2 Reyes 3 - Li Santil hu

¹ Nak yo̱ cuakxaklaju chihab roquic laj Josafat chokꞌ xreyeb laj Judá, laj Joram li ralal laj Acab qui-oc chokꞌ xreyeb laj Israel aran Samaria. Cablaju chihab quicuan saꞌ xcuanquil.

² Laj Joram quixba̱nu li ma̱usilal chiru li Ka̱cuaꞌ, abanan incꞌaꞌ quinumta lix ma̱usilal joꞌ lix ma̱usilal lix naꞌ xyucuaꞌ. Laj Joram quixjor li pec li nequeꞌxlokꞌoni cuiꞌ laj Baal, li quixyi̱b lix yucuaꞌ junxil.

³ Abanan laj Joram quixba̱nu li ma̱usilal joꞌ quixba̱nu laj Jeroboam li ralal laj Nabat, li quicꞌamoc xbeheb laj Israel chi ma̱cobc. Ut laj Joram incꞌaꞌ quixcanab xba̱nunquil li ma̱usilal.

⁴ Laj Mesa, lix reyeb laj Moab, aꞌan aj qꞌuiresihom carner. Ut rajlal chihab tento nak naxqꞌue jun ciento mil (100,000) chi carner toj sa̱j re lix reyeb laj Israel. Ut naxqꞌue ajcuiꞌ jun ciento mil li carner li ma̱jiꞌ besbileb rix.

⁵ Abanan nak quicam li rey Acab, laj Mesa lix reyeb laj Moab incꞌaꞌ chic quiraj xqꞌuebal li carner li tento xqꞌuebal re lix reyeb laj Israel.

⁶ Joꞌcan nak li rey Joram qui-el aran Samaria ut quixchꞌutubeb ru li soldados li cuanqueb saꞌ xcue̱nt Israel.

⁷ Quixtakla resil riqꞌuin lix reyeb laj Judá. Quixye re: —Lix reyeb laj Moab quixkꞌetkꞌeti rib chicuu. ¿Ma ta̱cuaj tina̱tenkꞌa chi pletic riqꞌuin? chan. Ut lix reyeb laj Judá quixye re: —Tatintenkꞌa chi pletic riqꞌuineb laj Moab. Eb lin soldado ut eb lin cacua̱y cuanqueb cha̱tenkꞌanquil.

⁸ ¿Bar cuan li be takacꞌam nak toxic chi pletic riqꞌuineb? chan. Ut laj Joram quixye: —Takacꞌam li be li nanumeꞌ saꞌ li chaki chꞌochꞌ aran Edom, chan.

⁹ Joꞌcan nak queꞌco̱eb chi pletic li rey Joram rochbeneb lix reyeb laj Judá ut lix reyeb laj Edom. Xban nak toj saꞌ li chaki chꞌochꞌ queꞌxqꞌue chak kꞌo̱t, joꞌcan nak queꞌbay cuukub cutan aran. Ut qui-osoꞌ rucꞌaheb li soldado, joꞌ ajcuiꞌ rucꞌaheb li xul.

¹⁰ Li rey Joram, lix reyeb laj Israel, quixye: —La̱o li oxibo chi rey to-osokꞌ. Li Ka̱cuaꞌ xoxkꞌaxtesi saꞌ rukꞌ lix reyeb laj Moab, chan.

¹¹ Abanan li rey Josafat quixye: —¿Ma ma̱cꞌaꞌ junak xprofeta li Dios arin re nak tixtzꞌa̱ma chiru li Dios cꞌaꞌru us takaba̱nu? chan. Jun li cui̱nk li nataklan saꞌ xbe̱neb lix soldado laj Israel quixye: —Cuan arin laj Eliseo, li ralal laj Safat. Laj Eliseo quicꞌanjelac chiru li profeta Elías, chan.

¹² Li rey Josafat quixye: —Laj Eliseo tixye ke cꞌaꞌru tixye li Dios, chan. Joꞌcan nak li oxib chi rey queꞌco̱eb chi a̱tinac riqꞌuin li profeta.

¹³ Abanan laj Eliseo quixye re lix reyeb laj Israel: —¿Cꞌaꞌ aj e nak texintenkꞌa la̱in? Ayukex. Patzꞌomak e̱naꞌleb riqꞌuineb li profeta li queꞌcꞌanjelac chiru le̱ naꞌ e̱yucuaꞌ, chan. Li rey Joram quixye re: —Incꞌaꞌ naru toxic riqꞌuineb aꞌan. Aꞌ li Ka̱cuaꞌ Dios, aꞌan xchꞌutuban ku la̱o li oxib chi rey re toxkꞌaxtesi saꞌ rukꞌeb laj Moab, chan.

¹⁴ Li profeta Eliseo quixye re: —Saꞌ xcꞌabaꞌ li yoꞌyo̱quil Dios li nincꞌanjela ru, la̱in ninye e̱re cui ta incꞌaꞌ ninqꞌue saꞌ xnakꞌ cuu li rey Josafat li cuan e̱rochben incꞌaꞌ raj tina̱tinak e̱riqꞌuin chi moco texintenkꞌa.

¹⁵ Anakcuan cꞌamomak chak cuiqꞌuin junak cui̱nk nachꞌeꞌoc arpa, chan. Ut nak li cui̱nk yo̱ chi cuajbac, li Ka̱cuaꞌ quia̱tinac riqꞌuin laj Eliseo ut quixye re cꞌaꞌru teꞌxba̱nu.

¹⁶ Ut laj Eliseo quixye reheb: —Aꞌan aꞌin li naxye li Ka̱cuaꞌ e̱re: Te̱bec nabal li rok haꞌ saꞌ li ru takꞌa aꞌin.

¹⁷ Usta incꞌaꞌ tixqꞌue hab ut usta incꞌaꞌ ta̱numekꞌ li ikꞌ saꞌ li naꞌajej aꞌin, abanan li rok haꞌ teꞌnujak chi haꞌ. Ut la̱ex ta̱cua̱nk chi tzꞌakal le̱ haꞌ, joꞌ ajcuiꞌ reheb le̱ xul.

¹⁸ Moco chꞌaꞌaj ta chiru li Ka̱cuaꞌ xba̱nunquil aꞌin. Ut tixkꞌaxtesiheb ajcuiꞌ laj Moab saꞌ e̱rukꞌ.

¹⁹ La̱ex tex-e̱chani̱nk re chixjunileb li tenamit li chꞌinaꞌus ut yi̱banbil chi cha̱bil. Talaje̱yocꞌ chixjunil li cha̱bil cheꞌ. Te̱butꞌeb li yuꞌam haꞌ. Ut telaje̱tu̱b li pec saꞌ li cha̱bil chꞌochꞌ re xpoꞌbal, chan laj Eliseo.

²⁰ Cuulajak chic saꞌ x-o̱ril li mayejac, yo̱ chak chi be̱c rok li haꞌ saꞌ xjayal Edom ut quinujac chi haꞌ li naꞌajej aꞌin.

²¹ Eb laj Moab queꞌrabi resil nak eb li oxib chi rey queꞌchal chi pletic riqꞌuineb. Joꞌcan nak chixjunileb li cui̱nk, joꞌ ti̱x joꞌ cocꞌ, li queꞌxcuy xcꞌambal lix chꞌi̱chꞌ re pletic queꞌxchꞌutub ribeb saꞌ li nuba̱l chi pletic.

²² Cuulajak chic nak queꞌcuacli, yo̱ chi iloc li sakꞌe. Ut li haꞌ cak cak quicꞌutun xban li sakꞌe. Chanchan quicꞌ.

²³ Saꞌ xchꞌo̱leb laj Moab nak tzꞌakal quicꞌ. Queꞌxye chi ribileb rib: —Quicꞌ aꞌan. Eb li oxib chi rey queꞌxcamsi ribeb. Yoꞌkeb anakcuan ut take̱chani li cꞌaꞌru reheb, chanqueb.

²⁴ Nak eb laj Moab queꞌcuulac cuan cuiꞌ lix muheba̱leb laj Israel, eb laj Israel queꞌxtiquib pletic riqꞌuineb toj retal queꞌe̱lelic laj Moab. Abanan eb laj Israel queꞌxta̱keheb ut queꞌxcamsiheb.

²⁵ Ut queꞌxsach ruheb lix naꞌajeb. Nak queꞌnumeꞌ cuan cuiꞌ li racui̱mkeb, eb laj Israel quilajeꞌxtu̱b li pec toj retal queꞌxpoꞌi chixjunil lix naꞌajeb li racui̱mkeb. Ut queꞌxbutꞌ eb li yuꞌam haꞌ. Ut quilajeꞌxtꞌan eb li cha̱bil cheꞌ. Caꞌaj cuiꞌ li nimla tenamit Kir-hareset quicana. Eb li cui̱nk li nequeꞌcutuc riqꞌuin rantꞌin queꞌxsuti li tenamit aꞌan, ut queꞌxcut chi pec toj retal queꞌxsach ru.

²⁶ Nak lix reyeb laj Moab quixqꞌue retal nak incꞌaꞌ quire̱chani li ple̱t, quixcꞌam chirix cuukub ciento li soldado li nequeꞌpletic riqꞌuin chꞌi̱chꞌ re teꞌxic chi pletic riqꞌuin lix reyeb laj Edom. Abanan incꞌaꞌ ajcuiꞌ queꞌru.

²⁷ Joꞌcan nak lix reyeb laj Moab quixchap li xbe̱n ralal li ta̱oc raj chokꞌ rey chokꞌ re̱kaj ut quixmayeja saꞌ xbe̱n li tzꞌac chokꞌ xmayej re lix dioseb laj Moab. Ut queꞌjoskꞌoꞌ laj Israel ut queꞌsukꞌi cuiꞌchic saꞌ lix naꞌajeb.