2 Samuel 13 - Li Santil hu

Laj Amnón ut lix Tamar

¹ Laj Absalón, li ralal laj David, quicuan jun li ranab, xTamar xcꞌabaꞌ. Cꞌajoꞌ xchꞌinaꞌusal li xkaꞌal aꞌan. Laj Amnón, aꞌan jun chic li ralal laj David. Laj Amnón co̱ xchꞌo̱l chirix lix Tamar.

² Cꞌajoꞌ nak quixra ru lix Tamar toj retal quiyajer xban xcꞌoxlanquil ut incꞌaꞌ naru ta̱ril ru. Xban nak lix Tamar ma̱jiꞌ cuanjenak riqꞌuin cui̱nk, laj Amnón quixcꞌoxla nak ma̱cꞌaꞌ ta̱ru̱k tixba̱nu re.

³ Cuan jun li rami̱g laj Amnón. Li rami̱g, aꞌan laj Jonadab, li ralal laj Simea. Ut laj Simea, aꞌan li ras laj David. Laj Jonadab se̱b xchꞌo̱l chixba̱nunquil li incꞌaꞌ us.

⁴ Laj Jonadab quixye re laj Amnón: —La̱at ralalat li rey David. Ye cue cꞌaꞌut nak rajlal cutan yo̱cat chi bakocꞌ, chan. Ut laj Amnón quixye re: —La̱in xco̱ inchꞌo̱l chirix lix Tamar, li ranab laj Absalón li cuas, chan.

⁵ Laj Jonadab quixye re: —Yoclan saꞌ a̱cuarib ut ba̱nu a̱cuib joꞌ nak yajat. Nak ta̱cha̱lk la̱ yucuaꞌ cha̱cuilbal, ta̱ye re, “Ba̱nu usilal, takla lix Tamar li cui̱tzꞌin chixqꞌuebal lin tzacae̱mk. La̱in nacuaj nak ta̱cha̱lk arin re tixyi̱b intzacae̱mk chicuu ut tixqꞌue cue re tintzaca,” chaꞌakat re, chan laj Jonadab.

⁶ Joꞌcan nak laj Amnón quiyocla ut quixba̱nu rib joꞌ nak yaj. Li rey David co̱ chirilbal ut laj Amnón quixye re: —Nintzꞌa̱ma cha̱cuu nak ta̱takla lix Tamar arin re nak tixyi̱b chicuu cuibak incaxlan cua ut tixqꞌue cue re tintzaca, chan.

⁷ Ut laj David quixye re lix Tamar: —Tatxic saꞌ rochoch laj Amnón la̱ cuas ut ta̱yi̱b lix tzacae̱mk, chan.

⁸ Joꞌcan nak lix Tamar co̱ saꞌ rochoch laj Amnón ut quiril nak cuan saꞌ xcuarib. Quixcꞌam li cꞌaj ut quixyi̱b li caxlan cua chiru laj Amnón ut quixqꞌue chi chakꞌac.

⁹ Quixcꞌam li xartin ut quixqꞌue li caxlan cua re. Abanan laj Amnón incꞌaꞌ quixcuaꞌ. Quixye re: —Ta̱ye reheb chixjunileb nak teꞌe̱lk arin, chan. Ut chixjunileb queꞌel aran.

¹⁰ Ut laj Amnón quixye re lix Tamar: —Cꞌam chak li tzacae̱mk arin saꞌ incuarib ut ta̱qꞌue cue re tincuaꞌ.— Ut lix Tamar quixchap li caxlan cua ut co̱ cuan cuiꞌ lix cuarib laj Amnón li ras.

¹¹ Lix Tamar quixqꞌue li tzacae̱mk re, abanan laj Amnón quixchap lix Tamar ut quixye re: —At cuanab, yoclan cuiqꞌuin, chan.

¹² Lix Tamar quixye re: —At cuas, incꞌaꞌ. Mina̱puersi chixba̱nunquil li incꞌaꞌ us aꞌin. La̱o aj Israel incꞌaꞌ nakaba̱nu chi joꞌcan.

¹³ Cui tinba̱nu li ma̱c aꞌin, ¿chanru tincana̱k la̱in? Xuta̱nal tine̱lk la̱in. Ut la̱at tatcana̱k joꞌ jun cui̱nk incꞌaꞌ us xnaꞌleb arin Israel. Nintzꞌa̱ma cha̱cuu nak tat-a̱tinak riqꞌuin li rey. Aꞌan tinixkꞌaxtesi chokꞌ a̱cuixakil, chan.

¹⁴ Abanan laj Amnón incꞌaꞌ qui-abin chiru. Aꞌan kꞌaxal cau rib chiru lix Tamar. Quixchap chi pue̱rs ut quicuan riqꞌuin.

¹⁵ Laj Amnón xbe̱n cua quixra lix Tamar. Abanan nak ac xchap lix Tamar chi pue̱rs, kꞌaxal cuiꞌchic xicꞌ quiril. Quixye re: —Cuaclin ut elen arin, chan.

¹⁶ Ut lix Tamar quixye re: —Incꞌaꞌ. Cui tina̱cua̱lina anakcuan, aꞌan kꞌaxal cuiꞌchic yibru chiru li xaba̱nu cue, chan. Abanan laj Amnón incꞌaꞌ quirabi li cꞌaꞌru quixye.

¹⁷ Quixbok lix mo̱s ut quixye re: —Isi li ixk arin, ut tzꞌap chi us li puerta, chan.

¹⁸ Li mo̱s quirisi chirix cab ut quixtzꞌap chi us li puerta. Lix Tamar cuan jun lix cha̱bil akꞌ chirix xcomon li nequeꞌrocsi eb lix rabin li rey, li toj ma̱jiꞌ cuanjenakeb cui̱nk riqꞌuin.

¹⁹ Lix Tamar quixqꞌue li cha saꞌ xjolom. Quixpej li rakꞌ. Quixtzꞌap li ru riqꞌuin li rukꞌ ut yo̱ chi ya̱bac nak co̱.

²⁰ Nak laj Absalón quiril lix Tamar, quixye re: —¿Ma xatxchap chi pue̱rs laj Amnón? Matya̱bac, at cuanab. Laj Amnón, aꞌan la̱ cuas. Ma̱ ani aj iqꞌuin ta̱serakꞌi li cꞌaꞌru xba̱nu a̱cue, chan. Joꞌcan nak lix Tamar quicana saꞌ rochoch laj Absalón ut kꞌaxal ra saꞌ xchꞌo̱l.

²¹ Nak quirabi li cꞌaꞌru quicꞌulman li rey David, cꞌajoꞌ nak quijoskꞌoꞌ.

²² Laj Absalón xicꞌ chic quiril laj Amnón xban nak quixchap chi pue̱rs lix Tamar, li ranab. Abanan chi ti̱c ma̱cꞌaꞌ quixye re.

²³ Nak ac xnumeꞌ chic cuib chihab, yo̱queb chixbesbal rix lix carner laj Absalón aran Baal-hazor, nachꞌ riqꞌuin li tenamit Efraín. Laj Absalón quixbok chixjunileb li ralal li rey re nak teꞌxic chi cuaꞌac riqꞌuin.

²⁴ Co̱ riqꞌuin li rey David ut quixye: —At rey, yo̱queb chixbesbal rixeb lin carner. Nintzꞌa̱ma cha̱cuu nak la̱at, a̱cuochbeneb li nequeꞌcꞌanjelac cha̱cuu, texxic cuiqꞌuin re ta̱sahokꞌ saꞌ e̱chꞌo̱l cuochben, chan.

²⁵ Li rey quixye: —At cualal, incꞌaꞌ toxic chikajunilo xban nak kꞌaxal nabalo. Kꞌaxal terto ta̱e̱lk chokꞌ a̱cue, chan. Usta laj Absalón quixpuersi ru re ta̱xic, abanan li rey incꞌaꞌ co̱. Abanan quixtzꞌa̱ma chiru li Dios nak ta̱rosobtesi laj Absalón.

²⁶ Ut laj Absalón quixye re: —Cui incꞌaꞌ ta̱ru̱k tatxic la̱at, chixicak laj Amnón li cuas, chan. Ut li rey quixye re: —¿Cꞌaꞌut nak ta̱cuaj nak ta̱xic laj Amnón? chan.

²⁷ Laj Absalón quirelaji ru li rey nak ta̱xic laj Amnón toj retal nak li rey quixtaklaheb laj Amnón ut chixjunileb li ralal.

²⁸ Laj Absalón quixye reheb lix mo̱s: —Qꞌuehomak retal nak ta̱cala̱k chi us laj Amnón. Nak tinye e̱re, te̱camsi. Mexcꞌoxlac chixcamsinquil xban nak la̱in yo̱quin chi takla̱nc e̱re. Cacuubresihomak e̱chꞌo̱l chixba̱nunquil li ninye e̱re, chan.

²⁹ Eb lix mo̱s queꞌxba̱nu joꞌ quiyeheꞌ reheb xban laj Absalón. Queꞌxcamsi laj Amnón. Ut eb li ralal li rey queꞌtakeꞌ chirixeb lix mu̱l ut queꞌe̱lelic.

³⁰ Nak toj ma̱jiꞌ nequeꞌcuulac li ralal, quicuulac resil riqꞌuin laj David nak queꞌcamsi̱c chixjunileb li ralal xban laj Absalón. Ma̱ jun chic quicana chi yoꞌyo.

³¹ Laj David quicuacli ut quixpej li rakꞌ ut quixcut rib saꞌ chꞌochꞌ xban xrahil xchꞌo̱l. Eb lix mo̱s li cuanqueb rochben queꞌxpej ajcuiꞌ li rakꞌeb.

³² Abanan, laj Jonadab li ralal li ras laj David quixye re: —At rey, incꞌaꞌ xcamsiheb chixjunileb. Caꞌaj cuiꞌ laj Amnón xcamsi. Laj Absalón ac cuan saꞌ xchꞌo̱l nak tixcamsi laj Amnón chalen nak laj Amnón quixchap chi pue̱rs lix Tamar li ranab.

³³ Ma̱pa̱b li cꞌaꞌru queꞌxye a̱cue. Moco xeꞌcamsi̱c ta chixjunileb la̱ cualal. Caꞌaj cuiꞌ laj Amnón quicamsi̱c, chan.

³⁴ Nak laj Absalón yo̱ chi e̱lelic, jun li soldado li yo̱ chi cꞌacꞌale̱nc quixqꞌue retal nak nabaleb yo̱queb chak chi cubec saꞌ li tzu̱l saꞌ li be li naxic Horonaim.

³⁵ Laj Jonadab quixye re laj David: —Aꞌaneb la̱ cualal li yo̱queb chi cha̱lc joꞌ xinye a̱cue, chan.

³⁶ Tojeꞌ ajcuiꞌ ta̱rakekꞌ chi a̱tinac laj Jonadab nak queꞌcuulac li ralal laj David ut japjo̱queb re chi ya̱bac. Cꞌajoꞌ nak queꞌya̱bac laj David ut eb li nequeꞌcꞌanjelac chiru.

³⁷ Laj Absalón quie̱lelic ut co̱ Gesur riqꞌuin li rey Talmai li ralal laj Amiud. Ut laj David rajlal cutan naya̱bac xban xcamic laj Amnón li ralal.

³⁸ Nak quie̱lelic laj Absalón, co̱ aran Gesur ut aran quicuan oxib chihab.

³⁹ Nak ac xnumeꞌ xrahil xchꞌo̱l laj David chirix li ralal li quicam, quiraj cuiꞌchic rilbal ru laj Absalón.