2 Samuel 22 - Li Santil hu

Laj David quixlokꞌoni li Ka̱cuaꞌ riqꞌuin lix bich xban nak quicoleꞌ chiruheb li xicꞌ nequeꞌiloc re

¹ Aꞌan aꞌin li bich li quixbicha laj David re xlokꞌoninquil li Ka̱cuaꞌ xban nak li Ka̱cuaꞌ quixcol aꞌan chiru laj Saúl ut chiruheb chixjunileb li xicꞌ nequeꞌiloc re:

² Li Ka̱cuaꞌ, aꞌan li na-iloc cue. Aꞌan li nacoloc cue. Chanchan jun sako̱nac bar nincol cuiꞌ cuib.

³ Li Ka̱cuaꞌ, aꞌan lin Dios. Aꞌan li nacoloc cue. Cau inchꞌo̱l riqꞌuin. Chanchan li chꞌi̱chꞌ li nincol cuiꞌ cuib. Aꞌan nacoloc cue riqꞌuin xnimal xcuanquil. Chanchan jun naꞌajej najt xteram bar ninmuk cuiꞌ cuib. Aꞌan li nacoloc cue chiru li ra xi̱cꞌ.

⁴ Tinqꞌue xlokꞌal li Ka̱cuaꞌ xban nak xcꞌulub nak ta̱qꞌuehekꞌ xlokꞌal. Tinya̱ba xcꞌabaꞌ li Ka̱cuaꞌ ut aꞌan ta̱colok cue chiruheb li xicꞌ nequeꞌiloc cue.

⁵ Chanchan ac ca̱mc cue xban li ma̱usilal queꞌxba̱nu cue. Chanchan lix cacuil rok li palau li ma̱usilal nak xchal saꞌ inbe̱n ut xqꞌue inxiu.

⁶ Chanchan nak li ca̱mc yo̱ chi numta̱c saꞌ inbe̱n. Ut chanchan nak xeꞌxqꞌue li raꞌal chokꞌ cue re tineꞌxcamsi.

⁷ Nak kꞌaxal ra cuanquin, quinya̱ba xcꞌabaꞌ li Ka̱cuaꞌ. Ut li Ka̱cuaꞌ quirabi lin tij toj saꞌ lix templo. Quirabi nak quinjap cue chixtzꞌa̱manquil intenkꞌanquil chiru.

⁸ Li ruchichꞌochꞌ qui-ecꞌan saꞌ xnaꞌaj. Ut qui-ecꞌan ajcuiꞌ saꞌ xnaꞌaj li nacu̱tun re li choxa xban nak yo̱ xjoskꞌil li Ka̱cuaꞌ.

⁹ Chanchan nak qui-el li sib saꞌ ruꞌuj. Chanchan nak qui-el chak xam saꞌ re, re sachoc. Chanchan li ru xam lochlo xxamlel.

¹⁰ Chanchan nak quixte li choxa ut quicube saꞌ ruchichꞌochꞌ. Ut cuan chak li kꞌeki chok rubel rok.

¹¹ Co̱ saꞌ junpa̱t chirix jun li querubín. Quichal saꞌ li ikꞌ li chanchan cuan xxicꞌ.

¹² Quixmuk rib saꞌ li kꞌeki chok. Sutsu xban li kꞌeki chok, li chok li naqꞌuehoc re li hab.

¹³ Xban nak nalemtzꞌun lix lokꞌal, chanchan nak narepoc li rakꞌ ca̱k.

¹⁴ Chanchan nak namok li ca̱k nak quia̱tinac li Ka̱cuaꞌ chi cau xya̱b xcux. Ut qui-abi̱c xya̱b xcux li nimajcual Dios.

¹⁵ Chanchan nak narepoc li ca̱k nak quixcut lix tzimaj. Quixsach xnaꞌlebeb li xicꞌ nequeꞌiloc cue ut quixchaꞌchaꞌi ruheb.

¹⁶ Nak li Ka̱cuaꞌ quikꞌusuc, quicꞌutun li chꞌochꞌ rubel li palau. Ut quicana chi cutanquil li nacu̱tun re li ruchichꞌochꞌ. Chanchan yal apunbil quixba̱nu re.

¹⁷ Toj takecꞌ quixqꞌue chak li rukꞌ cue ut quinrisi saꞌ li raylal. Chanchan nak quinrisi saꞌ xchamal li palau.

¹⁸ Quinixcol chiruheb li xicꞌ nequeꞌiloc cue, li kꞌaxal cauheb rib. Quinixcol chiruheb, usta kꞌaxal cau xmetzꞌe̱uheb chicuu la̱in.

¹⁹ Nak cuanquin saꞌ raylal queꞌchal chi pletic cuiqꞌuin eb li xicꞌ nequeꞌiloc cue. Abanan li Ka̱cuaꞌ quinixtenkꞌa.

²⁰ Quinixtenkꞌa re nak ma̱ ani chic ta̱chꞌiꞌchꞌiꞌi̱nk cue. Quinixcol xban nak sa saꞌ xchꞌo̱l cuiqꞌuin.

²¹ Li Ka̱cuaꞌ xqꞌue inkꞌajca̱munquil xban nak ti̱c inchꞌo̱l chiru. Li Ka̱cuaꞌ x-osobtesin cue xban nak ma̱cꞌaꞌ inma̱c.

²² La̱in xinba̱nu li cꞌaꞌru naxye saꞌ lix chakꞌrab. Ut incꞌaꞌ xintzꞌekta̱na li Ka̱cuaꞌ.

²³ La̱in ninba̱nu chixjunil lix chakꞌrab li Ka̱cuaꞌ. Ut incꞌaꞌ ninkꞌet lin taklanquil xban.

²⁴ La̱in incꞌaꞌ xinma̱cob chiru li Ka̱cuaꞌ. Ut incꞌaꞌ xinba̱nu li ma̱usilal.

²⁵ Joꞌcan nak li Ka̱cuaꞌ naxqꞌue inkꞌajca̱munquil aꞌ yal chanru xti̱quilal inchꞌo̱l. Naxqꞌue inkꞌajca̱munquil xban nak naxnau nak ma̱cꞌaꞌ inma̱c chiru.

²⁶ At Ka̱cuaꞌ, la̱at nacacuuxta̱na ru li ani na-uxta̱nan u. Ut kꞌaxal cha̱bilat riqꞌuineb li nequeꞌxba̱nu li us.

²⁷ La̱at nacacuosobtesiheb li ti̱queb xchꞌo̱l cha̱cuu. Aban li incꞌaꞌ useb xnaꞌleb cau nacakꞌuseb.

²⁸ La̱at nacatcoloc reheb li tenamit li nequeꞌxcubsi ribeb cha̱cuu. Abanan nacacubsiheb xcuanquil li nequeꞌxnimobresi ribeb cha̱cuu.

²⁹ At Ka̱cuaꞌ Dios, la̱at li nacatcutanobresin re lin cꞌaꞌux. Niquina̱cuisi saꞌ kꞌojyi̱n ut niquina̱qꞌue saꞌ cutan.

³⁰ La̱at nacatqꞌuehoc xcacuilal inchꞌo̱l chi pletic riqꞌuineb li xicꞌ nequeꞌiloc cue. Ut la̱at nacatqꞌuehoc incacuilal chi numecꞌ saꞌ xbe̱neb li tzꞌac li sutsu̱queb cuiꞌ.

³¹ Chixjunil li cꞌaꞌru naxba̱nu li Ka̱cuaꞌ, aꞌan cha̱bil ut tzꞌakal re ru. Ut li cꞌaꞌru naxyechiꞌi ke, nakanau chi tzꞌakal nak tixqꞌue ke. Li Dios naxtenkꞌaheb li ani cauheb xchꞌo̱l riqꞌuin.

³² ¿Ma cuan ta biꞌ chic junak Dios joꞌ li kaDios la̱o? ¿Ma incꞌaꞌ ta biꞌ caꞌaj cuiꞌ li kaDios naru nacoloc ke?

³³ Li Ka̱cuaꞌ Dios, aꞌan li naqꞌuehoc incacuilal. Ut aꞌan li nacꞌutuc re lin be chicuu.

³⁴ Aꞌan na-iloc cue yalak bar ninnumeꞌ re nak ma̱cꞌaꞌ nincꞌul. Chanchanin li quej li naa̱linac yalak bar saꞌ qꞌuicheꞌ.

³⁵ Li Ka̱cuaꞌ natzoloc cue re nak tinnau pletic ut naxqꞌue inmetzꞌe̱u chi cutuc riqꞌuin li tzimaj yi̱banbil riqꞌuin bronce.

³⁶ At Ka̱cuaꞌ, la̱at nacatcoloc cue, ut xban xnimal la̱ cuusilal xniman incuanquil.

³⁷ Junelic niquina̱tenkꞌa saꞌ lin yuꞌam. Chanchan nak xanimobresi ru li be chicuu re nak incꞌaꞌ ta̱jolcꞌok li cuok.

³⁸ Xincua̱linaheb li xicꞌ nequeꞌiloc cue toj retal xinnumta saꞌ xbe̱neb. Incꞌaꞌ xincanabeb toj xinnumta saꞌ xbe̱neb.

³⁹ La̱in xinchoy xcamsinquileb re nak incꞌaꞌ chic teꞌcuacli̱k. Xeꞌtꞌaneꞌ ban chi cuok.

⁴⁰ La̱at xatqꞌuehoc inmetzꞌe̱u re tinpletik. La̱at xakꞌaxtesiheb li xicꞌ nequeꞌiloc cue rubel incuanquil.

⁴¹ La̱at xakꞌaxtesiheb saꞌ cuukꞌ li xicꞌ nequeꞌiloc cue toj retal xinsach ruheb.

⁴² Xeꞌxjap reheb chixtzꞌa̱manquil xtenkꞌanquil, abanan ma̱ ani quicoloc reheb. Queꞌxtzꞌa̱ma xtenkꞌanquileb a̱cue, at Ka̱cuaꞌ. Abanan la̱at incꞌaꞌ casume lix tijeb.

⁴³ Chanchaneb li poks li nacꞌameꞌ xban ikꞌ nak xinsach ruheb. Chanchan yekꞌinbileb joꞌ li sulul saꞌ be xinba̱nu reheb.

⁴⁴ La̱at xatcoloc cue chiruheb li yo̱queb chi pletic cuiqꞌuin. Ut xina̱qꞌue chi takla̱nc saꞌ xbe̱neb li xni̱nkal ru tenamit. Nequeꞌcꞌanjelac chicuu li toj ma̱jiꞌ ninnau ruheb.

⁴⁵ Eb li jalaneb xtenamit nequeꞌxcuikꞌib ribeb chicuu, ut nequeꞌxba̱nu li cꞌaꞌru ninye reheb.

⁴⁶ Li jalaneb xtenamit nequeꞌchꞌinan xchꞌo̱leb ut nequeꞌsicsot xban xxiuheb nak nequeꞌel saꞌ li naꞌajej li nequeꞌxmuk cuiꞌ ribeb.

⁴⁷ Yoꞌyo li Ka̱cuaꞌ Dios li nacoloc cue. Ut lokꞌoninbil taxak ru. Chinima̱k taxak xlokꞌal li Ka̱cuaꞌ laj Colol cue.

⁴⁸ Li Dios xtenkꞌan cue chi numta̱c saꞌ xbe̱neb li xicꞌ nequeꞌiloc cue. Ut xqꞌueheb li tenamit rubel incuanquil.

⁴⁹ Li Ka̱cuaꞌ, aꞌan li nacoloc cue chiruheb li xicꞌ nequeꞌiloc cue. Ut aꞌan naqꞌuehoc incuanquil chi numta̱c saꞌ xbe̱neb li nequeꞌraj pletic cuiqꞌuin. Ut aꞌan ajcuiꞌ nacoloc cue chiruheb li nequeꞌrahobtesin cue.

⁵⁰ Joꞌcan nak la̱in tinye resilal saꞌ xya̱nkeb li xni̱nkal ru tenamit. Ut tinbicha lix lokꞌal li Ka̱cuaꞌ Dios.

⁵¹ Riqꞌuin xnimal xcuanquil li Ka̱cuaꞌ xinixcol xban nak la̱in li quinixxakab chokꞌ rey. Ut aꞌan ta̱uxta̱na̱nk cuu, la̱in li sicꞌbil cuu. Ut ta̱ruxta̱na ajcuiꞌ ruheb li cualal incꞌajol chi junelic, chan laj David.