2 Samuel 20 - Li Santil hu

¹ Saꞌ li tenamit Gilgal quicuan jun li cui̱nk incꞌaꞌ us xnaꞌleb. Aꞌan laj Seba, ralal laj Bicri. Xcomoneb li ralal xcꞌajol laj Benjamín. Laj Seba quixya̱basi li trompeta re xchꞌutubanquileb li tenamit, ut quixye reheb: —La̱o ma̱cꞌaꞌ nakara chirix laj David li ralal laj Isaí. Ma̱cꞌaꞌ tixqꞌue ke. Chikajunilo toxic saꞌ kamuheba̱l, chan.

² Joꞌcaꞌin nak chixjunileb li ralal xcꞌajol laj Israel queꞌxtzꞌekta̱na laj David ut queꞌoquen chirix laj Seba, ralal laj Bicri. Abanan eb li ralal xcꞌajol laj Judá queꞌoquen chirix laj David lix reyeb. Queꞌco̱eb chirix nak queꞌel cuan cuiꞌ li nimaꞌ Jordán ut queꞌco̱eb toj Jerusalén.

³ Nak li rey David quicuulac saꞌ li rochoch aran Jerusalén, quixqꞌue xjuneseb li laje̱b chi ixk li queꞌcuan riqꞌuin li quixcanabeb chi iloc cab. Quixqꞌue xtzacae̱mkeb, abanan incꞌaꞌ chic quicuan riqꞌuineb. Joꞌcan nak queꞌcana chi tzꞌaptzꞌo̱queb. Chanchaneb chic li xma̱lcaꞌan chalen nak queꞌcam.

⁴ Mokon chic li rey quixye re laj Amasa: —Ta̱chꞌutubeb chixjunileb li cui̱nk li cuanqueb Judá. Saꞌ oxib cutan cua̱nkeb arin ut cua̱nkat ajcuiꞌ la̱at, chan.

⁵ Laj Amasa co̱ chixbokbaleb li cui̱nk, abanan incꞌaꞌ quicuulac saꞌ li cutan li quiyeheꞌ re xban li rey David.

⁶ Joꞌcan nak li rey quixye re laj Abisai: —Laj Seba, li ralal laj Bicri, kꞌaxal cuiꞌchic nabal li chꞌaꞌajquilal tixcꞌam chak saꞌ kabe̱n chiru laj Absalón. Joꞌcan nak cꞌameb li cui̱nk li nequeꞌcꞌanjelac chicuu ut texxic chixsicꞌbal. Ma̱re anchal ta̱oc saꞌ eb li tenamit sutsu saꞌ tzꞌac ut incꞌaꞌ chic ta̱ru̱k takachap, chan.

⁷ Joꞌcan nak queꞌco̱eb chixjunileb li cuanqueb rubel xtakl laj Joab. Queꞌco̱eb ajcuiꞌ eb laj cereteo, eb laj peleteo, joꞌ eb ajcuiꞌ chixjunileb li cauheb xchꞌo̱l chi pletic. Queꞌel Jerusalén re teꞌxic chixsicꞌbal laj Seba, li ralal laj Bicri.

⁸ Nak queꞌcuulac nachꞌ cuan cuiꞌ li nimla pec aran Gabaón, queꞌcꞌuleꞌ xban laj Amasa. Laj Joab cuan rakꞌ soldado chirix. Lix chꞌi̱chꞌ cuan saꞌ xcꞌa̱mal xsaꞌ. Nak yo̱ chi nachꞌoc riqꞌuin laj Amasa, lix chꞌi̱chꞌ laj Joab quitꞌaneꞌ saꞌ chꞌochꞌ.

⁹ Laj Joab quixye re laj Amasa: —¿Chan xacuil, at cuami̱g?— Ut quixchap lix mach laj Amasa riqꞌuin li rukꞌ nim re ta̱rutzꞌ ru.

¹⁰ Laj Amasa incꞌaꞌ quixqꞌue retal nak cuan xchꞌi̱chꞌ laj Joab saꞌ li rukꞌ jun chic. Ut laj Joab quixcuj chi chꞌi̱chꞌ laj Amasa ut qui-el lix cꞌamcꞌot ut quitꞌaneꞌ saꞌ chꞌochꞌ ut quicam saꞌ junpa̱t. Jun sut ajcuiꞌ quixcuj chi chꞌi̱chꞌ. Chirix aꞌan laj Joab rochben laj Abisai li ri̱tzꞌin queꞌco̱eb chixsicꞌbal laj Seba.

¹¹ Jun lix soldado laj Joab quixakli chixcꞌatk li camenak ut quixjap re chixyebal: —Li ani ta̱raj oque̱nc chirixeb laj Joab ut laj David cheꞌxicak chirix laj Joab anakcuan, chan.

¹² Laj Amasa tꞌantꞌo saꞌ xyi be saꞌ lix quiqꞌuel. Lix soldado laj Joab quiril nak chixjunileb yo̱queb chi xakli̱c cuan cuiꞌ li camenak. Joꞌcan nak quixquelo li camenak chire li be ut quixtzꞌap riqꞌuin jun tꞌicr.

¹³ Nak ac xrisi li camenak saꞌ li be, chixjunileb queꞌco̱eb chirix laj Joab chixsicꞌbal laj Seba li ralal laj Bicri.

¹⁴ Laj Seba quinumeꞌ riqꞌuineb chixjunileb lix te̱paleb li ralal xcꞌajol laj Israel toj quicuulac aran Abel-bet-maaca. Ut chixjunileb li ralal xcꞌajol laj Bicri queꞌxchꞌutub ribeb ut queꞌoc saꞌ li tenamit chirix laj Seba.

¹⁵ Nak eb lix soldados laj Joab queꞌcuulac Abel-bet-maaca, queꞌxtu̱b li chꞌochꞌ chirix li tzꞌac li sutsu cuiꞌ li tenamit re ta̱ru̱k teꞌpletik riqꞌuineb. Ut queꞌxtiquib ajcuiꞌ xtꞌanbal li tzꞌac.

¹⁶ Jun li ixk cuan xnaꞌleb quixjap re toj saꞌ xbe̱n li tzꞌac ut quixye: —Ba̱nuhomak usilal. Yehomak re laj Joab nak ta̱nachꞌok chak cuiqꞌuin. La̱in nacuaj a̱tinac riqꞌuin, chan.

¹⁷ Laj Joab quinachꞌoc riqꞌuin ut li ixk quixye re: —¿Ma la̱at laj Joab?— Ut aꞌan quixye re: —La̱in laj Joab.— Li ixk quixye re: —La̱in aj cꞌanjel cha̱cuu. Ba̱nu usilal, chacuabi li cꞌaꞌru tinye, chan. Ut laj Joab quixye re: —La̱in tincuabi. Ye cue cꞌaꞌru ta̱cuaj.—

¹⁸ Li ixk quixye re: —Najter eb li tenamit queꞌxye, “cui ani naraj ta̱qꞌuehekꞌ xnaꞌleb ta̱xic chixpatzꞌbal xnaꞌleb aran Abel” chanqueb. Joꞌcaꞌin nak queꞌxyi̱b ru li chꞌaꞌajquilal junju̱nk.

¹⁹ Li katenamit nacuan saꞌ tuktu̱quil usilal ut nacuan saꞌ xya̱lal arin Israel. Aꞌin jun tenamit kꞌaxal nim xcuanquil. ¿Cꞌaꞌut nak ta̱cuaj xsachbal katenamit? Li tenamit aꞌin re li Dios, chan.

²⁰ Laj Joab quixye re: —La̱o incꞌaꞌ takasach la̱ tenamit chi moco xkacꞌoxla xpoꞌbal ru li cꞌaꞌru cuan e̱re.

²¹ Ma̱cuaꞌ aꞌan li nakaj la̱o. Jun li cui̱nk aj Seba xcꞌabaꞌ xchal chak saꞌ lix naꞌajeb li ralal xcꞌajol laj Efraín, li tzu̱l ru. Li cui̱nk aꞌan ta̱raj pletic riqꞌuin li rey David. Cui te̱kꞌaxtesi ke li cui̱nk aꞌan, la̱o toxic ut incꞌaꞌ to-oc saꞌ le̱ tenamit, chan laj Joab. Li ixk quixye re: —La̱o takacamsi ut takacut lix jolom jun pacꞌal li tzꞌac, chan.

²² Ut li ixk quixserakꞌi reheb li cuanqueb saꞌ li tenamit cꞌaꞌru us xba̱nunquil. Queꞌxcamsi laj Seba li ralal laj Bicri ut queꞌxcut lix jolom jun pacꞌal li tzꞌac cuan cuiꞌ laj Joab. Ut laj Joab quixya̱basi lix trompeta re nak teꞌxcanab pletic ut chixjunileb li cuanqueb rochben queꞌco̱eb saꞌ li rochocheb. Ut laj Joab co̱ Jerusalén riqꞌuin li rey David.

²³ Laj Joab quicana chi takla̱nc saꞌ xbe̱neb chixjunileb lix soldados aj Israel. Ut laj Benaía li ralal laj Joiada quicana chi takla̱nc saꞌ xbe̱neb laj cereteo ut eb laj peleteo.

²⁴ Laj Adoram quitaklan saꞌ xbe̱neb li queꞌpuersi̱c ruheb chi trabajic. Ut laj Josafat, li ralal laj Ahilud, aꞌan li quitzꞌi̱ban re li retalil li cꞌaꞌru quicꞌulman.

²⁵ Laj Seva, aꞌan laj tzꞌi̱b. Ut laj Sadoc ut laj Abiatar, aꞌaneb laj tij.

²⁶ Laj Ira, Jair xtenamit, aꞌan laj tij li quicuan riqꞌuin laj David.