2 Samuel 10 - Li Santil hu

¹ Mokon chic quicam laj Nahas, lix reyeb li ralal xcꞌajol laj Amón. Ut aꞌ chic laj Hanún li ralal qui-oc chokꞌ xreyeb.

² Li rey David quixye: —La̱in tincua̱nk saꞌ usilal riqꞌuin laj Hanún joꞌ nak quicuan saꞌ usilal cuiqꞌuin laj Nahas lix yucuaꞌ, chan. Joꞌcan nak quixtaklaheb lix takl riqꞌuin laj Hanún re teꞌxye re nak ra saꞌ xchꞌo̱l xban nak quicam laj Nahas, lix yucuaꞌ. Nak queꞌcuulac lix takl laj David saꞌ xnaꞌajeb li ralal xcꞌajol laj Amón,

³ eb li nequeꞌtaklan saꞌ xya̱nkeb li ralal xcꞌajol laj Amón queꞌxye re laj Hanún: —¿Ma nacapa̱b la̱at nak li rey David xtaklaheb chak lix takl arin caꞌaj cuiꞌ re xqꞌuebal xlokꞌal la̱ yucuaꞌ ut re xcꞌojobanquil a̱chꞌo̱l? ¿Ma incꞌaꞌ ta biꞌ xtaklaheb chak arin yal re xqꞌuebal retal li katenamit re tixsach ru? chanqueb.

⁴ Joꞌcan nak laj Hanún quixchapeb li cui̱nk ut quixtakla xjobal yijach lix macheb ut queꞌxset li rakꞌeb toj chiru li raꞌeb. Quixchakꞌrabiheb ut quixtaklaheb cuiꞌchic saꞌ xnaꞌajeb.

⁵ Nak laj David quirabi resil li cꞌaꞌru queꞌxcꞌul lix takl, quixtakla xcꞌulbaleb xban nak cꞌajoꞌ nak yo̱ xxuta̱neb. Quixtakla xyebal reheb nak teꞌcana̱k Jericó toj ta̱chamokꞌ cuiꞌchic lix macheb.

⁶ Eb li ralal xcꞌajol laj Amón queꞌxqꞌue retal nak xicꞌ chic teꞌilekꞌ xban laj David. Joꞌcan nak queꞌxtoj junmay mil chi soldados re Siria li queꞌcuan saꞌ li cuib chi tenamit Bet-rehob ut Soba. Queꞌxtoj ajcuiꞌ lix reyeb laj Maaca rochben jun mil chi soldados. Joꞌcan ajcuiꞌ cablaju mil chi soldados re Is-tob.

⁷ Laj David quirabi resil ut quixtakla laj Joab rochbeneb chixjunileb li soldados li cauheb rib chi pletic.

⁸ Eb li ralal xcꞌajol laj Amón queꞌco̱eb chi pletic ut queꞌxxakab ribeb saꞌ li oqueba̱l re li tenamit. Ut eb li soldados aj Siria li queꞌcuan saꞌ eb li tenamit Soba ut Rehob rochbeneb lix soldados laj Maaca ut eb li re Is-tob cuanqueb saꞌ cꞌaleba̱l.

⁹ Laj Joab quiril nak teꞌcha̱lk chiru ut chirix chi pletic. Joꞌcan nak quixsicꞌ ruheb lix soldados li kꞌaxal cauheb rib chi pletic saꞌ xya̱nkeb laj Israel ut quixqꞌueheb chi ubej re teꞌpletik riqꞌuineb li soldados aj Siria.

¹⁰ Ut quixcanabeb li jun chꞌu̱tal chi soldados rubel xtakl laj Abisai li ri̱tzꞌin re teꞌpletik riqꞌuineb li ralal xcꞌajol laj Amón.

¹¹ Quixye re laj Abisai: —Cui ta̱cuil nak eb li solda̱deb laj Siria yo̱keb chi numta̱c saꞌ inbe̱n, la̱at tattenkꞌa̱nk cue. Ut cui eb li ralal xcꞌajol laj Amón yo̱keb chi numta̱c saꞌ a̱be̱n, la̱in tintenkꞌa̱nk a̱cue.

¹² Cauhak taxak a̱chꞌo̱l. Chikacacuubresi kachꞌo̱l chi pletic. Chikacolak rix li katenamit la̱o aj Israel, lix tenamit li Dios. Ut li Ka̱cuaꞌ taxak tixba̱nu li cꞌaꞌru naraj aꞌan, chan.

¹³ Laj Joab ut eb li soldados li cuanqueb rochben queꞌnachꞌoc riqꞌuineb li soldados aj Siria re teꞌpletik riqꞌuineb. Abanan eb laj Siria queꞌe̱lelic chiruheb.

¹⁴ Ut eb li ralal xcꞌajol laj Amón queꞌril nak queꞌe̱lelic eb li soldados laj Siria. Joꞌcan nak queꞌe̱lelic ajcuiꞌ eb aꞌan chiruheb laj Abisai. Queꞌoc saꞌ lix tenamit re teꞌxcol ribeb. Ut laj Joab quixcanab pletic riqꞌuineb ut quisukꞌi cuiꞌchic Jerusalén.

¹⁵ Eb li soldados re Siria queꞌxqꞌue retal nak eb laj Israel queꞌnumta saꞌ xbe̱neb. Joꞌcan nak queꞌxchꞌutub cuiꞌchic ribeb chixjunileb.

¹⁶ Li rey Hadad-ezer quixbokeb li soldados aj Siria li cuanqueb jun pacꞌal li nimaꞌ Éufrates. Queꞌco̱eb saꞌ li naꞌajej Helam. Laj Sobac, li nataklan saꞌ xbe̱neb lix soldados laj Hadad-ezer, aꞌan li yo̱ chi cꞌamoc xbeheb.

¹⁷ Nak li rey David quirabi resil, quixchꞌutub chixjunileb li solda̱deb laj Israel. Queꞌco̱eb jun pacꞌal li nimaꞌ Jordán toj saꞌ li naꞌajej Helam. Ut eb li soldados re Siria queꞌxtzolob ribeb re teꞌpletik riqꞌuineb lix soldados laj David.

¹⁸ Abanan eb laj Siria queꞌe̱lelic cuiꞌchic chiruheb laj Israel. Ut laj David ut eb lix soldados queꞌxcamsiheb cuukub ciento li soldados li nequeꞌxic saꞌ li carruajes ut queꞌxcamsiheb ajcuiꞌ caꞌcꞌa̱l mil chi soldado li nequeꞌbe̱c chirix cacua̱y. Ut queꞌxcamsi laj Sobac li nataklan saꞌ xbe̱neb li solda̱deb laj Siria. Quicam saꞌ li naꞌajej li queꞌpletic cuiꞌ.

¹⁹ Eb li rey li cuanqueb rubel xcuanquil laj Hadad-ezer queꞌril nak eb laj Israel queꞌnumta saꞌ xbe̱neb. Joꞌcan nak queꞌxqꞌue ribeb rubel xcuanquileb laj Israel. Ut queꞌxcꞌam cuiꞌchic ribeb saꞌ usilal riqꞌuineb. Ut eb laj Siria incꞌaꞌ chic queꞌraj xtenkꞌanquileb li ralal xcꞌajol laj Amón xban nak queꞌxucuac.