2 Samuel 21 - Li Santil hu

¹ Nak laj David cuan chokꞌ rey quicuan jun li cueꞌej. Chiru oxib chihab ma̱cꞌaꞌ xtzacae̱mkeb. Laj David quitijoc ut quixpatzꞌ re li Dios cꞌaꞌut nak yo̱ li cueꞌej. Li Ka̱cuaꞌ Dios quixye re: —Yo̱ li cueꞌej aꞌin xban li ma̱usilal li quixba̱nu laj Saúl ut eb li ralal xcꞌajol nak queꞌxcamsiheb li cuanqueb Gabaón, chan.

² Laj David quixbokeb li cuanqueb Gabaón re ta̱a̱tinak riqꞌuineb. (Eb li cuanqueb Gabaón ma̱cuaꞌ xcomoneb li ralal xcꞌajol laj Israel. Xcomoneb ban laj amorreo. Ut eb laj Israel queꞌxye junxil saꞌ juramento nak incꞌaꞌ teꞌxcamsiheb. Abanan laj Saúl quixsicꞌ xya̱lal chanru nak tixcamsiheb xban nak quiraj li us chokꞌ reheb li ralal xcꞌajol laj Israel ut reheb li ralal xcꞌajol laj Judá.)

³ Laj David quixye reheb: —¿Chanru naru tinba̱nu usilal e̱re re xtojbal rix li incꞌaꞌ us quixba̱nu laj Saúl? La̱in nacuaj nak te̱tzꞌa̱ma chiru li Dios nak torosobtesi cuiꞌchic, la̱o lix tenamit li Dios, chan.

⁴ Ut eb laj Gabaón queꞌxye re: —Li kachꞌaꞌajquilal riqꞌuin laj Saúl ut eb li ralal xcꞌajol incꞌaꞌ naru xyi̱banquil ru riqꞌuin tumin, chi moco riqꞌuin xcamsinquil junak saꞌ e̱ya̱nk la̱ex aj Israel, chan. Laj David quixye reheb: —¿Cꞌaꞌru te̱raj takaba̱nu e̱re chi joꞌcanan?—

⁵ Eb aꞌan queꞌxye re li rey: —Laj Saúl quiraj kasachbal chi junaj cua. Quixcꞌu̱b ru nak ma̱ jun chic ke teꞌcana̱k chi yoꞌyo arin Israel.

⁶ La̱o nakaj nak ta̱kꞌaxtesi saꞌ kukꞌ cuukubeb li cui̱nk xcomoneb li ralal xcꞌajol laj Saúl. La̱o takayatzꞌeb chiru li Ka̱cuaꞌ aran Gabaa, lix tenamit laj Saúl, li sicꞌbil ru xban li Ka̱cuaꞌ, chanqueb. Ut li rey David quixye reheb: —Us. La̱in tinkꞌaxtesiheb e̱re, chan.

⁷ Li rey David quiril xtokꞌoba̱l ru laj Mefi-boset li ralal laj Jonatán li ralal laj Saúl xban li juramento li queꞌxba̱nu laj David ut laj Jonatán saꞌ xcꞌabaꞌ li Dios.

⁸ Abanan li rey David quixtakla xchapbaleb laj Armoni ut laj Mefi-boset, li cuib chi ralal laj Saúl riqꞌuin lix Rizpa lix rabin laj Aja. Ut quixtakla ajcuiꞌ xchapbaleb li o̱b chi ralal laj Adriel, li quixqꞌuiresi lix Micael lix rabin laj Saúl. Laj Adriel, aꞌan li ralal laj Barzilai, Mehola xtenamit.

⁹ Laj David quixkꞌaxtesiheb saꞌ rukꞌeb laj Gabaón. Ut queꞌyatzꞌeꞌ xbaneb laj Gabaón saꞌ li tzu̱l chiru li Ka̱cuaꞌ. Cuotz queꞌcamsi̱c li cuukub saꞌ xkꞌehil nak xticla xsicꞌbal ru li cebada.

¹⁰ Ut lix Rizpa, lix rabin laj Aja, quixcꞌam jun li kꞌes ru tꞌicr ut quixyi̱b jun lix muheba̱l saꞌ li pec li cuanqueb cuiꞌ li camenak. Aran quicana lix Rizpa chalen saꞌ xticlajic li xsicꞌbal ru li cebada toj nak quiticla li habalkꞌe. Aran quicana re nak eb li soꞌsol incꞌaꞌ teꞌxchꞌeꞌ li camenak chi cutan, chi moco li joskꞌ aj xul chiru li kꞌojyi̱n.

¹¹ Laj David quirabi resil li cꞌaꞌru quixba̱nu lix Rizpa, li ixk li quicuan riqꞌuin laj Saúl.

¹² Joꞌcan nak co̱ riqꞌuineb li cui̱nk li cuanqueb Jabes, li cuan saꞌ xcue̱nt Galaad, re tixcꞌam lix bakeleb laj Saúl ut laj Jonatán. (Eb li cui̱nk aꞌan queꞌrelkꞌa li camenak aran Bet-sán saꞌ li naꞌajej li queꞌtꞌuyuba̱c cuiꞌ xbaneb laj filisteo saꞌ li cutan nak queꞌcamsi̱c saꞌ li tzu̱l Gilboa.)

¹³ Li rey David quixtakla xcꞌambal lix bakeleb laj Saúl ut laj Jonatán, joꞌ eb ajcuiꞌ li cuukub chi camenak li queꞌyatzꞌeꞌ.

¹⁴ Ut queꞌxmuk lix bakeleb laj Saúl ut laj Jonatán saꞌ li mukleba̱l li quimukeꞌ cuiꞌ laj Sis lix yucuaꞌ. Li mukleba̱l aꞌan cuan aran Zela saꞌ lix chꞌochꞌeb li ralal xcꞌajol laj Benjamín. Queꞌxba̱nu chixjunil li quiyeheꞌ reheb xban li rey David. Ut chirix aꞌan, li Dios quirosobtesi cuiꞌchic li tenamit joꞌ queꞌxtzꞌa̱ma chiru.

¹⁵ Mokon chic eb laj filisteo queꞌoc cuiꞌchic chi pletic riqꞌuineb laj Israel. Laj David co̱ rochbeneb lix soldados chi pletic riqꞌuineb. Abanan laj David quilub chi pletic.

¹⁶ Quicuan jun li nimla cui̱nk aj Isbi-benob xcꞌabaꞌ. Lix la̱ns numenak oxcꞌa̱l (60) libra li ra̱lal, ut toj acꞌ lix chꞌi̱chꞌ re pletic. Li cui̱nk aꞌan quixyal xcamsinquil laj David.

¹⁷ Abanan laj Abisai, lix yum lix Sarvia, quicuulac chixcolbal laj David ut quixcamsi li nimla cui̱nk. Chirix aꞌan, eb li soldados aj Israel queꞌxba̱nu li juramento ut queꞌxye re laj David: —Chalen anakcuan la̱at incꞌaꞌ chic tatxic chikix chi pletic. Ma̱re anchal tatcamsi̱k. La̱at chanchanat li kasaken la̱o aj Israel xban nak la̱at li kayoꞌon, chanqueb.

¹⁸ Chirix chic aꞌan, quicuan cuiꞌchic li ple̱t aran Gob riqꞌuineb laj filisteo. Ut laj Sibecai laj husatita quixcamsi li cui̱nk aj Saf xcꞌabaꞌ, xcomoneb li cui̱nk li kꞌaxal ni̱nkeb.

¹⁹ Quicuan jun chic li ple̱t aran Gob riqꞌuineb laj filisteo. Saꞌ li ple̱t aꞌan, laj Elhanán li ralal laj Jaare-oregim, Belén xtenamit, quixcamsi laj Goliat laj geteo. Lix cheꞌel lix la̱ns laj Goliat kꞌaxal pim. Chanchan xcheꞌel li quemleb.

²⁰ Toj quicuan jun chic ple̱t aran Gat. Saꞌ li ple̱t aꞌan quicuan jun chic li cui̱nk kꞌaxal najt rok. Li cui̱nk aꞌan cablaju li ruꞌuj rukꞌ ut cablaju li ruꞌuj rok. Li cui̱nk aꞌan xcomoneb ajcuiꞌ li ni̱nki cui̱nk.

²¹ Li cui̱nk aꞌan quixhobeb laj Israel. Joꞌcan nak quicamsi̱c xban laj Jonatán li ralal laj Simea. Laj Simea, aꞌan ras laj David.

²² Eb li ca̱hib chi ni̱nki cui̱nk aꞌin Gat xtenamiteb. Xcomoneb li ralal xcꞌajol laj Refa, li nimla cui̱nk. Li ca̱hib chi cui̱nk aꞌin queꞌcamsi̱c xban laj David ut xbaneb li nequeꞌtenkꞌan re.