2 Reyes 8 - Li Santil hu

¹ Li profeta Eliseo quia̱tinac riqꞌuin li ixk li quiqꞌuirtesi̱c lix yum ut quixye re nak li Ka̱cuaꞌ tixtakla li cueꞌej saꞌ li naꞌajej aꞌan chiru cuukub chihab. Quixye re nak ta̱xic chi cua̱nc saꞌ jalan naꞌajej.

² Li ixk quixba̱nu joꞌ quiyeheꞌ re. Co̱ rochbeneb li rechꞌalal chi cua̱nc saꞌ lix naꞌajeb laj filisteo. Cuukub chihab quicuan aran.

³ Nak quinumeꞌ li cuukub chihab, li ixk quisukꞌi cuiꞌchic Israel. Co̱ riqꞌuin li rey chixtzꞌa̱manquil chiru nak tixqꞌue cuiꞌchic re li rochoch ut lix chꞌochꞌ.

⁴ Li rey yo̱ chi a̱tinac riqꞌuin laj Giezi, lix mo̱s li profeta Eliseo. Li rey quixye re laj Giezi nak tixserakꞌi re chixjunil li sachba chꞌo̱lej ut li milagros li quixba̱nu li profeta.

⁵ Laj Giezi yo̱ chixyebal re nak li profeta quixqꞌue cuiꞌchic xyuꞌam jun li camenak nak li ixk quicuulac riqꞌuin chixtzꞌa̱manquil chiru nak ta̱qꞌuehekꞌ cuiꞌchic re li rochoch ut lix chꞌochꞌ. Laj Giezi quixye: —At rey, aꞌan aꞌin li ixk li quiqꞌueheꞌ cuiꞌchic xyuꞌam lix yum xban li profeta. Ut aꞌan aꞌin li al li quiyoꞌobtesi̱c, chan.

⁶ Li rey quixye re li ixk nak tixserakꞌi re chixjunil li quicꞌulman. Li ixk quixba̱nu joꞌ quixye li rey. Chirix aꞌan li rey quixye re jun li cui̱nk li natenkꞌan re nak tixtenkꞌa li ixk. Quixye re: —Ta̱kꞌaxtesi re li ixk chixjunil li quicuan re junxil ut ta̱qꞌue ajcuiꞌ re lix tzꞌak li acui̱mk li qui-el saꞌ lix naꞌaj chiru li cuukub chihab nak ma̱ ani, chan.

Laj Hazael, qui-oc chokꞌ xreyeb aj Siria

⁷ Chirix aꞌan li profeta Eliseo co̱ saꞌ li tenamit Damasco. Laj Ben-adad, lix reyeb laj Siria yaj. Quiyeheꞌ resil re nak cuan li profeta Eliseo aran Damasco.

⁸ Li rey quixye re laj Hazael: —Ayu riqꞌuin lix profeta li Dios ut ta̱cꞌam junak xma̱tan. Ta̱ye re nak ta̱tijok ut tixpatzꞌ re lix Dios ma ta̱numekꞌ li yajel li cuanquin cuiꞌ, chan.

⁹ Laj Hazael co̱ riqꞌuin laj Eliseo. Quixcꞌam chirix caꞌcꞌa̱l chi camello li yo̱queb chiri̱kanquil li cꞌaꞌak re ru cha̱bil li na-el Damasco re tixsi re li profeta. Laj Hazael quicuulac cuan cuiꞌ laj Eliseo ut quixye re: —Li rey Ben-adad li nacatxra joꞌ jun yucuaꞌbej, xinixtakla chixpatzꞌbal a̱cue ma ta̱numekꞌ li yajel li cuan cuiꞌ malaj ut incꞌaꞌ, chan.

¹⁰ Li profeta Eliseo quixye re: —Ye re nak ta̱qꞌuira̱k usta li Ka̱cuaꞌ xcꞌut chicuu nak ta̱ca̱mk, chan.

¹¹ Li profeta Eliseo quixlema saꞌ ru laj Hazael ut laj Hazael chꞌiꞌchꞌiꞌ quirecꞌa. Laj Eliseo qui-oc chi ya̱bac.

¹² Laj Hazael quixye re: —At profeta Eliseo, ¿cꞌaꞌut nak yo̱cat chi ya̱bac? chan. Ut li profeta quixye re: —Yo̱quin chi ya̱bac xban nak ninnau nak la̱at tatrahobtesi̱nk reheb laj Israel. La̱at ta̱cꞌat li rochocheb li teꞌxcol cuiꞌ ribeb. Ta̱camsiheb li sa̱j cui̱nk ut ta̱saqꞌueb chiru pec li cocꞌal nak ta̱camsiheb. Ut ta̱set chi chꞌi̱chꞌ lix saꞌeb li yaj aj ixk, chan.

¹³ Laj Hazael quixye re: —¿Chanru nak tinba̱nu chi joꞌcan? La̱in ma̱cꞌaꞌ nin-oc cuiꞌ. Chanchanin tzꞌiꞌ, chan. Laj Eliseo quixye re: —Li Ka̱cuaꞌ xcꞌutbesi chicuu nak la̱at tat-oc chokꞌ xreyeb laj Siria, chan.

¹⁴ Ut laj Hazael quisukꞌi riqꞌuin li rey Ben-adad. Nak li rey quixpatzꞌ re cꞌaꞌru quixye li profeta Eliseo, laj Hazael quixye re: —Li profeta xye cue nak tatqꞌuira̱k, chan.

¹⁵ Abanan, saꞌ li cutan jun chic laj Hazael quixchap jun li pimil tꞌicr. Quixtzꞌa saꞌ haꞌ ut quixqꞌue saꞌ xnakꞌ ru li rey re ta̱tzꞌap xmusikꞌ toj retal quixcamsi. Ut laj Hazael qui-oc saꞌ xcuanquil chokꞌ re̱kaj.

Eb lix reyeb laj Judá

¹⁶ Yo̱ roꞌ chihab roquic chokꞌ xreyeb laj Israel laj Joram li ralal laj Acab nak laj Joram li ralal laj Josafat qui-oc chokꞌ xreyeb laj Judá.

¹⁷ Cablaju xcaꞌcꞌa̱l chihab cuan re nak qui-oc chokꞌ rey. Cuakxakib chihab quicuan saꞌ xcuanquil aran Jerusalén.

¹⁸ Li rixakil, aꞌan lix rabin laj Acab. Laj Joram quixba̱nu li ma̱usilal joꞌ queꞌxba̱nu chixjunileb lix reyeb laj Israel. Quixba̱nu li incꞌaꞌ us chiru li Ka̱cuaꞌ.

¹⁹ Abanan li Ka̱cuaꞌ incꞌaꞌ quixsach ruheb li ralal xcꞌajol laj Judá xban nak quixyechiꞌi re laj David laj cꞌanjel chiru nak junelic cua̱nk junak reheb li ralal xcꞌajol ta̱oc chokꞌ rey.

²⁰ Nak laj Joram cuan saꞌ xcuanquil aran Judá, eb laj Edom queꞌpletic riqꞌuin. Eb laj Edom queꞌrisi ribeb rubel xcuanquil ut queꞌxxakab xreyeb.

²¹ Laj Joram co̱ Zair rochbeneb chixjunileb lix carruaje. Eb laj Edom queꞌxsut li tenamit. Abanan chiru li kꞌojyi̱n laj Joram ut eb li nequeꞌchꞌeꞌoc reheb lix carruaje queꞌru chi e̱lelic. Ut eb li soldados queꞌxjeqꞌui ribeb ut queꞌco̱eb saꞌ rochocheb.

²² Eb laj Edom queꞌrisi ribeb rubel xcuanquileb laj Judá. Toj chalen anakcuan nequeꞌxtakla ribeb xjuneseb. Joꞌcan ajcuiꞌ li tenamit Libna. Saꞌ eb ajcuiꞌ li cutan aꞌan queꞌpletic riqꞌuineb laj Judá ut queꞌrisi ribeb rubel xcuanquil.

²³ Lix comon li cꞌaꞌak re ru li quixba̱nu li rey Joram tzꞌi̱banbil retal saꞌ li hu Crónicas, li tzꞌi̱banbil cuiꞌ retalil li quilajeꞌxba̱nu lix reyeb laj Judá.

²⁴ Li rey Joram quicam ut quimukeꞌ saꞌ lix tenamit li rey David bar queꞌmukeꞌ cuiꞌ lix xeꞌto̱nil xyucuaꞌ. Ut aꞌ chic laj Ocozías li ralal qui-oc chokꞌ rey chokꞌ re̱kaj laj Joram.

²⁵ Yo̱ cablaju chihab roquic chokꞌ xreyeb laj Israel laj Joram, li ralal laj Acab, nak laj Ocozías li ralal laj Joram qui-oc chokꞌ xreyeb laj Judá.

²⁶ Cuib xcaꞌcꞌa̱l chihab cuan re laj Ocozías nak qui-oc chokꞌ rey. Jun chihab quicuan saꞌ xcuanquil aran Jerusalén. Lix naꞌ, aꞌan lix Atalía li ri laj Omri, li quicuan chokꞌ xreyeb laj Israel.

²⁷ Laj Ocozías quixba̱nu li ma̱usilal chiru li Ka̱cuaꞌ joꞌ queꞌxba̱nu eb li ralal xcꞌajol laj Acab xban nak laj Joram, aꞌan xhiꞌ laj Acab.

²⁸ Laj Ocozías lix reyeb aj Judá quixjunaji rib riqꞌuin lix reyeb laj Israel re teꞌxic chi pletic riqꞌuin laj Hazael lix reyeb laj Siria. Lix reyeb laj Israel, aꞌan laj Horam li ralal laj Acab. Queꞌpletic aran Ramot li cuan saꞌ xcue̱nt Galaad. Eb laj Siria queꞌrocsi xyajel laj Joram.

²⁹ Laj Joram quisukꞌi Jezreel re tixban rib xban nak quitochꞌeꞌ chak nak quicuulac chi pletic aran Ramot riqꞌuin laj Hazael lix reyeb laj Siria. Xban nak yaj laj Joram, joꞌcan nak laj Ocozías co̱ Jezreel chirilbal laj Joram, li ralal laj Acab.