2 Samuel 16 - Li Santil hu

¹ Nak laj David yo̱ chi cubec jun pacꞌal li tzu̱l, quixcꞌul laj Siba lix mo̱s laj Mefi-boset. Laj Siba yo̱ chi cha̱lc chixcꞌulbal laj David. Quixcꞌameb chak cuib li bu̱r cuan ri̱keb. Li bu̱r yo̱queb chak chiri̱kanquil cuib ciento li caxlan cua, jun ciento cu̱t li chaki uvas ut jun ciento li caxlan cua yi̱banbil riqꞌuin chaki higo ut jun bo̱ls tzꞌu̱m li vino.

² Li rey David quixye re: —¿Cꞌaꞌut nak yo̱cat chixcꞌambal chak chixjunil aꞌin? chan. Laj Siba quixye re: —At rey, la̱at ut eb la̱ cualal a̱cꞌajol teꞌxic chirix li bu̱r. Chixjunileb li cui̱nk teꞌxcuaꞌ li tzacae̱mk. Ut li vino, aꞌan re teꞌrucꞌ li teꞌlubk saꞌ li chaki chꞌochꞌ, chan.

³ Li rey quixye re: —¿Bar cuan laj Mefi-boset, li ri laj Saúl la̱ patrón? chan. Laj Siba quixye re: —Xcana chak Jerusalén xban nak naxcꞌoxla nak eb laj Israel teꞌxxakab saꞌ xcuanquil chokꞌ re̱kaj laj Saúl lix yucuaꞌchin, chan.

⁴ Li rey David quixye re: —Chixjunil li cꞌaꞌru cuan re laj Mefi-boset, ta̱cana̱k chokꞌ a̱cue, chan. Laj Siba quixye re laj David: —At rey, la̱in aj cꞌanjel cha̱cuu. Junelic taxak sahak a̱chꞌo̱l cuiqꞌuin, chan.

⁵ Li rey David quicuulac Bahurim. Aran cuan jun li cui̱nk aj Simei xcꞌabaꞌ. Aꞌan ralal laj Gera xcomoneb li ralal xcꞌajol laj Saúl. Qui-oc chixmajecuanquil laj David.

⁶ Laj Simei qui-oc chixcutinquil chi pec laj David ut eb laj cꞌanjel chiru, usta sutsu̱queb xbaneb li soldado li nequeꞌcꞌacꞌalen re.

⁷ Laj Simei yo̱ chixmajecuanquil laj David ut quixye re: —Elen arin. La̱at aj camsinel. La̱at jun cui̱nk incꞌaꞌ us a̱naꞌleb.

⁸ Li Ka̱cuaꞌ Dios xqꞌuehoc a̱cue chixtojbal a̱ma̱c xban nak xacamsiheb nabal li ralal xcꞌajol laj Saúl ut la̱at chic xat-oc saꞌ lix naꞌaj. Li Ka̱cuaꞌ xatrisi saꞌ la̱ cuanquil ut aꞌ chic la̱ cualal laj Absalón xqꞌue saꞌ la̱ naꞌaj. Xat-isi̱c saꞌ la̱ cuanquil xban nak la̱at aj camsinel, chan.

⁹ Ut laj Abisai, lix yum lix Sarvia, quixye re laj David: —At rey, ¿cꞌaꞌut nak yo̱ cha̱majecuanquil li cui̱nk aꞌin, li chanchan tzꞌiꞌ ca̱mc re? Nintzꞌa̱ma cha̱cuu nak ta̱qꞌue inlese̱ns re tinxic chixsetbal lix cux, chan.

¹⁰ Abanan li rey quixye re: —Me̱ye cue chi joꞌcan, la̱ex lix yum lix Sarvia. Cui aꞌan yo̱ chinmajecuanquil, naxba̱nu xban nak li Ka̱cuaꞌ xyehoc re nak tixba̱nu chi joꞌcan. ¿Ani ta biꞌ ta̱ru̱k ta̱yehok re cꞌaꞌut nak yo̱ chixba̱nunquil chi joꞌcan? chan.

¹¹ Ut laj David quixye re laj Abisai ut reheb ajcuiꞌ li nequeꞌcꞌanjelac chiru: —Cui li tzꞌakal cualal ta̱raj incamsinquil, ¿ma tojaꞌ ta chic li cui̱nk aꞌin, li xcomoneb li ralal xcꞌajol laj Benjamín? Canabomak chinmajecuanquil xban nak li Ka̱cuaꞌ xyehoc re nak tixba̱nu chi joꞌcan.

¹² Ma̱re li Ka̱cuaꞌ Dios ta̱ril li raylal li yo̱quin chixcꞌulbal ut ma̱re ta̱ril xtokꞌoba̱l cuu ut tinrosobtesi chokꞌ re̱kaj li raylal li yo̱quin chixcꞌulbal anakcuan, chan.

¹³ Ut nak laj David yo̱ chi xic saꞌ li be rochbeneb li cui̱nk, laj Simei yo̱ ajcuiꞌ chi xic chiru li tzu̱l. Yo̱ chixhobbaleb ut yo̱ chixcutbaleb chi pec ut yo̱ chixcutbal li poks saꞌ xbe̱neb.

¹⁴ Tacuajenakeb li rey ut eb li cuanqueb rochben nak queꞌcuulac saꞌ jun li naꞌajej chire li nimaꞌ Jordán. Ut aran queꞌcana chi hila̱nc.

¹⁵ Ut laj Absalón ut chixjunileb li cuanqueb rochben, queꞌoc saꞌ li tenamit Jerusalén. Laj Ahitofel cuan rochbeneb.

¹⁶ Nak laj Husai, li rami̱g laj David, quixcꞌul laj Absalón, quixjap re ut quixye: —¡Najt taxak chicua̱nk xyuꞌam li rey! ¡Najt taxak chicua̱nk xyuꞌam li rey! chan.

¹⁷ Laj Absalón quixye re laj Husai: —¿Ma ma̱cuaꞌ ta biꞌ la̱at li tzꞌakal rami̱g laj David? Cui la̱at li tzꞌakal rami̱g, ¿cꞌaꞌut nak incꞌaꞌ xco̱at chirix? chan.

¹⁸ Laj Husai quixye re laj Absalón: —Li jun li sicꞌbil ru xban li Dios, ut xbaneb li tenamit aꞌin ut xbaneb chixjunileb laj Israel, aꞌan li tincꞌanjelak chiru. La̱in tincana̱k a̱cuiqꞌuin.

¹⁹ ¿Ani chi aj u tincꞌanjelak? ¿Ma ma̱cuaꞌ ta biꞌ chiru li ralal laj David tincꞌanjelak? Chanru nak xincꞌanjelac chiru la̱ yucuaꞌ, joꞌcan ajcuiꞌ nak tincꞌanjelak cha̱cuu la̱at, chan laj Husai.

²⁰ Laj Absalón quixye re laj Ahitofel: —Qꞌue kanaꞌleb. ¿Cꞌaꞌru takaba̱nu anakcuan? chan.

²¹ Laj Ahitofel quixye re: —Tatcua̱nk riqꞌuineb li ixk li xeꞌcuan riqꞌuin la̱ yucuaꞌ, li xeꞌcanaba̱c arin chi iloc cab. Cui ta̱ba̱nu chi joꞌcan, chixjunileb teꞌxnau nak la̱at xicꞌ chic nacat-ileꞌ xban la̱ yucuaꞌ ut teꞌcacuu̱k xchꞌo̱leb, chan.

²² Ut queꞌxqꞌue jun lix muheba̱l laj Absalón saꞌ xbe̱n li rochoch laj David. Ut chiruheb chixjunileb laj Absalón co̱ chi cua̱nc riqꞌuineb li ixk li queꞌcuan riqꞌuin lix yucuaꞌ.

²³ Saꞌ eb li cutan aꞌan, li naꞌleb li quixqꞌue laj Ahitofel quicꞌuleꞌ xbaneb chixjunileb joꞌ nak aꞌan ra̱tin li Dios. Ut joꞌ nak laj David quixba̱nu li cꞌaꞌru quixye laj Ahitofel, joꞌcan ajcuiꞌ nak laj Absalón quixba̱nu li cꞌaꞌru quixye.