2 Samuel 23 - Li Santil hu

¹ Riqꞌuin li a̱tin aꞌin quixrak a̱tinac laj David: Aꞌan aꞌin li a̱tin li quixye laj David li ralal laj Isaí. Aꞌin li ra̱tin laj David li quitaksi̱c xcuanquil xban li Ka̱cuaꞌ. Aꞌin ra̱tin li rey li quisiqꞌueꞌ ru xban li Ka̱cuaꞌ, lix Dios laj Jacob. Aꞌan li quixbicha nabal li bich reheb laj Israel.

² “Lix musikꞌ li Ka̱cuaꞌ Dios naa̱tinac cuiqꞌuin. Joꞌcan nak ninye li ra̱tin.

³ Lix Dioseb laj Israel quia̱tinac. Li nacoloc reheb laj Israel quixye cue: ‘Ta̱cua̱nk junak ti̱c xchꞌo̱l ta̱takla̱nk saꞌ xbe̱neb li tenamit. Li jun aꞌan ta̱cua̱nk xcuanquil saꞌ xbe̱neb li tenamit ut tixxucua ru li Dios.

⁴ Li rey aꞌan chanchanak li sakꞌe na-el chak ekꞌela nak ma̱cꞌaꞌ li chok saꞌ li choxa. Chanchanak li hab li naxqꞌue chi mokc li pim saꞌ li chꞌochꞌ.’

⁵ Usta ma̱cuaꞌ joꞌcaneb li cualal incꞌajol riqꞌuin li Dios, abanan li Dios quixba̱nu li contrato cuiqꞌuin ut xakxo̱k xcuanquil chi junelic. Aꞌan xyehoc re chixjunil li cꞌaꞌak re ru aꞌin, ut tento ta̱uxma̱nk usta toj ma̱jiꞌ nacꞌulman. Ninnau nak laj Colol cue tixba̱nu li cꞌaꞌru nacuaj.

⁶ Abanan eb li nequeꞌxba̱nu li ma̱usilal chanchaneb li qꞌuix li michꞌbil ut tzꞌekta̱nanbil. Ut ma̱ ani naru nachꞌeꞌoc re riqꞌuin li rukꞌ.

⁷ Li ani nachꞌeꞌoc re naxba̱nu riqꞌuin xchꞌi̱chꞌ malaj ut riqꞌuin xla̱ns. Nequeꞌxqꞌue xxamlel ut aran na-osoꞌ. Joꞌcaꞌin nak teꞌosokꞌ li nequeꞌxba̱nu ma̱usilal.”

Lix cꞌabaꞌeb lix soldado laj David li cauheb rib chi pletic

⁸ Aꞌaneb aꞌin lix cꞌabaꞌeb lix soldados laj David, li kꞌaxal cauheb xchꞌo̱l chi pletic. Li xbe̱n, aꞌan laj Joseb-basebet, Tacmón xtenamit. Nequeꞌxye ajcuiꞌ Adino re. Aꞌan li kꞌaxal nim xcuanquil saꞌ xbe̱neb li oxibeb li cauheb xchꞌo̱l chi pletic. Saꞌ jun li ple̱t quixcamsiheb cuakxakib ciento chi cui̱nk riqꞌuin lix la̱ns.

⁹ Li xcab, aꞌan laj Eleazar li ralal laj Dodo aj ahohíta. Laj Eleazar, aꞌan jun saꞌ xya̱nkeb li oxibeb li cauheb xchꞌo̱l chi pletic li queꞌcuan rochben laj David nak queꞌpletic riqꞌuineb laj filisteo aran Pasdamim. Saꞌ li ple̱t aꞌan eb laj Israel queꞌe̱lelic chiruheb laj filisteo.

¹⁰ Abanan laj Eleazar incꞌaꞌ quie̱lelic. Quipletic ban riqꞌuineb toj retal quilub li rukꞌ ut quiletz lix chꞌi̱chꞌ saꞌ li rukꞌ. Saꞌ li cutan aꞌan li Ka̱cuaꞌ quixkꞌaxtesiheb laj filisteo saꞌ rukꞌ ut eb laj Israel queꞌsukꞌi yal re xxocbal li cꞌaꞌak re ru xeꞌre̱chani saꞌ li ple̱t.

¹¹ Li rox, aꞌan laj Sama li ralal laj Age laj ararita. Eb laj filisteo queꞌxchꞌutub ribeb aran Lehi saꞌ jun chꞌina naꞌajej aubil cuiꞌ jun si̱ril que̱nkꞌ. Li soldados aj Israel queꞌe̱lelic chiruheb laj filisteo.

¹² Abanan laj Sama incꞌaꞌ quie̱lelic. Quicana ban saꞌ xnaꞌaj li acui̱mk ut quixcamsiheb laj filisteo. Li Dios quitenkꞌan re chi numta̱c saꞌ xbe̱neb.

¹³ Saꞌ xkꞌehil li kꞌoloc oxib reheb li laje̱b xcaꞌcꞌa̱l li nequeꞌtaklan queꞌco̱eb riqꞌuin laj David saꞌ li ochoch pec li cuan Adulam. Eb lix muheba̱leb laj filisteo cuan saꞌ li ru takꞌa re Refaim.

¹⁴ Saꞌ li cutan aꞌan laj David cuan saꞌ li naꞌajej li nequeꞌxcol cuiꞌ ribeb. Ut cuan jun xnaꞌajeb li soldados aj filisteo aran Belén.

¹⁵ Laj David quixye nak ta̱raj ru li rucꞌa. Quixye: —Us raj cuan ta junak tixcꞌam chak cuucꞌa saꞌ li becbil haꞌ li cuan chire li oqueba̱l re li tenamit Belén, chan.

¹⁶ Li oxib chi cui̱nk li cauheb rib chi pletic, queꞌnumeꞌ saꞌ lix naꞌajeb laj filisteo. Queꞌrisi li haꞌ saꞌ li becbil haꞌ li cuan chire li oqueba̱l re Belén. Queꞌxcꞌam ut queꞌxqꞌue re laj David. Abanan laj David incꞌaꞌ quirucꞌ. Quixhoy ban li haꞌ re xmayejanquil chiru li Dios.

¹⁷ Ut quixye: —At Ka̱cuaꞌ, ma̱min ta̱ru̱k tincuucꞌ li haꞌ aꞌin. Chanchan raj nak tincuucꞌ xquiqꞌueleb li cui̱nk aꞌin xban nak xeꞌxkꞌaxtesi raj lix yuꞌameb chi ca̱mc nak queꞌco̱eb chixcꞌambal li haꞌ chokꞌ cue, chan. Ut laj David incꞌaꞌ quirucꞌ li haꞌ. Aꞌan aꞌin li queꞌxba̱nu li oxib chi cui̱nk li cauheb xchꞌo̱l chi pletic.

¹⁸ Laj Abisai, li ri̱tzꞌin laj Joab, aꞌan li nataklan saꞌ xbe̱neb li laje̱b xcaꞌcꞌa̱l. Aꞌan lix yum lix Sarvia. Laj Abisai quixcamsiheb oxib ciento chi cui̱nk. Joꞌcan nak quiniman xcuanquil joꞌ li oxibeb li cauheb rib chi pletic.

¹⁹ Laj Abisai, aꞌan li kꞌaxal naꞌno ru saꞌ xya̱nkeb li laje̱b xcaꞌcꞌa̱l. Aꞌan quicꞌamoc be saꞌ xya̱nkeb. Abanan lix cuanquil incꞌaꞌ quixtau lix cuanquil li oxibeb li cauheb rib chi pletic.

²⁰ Joꞌcan ajcuiꞌ laj Benaía naꞌno ru. Laj Benaía, aꞌan li ralal laj Joiada li chalenak saꞌ li tenamit Cabseel. Cau xchꞌo̱l laj Benaía ut nabal li cꞌaꞌru xba̱nu xban xcacuilal xchꞌo̱l. Quixcamsi cuibeb li ralal laj Ariel aj Moab. Saꞌ jun li cutan laj Benaía quicube saꞌ jun chamal jul nak quixcamsi jun li cakcoj nak yo̱ chak chi tꞌanecꞌ saꞌ choxa li nieve li chanchan li ratzꞌam que.

²¹ Quixcamsi ajcuiꞌ jun li cui̱nk aj Egipto. Li cui̱nk aꞌan kꞌaxal najt rok ut cuan xla̱ns saꞌ rukꞌ. Laj Benaía quixchap jun cheꞌ ut qui-oc chi pletic riqꞌuin toj retal quixmakꞌ lix la̱ns chiru. Ut riqꞌuin ajcuiꞌ li la̱ns aꞌan quixcamsi laj Egipto.

²² Aꞌan li quixba̱nu laj Benaía li ralal laj Joiada. Ut riqꞌuin aꞌan quiqꞌueheꞌ xcuanquil saꞌ xya̱nkeb li oxibeb li cauheb rib chi pletic.

²³ Quiqꞌueheꞌ xcuanquil saꞌ xya̱nkeb li laje̱b xcaꞌcꞌa̱l. Abanan moco joꞌ ta li oxibeb li kꞌaxal ni̱nkeb xcuanquil. Laj David quixqꞌue laj Benaía chi takla̱nc saꞌ xbe̱neb li soldados li nequeꞌcꞌacꞌalen re.

²⁴ Aꞌaneb aꞌin li cuanqueb saꞌ xya̱nkeb li laje̱b xcaꞌcꞌa̱l chi soldados: laj Asael li ri̱tzꞌin laj Joab; laj Elhanán li ralal laj Dodo, Belén xtenamit;

²⁵ laj Sama, Harod xtenamit; laj Elica, Harod xtenamit;

²⁶ laj Heles, Paltit xtenamit, laj Ira li ralal laj Iques, Tecoa xtenamit;

²⁷ laj Abiezer, Anatot xtenamit; laj Mebunai, Husah xtenamit;

²⁸ laj Salmón, Ahoh xtenamit; laj Maharai, Netofa xtenamit;

²⁹ laj Heleb, li ralal laj Baana, Netofa xtenamit; laj Itai li ralal laj Ribai, Gabaa xtenamit li cuan saꞌ xcue̱nt lix naꞌajeb li ralal xcꞌajol laj Benjamín;

³⁰ laj Benaía, Piratón xtenamit; laj Hidai, aꞌan chalenak cuan cuiꞌ li rok haꞌ li cuan Gaas;

³¹ laj Abi-albón, Arabá xtenamit; laj Azmavet, Bahurim xtenamit;

³² laj Eliaba, Saalbón xtenamit; eb li ralal laj Jasén; laj Jonatán,

³³ li ralal laj Sama, Arar xtenamit; laj Ahíam li ralal laj Sarar, Arar xtenamit;

³⁴ laj Elifelet li ralal laj Ahasbai, li ralal laj Maaca; laj Eliam li ralal laj Ahitofel, Gilón xtenamit;

³⁵ laj Hezrai, Carmel xtenamit; laj Paarai, Arba xtenamit;

³⁶ laj Igal li ralal laj Natán, Soba xtenamit; laj Bani, Gad xtenamit;

³⁷ laj Selec, Amón xtenamit; laj Naharai, Beerot xtenamit, aꞌan li nacꞌamoc re lix chꞌi̱chꞌ laj Joab lix yum lix Sarvia;

³⁸ laj Ira, Itra xtenamit; laj Gareb, Itra xtenamit;

³⁹ ut laj Urías, laj heteo. Chixjunileb aꞌin cuanqueb cuuklaju xcaꞌcꞌa̱l (37).