2 Samuel 8 - Li Santil hu

¹ Mokon chic li rey David quipletic cuiꞌchic riqꞌuineb laj filisteo ut quinumta saꞌ xbe̱neb. Joꞌcan nak queꞌsach xcuanquileb laj filisteo saꞌ li naꞌajej Meteg-ama.

² Chirix chic aꞌan laj David quinumta saꞌ xbe̱neb laj Moab. Quixtusubeb chi yocyo saꞌ chꞌochꞌ ut quixbiseb riqꞌuin cꞌa̱m. Li caꞌcab tusul quixcamsiheb ut li cuanqueb saꞌ li rox tusul incꞌaꞌ quixcamsiheb. Eb li incꞌaꞌ queꞌcamsi̱c queꞌcana rubel xcuanquil laj David ut queꞌxtoj rix lix naꞌajeb.

³ Laj Hadad-ezer, li ralal laj Rehob, aꞌan lix reyeb laj Soba. Nak yo̱ raj chi xic laj Hadad-ezer chire̱chaninquil cuiꞌchic li naꞌajej chire li nimaꞌ Éufrates, laj David quinumta saꞌ xbe̱neb.

⁴ Laj David quixchapeb jun mil riqꞌuin cuukub ciento lix solda̱deb li nequeꞌxic chirix cacua̱y. Ut quixchapeb ajcuiꞌ junmay mil chi cui̱nk li nequeꞌxic chi rokeb. Quixtok li rokeb chixjunileb lix cacua̱yeb. Abanan incꞌaꞌ quixtok rokeb li cacua̱y li joꞌ qꞌuial li teꞌcꞌanjelak re xquelonquil li jun ciento chi carruaje.

⁵ Eb laj Siria li cuanqueb Damasco queꞌchal chixtenkꞌanquil laj Hadad-ezer li rey re Soba. Abanan laj David quinumta saꞌ xbe̱neb laj Siria ut quixcamsiheb cuib xcaꞌcꞌa̱l mil (22,000) chi cui̱nk.

⁶ Chirix aꞌan laj David quixyi̱b xnaꞌajeb li soldados re teꞌcꞌacꞌale̱nk saꞌ li tenamit Damasco. Ut eb laj Siria queꞌcana rubel xcuanquil ut queꞌxtoj rix lix naꞌajeb. Yalak bar co̱ chi pletic laj David, li Ka̱cuaꞌ quitenkꞌan re, re nak us qui-el.

⁷ Laj David quixxoc li chꞌi̱chꞌ oro li nequeꞌxcol cuiꞌ re xchꞌo̱leb li queꞌtaklan saꞌ xbe̱neb lix soldados laj Hadad-ezer ut quixcꞌameb Jerusalén.

⁸ Ut saꞌ li cuib chi tenamit Beta ut Berotai, li queꞌcuan rubel xcuanquil li rey Hadad-ezer, li rey David quixxoc nabal li chꞌi̱chꞌ bronce.

⁹ Ut laj Toi, lix reyeb li cuanqueb saꞌ li tenamit Hamat, quirabi resil nak laj David quinumta saꞌ xbe̱neb chixjunileb lix soldados laj Hadad-ezer.

¹⁰ Joꞌcan nak laj Toi quixtakla laj Joram li ralal re nak tixqꞌue xsahil xchꞌo̱l laj David ut ta̱a̱tinak riqꞌuin saꞌ xya̱lal. Laj Toi quipletic nabal sut riqꞌuin laj Hadad-ezer. Joꞌcan nak quisahoꞌ xchꞌo̱l nak laj David quinumta saꞌ xbe̱neb. Ut quixtakla lix ma̱tan laj David yi̱banbil riqꞌuin oro, plata ut bronce.

¹¹ Li rey David quixkꞌaxtesiheb li ma̱tan aꞌan chiru li Ka̱cuaꞌ, rochben li oro ut li plata li quire̱chani

¹² nak quipletic riqꞌuineb laj Siria, eb laj Moab, eb laj Amón, eb laj filisteo, eb laj Amalec, joꞌ ajcuiꞌ nak quipletic riqꞌuin laj Hadad-ezer li ralal laj Rehob, li quicuan chokꞌ rey aran Soba.

¹³ Kꞌaxal cuiꞌchic naꞌno ru laj David yalak bar nak quisukꞌi chixcamsinquileb laj Siria xban nak quixcamsiheb ajcuiꞌ cuakxaklaju mil (18,000) chi cui̱nk aj Edom saꞌ li ru takꞌa cuan cuiꞌ li atzꞌam.

¹⁴ Li rey David quixyi̱b lix naꞌajeb lix soldados saꞌ chixjunil li naꞌajej Edom. Ut eb li cuanqueb aran queꞌcana rubel xcuanquil laj David. Li Ka̱cuaꞌ quitenkꞌan re laj David chi numta̱c saꞌ xbe̱neb chixjunileb li quicuulac cuiꞌ chi pletic.

¹⁵ Laj David quicuan chokꞌ xreyeb laj Israel ut junelic quitaklan saꞌ xya̱lal ut saꞌ ti̱quilal saꞌ xbe̱neb chixjunileb lix tenamit.

¹⁶ Li nataklan saꞌ xbe̱neb li soldado, aꞌan laj Joab, xyum lix Sarvia. Ut laj Josafat, ralal laj Ahilud, aꞌan li quitzꞌi̱ban re li cꞌaꞌru quicꞌulman.

¹⁷ Laj Sadoc, ralal laj Ahitob, ut laj Ahimelec, ralal laj Abiatar, aꞌan eb laj tij. Ut laj Seraías, aꞌan laj tzꞌi̱b.

¹⁸ Laj Benaía, li ralal laj Joiada, aꞌan li quitaklan saꞌ xbe̱neb laj cereteo ut eb laj peleteo. Eb li ralal laj David, aꞌaneb li ni̱nkeb xcuanquil saꞌ xya̱nkeb.