2 Timoteo 3 - Li Santil hu

Ta̱numta̱k li ma̱usilal saꞌ ruchichꞌochꞌ saꞌ rosoꞌjiqueb li cutan

¹ Nacuaj ajcuiꞌ nak ta̱nau nak kꞌaxal xiu xiu li cutan teꞌcha̱lk chiku nak ta̱nachꞌok chak rosoꞌjiqueb li cutan.

² Eb li cristian junes reheb teꞌraj. Teꞌxrahi ru li tumin. Teꞌxnimobresi xcuanquil xjuneseb rib. Teꞌxkꞌetkꞌeti ribeb. Teꞌhobok ut teꞌxkꞌet ra̱tin xnaꞌ xyucuaꞌ. Incꞌaꞌ teꞌtioxi̱nk ut incꞌaꞌ teꞌxqꞌue xcuanquil xpa̱banquil li Dios.

³ Ma̱cꞌaꞌak rahoc riqꞌuineb. Ma̱cꞌaꞌak usilal riqꞌuineb. Telajeꞌxyoꞌob a̱tin chi ribileb rib. Aj kꞌabanelakeb. Incꞌaꞌ teꞌxcuy rib. Joskꞌakeb ut xicꞌ teꞌril li cha̱bilal.

⁴ Teꞌxkꞌaxtesi li ras ri̱tzꞌin saꞌ rukꞌeb li xicꞌ nequeꞌiloc reheb. Cauhakeb rib chixba̱nunquil li incꞌaꞌ us. Ta̱numta̱k lix kꞌetkꞌetileb. Incꞌaꞌ teꞌxra li Dios. Aꞌ ban chic lix saylal li ruchichꞌochꞌ, aꞌan chic li teꞌxra.

⁵ Teꞌxye rib nak aj pa̱baneleb, abanan incꞌaꞌ teꞌxqꞌue xcuanquil li pa̱ba̱l. At Timoteo, ma̱junaji a̱cuib riqꞌuineb aꞌan.

⁶ Saꞌ xya̱nkeb aꞌan cuanqueb li cui̱nk li nequeꞌxsicꞌ chanru teꞌoc saꞌ eb li cab chi balakꞌi̱nc ut nequeꞌxcꞌut lix tijleb chiruheb li ixk li ma̱cꞌaꞌeb xnaꞌleb, li nequeꞌrecꞌa nak aj ma̱queb, ut junes li cꞌaꞌak re ru nequeꞌxrahi ru, aꞌan li nequeꞌxba̱nu.

⁷ Ut eb li ixk aꞌin junelic yo̱queb chixtzolbal li cꞌaꞌak re ru chi tijleb, abanan incꞌaꞌ nequeꞌxtau ru lix ya̱lal.

⁸ Eb a cui̱nk aꞌan yo̱queb chixba̱nunquil joꞌ queꞌxba̱nu laj Janes ut laj Jambres nak queꞌxcuechꞌi rix laj Moisés. Nequeꞌxtzꞌekta̱na li ya̱l. Incꞌaꞌ useb lix naꞌlebeb ut ma̱cꞌaꞌ nequeꞌoc cuiꞌ xban nak tzꞌekta̱nanbil li pa̱ba̱l xbaneb.

⁹ Aban incꞌaꞌ ajcuiꞌ us ta̱e̱lk chiruheb xban nak chꞌolchꞌo̱k chiruheb chixjunileb nak xmajelil xnaꞌlebeb teꞌxba̱nu cuiꞌ, joꞌ queꞌxcꞌul laj Janes ut laj Jambres nak queꞌxcuechꞌi rix laj Moisés.

Laj Pablo naxqꞌue xnaꞌleb laj Timoteo

¹⁰ Abanan la̱at, Timoteo, ac nacanau li tijleb ninchꞌolob xya̱lal. Xaqꞌue retal chanru nincuan ut li cꞌaꞌru nincꞌoxla xba̱nunquil. Xaqꞌue retal lin pa̱ba̱l ut chanru nak nincuyuc ut chanru ninrahoc. Ut xaqꞌue ajcuiꞌ retal chanru xcacuilal lin chꞌo̱l.

¹¹ Ac xaqꞌue retal chanru nak xincuy xnumsinquil li ra xi̱cꞌ ut li raylal li xincꞌul xban xyebal resil li evangelio aran saꞌ eb li tenamit Antioquía, Iconio ut Listra. Chixjunil li raylal quilajincuy xnumsinquil ut li Ka̱cuaꞌ xcoloc cue chiruheb chixjunil li raylal aꞌan.

¹² Ut ya̱l ajcuiꞌ nak teꞌrahobtesi̱k li joꞌ qꞌuialeb li teꞌraj cua̱nc saꞌ ti̱quilal saꞌ xcꞌabaꞌ li Jesucristo.

¹³ Ut ta̱numta̱k lix ma̱usilaleb laj balakꞌ li incꞌaꞌ useb xnaꞌleb. Yo̱keb chi balakꞌi̱nc ut yo̱k ajcuiꞌ xbalakꞌinquileb aꞌan.

¹⁴ Aꞌut la̱at, Timoteo, junelic taxak cauhak a̱chꞌo̱l chixpa̱banquil lix ya̱lal li xatzol cuiꞌ chak a̱cuib. Ac nacanau nak tzꞌakal ya̱l ut nacanau aniheb li xatzol cuiꞌ chak a̱cuib.

¹⁵ Chalen chak toj saꞌ a̱caꞌchꞌinal ac nacanau xsaꞌ li Santil Hu. Nacanau nak aꞌan li nacꞌutuc lix ya̱lal chiku nak li colba-ib natauman riqꞌuin xpa̱banquil li Jesucristo.

¹⁶ Chixjunil li tzꞌi̱banbil saꞌ li Santil Hu, aꞌan musikꞌanbil xban li Dios ut nacꞌanjelac re xcꞌutbal chiku lix ya̱lal. Nacꞌanjelac re kakꞌusbal ut re xqꞌuebal kanaꞌleb ut naxcꞌut chiku chanru nak tocua̱nk saꞌ ti̱quilal.

¹⁷ Li Santil Hu naxcꞌut chiru li nacꞌanjelac chiru li Dios chanru nak ta̱cua̱nk chi tzꞌakal re ru lix yuꞌam ut naxtenkꞌa aꞌan re nak cauresinbilak chi tzꞌakal re xba̱nunquil chixjunil li cha̱bil cꞌanjel.