2 Samuel 5 - Li Santil hu

Laj David quixakaba̱c ajcuiꞌ chokꞌ xreyeb laj Israel

¹ Queꞌco̱eb Hebrón chixjunileb li xte̱paleb laj Israel re nak teꞌa̱tinak riqꞌuin laj David. Ut queꞌxye re: —La̱at moco jalanat ta kiqꞌuin. La̱o kechꞌalal kib chi kibil kib, chanqueb.

² Chalen nak toj cua̱nk laj Saúl chokꞌ karey, la̱at catcꞌamoc be chiruheb li soldados aj Israel saꞌ eb li ple̱t. Ut li Ka̱cuaꞌ quixye nak la̱at tat-ilok reheb lix tenamit ut la̱atak lix reyeb, chanqueb.

³ Joꞌcan nak chixjunileb li nequeꞌtaklan saꞌ xya̱nkeb laj Israel queꞌcuulac riqꞌuin li rey David aran Hebrón. Laj David quixba̱nu jun li contrato riqꞌuineb saꞌ xcꞌabaꞌ li Ka̱cuaꞌ. Ut queꞌxqꞌue li aceite saꞌ xjolom ut queꞌxxakab chokꞌ xreyeb laj Israel.

⁴ Laje̱b xcaꞌcꞌa̱l chihab cuan re laj David nak qui-oc chokꞌ rey. Ut caꞌcꞌa̱l chihab quicuan chokꞌ rey.

⁵ Cuukub chihab riqꞌuin cuakib po quicuan Hebrón chokꞌ xreyeb laj Judá. Ut oxlaju xcaꞌcꞌa̱l chihab quicuan Jerusalén chokꞌ xreyeb chixjunileb laj Israel joꞌ eb ajcuiꞌ laj Judá.

⁶ Co̱ ut li rey David aran Jerusalén rochbeneb li cui̱nk li nequeꞌtenkꞌan re. Co̱eb chi pletic riqꞌuineb laj jebuseo li cuanqueb aran. Eb laj jebuseo queꞌxye re laj David: —La̱at incꞌaꞌ tatru̱k chi oc arin xban nak la̱at incꞌaꞌ ta̱cuy usta yal riqꞌuineb li mutzꞌ ut eb li ye̱k rok tatpletik, chanqueb. Queꞌxye chi joꞌcan re xhobbal xban nak queꞌxcꞌoxla nak laj David incꞌaꞌ tixcuy pletic riqꞌuin li tenamit aꞌan.

⁷ Usta ac cauresinbil chi us li tenamit, abanan laj David quinumta saꞌ xbe̱neb ut qui-oc saꞌ li naꞌajej Sión. Toj chalen anakcuan “Xtenamit laj David” nayeheꞌ re li naꞌajej aꞌan.

⁸ Saꞌ li cutan aꞌan laj David quixye: —Li ani ta̱raj ta̱numta̱k saꞌ xbe̱neb laj jebuseo, tento ta̱oc chak cuan cuiꞌ li rok li haꞌ ut tixcamsiheb laj jebuseo, li chanchaneb mutzꞌ ut chanchan ye̱k rokeb, li kꞌaxal xicꞌ nequeꞌcuil, chan laj David. (Chalen aꞌan cuan jun li a̱tin naxye, “Chi moco li mutzꞌ chi moco li ye̱k rok teꞌoc saꞌ lix templo li Ka̱cuaꞌ.”)

⁹ Ut nak ac xre̱chani lix nimal ru tenamit, laj David quicana chi cua̱nc aran Sión ut quixqꞌue chokꞌ xcꞌabaꞌ “Xtenamit laj David”. Ut quixyi̱b li tzꞌac chi xjun sutam lix tenamit. Naticla chak li tzꞌac cuan cuiꞌ jun li cab najt xteram Milo xcꞌabaꞌ ut nacuulac toj saꞌ li tenamit.

¹⁰ Us yo̱ chi e̱lc chiru laj David li cꞌaꞌru naxba̱nu ut yo̱ chi nima̱nc xcuanquil xban nak li nimajcual Dios cuan riqꞌuin ut aꞌan yo̱ chi tenkꞌa̱nc re.

¹¹ Laj Hiram, li rey re li tenamit Tiro, quixtaklaheb lix takl riqꞌuin laj David. Quixtakla ajcuiꞌ li cha̱bil cheꞌ chacalteꞌ ut quixtaklaheb laj pechꞌ ut laj tzꞌac. Queꞌxyi̱b chi cha̱bil li rochoch laj David.

¹² Ut laj David quixtau ru nak li Dios, aꞌan li quisicꞌoc ru chokꞌ rey ut chi takla̱nc saꞌ xya̱nkeb laj Israel. Ut quixtau ajcuiꞌ xya̱lal nak li Dios quixnimobresi xcuanquil xban nak naxraheb lix tenamit Israel.

¹³ Nak qui-el Hebrón, laj David co̱ Jerusalén ut quixcꞌam nabal li ixk li yal queꞌcuan riqꞌuin chi joꞌcan. Ut quixcꞌameb ajcuiꞌ li rixakil. Ut quicuan chic ralal xcꞌajol riqꞌuineb.

¹⁴ Aꞌaneb aꞌin lix cꞌabaꞌeb li ralal li queꞌyoꞌla Jerusalén: laj Samúa, laj Sobab, laj Natán, laj Salomón,

¹⁵ laj Ibhar, laj Elisúa, laj Nefeg, laj Jafía,

¹⁶ laj Elisama, laj Eliada, ut laj Elifelet.

¹⁷ Eb laj filisteo queꞌrabi resil nak laj David quixakaba̱c chokꞌ xreyeb laj Israel. Joꞌcan nak queꞌco̱eb chi pletic riqꞌuin. Laj David quirabi resil nak eb laj filisteo ac yo̱queb chi cha̱lc chi pletic riqꞌuin. Joꞌcan nak co̱ saꞌ li naꞌajej li nequeꞌxcol cuiꞌ ribeb.

¹⁸ Eb laj filisteo queꞌcana saꞌ li ru takꞌa re Refaim.

¹⁹ Laj David quitijoc ut quixye re li Dios: —¿Ma tinxic chi pletic riqꞌuineb laj filisteo? ¿Ma tina̱tenkꞌa chi numta̱c saꞌ xbe̱neb? chan. Ut li Ka̱cuaꞌ quixye re: —Ayu chi pletic riqꞌuineb. La̱in tinkꞌaxtesiheb saꞌ a̱cuukꞌ, chan.

²⁰ Joꞌcan nak laj David co̱ saꞌ li naꞌajej Baal-perazim ut quinumta saꞌ xbe̱neb laj filisteo ut quixye: —Li Ka̱cuaꞌ quixsach ruheb li xicꞌ nequeꞌiloc cue. Chanchan nak xeꞌcꞌameꞌ xban butꞌ, chan. Joꞌcan nak queꞌxqꞌue Baal-perazim chokꞌ xcꞌabaꞌ li naꞌajej aꞌan.

²¹ Eb laj filisteo queꞌe̱lelic chiru laj David ut queꞌxcanab lix yi̱banbil dios nak queꞌco̱eb. Ut laj David ut eb li cuanqueb rochben queꞌxcꞌat lix dioseb.

²² Chirix chic aꞌan, eb laj filisteo queꞌco̱eb cuiꞌchic aran saꞌ li ru takꞌa re Refaim.

²³ Ut laj David quitijoc cuiꞌchic ut quixpatzꞌ re li Dios cꞌaꞌru us tixba̱nu. Ut li Ka̱cuaꞌ quixye re: —Incꞌaꞌ tat-oc chi ubej. Te̱sut rix lix naꞌajeb ut texpletik riqꞌuineb cuanqueb cuiꞌ li cheꞌ bálsamo.

²⁴ Nak ta̱cuabi li ecꞌa̱nc saꞌ rukꞌeb li cheꞌ chanchan yo̱queb chi be̱c li soldados, tatxic chi pletic riqꞌuineb xban nak la̱in tinxic chi ubej ut tinsach xcuanquileb lix solda̱deb laj filisteo, chan li Dios.

²⁵ Ut laj David quixba̱nu joꞌ quixye li Ka̱cuaꞌ. Quixcamsiheb laj filisteo. Naticla saꞌ li tenamit Geba ut quicuulac toj cuan cuiꞌ li tenamit Gezer.