2 Samuel 17 - Li Santil hu1 Mokon chic laj Ahitofel quixye re laj Absalón: —Anakcuan tinsicꞌ ruheb cablaju mil chi soldados ut chiru ajcuiꞌ li kꞌojyi̱n aꞌin toxic chixsicꞌbal laj David. 2 Tinpletik riqꞌuin nak lublu̱queb ut ma̱cꞌaꞌ xmetzꞌe̱uheb. Teꞌxucuak chiku ut chixjunileb li cui̱nk teꞌe̱lelik. Caꞌaj cuiꞌ li rey tincamsi. 3 Tinye reheb chixjunileb li cristian li yo̱queb chi oque̱nc chirix laj David nak teꞌsukꞌi̱k a̱cuiqꞌuin. Eb aꞌan incꞌaꞌ teꞌcamsi̱k. La̱at caꞌaj cuiꞌ li rey ta̱cuaj ta̱ca̱mk. Nak acak xeꞌsukꞌi saꞌ li tenamit, incꞌaꞌ chic ta̱cua̱nk ple̱t, chan. 4 Laj Absalón quixcꞌul xchꞌo̱l li cꞌaꞌru quixye ut queꞌxcꞌul ajcuiꞌ xchꞌo̱leb laj Israel li nequeꞌcꞌamoc be. 5 Laj Absalón quixye re: —Bok chak laj Husai laj arquita, re takabi li cꞌaꞌru tixye aꞌan, chan. 6 Nak quicuulac laj Husai, laj Absalón quixserakꞌi re li cꞌaꞌru quiyeheꞌ re xban laj Ahitofel. Quixye: —Aꞌin li naꞌleb li xqꞌue laj Ahitofel. ¿Ma us xba̱nunquil li cꞌaꞌru naxye malaj ut incꞌaꞌ us? ¿Cꞌaꞌru nacaye la̱at? chan. 7 Laj Husai quixye re: —Li naꞌleb li xqꞌue laj Ahitofel anakcuan incꞌaꞌ us. 8 La̱at nacanau nak la̱ yucuaꞌ ut eb lix soldados cauheb rib chi pletic. Yo̱queb xjoskꞌil anakcuan. Chanchaneb li oso li namakꞌeꞌ li ral chiru. La̱ yucuaꞌ naxnau pletic chi us. Aꞌan incꞌaꞌ tixnumsi li kꞌojyi̱n saꞌ xya̱nkeb li tenamit. 9 Ma̱re ac xmuk rib saꞌ junak ochoch pec malaj ut saꞌ junak chic naꞌajej. Nak acak xeꞌoc chi pletic laj David riqꞌuineb la̱ soldados, eb li tenamit teꞌxye nak laj David xeꞌre̱chani li ple̱t. 10 Usta eb la̱ soldados cauheb rib joꞌ xcacuil rib li cakcoj, teꞌxucuak xban nak chixjunileb laj Israel nequeꞌxnau nak la̱ yucuaꞌ kꞌaxal cau rib chi pletic. Ut eb li cuanqueb rochben cauheb ajcuiꞌ rib chi pletic. 11 La̱in ninye a̱cue nak kꞌaxal us nak ta̱chꞌutubeb ru chixjunileb laj Israel, li cuanqueb saꞌ li tenamit Dan toj saꞌ li tenamit Beerseba. Eb aꞌan kꞌaxal nabaleb. Chanchaneb li cocꞌ ru li samaib chire li palau. Ut la̱at tatcꞌamok xbeheb nak texxic chi pletic. 12 La̱o topletik riqꞌuin la̱ yucuaꞌ aꞌ yal bar takatau ut aꞌ yal bar cuan. Chi ma̱cꞌaꞌeb saꞌ xchꞌo̱l tocuulak. Chi moco aꞌan, chi moco eb lix soldados teꞌcana̱k chi yoꞌyo. 13 Ut cui naxic chixcolbal rib saꞌ junak tenamit, chixjunileb laj Israel teꞌxcꞌam xla̱seb ut takaquelo li tenamit toj saꞌ li nimaꞌ. Ma̱ jun chic li pec ta̱cana̱k saꞌ xnaꞌaj, chan. 14 Laj Absalón ut chixjunileb li cuanqueb rochben queꞌxye: —Kꞌaxal us li naꞌleb li xqꞌue laj Husai chiru li xqꞌue laj Ahitofel, chanqueb. Queꞌxye nak us xban nak ac cuan saꞌ xchꞌo̱l li Dios nak ta̱poꞌekꞌ ru li naꞌleb li quixqꞌue laj Ahitofel ut nak laj Absalón tixcꞌul li raylal. 15 Ut laj Husai quixye reheb laj Sadoc ut laj Abiatar laj tij: —Aꞌan aꞌin li naꞌleb li xqꞌue laj Ahitofel re laj Absalón ut reheb ajcuiꞌ li nequeꞌcꞌamoc be saꞌ xya̱nkeb laj Israel. Ut aꞌan aꞌin li naꞌleb li xinqꞌue la̱in, chan. 16 Ut quixye ajcuiꞌ reheb nak teꞌxtakla resil chi junpa̱t riqꞌuin laj David re nak incꞌaꞌ teꞌxnumsi li kꞌojyi̱n saꞌ li chaki chꞌochꞌ bar nequeꞌnumeꞌ cuiꞌ jun pacꞌal li nimaꞌ. Teꞌxic ban jun pacꞌal li nimaꞌ Jordán saꞌ junpa̱t re nak incꞌaꞌ ta̱camsi̱k li rey joꞌqueb ajcuiꞌ li cuanqueb rochben. 17 Laj Jonatán ut laj Ahimaas cuanqueb chire li haꞌ Rogel. Incꞌaꞌ naru teꞌoc Jerusalén xban nak naru nequeꞌileꞌ. Joꞌcan nak jun li mo̱s ixk naxic chixyebal reheb cꞌaꞌru yo̱ chicꞌulma̱nk saꞌ li tenamit. Ut chirix aꞌan, laj Jonatán ut laj Ahimaas nequeꞌxic chixyebal re li rey David. 18 Abanan queꞌileꞌ xban jun li sa̱j al. Li sa̱j al co̱ chixyebal resil re laj Absalón. Laj Jonatán ut laj Ahimaas queꞌco̱eb chi junpa̱t. Queꞌcuulac saꞌ rochoch jun li cui̱nk cuan Bahurim. Cuan jun li becbil haꞌ saꞌ li neba̱l ut aran queꞌxmuk ribeb chi saꞌ li becbil haꞌ. 19 Li rixakil li cui̱nk quixtzꞌap li becbil haꞌ riqꞌuin jun li tꞌicr ut quixhel li ru li trigo saꞌ xbe̱n. Ut ma̱ ani quinaꞌoc re nak mukmu̱queb li cui̱nk chi saꞌ li becbil haꞌ. 20 Eb li nequeꞌcꞌanjelac chiru laj Absalón queꞌcuulac saꞌ li cab aꞌan ut queꞌxpatzꞌ re li ixk: —¿Bar cuanqueb laj Ahimaas ut laj Jonatán? chanqueb. Li ixk quixye reheb: —Ac xeꞌnumeꞌ arin. Xeꞌco̱eb saꞌ li nimaꞌ, chan. Queꞌxsiqꞌui abanan incꞌaꞌ queꞌxtauheb. Joꞌcan nak queꞌsukꞌi cuiꞌchic Jerusalén. 21 Nak ac xeꞌco̱eb li cui̱nk, laj Ahimaas ut laj Jonatán queꞌel saꞌ li becbil haꞌ ut queꞌco̱eb riqꞌuin laj David chixyebal re li cꞌaꞌru queꞌrabi. Queꞌxye re: —Se̱bahomak e̱rib. Texxic jun pacꞌal li nimaꞌ xban nak laj Ahitofel ac xye reheb nak chiru ajcuiꞌ li kꞌojyi̱n aꞌin teꞌcha̱lk chi pletic e̱riqꞌuin, chanqueb. 22 Joꞌcan nak laj David ut chixjunileb li cuanqueb rochben queꞌco̱eb jun pacꞌal li nimaꞌ. Nak quisake̱u, ac xeꞌxkꞌax li nimaꞌ Jordán chixjunileb. 23 Laj Ahitofel quixqꞌue retal nak incꞌaꞌ queꞌxba̱nu li cꞌaꞌru quixye reheb. Joꞌcan nak quixyi̱b rix lix bu̱r ut quitakeꞌ chirix ut quisukꞌi saꞌ xtenamit. Quixyi̱b ru li cꞌaꞌru re saꞌ li rochoch. Ut chirix aꞌan quixyatzꞌ rib. Joꞌcaꞌin nak quicam laj Ahitofel. Quimukeꞌ saꞌ li mukleba̱l li quimukeꞌ cuiꞌ lix yucuaꞌ. 24 Nak laj David ut eb li rochben yo̱queb chi cuulac saꞌ li tenamit Mahanaim, laj Absalón rochbeneb chixjunileb lix soldados aj Israel yo̱queb chi numecꞌ saꞌ li nimaꞌ Jordán. 25 Laj Absalón quixxakab laj Amasa chi takla̱nc saꞌ xbe̱neb li soldados chokꞌ re̱kaj laj Joab. Laj Amasa, aꞌan ralal laj Itra, xcomoneb li ralal xcꞌajol laj Ismael. Laj Itra, aꞌan lix be̱lom lix Abigail lix rabin laj Nahas. Lix Abigail, aꞌan li ras lix Sarvia. Ut lix Sarvia, aꞌan lix naꞌ laj Joab. 26 Laj Absalón ut eb li cui̱nk aj Israel li cuanqueb rochben queꞌxyi̱b lix muheba̱leb aran Galaad. 27 Nak quicuulac laj David Mahanaim, laj Sobi, laj Maquir ut laj Barzilai queꞌcuulac riqꞌuin. Laj Sobi, aꞌan li ralal laj Nahas. Rabá xtenamit, li cuan saꞌ xcue̱nteb li ralal xcꞌajol laj Amón. Laj Maquir, aꞌan li ralal laj Amiel. Lodebar xtenamit. Ut laj Barzilai, Rogelim xtenamit, li cuan saꞌ xcue̱nt Galaad. 28 Queꞌxcꞌam li cꞌaꞌru teꞌxsi re laj David ut reheb li cuanqueb rochben. Queꞌxcꞌam eb li cuarib, li chꞌochꞌ ucꞌal, ut li cuc. Ut queꞌxcꞌam ajcuiꞌ li trigo ut li cebada, li cꞌaj ut li ru li trigo qꞌuilinbil. Ut queꞌxcꞌam ajcuiꞌ cuib pa̱y ru li que̱nkꞌ reheb. 29 Ut queꞌxcꞌam ajcuiꞌ xyaꞌal cab, mante̱c, carner, ut queso re nak teꞌcuaꞌak xban nak queꞌxnau nak laj David ut eb li rochben tacuajenakeb ut teꞌtzꞌoca̱k ut ta̱chakik reheb. |
© 2019, Wycliffe Bible Translators. All rights reserved.
Wycliffe Bible Translators, Inc.