2 Samuel 24 - Li Santil hu

¹ Quichal cuiꞌchic xjoskꞌil li Ka̱cuaꞌ Dios saꞌ xbe̱neb laj Israel. Joꞌcan nak quixqꞌue xjoskꞌil laj David saꞌ xbe̱neb. Quiyeheꞌ re laj David nak ta̱rajlaheb chixjunileb laj Israel ut eb laj Judá.

² Joꞌcan nak li rey David quixye re laj Joab li kꞌaxal nim xcuanquil saꞌ xbe̱neb li soldados: —Tatxic a̱cuochbeneb chixjunileb li nequeꞌtaklan saꞌ xbe̱neb li soldados. Te̱rajla chixjunileb li cuanqueb saꞌ li naꞌajej Israel. Naticla chak saꞌ li tenamit Dan ut nacuulac toj saꞌ li tenamit Beerseba. Nacuaj xnaubal jarubeb li cristian, chan.

³ Laj Joab quixye re: —At rey, aꞌ taxak li Dios chiqꞌuehok re chi ta̱mc chi nabal eb laj Israel. Ut ta̱cuileb taxak chixjunileb. Abanan nacuaj xpatzꞌbal a̱cue cꞌaꞌut nak nasahoꞌ a̱chꞌo̱l chirajlanquileb laj Israel, chan.

⁴ Abanan li rey quixpuersi laj Joab ut eb li nequeꞌtaklan saꞌ xbe̱neb li soldados chixba̱nunquil. Joꞌcan nak queꞌel riqꞌuin li rey ut queꞌco̱eb chirajlanquileb chixjunileb laj Israel.

⁵ Queꞌnumeꞌ jun pacꞌal li nimaꞌ Jordán ut queꞌxyi̱b lix muheba̱leb saꞌ li sur re li tenamit Aroer. Li tenamit aꞌan cuan saꞌ xyi li ru takꞌa saꞌ xjayal li cuib chi tenamit Gad ut Jazer.

⁶ Chirix aꞌan queꞌco̱eb saꞌ eb li tenamit Galaad ut Hodsi saꞌ lix naꞌajeb laj hititas. Nak queꞌel aran queꞌco̱eb saꞌ li tenamit Dan-jaán. Ut chirix aꞌan queꞌco̱eb Sidón ut saꞌ eb li naꞌajej li cuanqueb chi xjun sutam.

⁷ Mokon chic, queꞌco̱eb saꞌ li tenamit Tiro, li kꞌaxal cau rib chi pletic. Ut queꞌco̱eb saꞌ chixjunileb lix tenamiteb laj heveo ut eb laj cananeo. Ut queꞌco̱eb saꞌ li tenamit Beerseba, li cuan saꞌ xcue̱nt Judá ut queꞌcuulac toj Neguev.

⁸ Nak ac xeꞌnumeꞌ rajlanquil chixjunileb li tenamit, queꞌsukꞌi cuiꞌchic Jerusalén. Bele̱b po riqꞌuin junmay cutan queꞌxnumsi chixbeninquil xsaꞌ chixjunil li tenamit.

⁹ Ut laj Joab quixye re li rey David jarubeb li cristian. Cuakxakib ciento mil chi cui̱nk cuanqueb Israel cauheb rib chi pletic. Ut o̱b ciento mil chi cui̱nk cuanqueb Judá.

¹⁰ Nak ac queꞌajla̱c chixjunileb laj Israel, quiyotꞌeꞌ xchꞌo̱l laj David. Quitijoc ut quixye re li Dios: —At Ka̱cuaꞌ, nimla ma̱c li xinba̱nu la̱in. Nintzꞌa̱ma cha̱cuu nak ta̱cuy ta̱sach taxak lin ma̱c. Xma̱cꞌaꞌil innaꞌleb xinba̱nu cuiꞌ, chan.

¹¹ Cuulajak chic, nak ac xcuacli laj David, li Ka̱cuaꞌ quia̱tinac riqꞌuin li profeta Gad, li naqꞌuehoc xnaꞌleb laj David.

¹² Quixye re: —Tatxic riqꞌuin laj David ut ta̱ye re, “Joꞌcaꞌin xye li Ka̱cuaꞌ. Tinye a̱cue oxib pa̱y ru li raylal naru tinba̱nu. Ta̱sicꞌ ru li bar cuan ta̱cuaj la̱at tinba̱nu”, chan li Dios.

¹³ Laj Gad co̱ riqꞌuin laj David ut quixye re: —¿Cꞌaꞌru ta̱cuaj tixba̱nu li Ka̱cuaꞌ? ¿Ma ta̱cuaj nak ta̱cua̱nk cuukub chihab li cueꞌej saꞌ la̱ tenamit? ¿Malaj ut ta̱cuaj nak tate̱lelik oxibak po chiruheb li xicꞌ nequeꞌiloc a̱cue? ¿Malaj ut ta̱cuaj nak teꞌca̱mk li tenamit xban li caki yajel chiru oxib cutan? Cꞌoxla chi us cꞌaꞌru ta̱cuaj ut ye cue cꞌaꞌru tinye re li Ka̱cuaꞌ, chan laj Gad.

¹⁴ Laj David quixye: —Kꞌaxal ra saꞌ inchꞌo̱l ut incꞌaꞌ nintau cꞌaꞌru tinba̱nu. Abanan takacanab kib saꞌ rukꞌ li Dios xban nak nim li rusilal. Incꞌaꞌ nakaj nak totꞌanekꞌ saꞌ rukꞌeb li xicꞌ nequeꞌiloc ke, chan laj David.

¹⁵ Joꞌcan nak li Ka̱cuaꞌ quixtakla li caki yajel saꞌ xbe̱neb laj Israel saꞌ li ekꞌela aꞌan toj quicuulac li ho̱nal li quixye li Ka̱cuaꞌ. Queꞌcam laje̱b xca̱cꞌa̱l mil (70,000) chi cui̱nk. Quixtiquib chak saꞌ li tenamit Dan ut quicuulac toj saꞌ li tenamit Beerseba.

¹⁶ Oc raj re chixsachbal ru li tenamit Jerusalén lix ángel li Dios, abanan quiyotꞌeꞌ xchꞌo̱l li Dios chirilbal li raylal yo̱queb chixcꞌulbal. Ut li Dios quixye re li ángel li yo̱ chi camsi̱nc reheb: —Tzꞌakal li xaba̱nu. Ma̱rahobtesiheb chic, chan. Saꞌ li ho̱nal aꞌan lix ángel li Dios cuan chire li naꞌajej li narisi cuiꞌ rix li trigo laj Arauna laj jebuseo.

¹⁷ Laj David quiril li ángel li yo̱ chi camsi̱nc reheb li cristian ut quixye re li Dios: —At Ka̱cuaꞌ, la̱in xinba̱nun re li ma̱usilal aꞌin. La̱in cuan inma̱c. Eb li cristian aꞌin ma̱cꞌaꞌeb xma̱c. Chanchaneb li carner. Nintzꞌa̱ma cha̱cuu nak ta̱qꞌue li raylal saꞌ inbe̱n la̱in ut saꞌ xbe̱neb li cualal incꞌajol, chan.

¹⁸ Saꞌ ajcuiꞌ li cutan aꞌan laj Gad quicuulac riqꞌuin laj David ut quixye re: —Tatxic saꞌ li naꞌajej li narisi cuiꞌ rix lix trigo laj Arauna laj jebuseo. Ut aran ta̱yi̱b jun li artal re xlokꞌoninquil li Ka̱cuaꞌ, chan.

¹⁹ Joꞌcan nak li rey David co̱ chixba̱nunquil li cꞌaꞌru quiyeheꞌ re xban laj Gad, joꞌ quitakla̱c cuiꞌ xban li Ka̱cuaꞌ.

²⁰ Laj Arauna quiril nak li rey David ut eb li nequeꞌtenkꞌan re yo̱queb chak chi cha̱lc riqꞌuin. Qui-el ut quixcuikꞌib rib saꞌ chꞌochꞌ chiru li rey David.

²¹ Laj Arauna quixye: —At rey, ¿cꞌaꞌ raj ru ta̱cuaj nak xatchal chicuilbal la̱in aj cꞌanjel cha̱cuu? chan. Laj David quixye re: —La̱in tincuaj xlokꞌbal la̱ naꞌaj li nacacuisi cuiꞌ rix la̱ trigo. Tinyi̱b jun li artal arin re xlokꞌoninquil li Ka̱cuaꞌ Dios re nak teꞌxcanab ca̱mc li tenamit, chan.

²² Laj Arauna quixye re: —At rey, ba̱nu joꞌ nacacꞌoxla nak us xba̱nunquil. Qꞌue la̱ mayej chiru li Ka̱cuaꞌ la̱ Dios. Naru ta̱camsi li cuib chi bo̱yx aꞌin chokꞌ re la̱ cꞌatbil mayej. Ut li cheꞌ li naqꞌueman saꞌ xcuxeb ta̱cꞌanjelak re la̱ siꞌ joꞌ ajcuiꞌ lix cheꞌel li naꞌajej aꞌin, chan.

²³ Laj Arauna quixqꞌue chixjunil re li rey David ut quixye re: —Chixcꞌulak taxak li Ka̱cuaꞌ la̱ mayej, chan.

²⁴ Li rey David quixye re: —Incꞌaꞌ tincꞌul yal chi joꞌcan. Incꞌaꞌ naru tinmayeja chiru li Ka̱cuaꞌ li incꞌaꞌ xintoj rix la̱in, chan. Joꞌcan nak quixlokꞌ li naꞌajej li narisi cuiꞌ rix lix trigo laj Arauna, joꞌ eb ajcuiꞌ lix bo̱yx. Laje̱b roxcꞌa̱l (50) chi tumin plata quixqꞌue re.

²⁵ Quixyi̱b lix artal laj David saꞌ li naꞌajej aꞌan. Quixqꞌue lix cꞌatbil mayej. Ut quixqꞌue lix mayej re xcꞌambaleb rib saꞌ usilal riqꞌuin li Ka̱cuaꞌ. Li Ka̱cuaꞌ quirabi li cꞌaꞌru queꞌxtzꞌa̱ma chiru ut quirisi li caki yajel saꞌ xbe̱neb laj Israel.