2 Reyes 9 - Li Santil hu

¹ Li profeta Eliseo quixbok jun li sa̱j cui̱nk xcomoneb li profeta li cuanqueb aran, ut quixye re: —Yi̱b a̱cuib re tatxic saꞌ li naꞌajej Ramot li cuan saꞌ xcue̱nt Galaad ut cꞌam li aceite aꞌin.

² Nak tatcuulak saꞌ li tenamit aꞌan, ta̱sicꞌ laj Jehú li ralal laj Josafat. Laj Jehú, aꞌan ri laj Nimsi. Nak ta̱tau, tat-oc aran cuan cuiꞌ. Ta̱cuisi saꞌ xya̱nkeb li cuanqueb rochben ut ta̱cꞌam xjunes saꞌ jalan naꞌajej.

³ Nak ac cua̱nk xjunes ta̱qꞌue li aceite saꞌ xjolom ut ta̱ye re, “Joꞌcaꞌin xye li Ka̱cuaꞌ: Anakcuan xatinxakab chokꞌ xreyeb laj Israel,” chan. Nak acak xaqꞌue li aceite saꞌ xjolom, ta̱te li puerta ut tat-e̱lk saꞌ junpa̱t. Matbay aran, chan laj Eliseo.

⁴ Co̱ ut li sa̱j profeta saꞌ li tenamit Ramot li cuan saꞌ xcue̱nt Galaad.

⁵ Nak quicuulac saꞌ li tenamit aꞌan, chunchu̱queb nak quixtauheb li nequeꞌtaklan saꞌ xya̱nkeb li soldado. Quixye reheb: —La̱in nacuaj a̱tinac riqꞌuin li nataklan xban nak cuan cꞌaꞌru tinye re, chan. Ut laj Jehú quichakꞌoc ut quixye re: —¿Ani ke ta̱cuaj ra̱tinanquil? chan re li profeta. Ut li profeta quixye re: —At Ka̱cuaꞌ, a̱cuiqꞌuin la̱at tincuaj a̱tinac, chan.

⁶ Quicuacli ut laj Jehú ut queꞌoc saꞌ cab xjuneseb. Ut li profeta quixqꞌue li aceite saꞌ xjolom ut quixye re: —Joꞌcaꞌin xye li Ka̱cuaꞌ li nequeꞌxlokꞌoni eb laj Israel, “Anakcuan xatinxakab chokꞌ xreyeb lin tenamit Israel.

⁷ La̱at tatsachok ruheb li ralal xcꞌajol laj Acab li nataklan saꞌ a̱be̱n. Chi joꞌcaꞌin ta̱qꞌueheb chixtojbal rix lix camiqueb lin profetas li queꞌcꞌanjelac chicuu li quixtakla xcamsinquil lix Jezabel.

⁸ Ta̱camsiheb chixjunileb li ralal xcꞌajol laj Acab. Ta̱sacheb ru chixjunileb li cui̱nk li cuanqueb saꞌ xya̱nkeb li ralal xcꞌajol. Ma̱ jun chic reheb teꞌcana̱k chi yoꞌyo.

⁹ Tinsach ruheb li ralal xcꞌajol laj Acab joꞌ nak quinsach ruheb li ralal xcꞌajol laj Jeroboam li ralal laj Nabat. Tinsach ruheb joꞌ nak quinsach ruheb li ralal xcꞌajol laj Baasa li ralal laj Ahías.

¹⁰ Ut lix Jezabel ma̱ ani ta̱mukuk re nak ta̱ca̱mk. Tzꞌiꞌ ta̱cꞌuxuk re saꞌ li ru takꞌa Jezreel”, chan.— Nak quirakeꞌ chixyebal li profeta li cꞌaꞌru quixye li Ka̱cuaꞌ, quixte li puerta ut co̱ saꞌ junpa̱t.

¹¹ Laj Jehú co̱ cuiꞌchic riqꞌuineb li rochben ut queꞌxye re: —¿Cꞌaꞌru xraj a̱cuiqꞌuin li lo̱c aj cui̱nk aꞌan? chanqueb. Laj Jehú quixye reheb: —La̱ex ac nequenau ru li cui̱nk aꞌan. La̱ex nequenau chanru naa̱tinac, chan.

¹² Queꞌxye re: —Moco ya̱l ta aꞌan. La̱o incꞌaꞌ nakanau cꞌaꞌru naraj, chanqueb. Ut laj Jehú quixye reheb: —Li cui̱nk aꞌan xye cue: Joꞌcaꞌin xye li Ka̱cuaꞌ Dios: La̱in xatinxakab chokꞌ xreyeb laj Israel, chan laj Jehú.

¹³ Saꞌ junpa̱t queꞌxcꞌam chak lix tꞌicreb li rech solda̱dil ut queꞌxhel saꞌ li gradas re nak laj Jehú ta̱xakli̱k saꞌ xbe̱n ut queꞌxya̱basiheb lix trompeta ut queꞌxjap reheb chixyebal: —Laj Jehú, aꞌan li karey, chanqueb.

¹⁴ Joꞌcan nak laj Jehú quixcꞌu̱b ru chanru nak tixcamsi li rey Joram. Laj Jehú, aꞌan li ralal laj Josafat. Ut laj Josafat, aꞌan li ralal laj Nimsi. Laj Joram yo̱ chixcolbal li tenamit Ramot cuan saꞌ xcue̱nt Galaad chiru laj Hazael lix reyeb laj Siria. Chixjunileb li soldados aj Israel cuanqueb rochben laj Joram.

¹⁵ Li rey Joram ac xsukꞌi saꞌ li tenamit Jezreel re ta̱qꞌuira̱k xban nak quitochꞌeꞌ xbaneb laj Siria nak co̱ chi pletic riqꞌuineb li rey Hazael. Laj Jehú quixye reheb li soldado: —Cui junaj kacꞌaꞌux, cheba̱nu cue̱nt nak ma̱ ani ta̱e̱lk saꞌ li tenamit Ramot re teꞌxic chixyebal resil reheb li cuanqueb Jezreel, chan.

¹⁶ Chirix aꞌan, laj Jehú quitakeꞌ saꞌ lix carruaje ut co̱ saꞌ li tenamit Jezreel xban nak aran cuan laj Joram. Toj yaj. Laj Ocozías lix reyeb laj Judá yo̱ chirulaꞌaninquil.

¹⁷ Li cui̱nk li yo̱ chixcꞌacꞌalenquil li tenamit Jezreel cuan saꞌ li cab najt xteram. Quiril nak yo̱queb chak chi cha̱lc lix soldados laj Jehú. Quixjap re chixyebal: —Cueꞌqueb chak jun chꞌu̱tal li soldados, chan. Li rey Joram quixye re: —Takla junak li cui̱nk chirix cacua̱y chixpatzꞌbal reheb ma saꞌ usilal xeꞌchal, chan.

¹⁸ Li cui̱nk li queꞌxtakla co̱ chixcꞌulbal laj Jehú ut quixye re: —Li rey ta̱raj tixnau ma saꞌ usilal xatchal, chan re. Ut laj Jehú quixye re: —¿Cꞌaꞌru ta̱cuaj re aꞌan la̱at? Qꞌue a̱cuib chicuix, chan. Ut li cui̱nk quixta̱ke laj Jehú. Li cui̱nk li yo̱ chi cꞌacꞌale̱nc re li tenamit quixye re li rey Joram: —Li takl xcuulac riqꞌuineb, abanan incꞌaꞌ chic xsukꞌi chak, chan.

¹⁹ Ut li rey Joram quixtakla jun chic lix takl chirix cacua̱y re tixpatzꞌ re laj Jehú ma saꞌ usilal xchal. Co̱ ut li cui̱nk. Nak quicuulac riqꞌuin laj Jehú, quixye re: —Li rey Joram xtakla xpatzꞌbal a̱cue ma saꞌ usilal xatchal, chan. Ut laj Jehú quixye re: —¿Cꞌaꞌru ta̱cuaj re aꞌan la̱at? Qꞌue a̱cuib chicuix, chan.

²⁰ Li cui̱nk li yo̱ chi cꞌacꞌale̱nc saꞌ li tenamit quixye re li rey Joram: —Li takl xcuulac riqꞌuineb. Abanan chi moco aꞌan xsukꞌi chak. Li carruaje yo̱ chi cha̱lc saꞌ junpa̱t. Riqꞌuin aꞌan nacꞌutun nak ma̱re aꞌan laj Jehú li ralal laj Nimsi xban nak aꞌan naxberesi lix carruaje saꞌ junpa̱t. Chanchan li lo̱c, chan.

²¹ Li rey Joram quixye: —Cauresihomak lin carruaje re tinxic la̱in chixcꞌulbal, chan. Nak ac xya̱loꞌ li carruaje, laj Joram quitakeꞌ saꞌ lix carruaje ut li rey Ocozías quitakeꞌ ajcuiꞌ saꞌ lix carruaje aꞌan. Ut queꞌco̱eb chixcꞌulbal laj Jehú. Queꞌxcꞌul ribeb saꞌ lix naꞌaj laj Nabot, Jezreel xtenamit.

²² Nak li rey Joram quiril laj Jehú quixye re: —At Jehú, ¿ma saꞌ usilal xatchal? chan. Laj Jehú quixye re: —¿Chanru nak tocua̱nk saꞌ usilal nak lix Jezabel la̱ naꞌ toj yo̱ chixlokꞌoninquileb li yi̱banbil dios ut cꞌajoꞌ li tu̱lac yo̱? chan.

²³ Laj Joram quixsukꞌisi lix carruaje re ta̱e̱lelik ut quixjap re chixyebal re laj Ocozías: —¡At Ocozías, xoxbalakꞌi! chan.

²⁴ Abanan laj Jehú quixti̱ca laj Joram riqꞌuin lix tzimaj. Nak quixcut chi cau, lix tzimaj saꞌ xyi rix laj Joram qui-oc ut quinumeꞌ saꞌ li ra̱m. Ut laj Joram quitꞌaneꞌ saꞌ lix carruaje chi camenak.

²⁵ Laj Jehú quixye re laj Bidcar li nataklan saꞌ xbe̱neb lix soldado: —Cutumak li camenak saꞌ lix chꞌochꞌ laj Nabot aj Jezreel. ¿Ma jultic a̱cue nak cuotz yo̱co chi xic chirix laj Acab, lix yucuaꞌ laj Joram, nak li Ka̱cuaꞌ Dios quixteneb li raylal aꞌin saꞌ xbe̱n laj Acab?

²⁶ Quixye, “Ecue̱r quicuil nak queꞌcamsi̱c laj Nabot ut eb li ralal. Ninye a̱cue nak tatinqꞌue chixtojbal a̱ma̱c saꞌ ajcuiꞌ li naꞌajej aꞌin. La̱in li Ka̱cuaꞌ ninyehoc re aꞌin,” chan. Joꞌcan nak cꞌam li camenak ut cut aꞌan saꞌ lix chꞌochꞌ laj Nabot joꞌ quixye li Ka̱cuaꞌ, chan laj Jehú.

²⁷ Laj Ocozías lix reyeb laj Judá quiril li quicꞌulman. Joꞌcan nak quie̱lelic toj Bet-hagan. Abanan laj Jehú quixta̱ke ut quixye reheb lix soldados nak teꞌxcamsi laj Ocozías. Queꞌxcut chi tzimaj saꞌ lix carruaje saꞌ li taksi̱nc Gur li cuan chixcꞌatk Ibleam. Abanan laj Ocozías co̱ toj Meguido ut aran quicam.

²⁸ Ut eb li nequeꞌcꞌanjelac chiru laj Ocozías queꞌxcꞌam li camenak toj Jerusalén ut queꞌxmuk saꞌ lix tenamit laj David saꞌ li naꞌajej li queꞌmukeꞌ cuiꞌ lix xeꞌto̱nil xyucuaꞌ.

²⁹ (Nak yo̱ junlaju chihab roquic chokꞌ xreyeb laj Israel laj Joram li ralal laj Acab, laj Ocozías qui-oc chokꞌ xreyeb laj Judá.)

Nak quicamsi̱c lix Jezabel

³⁰ Chirix chic aꞌan laj Jehú quisukꞌi Jezreel ut lix Jezabel quirabi resil. Quixbon li ru ut quixyi̱b chi us li rismal ut quixxakab rib chi iloc saꞌ ventana.

³¹ Nak laj Jehú qui-oc saꞌ li tenamit, lix Jezabel quixye re: —¿Ma saꞌ usilal xatchal, at Zimri? La̱at li xacamsi la̱ rey.

³² Laj Jehú qui-iloc saꞌ li ventana ut quixjap re chixyebal: —¿Ani ta̱oque̱nk chicuix? chan. Cuib oxibeb li cui̱nk eunuco yo̱queb chi iloc saꞌ li ventana.

³³ Laj Jehú quixye reheb: —Cutumak li ixk aꞌan takꞌa, chan. Ut queꞌxcut li ixk takꞌa. Quirachoc lix quiqꞌuel chiru li tzꞌac ut chirixeb ajcuiꞌ li cacua̱y. Ut laj Jehú quixnumsiheb lix cacua̱y ut eb lix carruaje saꞌ xbe̱n lix Jezabel.

³⁴ Chirix aꞌan laj Jehú qui-oc saꞌ li palacio ut quicuaꞌac ut qui-ucꞌac. Tojoꞌnak quixye reheb: —Anakcuan texxic chixmukbal li ma̱us aj ixk aꞌan. Te̱muk xban nak aꞌan xrabin jun li rey, chan.

³⁵ Abanan nak queꞌcuulac cuan cuiꞌ li camenak re teꞌxmuk, incꞌaꞌ chic queꞌxtau. Caꞌaj cuiꞌ lix bakel lix jolom, li rok ut li rukꞌ.

³⁶ Nak li cui̱nk queꞌsukꞌi, queꞌxye re laj Jehú. Ut laj Jehú quixye: —Xcꞌulman joꞌ quixye li Ka̱cuaꞌ Dios re li profeta Elías, Tisbe xtenamit, nak quixye, “Eb li tzꞌiꞌ teꞌxtiu lix tibel lix Jezabel saꞌ li naꞌajej Jezreel.”

³⁷ Lix tibel, aꞌan chanchanak li cꞌot saꞌ li chꞌochꞌ aran Jezreel re nak ma̱ ani ta̱yehok re, “Cueꞌ lix tibel lix Jezabel”, chan laj Jehú.