2 Reyes 7 - Li Santil hu

¹ Laj Eliseo quixye re: —Abihomak li cꞌaꞌru naxye li Ka̱cuaꞌ. Cuulaj saꞌ ajcuiꞌ li ho̱nal aꞌin che̱junilex ta̱ru̱k texlokꞌok saꞌ li oqueba̱l re Samaria. Te̱lokꞌ cuukub litro li cꞌaj riqꞌuin yal jun chi tumin plata ut te̱lokꞌ ajcuiꞌ oꞌlaju litro li cebada riqꞌuin yal jun chi tumin plata, chan.

² Li cui̱nk li natenkꞌan re li rey quixye re laj Eliseo: —Usta li Ka̱cuaꞌ Dios naxtakla chak saꞌ choxa li cebada chi nabal, ma̱ jaruj ta̱cꞌulma̱nk joꞌ xaye, chan. Ut laj Eliseo quixye re: —La̱at ta̱cuil nak ta̱cꞌulma̱nk joꞌ xinye. Abanan la̱at incꞌaꞌ ta̱tzaca li tzacae̱mk aꞌan, chan.

³ Cuanqueb ca̱hib li cui̱nk saklep rixeb chire li oqueba̱l re li tenamit. Queꞌxye chi ribileb rib: —¿Cꞌaꞌut nak cuanco arin roybeninquil kacamic?

⁴ Ma̱cꞌaꞌ rajbal nak to-oc saꞌ li tenamit. Toca̱mk xban cueꞌej. Abanan cui tocana̱k arin toca̱mk ajcuiꞌ. Toxic saꞌ lix naꞌajeb li soldado aj Siria. Cui eb aꞌan incꞌaꞌ toeꞌxcamsi, us. Cui ut toeꞌxcamsi toca̱mk, chanqueb.

⁵ Nak ac oc re li kꞌojyi̱n queꞌco̱eb saꞌ li naꞌajej li cuanqueb cuiꞌ lix muheba̱leb laj Siria. Nak queꞌcuulac eb laj Siria ma̱ aniheb chic saꞌ lix muheba̱leb.

⁶ Li Ka̱cuaꞌ quixqꞌueheb laj Siria chirabinquil jun li choki̱nc. Chanchan xya̱b li carruaje ut li cacua̱y nak yo̱queb chi cha̱lc nabaleb li soldado. Saꞌ xchꞌo̱leb laj Siria nak lix reyeb laj Israel queꞌxjunaji ribeb riqꞌuineb laj hiteo ut eb laj Egipto ut yo̱queb chi cha̱lc chi pletic riqꞌuineb.

⁷ Joꞌcan nak eb laj Siria queꞌe̱lelic saꞌ li ecuu aꞌan. Queꞌxcanab lix muheba̱leb, lix cacua̱yeb ut eb lix bu̱reb. Queꞌcana lix muheba̱leb joꞌ nak cuan ut queꞌe̱lelic re nak teꞌxcol rix lix yuꞌameb.

⁸ Eb li cui̱nk saklep rixeb queꞌcuulac cuanqueb cuiꞌ lix muheba̱leb laj Siria. Queꞌoc chi saꞌ jun li muheba̱l ut queꞌcuaꞌac ut queꞌucꞌac. Queꞌxxoc li plata, li oro ut li tꞌicr li queꞌxtau saꞌ li muheba̱l ut queꞌco̱eb ut queꞌxmuk. Queꞌsukꞌi cuiꞌchic xcaꞌ sut saꞌ li naꞌajej li xeꞌcuan cuiꞌ laj Siria ut queꞌoc saꞌ jun chic li muheba̱l. Queꞌxxoc li cꞌaꞌru cuan aran ut queꞌco̱eb cuiꞌchic chixmukbal.

⁹ Chirix aꞌan queꞌxye chi ribileb rib: —Incꞌaꞌ us yo̱co chixba̱nunquil. Cha̱bil esilal li xkatau. Tento nak takaye ajcuiꞌ reheb li kech tenamitil. Cui takoybeni toj cuulaj, teꞌxye nak xoma̱cob chiruheb. Toxic saꞌ tenamit ut takaye resil saꞌ li rochoch li rey, chanqueb.

¹⁰ Joꞌcan nak queꞌel saꞌ li naꞌajej li cuanqueb cuiꞌ lix muheba̱leb laj Siria ut queꞌco̱eb saꞌ li tenamit Samaria. Nak queꞌcuulac saꞌ li oqueba̱l re li tenamit, queꞌxjap reheb chixbokbaleb li soldado li yo̱queb chi cꞌacꞌale̱nc. Queꞌxye reheb: —La̱o xocuulac chak saꞌ lix muheba̱leb laj Siria. Ma̱ aniheb chic aran. Ma̱ ani na-ecꞌan aran. Eb lix cacua̱y ut eb lix bu̱r bacꞌbo̱queb. Yi̱banbil ajcuiꞌ lix muheba̱leb xeꞌcana, chanqueb.

¹¹ Eb li soldado li yo̱queb chi cꞌacꞌale̱nc re li oqueba̱l queꞌxjap reheb chixyebal resil saꞌ li palacio.

¹² Li rey quicuacli chak saꞌ lix cuariba̱l xban nak ac kꞌojyi̱n. Quixye reheb: —La̱in tinchꞌolob xya̱lal e̱re li cꞌaꞌru yo̱queb chixcꞌoxlanquil xba̱nunquil ke eb laj Siria. Eb aꞌan nequeꞌxnau nak ma̱cꞌaꞌ chic katzacae̱mk. Joꞌcan nak xeꞌel saꞌ lix muheba̱leb ut xeꞌxmuk ribeb chi nachꞌ. Saꞌ xchꞌo̱leb aꞌan nak toe̱lk saꞌ li tenamit ut toeꞌxchap chi yoꞌyo ut teꞌoc saꞌ li katenamit, chan.

¹³ Jun reheb li nequeꞌtenkꞌan re li rey quixye: —Katakla̱keb cuib oxibak li cui̱nk chirixeb li o̱b chi cacua̱y li xeꞌcana saꞌ li tenamit chirilbal chi tzꞌakal cꞌaꞌru yo̱queb laj Siria. Cui teꞌcamsi̱k, cꞌaꞌru xjalenquil xban nak juntakꞌe̱t ajcuiꞌ takacꞌul chikajunilo arin saꞌ li tenamit, chan.

¹⁴ Joꞌcan nak queꞌxsicꞌ ru cuib li cacua̱y ut jun li carruaje. Ut li rey quixtaklaheb li cui̱nk ut quixye reheb: —Ayukex ut toxe̱qꞌue chak retal lix muheba̱leb laj Siria, chan.

¹⁵ Queꞌco̱eb ut queꞌcuulac toj saꞌ li nimaꞌ Jordán. Ut queꞌxqꞌue retal nak yalak bar natꞌanaxin li rakꞌeb ut li cꞌaꞌru reheb laj Siria li queꞌxtzꞌek nak yo̱queb chi e̱lelic. Queꞌsukꞌi cuiꞌchic riqꞌuin li rey ut queꞌxye re cꞌaꞌru queꞌril chak.

¹⁶ Joꞌcan nak eb laj Israel queꞌel saꞌ li tenamit ut queꞌco̱eb saꞌ lix muheba̱leb laj Siria chixxocbal chixjunil li cꞌaꞌru cuan reheb. Quicꞌulman joꞌ quixye li Ka̱cuaꞌ. Queꞌxcꞌayi cuukub litro li cꞌaj yal riqꞌuin jun li tumin plata, ut queꞌxcꞌayi ajcuiꞌ oꞌlaju litro li cebada yal riqꞌuin jun li tumin plata.

¹⁷ Lix reyeb laj Israel quixqꞌue li soldado li natenkꞌan re chi cꞌacꞌale̱nc saꞌ li oqueba̱l re li tenamit. Eb li tenamit queꞌnumeꞌ saꞌ xbe̱n ut queꞌxpitzꞌ xsaꞌ ut quicam. Quicꞌulman joꞌ quixye lix profeta li Ka̱cuaꞌ nak quicuulac li rey riqꞌuin.

¹⁸ Ut quicꞌulman ajcuiꞌ li cꞌaꞌru quixye li profeta nak quixye: Saꞌ ajcuiꞌ li ho̱nal aꞌin cuulaj cuukub litro li cha̱bil trigo ta̱cꞌayi̱k yal riqꞌuin jun li tumin plata joꞌ ajcuiꞌ oꞌlaju litro li cebada.

¹⁹ Li cui̱nk li natenkꞌan re li rey quixye: —Usta li Ka̱cuaꞌ Dios naxtakla chak saꞌ choxa li cebada chi nabal, ma̱ jaruj ta̱cꞌulma̱nk joꞌ xaye, chan. Ut laj Eliseo quixye re: —La̱at ta̱cuil nak ta̱cꞌulma̱nk, abanan la̱at incꞌaꞌ ta̱tzaca li tzacae̱mk aꞌan, chan.

²⁰ Ut li cui̱nk quixcꞌul joꞌ quiyeheꞌ re xban nak eb li tenamit queꞌnumeꞌ saꞌ xbe̱n saꞌ li oqueba̱l re li tenamit ut quicam.