2 Samuel 4 - Li Santil hu

¹ Cꞌajoꞌ nak quixucuac laj Is-boset, li ralal laj Saúl, nak quirabi nak quicamsi̱c laj Abner aran Hebrón. Ut queꞌxucuac ajcuiꞌ chixjunileb li cuanqueb aran Israel.

² Laj Is-boset li ralal laj Saúl cuanqueb cuib li cui̱nk nequeꞌcꞌanjelac chiru. Aꞌaneb li queꞌtaklan saꞌ xbe̱neb li soldados li nequeꞌxic chi pletic re teꞌre̱chani li cꞌaꞌak re ru. Li jun aj Baana xcꞌabaꞌ ut li jun chic aj Recab xcꞌabaꞌ. Ralaleb laj Rimón li quicuan Beerot. Aꞌan eb xcomoneb li ralal xcꞌajoleb laj Benjamín xban nak Beerot, aꞌan cuan saꞌ xcue̱nt li cuanqueb cuiꞌ li ralal xcꞌajol laj Benjamín.

³ (Eb li queꞌcuan Beerot junxil queꞌe̱lelic ut queꞌco̱eb Gitaim ut aran cuanqueb toj chalen anakcuan.)

⁴ Quicuan jun li ralal laj Jonatán, li ralal laj Saúl. Aꞌan laj Mefi-boset xcꞌabaꞌ. O̱b chihab cuan re nak eb li cuanqueb Jezreel queꞌxtakla resil nak queꞌcamsi̱c laj Jonatán ut laj Saúl. Li ixk li na-iloc re laj Mefi-boset quixkꞌalu ut quie̱lelic. Abanan xban nak yo̱ chixse̱banquil rib, quitꞌaneꞌ li chꞌina al saꞌ rukꞌ ut quicana chi incꞌaꞌ chic nabe̱c.

⁵ Laj Recab ut laj Baana, li cuib chi ralal laj Rimón, Beerot xtenamit, queꞌco̱eb saꞌ rochoch laj Is-boset. Queꞌcuulac saꞌ li ho̱nal nak kꞌaxal tik li sakꞌe nak laj Is-boset yo̱ chi hila̱nc.

⁶ Joꞌcan ajcuiꞌ li ixk, li nacꞌacꞌalen re li oqueba̱l, quicube xcuara nak yo̱ chi tzꞌiloc trigo. Joꞌcan nak laj Recab ut laj Baana li ri̱tzꞌin queꞌoc saꞌ li cab ut ma̱ ani qui-iloc reheb.

⁷ Nak queꞌoc saꞌ li cab, laj Is-boset yo̱ chi cua̱rc saꞌ xcuarib. Queꞌoc saꞌ li naꞌajej li yo̱ cuiꞌ chi cua̱rc ut queꞌxcamsi. Queꞌxset lix cux ut queꞌxcꞌam lix jolom chirixeb nak co̱eb. Queꞌbe̱c chixjunil li kꞌojyi̱n saꞌ li be li naxic Arabá.

⁸ Queꞌxcꞌam lix jolom li camenak re teꞌxkꞌaxtesi re li rey David aran Hebrón. Queꞌxye re laj David: —At rey, xkacꞌam chak chokꞌ a̱cue lix jolom laj Is-boset li ralal laj Saúl, li xicꞌ qui-iloc a̱cue li quixyal a̱camsinquil. Abanan saꞌ li cutan aꞌin li Dios quixqꞌue chixtojbal rix lix ma̱c laj Saúl joꞌ eb ajcuiꞌ li ralal xcꞌajol, chanqueb.

⁹ Laj David quichakꞌoc ut quixye reheb: —Saꞌ xcꞌabaꞌ li Ka̱cuaꞌ li nimajcual Dios, li quicoloc cue chiru li raylal, la̱in ninye e̱re:

¹⁰ —Nak cuanco aran Siclag, quicuulac cuiqꞌuin li cui̱nk chixyebal cue nak quicam laj Saúl. Saꞌ xchꞌo̱l aꞌan nak cha̱bil esil li tixye cue. Saꞌ xchꞌo̱l aꞌan nak ta̱sahokꞌ inchꞌo̱l chirabinquil nak camenak chic laj Saúl. Abanan la̱in xintakla xchapbal ut xcamsinquil re xtojbal rix li esilal li quixye cue.

¹¹ Joꞌcan ajcuiꞌ tinba̱nu e̱re la̱ex xban nak kꞌaxal cuiꞌchic yibru xeba̱nu nak xex-oc saꞌ li rochoch li cui̱nk aꞌin ut xecamsi nak yo̱ chi cua̱rc. La̱in texinqꞌue chixtojbal e̱ma̱c joꞌ e̱cꞌulub xcꞌulbal xban nak xecamsi li cui̱nk aꞌin chi ma̱cꞌaꞌ xma̱c. Tintakla e̱camsinquil, chan.

¹² Ut laj David quixye reheb li queꞌcꞌanjelac chiru nak teꞌxcamsiheb laj Recab ut laj Baana. Queꞌxcamsiheb ut queꞌrisi li rokeb ut li rukꞌeb ut queꞌxtꞌuyub chixcꞌatk li haꞌ li cuan aran Hebrón. Chirix aꞌan, queꞌxcꞌam lix jolom laj Is-boset ut queꞌxmuk saꞌ li mukleba̱l li quimukeꞌ cuiꞌ laj Abner aran Hebrón.