2 Samuel 1 - Li Santil hu

Nak quicuulac resil lix camiqueb laj Saúl ut laj Jonatán riqꞌuin laj David

¹ Chirix lix camic laj Saúl, laj David quisukꞌi Siclag nak ac xnumta saꞌ xbe̱neb laj Amalec ut aran quicuan cuib cutan.

² Saꞌ rox li cutan quicuulac jun li sa̱j cui̱nk riqꞌuin laj David. Li cui̱nk aꞌan xcomoneb lix soldados laj Saúl. Pejel li rakꞌ ut cuan li poks saꞌ xjolom retalil lix rahil xchꞌo̱l. Quixcuikꞌib rib saꞌ chꞌochꞌ re xqꞌuebal xlokꞌal laj David.

³ Laj David quixye re: —¿Bar xatchal chak? chan. Li cui̱nk quixye re: —Yal xine̱lelic chak saꞌ xya̱nkeb lix soldados laj Saúl, chan.

⁴ Laj David quixye re: —Ye cue cꞌaꞌru xcꞌulman.— Li cui̱nk quixye re: —Eb li soldados aj Israel queꞌe̱lelic saꞌ li ple̱t. Nabaleb li xeꞌcamsi̱c. Xeꞌxcamsi laj Saúl ut xeꞌxcamsi ajcuiꞌ laj Jonatán li ralal, chan.

⁵ Laj David quixye re li sa̱j cui̱nk li quicꞌamoc re li esilal: —¿Chanru nak nacanau nak xeꞌcamsi̱c laj Saúl ut laj Jonatán? chan re.

⁶ Li cui̱nk quixye re: —La̱in yo̱quin chi numecꞌ aran saꞌ li tzu̱l Gilboa nak xcuil nak laj Saúl xakxo aran. Yo̱ chixcu̱tunquil rib riqꞌuin lix la̱ns. Ut eb li soldados li xicꞌ nequeꞌiloc re yo̱queb chi cha̱lc saꞌ xcarruaje ut yo̱queb ajcuiꞌ chi cha̱lc chirix cacua̱y.

⁷ Quixsukꞌisi rib laj Saúl chicuilbal ut quixye cue, “Quim arin.” Ut la̱in co̱in riqꞌuin ut quinye re, “Cueꞌquin. ¿Cꞌaꞌru ta̱cuaj tinba̱nu?” chanquin re.

⁸ Quixye cue, “¿Anihat la̱at?” chan. Ut la̱in quinye re, “La̱in xcomoneb laj Amalec” chanquin re.

⁹ Ut aꞌan quixye cue, “Hilon chak cuiqꞌuin ut china̱camsi. Toj yoꞌyo̱quin, abanan kꞌaxal ra cuanquin,” chan laj Saúl.

¹⁰ Joꞌcan nak quinnachꞌoc riqꞌuin ut quincamsi xban nak quinqꞌue retal nak incꞌaꞌ chic ta̱cua̱nk xyuꞌam xban nak ac xtꞌaneꞌ saꞌ rukꞌeb li xicꞌ nequeꞌiloc re. Chirix aꞌan quinxoc lix corona li cuan saꞌ xjolom ut quinxoc ajcuiꞌ li chꞌi̱chꞌ li cuan saꞌ xtel ut quincꞌam chak chokꞌ a̱cue, at ka̱cuaꞌ David, chan li sa̱j cui̱nk.

¹¹ Laj David, joꞌ eb ajcuiꞌ chixjunileb li cui̱nk li cuanqueb rochben, queꞌxpej li rakꞌeb xban xrahil xchꞌo̱leb.

¹² Queꞌya̱bac xban xrahil xchꞌo̱leb ut queꞌxba̱nu x-ayu̱n toj qui-ecuu xban nak queꞌcamsi̱c laj Saúl ut laj Jonatán ut xban ajcuiꞌ nak kꞌaxal nabaleb laj Israel, lix tenamit li Dios, queꞌcamsi̱c saꞌ li ple̱t.

¹³ Ut laj David quia̱tinac riqꞌuin li cui̱nk li quiyehoc re nak quicamsi̱c laj Saúl. Quixye re: —¿Bar a̱tenamit? chan. Li cui̱nk quixye: —La̱in saꞌ jalan tenamit xinchal chak. La̱in xcomoneb laj Amalec, chan.

¹⁴ Laj David quixye ajcuiꞌ re: —¿Ma incꞌaꞌ xatxucuac chixcamsinquil li rey? ¿Cꞌaꞌut nak xacamsi li rey li sicꞌbil ru xban li Dios? chan.

¹⁵ Ut laj David quixbok jun li cui̱nk riqꞌuin ut quixye re: —Camsi li cui̱nk aꞌin, chan. Ut aꞌan quixcamsi li cui̱nk aj Amalec.

¹⁶ Ut laj David quixye re li cui̱nk aj Amalec: —Xma̱c nak xaye nak xacamsi li rey li sicꞌbil ru xban li Dios, joꞌcan nak xatcamsi̱c la̱at, chan.

¹⁷ Laj David quixbicha jun li bich re rahil chꞌo̱lej chirix lix camiqueb laj Saúl ut laj Jonatán, li ralal.

¹⁸ Ut quixye nak chixjunileb li ralal xcꞌajol laj Judá teꞌxtzol. Li bich aꞌin tzꞌi̱banbil saꞌ li hu li quixtzꞌi̱ba laj Jaser. Aꞌan aꞌin li bich:

¹⁹ Quisacheꞌ ru lix lokꞌal li tenamit Israel saꞌ xbe̱neb li tzu̱l. Li kꞌaxal cauheb rib chi pletic queꞌcamsi̱c.

²⁰ Me̱ye resil aran Gat, chi moco te̱ye resil saꞌ eb li be aran Ascalón, re nak incꞌaꞌ teꞌsahokꞌ saꞌ xchꞌo̱leb lix rabineb laj filisteo. Me̱ye resil re nak incꞌaꞌ teꞌpiscꞌok xban xsahileb xchꞌo̱l li ixk li incꞌaꞌ nequeꞌxpa̱b li Dios.

²¹ La̱ex li tzu̱l li cuanquex Gilboa, incꞌaꞌ ta chic chitꞌanekꞌ li hab saꞌ e̱be̱n, chi moco li xchuꞌque. Ut incꞌaꞌ ta chic chie̱lk li acui̱mk chiru li chꞌochꞌ xban nak saꞌ e̱be̱n la̱ex xeꞌsacheꞌ xcuanquileb lix chꞌi̱chꞌeb li cauheb rib chi pletic. Ut saꞌ e̱be̱n ajcuiꞌ la̱ex quisacheꞌ xcuanquil lix chꞌi̱chꞌ laj Saúl. Chanchan ta li incꞌaꞌ sicꞌbil ru xban li Dios.

²² Ma̱ jun sut queꞌsukꞌi saꞌ li ple̱t laj Saúl ut laj Jonatán chi incꞌaꞌ ta nequeꞌxcamsi chak nabaleb riqꞌuineb lix tzimaj ut riqꞌuin lix chꞌi̱chꞌeb.

²³ Laj Saúl ut laj Jonatán kꞌaxal cha̱bileb ut raro̱queb. Laj Saúl ut laj Jonatán incꞌaꞌ queꞌxcanab ribeb nak toj yoꞌyo̱queb. Chi moco nak queꞌcam queꞌxcanab ribeb. Kꞌaxal se̱beb joꞌ li xul tꞌiu xcꞌabaꞌ. Ut kꞌaxal cauheb rib joꞌ li cakcoj.

²⁴ Ex ixk aj Israel, chexya̱bak chirix lix camic laj Saúl xban nak aꞌan natikiban e̱re riqꞌuin li cha̱bil tꞌicr púrpura. Ut aꞌan ajcuiꞌ naxqꞌue li oro chokꞌ xsahob ru le̱ rakꞌ.

²⁵ Qꞌuehomak retal. Xeꞌcamsi̱c li cauheb rib chi pletic ut xcamsi̱c ajcuiꞌ laj Jonatán saꞌ xbe̱n li tzu̱l.

²⁶ At Jonatán, la̱at chanchanat li cuas. Cꞌajoꞌ xrahil inchꞌo̱l xban nak kꞌaxal raro̱cat inban. Kꞌaxal lokꞌ chokꞌ cue nak xina̱ra. Kꞌaxal lokꞌ nak xinraheꞌ a̱ban chiru nak xinraheꞌ xbaneb li ixk.

²⁷ Xeꞌosoꞌ li cauheb rib chi pletic ut eb lix chꞌi̱chꞌ ma̱cꞌaꞌ chic nequeꞌoc cuiꞌ, chan laj David saꞌ lix bich.