2 Samuel 7 - Li Santil hu

¹ Laj David ac cuan chic saꞌ rochoch. Ut li Ka̱cuaꞌ Dios quixqꞌueheb chi cua̱nc saꞌ usilal riqꞌuin laj David eb li xicꞌ nequeꞌiloc re, li cuanqueb chi xjun sutam.

² Laj David quixye re li profeta Natán: —¡Qꞌue retal! La̱in cuanquin saꞌ cha̱bil cab yi̱banbil riqꞌuin li cheꞌ chacalteꞌ. Abanan li muheba̱l li cuan cuiꞌ lix Lokꞌlaj Ca̱x li Ka̱cuaꞌ, aꞌan yal riqꞌuin tꞌicr yi̱banbil, chan.

³ Ut laj Natán quixye re: —At rey, ba̱nu chixjunil li cꞌaꞌru cuan saꞌ a̱chꞌo̱l xba̱nunquil, xban nak li Ka̱cuaꞌ Dios cuan a̱cuiqꞌuin, chan.

⁴ Abanan, chiru li kꞌojyi̱n aꞌan li Ka̱cuaꞌ Dios quia̱tinac riqꞌuin laj Natán ut quixye re:

⁵ —Tatxic riqꞌuin laj David laj cꞌanjel chicuu ut ta̱ye re chi joꞌcaꞌin, “Joꞌcaꞌin xye li Ka̱cuaꞌ. At David, ma̱cuaꞌ la̱at li tatyi̱ba̱nk re lin templo re tincua̱nk cuiꞌ.

⁶ Relic chi ya̱l nak la̱in incꞌaꞌ xincuan saꞌ junak cha̱bil cab chalen saꞌ li cutan nak quicuisiheb lin tenamit aran Egipto toj chalen anakcuan. Nincuan ban saꞌ li tabernáculo, li muheba̱l yi̱banbil riqꞌuin tꞌicr.

⁷ Chalen nak xeꞌcuochbeni chak li ralal xcꞌajol laj Israel incꞌaꞌ xinye reheb li yo̱queb chi cꞌamoc be chiruheb nak teꞌxyi̱b junak li templo riqꞌuin chacalteꞌ re tincua̱nk cuiꞌ.”

⁸ Li Dios quixye re laj Natán: —Ta̱ye re laj David laj cꞌanjel chicuu, “Joꞌcaꞌin xye a̱cue li Ka̱cuaꞌ li nimajcual Dios: La̱in quinsicꞌoc a̱cuu nak yo̱cat chak chi iloc carner saꞌ cꞌaleba̱l, ut catinxakab chokꞌ xreyeb lin tenamit Israel.

⁹ La̱in xintenkꞌan a̱cue saꞌ chixjunil li naꞌajej xatcuulac cuiꞌ ut xinkꞌaxtesi saꞌ a̱cuukꞌ chixjunileb li xicꞌ nequeꞌiloc a̱cue. Xinqꞌue a̱cuanquil joꞌ lix cuanquileb li xni̱nkal ru cui̱nk li cuanqueb saꞌ ruchichꞌochꞌ.

¹⁰ La̱in xinqꞌue xnaꞌajeb lin tenamit Israel ut xinqꞌueheb chi cua̱nc aran chi sa saꞌ xchꞌo̱leb. Ma̱ ani ta̱ru̱k ta̱isi̱nk reheb. Chi moco eb li incꞌaꞌ useb xnaꞌleb teꞌxrahobtesiheb joꞌ queꞌxba̱nu chak junxil.

¹¹ Chalen nak xebinxakab chak laj rakol a̱tin chi takla̱nc saꞌ xbe̱neb lin tenamit Israel, nabal li raylal xeꞌxcꞌul xbaneb li xicꞌ nequeꞌiloc reheb. Anakcuan la̱in tatinqꞌue chi hila̱nc riqꞌuin li raylal aꞌin. Incꞌaꞌ chic texchꞌiꞌchꞌiꞌi̱k xbaneb li xicꞌ nequeꞌiloc e̱re. Ut tinqꞌueheb a̱cualal a̱cꞌajol.

¹² Nak ta̱cuulak xkꞌehil nak tatca̱mk, tatxic chi hila̱nc saꞌ xya̱nkeb la̱ xeꞌto̱nil yucuaꞌ. La̱in tinqꞌue chokꞌ a̱cue̱kaj jun reheb la̱ cualal. Ut tinxakab saꞌ xnaꞌaj lix cuanquilal.

¹³ Aꞌan li ta̱yi̱ba̱nk re li templo li tineꞌxlokꞌoni cuiꞌ li tenamit. Ut la̱in tinxakaba̱nk re saꞌ xnaꞌaj lix cuanquil chi junelic.

¹⁴ La̱inak lix yucuaꞌ ut aꞌanak li cualal. Nak tixba̱nu li incꞌaꞌ us, la̱in tinkꞌusuk re, ut tinqꞌue chixtojbal xma̱c, joꞌ nak naxkꞌus ut naxqꞌue chi tzꞌu̱m li ralal junak yucuaꞌbej.

¹⁵ Abanan incꞌaꞌ tincanab ruxta̱nanquil ru joꞌ nak quincanab ruxta̱nanquil ru laj Saúl. Quicuisi saꞌ xcuanquil re nak la̱at chic tat-oc chokꞌ rey.

¹⁶ Junelic teꞌcua̱nk a̱cualal a̱cꞌajol, ut aꞌaneb li teꞌoc chokꞌ rey mokon chi junelic kꞌe cutan. Ut la̱ cuanquil xakxo̱k saꞌ xnaꞌaj chi junelic,” chan li Ka̱cuaꞌ.

¹⁷ Li profeta Natán quixye re laj David chixjunil li cꞌaꞌru quiyeheꞌ re ut li cꞌaꞌru quicꞌutbesi̱c chiru saꞌ visión xban li Ka̱cuaꞌ.

¹⁸ Ut laj David qui-oc saꞌ li muheba̱l li cuan cuiꞌ lix Lokꞌlaj Ca̱x li Ka̱cuaꞌ. Quitijoc ut quixye: —At Ka̱cuaꞌ, at nimajcual Dios, ¿anihin la̱in ut aniheb li cualal incꞌajol nak xaqꞌue li usilal aꞌin cue?

¹⁹ At Ka̱cuaꞌ Dios, cha̱cuu la̱at toj ma̱jiꞌ tzꞌakal li xaye xban nak xaye ajcuiꞌ nak junelic xakxo̱k xcuanquileb li cualal incꞌajol li teꞌcua̱nk mokon. Ma̱ jun cui̱nk naba̱nun re li nacaba̱nu la̱at, at Ka̱cuaꞌ, at nimajcual Dios.

²⁰ ¿Cꞌaꞌ chic ru naru tinye a̱cue? La̱at nacanau chanru lin naꞌleb la̱in aj cꞌanjel cha̱cuu, at Ka̱cuaꞌ, at inDios.

²¹ La̱at xaba̱nu chixjunil li xni̱nkal ru naꞌleb aꞌin joꞌ xaye ut joꞌ xacuaj la̱at. Ut anakcuan la̱at xaye cue re nak la̱in tinnau.

²² At nimajcual Dios, kꞌaxal nim la̱ cuanquilal. Ma̱ jun chic nim xcuanquil joꞌ la̱at. Ma̱ jun chic Dios cuan. Caꞌaj cuiꞌ la̱at, joꞌ ac kabiom resil.

²³ Ma̱ jun chic tenamit cuan saꞌ ruchichꞌochꞌ joꞌ la̱ tenamit Israel. Caꞌaj cuiꞌ aꞌan. At Ka̱cuaꞌ, la̱at xatcoloc reheb re nak teꞌoc chokꞌ a̱tenamit. Xaba̱nu li milagros, li sachba chꞌo̱lej ut li xni̱nkal ru naꞌleb re xcolbaleb, re nak naꞌno̱k ruheb la̱ tenamit. La̱at cat-isin chak reheb saꞌ xya̱nkeb li jalanil tenamit ut lix dioseb nak cacuisiheb chak Egipto. Caba̱nu chixjunil aꞌan xban xra̱baleb.

²⁴ La̱at catsicꞌoc ruheb laj Israel re nak aꞌanakeb la̱ tenamit chi junelic. Ut la̱at, at Ka̱cuaꞌ, la̱atak lix Dioseb.

²⁵ At Ka̱cuaꞌ Dios, chaba̱nu taxak joꞌ xayechiꞌi cue. Ta̱xakab taxak lin cuanquil chi junelic joꞌ ajcuiꞌ lix cuanquileb li cualal incꞌajol joꞌ xaye.

²⁶ Chinima̱k taxak xlokꞌal la̱ cꞌabaꞌ chi junelic ut chixjunileb taxak teꞌyehok re nak la̱at, li nimajcual Dios, la̱at lix Dioseb laj Israel. Ut ta̱xakab taxak saꞌ xnaꞌaj lix cuanquileb li cualal incꞌajol chi junelic.

²⁷ At nimajcual Dios, la̱at li kaDios la̱o aj Israel. La̱at xacꞌutbesi chicuu nak xakxo̱k saꞌ xnaꞌaj lin cuanquil chi junelic. La̱at xaye cue nak eb li cualal incꞌajol teꞌoc chokꞌ rey chi junelic. Joꞌcan nak la̱in aj cꞌanjel cha̱cuu, yo̱quin chixtzꞌa̱manquil cha̱cuu li usilal aꞌin.

²⁸ At Ka̱cuaꞌ, la̱at li nimajcual Dios. Ut la̱ cua̱tin tzꞌakal ya̱l. La̱at xatyechiꞌin li usilal aꞌin cue la̱in laj cꞌanjel cha̱cuu.

²⁹ La̱in nintzꞌa̱ma cha̱cuu nak ta̱cuosobtesiheb li cualal incꞌajol. Junelic xakxo̱k taxak saꞌ xnaꞌaj lix cuanquileb. Osobtesinbilakeb a̱ban chi junelic xban nak xaye nak ta̱cuosobtesiheb, chan laj David.