2 Samuel 6 - Li Santil hu

Nak queꞌxcꞌam li Lokꞌlaj Ca̱x Jerusalén

¹ Laj David quixchꞌutubeb cuiꞌchic laje̱b xcaꞌcꞌa̱l mil (30,000) chi soldados aj Israel, li sicꞌbileb ru.

² Ut quixcꞌameb aran Baala li cuan saꞌ xcue̱nt Judá re nak teꞌxcꞌam lix Lokꞌlaj Ca̱x li Dios, li nequeꞌxya̱ba cuiꞌ xcꞌabaꞌ li nimajcual Dios li nahilan saꞌ xya̱nkeb li querubines.

³ Queꞌrisi li Lokꞌlaj Ca̱x saꞌ rochoch laj Abinadab li cuan saꞌ xbe̱n bol ut queꞌxqꞌue saꞌ xbe̱n jun li carre̱t toj acꞌ. Laj Uza ut laj Ahío, eb li ralal laj Abinadab, yo̱queb chi beresi̱nc re li acꞌ carre̱t.

⁴ Ut laj Ahío cꞌamol be chiru li Lokꞌlaj Ca̱x nak yo̱queb chi xic.

⁵ Laj David ut chixjunileb laj Israel yo̱queb chi xajoc ut yo̱queb chi bicha̱nc chi anchaleb xchꞌo̱l re xqꞌuebal xlokꞌal li Ka̱cuaꞌ ut yo̱queb chi cuajbac. Cuanqueb x-arpa, cuanqueb xsalterios, cuanqueb xtambor, ut cuanqueb xxo̱lb ut yo̱queb ajcuiꞌ chixtꞌochbal li sursu̱quil chꞌi̱chꞌ.

⁶ Nak queꞌcuulac saꞌ li naꞌajej li narisi cuiꞌ rix lix trigo laj Nacón, eb li bo̱yx queꞌxtich rokeb. Ut laj Uza quixchap lix Lokꞌlaj Ca̱x li Dios re nak incꞌaꞌ ta̱tꞌanekꞌ.

⁷ Cꞌajoꞌ nak quijoskꞌoꞌ li Dios riqꞌuin laj Uza, ut quixcamsi xban nak quixchꞌeꞌ li Lokꞌlaj Ca̱x riqꞌuin rukꞌ. Ut aran chixcꞌatk li Lokꞌlaj Ca̱x quicana chi camenak laj Uza.

⁸ Cꞌajoꞌ nak quirahoꞌ xchꞌo̱l laj David xban nak li Ka̱cuaꞌ quixrak xyuꞌam laj Uza. Li naꞌajej aꞌan Pérez-uza queꞌxqꞌue chokꞌ xcꞌabaꞌ toj chalen anakcuan.

⁹ Laj David qui-oc xxiu saꞌ li cutan aꞌan xban li cꞌaꞌru quixba̱nu li Ka̱cuaꞌ ut quixye: —Ma̱min ta̱ru̱k tincꞌam cuiqꞌuin lix Lokꞌlaj Ca̱x li Ka̱cuaꞌ, chan.

¹⁰ Ut incꞌaꞌ chic quixcꞌam li Lokꞌlaj Ca̱x toj Jerusalén saꞌ lix tenamit laj David. Quixtakla ban xcanabanquil saꞌ rochoch laj Obed-edom saꞌ li tenamit Gat.

¹¹ Li Lokꞌlaj Ca̱x quicuan aran oxib po. Ut li Ka̱cuaꞌ quirosobtesi laj Obed-edom joꞌ eb ajcuiꞌ chixjunileb li cuanqueb saꞌ li rochoch.

¹² Quiyeheꞌ resil re li rey David chanru nak li Ka̱cuaꞌ quirosobtesi laj Obed-edom joꞌ ajcuiꞌ chixjunil li cꞌaꞌru cuan re saꞌ xcꞌabaꞌ li Lokꞌlaj Ca̱x. Joꞌcan nak co̱ chirisinquil li Lokꞌlaj Ca̱x saꞌ rochoch laj Obed-edom re tixcꞌam Jerusalén ut kꞌaxal sa saꞌ xchꞌo̱l.

¹³ Nak ac xeꞌxqꞌue cuakib yoc li yo̱queb chi cꞌamoc re li Lokꞌlaj Ca̱x, laj David quixmayeja chiru li Ka̱cuaꞌ jun li bo̱yx ut jun li carner nim xtibel.

¹⁴ Laj David cuan chirix jun li efod yi̱banbil riqꞌuin li cha̱bil tꞌicr lino ut yo̱ chi xajoc chi anchal xchꞌo̱l re xqꞌuebal xlokꞌal li Dios.

¹⁵ Chi joꞌcaꞌin laj David ut chixjunileb li ralal xcꞌajol laj Israel queꞌxcꞌam li Lokꞌlaj Ca̱x. Yo̱queb chixjapbal reheb xban xsahil xchꞌo̱leb ut yo̱queb chixya̱basinquil lix trompeta.

¹⁶ Nak yo̱queb chirocsinquil li Lokꞌlaj Ca̱x Jerusalén, saꞌ lix tenamit laj David, lix Mical lix rabin laj Saúl yo̱ chi iloc saꞌ li ventana. Nak quiril nak laj David yo̱ chi xajoc ut yo̱ chi piscꞌoc re xqꞌuebal xlokꞌal li Ka̱cuaꞌ, xicꞌ quirecꞌa.

¹⁷ Queꞌxcꞌam lix Lokꞌlaj Ca̱x li Ka̱cuaꞌ ut queꞌxqꞌue saꞌ xnaꞌaj saꞌ xyi li muheba̱l li quixyi̱b laj David. Ut laj David quixcꞌat li mayejanbil xul chiru li Ka̱cuaꞌ ut quixqꞌue xmayej re xcꞌambal ribeb saꞌ usilal riqꞌuin li Ka̱cuaꞌ.

¹⁸ Nak laj David ac xrakeꞌ chixqꞌuebal li cꞌatbil mayej ut li mayej re xcꞌambal ribeb saꞌ usilal riqꞌuin li Ka̱cuaꞌ, quixtzꞌa̱ma chiru li Ka̱cuaꞌ li nimajcual Dios nak ta̱rosobtesiheb lix tenamit.

¹⁹ Ut laj David quixjeqꞌui li tzacae̱mk reheb li tenamit. Quixqꞌue li caxlan cua, li pombil tib ut li chaki uvas reheb li junju̱nk chi aj Israel, joꞌ ixk, joꞌ cui̱nk. Ut chixjunileb queꞌco̱eb saꞌ rochocheb.

²⁰ Ut laj David co̱ saꞌ rochoch chixtzꞌa̱manquil chiru li Dios nak ta̱rosobtesiheb li cuanqueb saꞌ li rochoch. Lix Mical qui-el chixcꞌulbal ut quixhob ut quixye re: —Anakcuan qꞌuebil chic a̱lokꞌal, at rey, riqꞌuin li cꞌaꞌru xaba̱nu chiruheb li ixk, lix mo̱seb li nequeꞌcꞌanjelac cha̱cuu. Riqꞌuin li cꞌaꞌru xaba̱nu, xacꞌutbesi a̱cuib joꞌ nequeꞌxba̱nu li incꞌaꞌ nequeꞌxnau xuta̱nac, chan.

²¹ Laj David quixye re: —La̱in xinxajoc re xqꞌuebal xlokꞌal li Ka̱cuaꞌ li quisicꞌoc cuu chokꞌ re̱kaj la̱ yucuaꞌ ut eb li ralal xcꞌajol. Li Ka̱cuaꞌ xinixxakab chi takla̱nc saꞌ xbe̱neb laj Israel, lix tenamit. Joꞌcan nak la̱in tinxajok cuiꞌchic re xqꞌuebal xlokꞌal li Ka̱cuaꞌ.

²² Kꞌaxal cuiꞌchic tincubsi cuib anakcuan chiru xbe̱n cua. Cha̱cuu la̱at ma̱cꞌaꞌak inlokꞌal. Abanan qꞌuebilak inlokꞌal xbaneb li mo̱s ixk li yo̱cat chixyebal, chan.

²³ Lix Mical lix rabin laj Saúl, ma̱ jun lix cocꞌal quicuan chalen nak quicam.