2 Reyes 25 - Li Santil hu

¹ Yo̱ chic bele̱b chihab roquic chokꞌ xreyeb laj Judá laj Sedequías. Saꞌ li laje̱b xbe li xlaje li po re li chihab aꞌan nak co̱ laj Nabucodonosor lix reyeb laj Babilonia rochbeneb chixjunileb lix soldados chi pletic riqꞌuin li tenamit Jerusalén. Queꞌxyi̱b lix muheba̱leb chire li tenamit ut queꞌxyi̱b lix takleba̱l chi xjun sutam.

² Li tenamit sutsu xbaneb toj saꞌ li junlaju chihab roquic chokꞌ rey laj Sedequías.

³ Saꞌ li bele̱b xbe li xca̱ po re li chihab quinumta li cueꞌej saꞌ xbe̱neb li cuanqueb Jerusalén. Ut ma̱cꞌaꞌ chic xtzacae̱mkeb.

⁴ Eb laj Jerusalén queꞌxhop li tzꞌac li sutsu cuiꞌ li tenamit ut queꞌe̱lelic chi kꞌek chixjunileb li cui̱nk li cauheb rib chi pletic rochben li rey. Queꞌel saꞌ li oqueba̱l li cuan saꞌ xyi li cuib chi tzꞌac chixcꞌatk lix naꞌaj li rutzꞌuꞌuj li rey, usta cuanqueb lix soldado laj Babilonia chi xjun sutam li tenamit. Queꞌco̱eb saꞌ li be li naxic Arabá.

⁵ Abanan eb li soldado aj Babilonia queꞌxta̱ke li rey Sedequías ut coxeꞌxchap saꞌ li ru takꞌa re Jericó. Ut chixjunileb lix soldado laj Sedequías queꞌe̱lelic yalak bar.

⁶ Nak ac xeꞌxchap li rey Sedequías queꞌxcꞌam aran Ribla riqꞌuin lix reyeb laj Babilonia. Ut aran quirakeꞌ a̱tin saꞌ xbe̱n.

⁷ Ut chiru laj Sedequías queꞌxchꞌic chi chꞌi̱chꞌ saꞌ cuxeb li ralal. Chirix aꞌan queꞌrisi lix nakꞌ ru xcabichal laj Sedequías, queꞌxbacꞌ riqꞌuin cadena ut queꞌxcꞌam toj Babilonia.

⁸ Yo̱ chic bele̱laju chihab roquic laj Nabucodonosor chokꞌ xreyeb laj Babilonia. Cuukub cutan chic xticlajic li roꞌ po re li chihab aꞌan nak laj Nabuzaradán quicuulac Jerusalén. Aꞌan li nataklan saꞌ xbe̱neb li soldado li nequeꞌcꞌacꞌalen re li rey aran Babilonia.

⁹ Nak quicuulac laj Nabuzaradán Jerusalén quixcꞌat lix templo li Ka̱cuaꞌ ut quixcꞌat ajcuiꞌ li rochoch li rey. Ut quixcꞌat ajcuiꞌ li rochocheb chixjunileb li cuanqueb xcuanquil. Chixjunileb li cab li cuanqueb Jerusalén quilajxcꞌat.

¹⁰ Eb li soldado aj Babilonia li queꞌco̱eb chirix laj Nabuzaradán queꞌxjuqꞌui chixjunil li tzꞌac li sutsu cuiꞌ li tenamit Jerusalén.

¹¹ Ut laj Nabuzaradán quixchapeb li joꞌ qꞌuialeb chic li tenamit li queꞌcana ut quixcꞌameb Babilonia joꞌqueb ajcuiꞌ li nequeꞌcꞌanjelac saꞌ li tenamit. Ut quixcꞌameb ajcuiꞌ li queꞌoquen chirix lix reyeb laj Babilonia.

¹² Caꞌaj cuiꞌ li nebaꞌeb quixcanabeb re nak teꞌxcꞌanjela li chꞌochꞌ ut teꞌxrakꞌi li uvas.

¹³ Eb laj Babilonia queꞌxjori li okech yi̱banbil riqꞌuin bronce ut lix naꞌaj li haꞌ rochbeneb lix cꞌojleba̱l. Ut queꞌxcꞌam Babilonia chixjunil li bronce.

¹⁴ Queꞌxcꞌam ajcuiꞌ li ni̱nki ucꞌal. Ut queꞌxcꞌam ajcuiꞌ li pala li queꞌcꞌanjelac saꞌ li artal joꞌqueb ajcuiꞌ lix naꞌajeb li cha ut li chꞌi̱chꞌ li quicꞌanjelac re xyi̱banquil li lámpara, joꞌ ajcuiꞌ li quicꞌateꞌ cuiꞌ li incienso. Chixjunil li cꞌaꞌak re ru yi̱banbil riqꞌuin bronce li quicꞌanjelac saꞌ li templo, quilajeꞌxcꞌam Babilonia.

¹⁵ Laj Nabuzaradán, li nataklan saꞌ xbe̱neb li soldados li nequeꞌcꞌacꞌalen re li rey, quixcꞌam chixjunil li cꞌaꞌak re ru yi̱banbil riqꞌuin oro ut plata joꞌ li secꞌ ut li ucꞌal li quicꞌanjelac re li ru xam.

¹⁶ Li cꞌaꞌak re ru yi̱banbil riqꞌuin bronce xban li rey Salomón kꞌaxal nabal. Li cuib chi ni̱nki okech, li pila joꞌ eb ajcuiꞌ li cablaju chi cuacax bronce li queꞌhilan cuiꞌ li pila, ma̱ ani nanaꞌoc re joꞌ qꞌuial tzꞌakal li ra̱lal xban nak incꞌaꞌ quiru xbisbal.

¹⁷ Cuakxakib metro xni̱nkal rok li ni̱nki okech bronce. Ut numenak cuib metro xteram li cuan saꞌ xbe̱n li okech. Ut lix sahob ru li cuan saꞌ xbe̱n yi̱banbil ajcuiꞌ riqꞌuin bronce chanchan ru li cheꞌ granada. Juntakꞌe̱teb li cuib chi okech.

¹⁸ Ut laj Seraías li xbe̱nil aj tij quichapeꞌ ut quicꞌameꞌ xbaneb lix soldado laj Nabuzaradán. Ut quicꞌameꞌ ajcuiꞌ laj Sofonías li xcab aj tij. Ut queꞌcꞌameꞌ li oxib chi cui̱nk li queꞌcꞌacꞌalen re li oqueba̱l re li templo.

¹⁹ Ut queꞌcꞌameꞌ o̱b li nequeꞌqꞌuehoc xnaꞌleb li rey li toj cuanqueb saꞌ li tenamit. Ut quicꞌameꞌ li cui̱nk li nataklan saꞌ xbe̱neb li soldado aj Israel rochben li cui̱nk li natzꞌi̱ban re lix cꞌabaꞌeb li tenamit. Ut queꞌcꞌameꞌ oxcꞌa̱l li cui̱nk li toj cuanqueb saꞌ li tenamit.

²⁰ Chixjunileb queꞌcꞌameꞌ saꞌ li tenamit Ribla li cuan saꞌ li naꞌajej Hamat. Aran queꞌcꞌameꞌ riqꞌuin li rey Nabucodonosor.

²¹ Aran saꞌ li tenamit Ribla li rey quixtakla xcamsinquileb. Joꞌcaꞌin nak queꞌchapeꞌ ut queꞌisi̱c laj Judá saꞌ lix tenamiteb.

²² Laj Nabucodonosor quixxakab chokꞌ gobernador aran Judá laj Gedalías li ralal laj Ahicam. Lix yucuaꞌ laj Ahicam, aꞌan laj Safán. Ut laj Gedalías, aꞌan chic li quicuan xcuanquil saꞌ xbe̱neb li queꞌcana Judá.

²³ Eb li cuanqueb xcuanquil saꞌ xbe̱neb li soldado aj Israel queꞌrabi resil nak laj Gedalías, aꞌan chic li gobernador ut co̱eb Mizpa chi a̱tinac riqꞌuin. Aꞌaneb laj Ismael li ralal laj Netanías; laj Johanán li ralal laj Carea; laj Seraías li ralal laj Tanhumet, Netofa xtenamit; ut laj Jaazanías li ralal jun li cui̱nk Maaca xtenamit. Ut co̱eb ajcuiꞌ li cui̱nk li cuanqueb rochbeneb.

²⁴ Ut laj Gedalías quixba̱nu jun li juramento riqꞌuineb ut quixye reheb: —Mexxucuac chi cana̱c joꞌ aj cꞌanjel chiruheb laj Babilonia. Texcana̱k saꞌ li naꞌajej aꞌin ut cꞌanjelankex chiru li rey Nabucodonosor ut aꞌan tixba̱nu usilal e̱re, chan laj Gedalías reheb.

²⁵ Laj Ismael aꞌan li ralal laj Netanías li ralal laj Elisama xcomoneb lix reyeb laj Judá. Saꞌ li xcuuk li po, laj Ismael rochben laje̱b chi cui̱nk queꞌcuulac ut queꞌxcamsi laj Gedalías. Ut queꞌxcamsiheb ajcuiꞌ laj Judá ut eb laj Babilonia li cuanqueb rochben aran Mizpa.

²⁶ Chirix chic aꞌan, chixjunileb laj Judá, joꞌ ni̱nk joꞌ cocꞌ, rochbeneb li nequeꞌtaklan saꞌ xbe̱neb li soldado aj Israel queꞌe̱lelic ut queꞌco̱eb Egipto xban nak queꞌxucuac chiruheb laj Babilonia.

²⁷ Nak yo̱ cuuklaju xcaꞌcꞌa̱l chihab roquic chi pre̱xil aran Babilonia laj Joaquín lix reyeb laj Judá, laj Evil-merodac qui-oc chokꞌ xreyeb laj Babilonia. Saꞌ li cuukub xcaꞌcꞌa̱l xbe li cablaju po re li chihab aꞌan laj Evil-merodac quirisi laj Joaquín saꞌ tzꞌalam.

²⁸ Quixqꞌue xcuanquil ut kꞌaxal quixba̱nu usilal re chiruheb li jun chꞌol chic li rey li queꞌcuan aran Babilonia.

²⁹ Laj Joaquín quirisi li rakꞌ li pre̱x chirix. Ut quicuaꞌac saꞌ lix me̱x li rey joꞌ najtil chic quicuan chi yoꞌyo.

³⁰ Rajlal quiqꞌueheꞌ cꞌaꞌru re laj Joaquín xban li rey. Quichꞌolani̱c toj chalen nak quicam.