo toj yaj nak quincanab saꞌ li tenamit Mileto.

²¹ Kꞌaxal us cui tatcha̱lk nak toj ma̱jiꞌ naticla li habalkꞌe. Xtakla xsahil a̱chꞌo̱l laj Eubulo, joꞌqueb ajcuiꞌ laj Pudente, laj Lino, lix Claudia ut chixjunileb li herma̱n li cuanqueb arin.

²² Aꞌ taxak li Ka̱cuaꞌ chicua̱nk a̱cuiqꞌuin. Ut aꞌ taxak li rusilal li Dios chicua̱nk e̱riqꞌuin la̱ex che̱junilex. Joꞌcan taxak.