2 Samuel 14 - Li Santil hu1 Laj Joab quixnau nak kꞌaxal ra saꞌ xchꞌo̱l li rey David chirix laj Absalón. 2 Quixtakla xcꞌambal jun li ixk cuan aran Tecoa. Li ixk aꞌan cuan xnaꞌleb chixba̱nunquil cꞌaꞌak re ru chi naꞌlebil. Nak li ixk quicuulac riqꞌuin, quixye re: —Ba̱nu a̱cuib joꞌ nak ra saꞌ a̱chꞌo̱l chirix xcamic jun la̱ cuechꞌalal. Qꞌue cha̱cuix li tꞌicr li naxcꞌut nak ra saꞌ a̱chꞌo̱l. Ma̱qꞌue li sununquil ban. Ba̱nu chi joꞌcan re nak ta̱cꞌutu̱nk nak ac junxil na-oc xrahil a̱chꞌo̱l. 3 Tatxic riqꞌuin li rey David ut ta̱ye re li cꞌaꞌru tinye a̱cue, chan. Ut laj Joab quixye re chanru tixye re laj David. 4 Li ixk co̱ riqꞌuin li rey David ut quixcuikꞌib rib saꞌ chꞌochꞌ re xqꞌuebal xlokꞌal, ut quixye: —At rey, ba̱nu usilal. China̱tenkꞌa, chan. 5 Laj David quixye re: —¿Cꞌaꞌru ta̱cuaj tinba̱nu? chan. Li ixk quixye re: —La̱in jun xma̱lcaꞌan nebaꞌin. Camenak inbe̱lom. 6 At rey, cuanqueb cuib inyum. Abanan xeꞌpletic saꞌ cꞌaleba̱l. Ut ma̱ ani xeꞌjachoc reheb chi pletic. Li jun quixcamsi li jun chic. 7 Anakcuan chixjunileb li cuechꞌalal xeꞌjoskꞌoꞌ saꞌ inbe̱n. Teꞌraj nak tinkꞌaxtesi saꞌ rukꞌeb lin yum re teꞌxcamsi xban nak aꞌan quicamsin re li ras. Cui teꞌxcamsi lin yum, ma̱cꞌaꞌak chic inyoꞌon ut ma̱cꞌaꞌak chic li ralal xcꞌajol lin be̱lom mokon. Ta̱sachekꞌ lix cꞌabaꞌ saꞌ ruchichꞌochꞌ, chan li ixk. 8 Li rey David quixye re: —Ayu saꞌ la̱ cuochoch. Matcꞌoxlac xban nak la̱in tinqꞌue junak chakꞌrab re a̱tenkꞌanquil, chan. 9 Li ixk quixye re: —At rey, li ma̱c aꞌin chicana̱k saꞌ inbe̱n la̱in ut saꞌ xbe̱neb li ralal xcꞌajol lin yucuaꞌ. Incꞌaꞌ chicana̱k saꞌ a̱be̱n la̱at, at rey, chi moco saꞌ xbe̱n la̱ cuanquilal, chan. 10 Li rey quixye re: —Cui ani ta̱chꞌiꞌchꞌiꞌi̱nk a̱cue, cꞌam chak cuiqꞌuin. La̱in ninye a̱cue nak aꞌan incꞌaꞌ chic tatxchꞌiꞌchꞌiꞌi, chan. 11 Li ixk quixye cuiꞌchic re laj David: —At rey, ba̱nu usilal, ta̱tzꞌa̱ma chiru li Ka̱cuaꞌ la̱ Dios nak li cuechꞌalal li ta̱raj tixqꞌue re̱kaj xcamic li jun, incꞌaꞌ tixcamsi re nak incꞌaꞌ tixnimobresi ru li raylal, chan. Li rey David quixye re: —Saꞌ xcꞌabaꞌ li Ka̱cuaꞌ Dios, la̱in ninye a̱cue nak la̱ yum ma̱cꞌaꞌ tixcꞌul. Ma̱ ani ta̱chꞌeꞌok re, chan. 12 Ut li ixk quixye re: —At rey, china̱canab chi a̱tinac junpa̱tak chic a̱cuiqꞌuin, chan. Ut li rey David quixye re: —Us. A̱tinan, chan. 13 Li ixk quixye re: —At rey, ¿Cꞌaꞌut nak xaba̱nu li incꞌaꞌ us aꞌin reheb lix tenamit li Dios? Riqꞌuin li cꞌaꞌru xaye, nacꞌutun nak cuan a̱ma̱c. ¿Cꞌaꞌut nak incꞌaꞌ nacaqꞌue xlese̱ns re ta̱cha̱lk cuiꞌchic arin laj Absalón la̱ cualal? 14 Chikajunilo toca̱mk. Chanchano li haꞌ hoybil saꞌ chꞌochꞌ. Incꞌaꞌ chic naru xxocbal. Li Ka̱cuaꞌ Dios ma̱ ani narisi xyuꞌam. Naxsicꞌ ban xya̱lal chanru nak ta̱sukꞌi̱k cuiꞌchic riqꞌuin li najt cuan riqꞌuin. 15 La̱in xinchal chi a̱tinac a̱cuiqꞌuin xban nak xinxucuac xban li cꞌaꞌru xeꞌxye cue li tenamit. La̱in xinye nak tina̱tinak a̱cuiqꞌuin xban nak ma̱re ta̱ba̱nu li cꞌaꞌru tintzꞌa̱ma cha̱cuu. 16 At rey, cui la̱at ta̱cuabi li cꞌaꞌru yo̱quin chixtzꞌa̱manquil cha̱cuu, la̱at ta̱ru̱k toa̱col re nak incꞌaꞌ teꞌxsach ku saꞌ li naꞌajej aꞌin li xqꞌue ke li Ka̱cuaꞌ. 17 La̱in ninnau nak li cꞌaꞌru tina̱sume cuiꞌ tixcꞌojob inchꞌo̱l. La̱at chanchanat lix ángel li Ka̱cuaꞌ. Nacanau xqꞌuebal retal cꞌaꞌru li us ut cꞌaꞌru li incꞌaꞌ us. Aꞌ taxak li Ka̱cuaꞌ la̱ Dios chicua̱nk a̱cuiqꞌuin, chan li ixk. 18 Li rey David quixye re li ixk: —Nacuaj patzꞌoc a̱cue ut nacuaj nak ta̱sume chi tzꞌakal li cꞌaꞌru tinpatzꞌ a̱cue, chan. Ut li ixk quixye: —Us. Patzꞌ li cꞌaꞌru ta̱cuaj, chan. 19 Li rey David quixye re: —¿Ma ma̱cuaꞌ laj Joab li xtaklan chak a̱cue chi a̱tinac cuiqꞌuin? chan. Ut li ixk quixye re: —At rey, saꞌ a̱cꞌabaꞌ la̱at tinsume li cꞌaꞌru xapatzꞌ cue ut tinye lix ya̱lal a̱cue. Laj Joab, li nacꞌanjelac cha̱cuu, aꞌan li xyehoc cue nak tincha̱lk a̱cuiqꞌuin chi a̱tinac. Ut aꞌan ajcuiꞌ xyehoc cue li cꞌaꞌru xinye a̱cue. 20 Laj Joab xba̱nu chixjunil aꞌin re a̱tenkꞌanquil. Aꞌan naraj nak ta̱yi̱ba̱k ru li chꞌaꞌajquilal aꞌin. At rey, la̱at cuan a̱naꞌleb joꞌ jun x-ángel li Dios. La̱at nacanau chixjunil li na-uxman saꞌ ruchichꞌochꞌ, chan. 21 Ut li rey David quixye re laj Joab: —Ac xinyi̱b ru li chꞌaꞌajquil. La̱in tinba̱nu li xatzꞌa̱ma chicuu. Ayu ut ta̱cꞌam chak laj Absalón, chan. 22 Laj Joab quixcuikꞌib rib saꞌ chꞌochꞌ re xqꞌuebal xlokꞌal laj David ut quixye: —Aꞌ taxak li Dios chi-osobtesi̱nk a̱cue, at rey. Anakcuan ninnau nak xsahoꞌ a̱chꞌo̱l cuiqꞌuin xban nak xaba̱nu li cꞌaꞌru xintzꞌa̱ma cha̱cuu, chan. 23 Laj Joab quicuacli ut co̱ Gesur. Ut quixcꞌam cuiꞌchic chak laj Absalón saꞌ li tenamit Jerusalén. 24 Abanan li rey David quixye re nak laj Absalón ti̱c ta̱xic saꞌ rochoch. Incꞌaꞌ ta̱cꞌamekꞌ saꞌ rochoch laj David xban nak incꞌaꞌ quiraj rilbal ru. Joꞌcan nak laj Absalón quicuan saꞌ rochoch ut incꞌaꞌ quicuulac saꞌ rochoch laj David. 25 Ma̱ jun chic cui̱nk cuan Israel joꞌ laj Absalón. Tzꞌakal re ru lix tibel. Ma̱cꞌaꞌ xpaltil. Xban nak cꞌajoꞌ xchakꞌal ru, chixjunileb nequeꞌxqꞌue xlokꞌal. 26 Rajlal, nak ac rakecꞌ re li chihab, naxqꞌue chi besecꞌ lix jolom xban nak kꞌaxal nabal li rismal ut nachꞌiꞌchꞌiꞌi̱c xban. Li rismal li nabeseꞌ numenak o̱b libras ra̱lal joꞌ nequeꞌbisoc cuiꞌ saꞌ rochoch li rey. 27 Queꞌcuan oxib li ralal laj Absalón ut jun lix rabin kꞌaxal chꞌinaꞌus, xTamar xcꞌabaꞌ. 28 Laj Absalón quicuan Jerusalén cuib chihab chi incꞌaꞌ quiril ru li rey. 29 Quixtakla xbokbal laj Joab re nak ta̱xic chi a̱tinac riqꞌuin li rey saꞌ xcꞌabaꞌ laj Absalón. Abanan laj Joab incꞌaꞌ quiraj xic riqꞌuin laj Absalón. Quixtakla cuiꞌchic xbokbal xcaꞌ sut, abanan laj Joab incꞌaꞌ ajcuiꞌ quiraj xic. 30 Joꞌcan nak laj Absalón quixye reheb lix mo̱s: —Qꞌuehomak retal. Lix naꞌaj lix cebada laj Joab cuan chixcꞌatk li cue. Texxic ut te̱cꞌat lix cebada laj Joab, chan. Ut eb lix mo̱s queꞌxba̱nu joꞌ quiyeheꞌ reheb. 31 Ut laj Joab co̱ saꞌ li rochoch laj Absalón ut quixye re: —¿Cꞌaꞌut nak xeꞌxcꞌat lin cebada eb la̱ mo̱s? chan. 32 Laj Absalón quixye re: —Xeꞌxcꞌat xban nak xintakla a̱bokbal ut incꞌaꞌ xatcꞌulun chicuilbal. Xcuaj raj nak tatxic chi a̱tinac riqꞌuin li rey saꞌ incꞌabaꞌ la̱in. Xatintakla raj chixyebal re, “¿Cꞌaꞌru aj e nak xatakla incꞌambal arin? Us raj chokꞌ cue cui ta xincana aran Gesur”. La̱in tincuaj rilbal ru li rey. Cui cuan inma̱c chiru, chinixcamsihak, chan laj Absalón. 33 Joꞌcan nak laj Joab co̱ chi a̱tinac riqꞌuin li rey David ut quixye re li cꞌaꞌru quixye laj Absalón. Li rey quixtakla xbokbal laj Absalón. Co̱ laj Absalón riqꞌuin ut quixcuikꞌib rib saꞌ chꞌochꞌ. Li rey quixcꞌul ut quirutzꞌ ru. |
© 2019, Wycliffe Bible Translators. All rights reserved.
Wycliffe Bible Translators, Inc.