2 Reyes 23 - Li Santil hu

¹ Li rey Josías quixtakla xbokbaleb riqꞌuin chixjunileb li nequeꞌcꞌamoc be saꞌ xya̱nkeb laj Judá ut saꞌ xya̱nkeb laj Jerusalén.

² Co̱ saꞌ lix templo li Dios rochbeneb li cui̱nk aj Judá ut rochbeneb li cui̱nk li cuanqueb Jerusalén. Queꞌco̱eb rochben eb laj tij ut eb li profeta. Queꞌco̱eb ajcuiꞌ chixjunileb li tenamit, joꞌ ni̱nk, joꞌ cocꞌ. Ut li rey quiril chiruheb chixjunil li tzꞌi̱banbil saꞌ li hu re li contrato, li hu li queꞌxtau saꞌ lix templo li Ka̱cuaꞌ.

³ Quixakli li rey chixcꞌatk li rokechal li templo ut quixba̱nu jun li contrato riqꞌuin li Ka̱cuaꞌ. Quixye re li Ka̱cuaꞌ nak tixba̱nu lix chakꞌrab ut chi anchal xchꞌo̱l tixba̱nu li naxtakla li Ka̱cuaꞌ. Quixye nak chi anchal xchꞌo̱l tixqꞌue xcuanquil li contrato li tzꞌi̱banbil saꞌ li hu. Ut chixjunileb li tenamit queꞌxye nak teꞌxba̱nu li cꞌaꞌru tzꞌi̱banbil saꞌ li contrato.

⁴ Li rey Josías quixtakla laj Hilcías li xbe̱nil aj tij, joꞌqueb ajcuiꞌ li xcabil aj tij ut eb li nequeꞌcꞌacꞌalen re li templo. Quixye reheb nak teꞌrisi saꞌ lix templo li Ka̱cuaꞌ chixjunil li quicꞌanjelac re xlokꞌoninquil laj Baal ut lix Asera. Teꞌrisi ajcuiꞌ chixjunil li quicꞌanjelac re xlokꞌoninquil li sakꞌe, li po ut eb li chahim. Ut li rey Josías quixcꞌat chixjunil chire li tenamit Jerusalén saꞌ li cꞌaleba̱l Cedrón ut quixtakla lix chahil aran Bet-el.

⁵ Quirisiheb laj tij li queꞌcꞌanjelac chiruheb li jalanil dios, li queꞌxakaba̱c xbaneb li rey junxil chixcꞌatbal li incienso saꞌ eb li naꞌajej li najt xteram li cuanqueb Judá ut Jerusalén. Ut quirisiheb ajcuiꞌ li queꞌcꞌatoc incienso re xlokꞌoninquileb laj Baal, li sakꞌe ut li po joꞌ eb ajcuiꞌ li chahim.

⁶ Quixtakla ajcuiꞌ risinquil saꞌ lix templo li Ka̱cuaꞌ lix jalam u̱ch lix Asera. Queꞌrisi Jerusalén ut queꞌxcꞌam toj saꞌ li ru takꞌa re Cedrón ut aran queꞌxcꞌat. Ut lix chahil queꞌxcut saꞌ xbe̱neb lix mukleba̱l li tenamit.

⁷ Ut quixtakla ajcuiꞌ xjucꞌbal saꞌ li templo lix naꞌajeb li nequeꞌxcꞌayi ribeb re xlokꞌoninquil lix dioseb. Aꞌan lix naꞌajeb li nequeꞌquemoc re li tꞌicr li nacꞌanjelac re xlokꞌoninquil li yi̱banbil dios xAsera.

⁸ Quixtakla xcꞌambal Jerusalén chixjunileb laj tij li cuanqueb Judá ut quixtakla xpoꞌbaleb chixjunileb li naꞌajej najt xteram li queꞌxcꞌat cuiꞌ li incienso eb laj tij. Naticla saꞌ li naꞌajej Geba ut nacuulac toj saꞌ li naꞌajej Beerseba. Quixtakla xjucꞌbal eb li artal li cuanqueb saꞌ li oqueba̱l re laj Josué, li quitaklan saꞌ li tenamit. Eb li artal aꞌan queꞌcuan saꞌ xtzꞌe li oqueba̱l re li tenamit.

⁹ Eb laj tij aꞌan incꞌaꞌ queꞌru chi cꞌanjelac saꞌ li templo, abanan queꞌxcuaꞌ li caxlan cua li ma̱cꞌaꞌ xchꞌamal rochbeneb laj tij li queꞌcꞌanjelac saꞌ li templo.

¹⁰ Li rey Josías quixtakla xpoꞌbal li naꞌajej Tofet li cuan saꞌ li ru takꞌa saꞌ lix chꞌochꞌ laj Ben-hinom. Quixpoꞌ li naꞌajej aꞌan re nak ma̱ ani chic tixcꞌat li ralal malaj ut lix rabin chokꞌ xmayej chiru li yi̱banbil dios Moloc.

¹¹ Ut quixtakla ajcuiꞌ risinquileb li cacua̱y li queꞌxkꞌaxtesiheb lix reyeb laj Judá re xlokꞌoninquil li sakꞌe. Eb li cacua̱y aꞌin queꞌcuan saꞌ li neba̱l re li templo nachꞌ riqꞌuin li oqueba̱l ut nachꞌ ajcuiꞌ riqꞌuin lix naꞌaj laj Natán-melec li eunuco li nim xcuanquil. Ut quixcꞌateb ajcuiꞌ li carruaje li queꞌcꞌanjelac re xlokꞌoninquil li sakꞌe.

¹² Ut quixjucꞌ ajcuiꞌ eb li artal li queꞌcuan saꞌ xbe̱n cab nachꞌ riqꞌuin li naꞌajej li quicuan cuiꞌ laj Acaz, li queꞌyi̱ba̱c xbaneb lix reyeb laj Judá. Ut quixtakla ajcuiꞌ xjucꞌbal li cuib chi artal li queꞌyi̱ba̱c xban laj Manasés li queꞌcuan saꞌ li cuib chi neba̱l re lix templo li Ka̱cuaꞌ. Queꞌrisi aran ut queꞌxjor ut li xcꞌaj quicuteꞌ saꞌ li nimaꞌ Cedrón.

¹³ Ut quixtakla ajcuiꞌ xpoꞌbal eb li artal li quixyi̱b laj Salomón lix reyeb laj Israel. Eb li artal aꞌan queꞌcuan saꞌ li este re Jerusalén ut saꞌ li sur re li tzu̱l Olivos. Eb li artal aꞌan queꞌyi̱ba̱c re xlokꞌoninquileb li jalanil dios li kꞌaxal yibeb ru. Aꞌaneb lix Astoret lix dioseb laj Sidón, laj Quemos lix dioseb laj Moab ut laj Milcom lix dioseb li ralal xcꞌajol laj Amón.

¹⁴ Quixtakla ajcuiꞌ xpoꞌbal li pec ut li cheꞌ li quicꞌanjelac re xlokꞌoninquil lix Asera. Ut quixcut xbakeleb li camenak saꞌ li naꞌajej li queꞌcuan cuiꞌ.

¹⁵ Quixtakla ajcuiꞌ xpoꞌbal li artal li cuan Bet-el ut li naꞌajej li najt xteram li quixyi̱b laj Jeroboam li ralal laj Nabat. Laj Jeroboam, aꞌan li quicꞌamoc xbeheb laj Israel chi ma̱cobc. Queꞌxcꞌat li artal li najt xteram ut queꞌxcꞌat ajcuiꞌ lix jalam u̱ch li yi̱banbil dios xAsera.

¹⁶ Li rey Josías qui-iloc chi xjun sutam li naꞌajej aꞌan. Quiril li mukleba̱l cuan saꞌ li tzu̱l. Quixtakla risinquileb lix bakel li camenak. Queꞌrisiheb chak lix bakeleb ut queꞌxcꞌat saꞌ xbe̱n li artal aꞌan re xmuxbal ru, joꞌ quiyeheꞌ reheb xban lix profeta li Dios li quiyehoc resil li cꞌaꞌru ta̱cꞌulma̱nk.

¹⁷ Ut li rey quixye: —¿Cꞌaꞌru chi mukleba̱lil li yo̱quin chirilbal? chan. Eb li cui̱nk queꞌxye re: —Saꞌ li mukleba̱l aꞌan mukbil lix profeta li Dios li quichal chak Judá. Li cui̱nk aꞌan quixye resil chixjunil li cꞌaꞌru tixcꞌul li artal Bet-el. Ut aꞌan ajcuiꞌ quiyehoc resil chixjunil li cꞌaꞌru yo̱ chi cꞌulma̱nc anakcuan, chanqueb.

¹⁸ Ut li rey quixye reheb: —Me̱chꞌeꞌ li mukleba̱l aꞌan. Eb lix bakel li cui̱nk aꞌan incꞌaꞌ teꞌchꞌeꞌekꞌ, chan. Joꞌcan nak incꞌaꞌ queꞌrisi xbakel li profeta aꞌan chi moco queꞌrisi xbakel li profeta li quichal Samaria.

¹⁹ Joꞌ quixba̱nu aran Bet-el, joꞌcan ajcuiꞌ quixba̱nu saꞌ chixjunileb li tenamit li cuanqueb Samaria. Quixtakla xjucꞌbal chixjunileb li artal saꞌ eb li naꞌajej najt xteram li queꞌxyi̱b lix reyeb laj Israel li queꞌchikꞌoc re xjoskꞌil li Dios.

²⁰ Quixtakla xcamsinquileb laj tij li queꞌcꞌanjelac saꞌ eb li naꞌajej li najt xteram. Ut queꞌxcꞌat xbakeleb li cristian saꞌ xbe̱neb li artal. Chirix chic aꞌan quisukꞌi cuiꞌchic Jerusalén.

²¹ Li rey Josías quixye reheb li tenamit nak teꞌoc cuiꞌchic chixninkꞌeinquil li reliqueb aran Egipto. Pascua nayeman re li ninkꞌe aꞌan. Teꞌxninkꞌei re xlokꞌoninquil li Ka̱cuaꞌ joꞌ tzꞌi̱banbil retalil saꞌ li contrato.

²² Ma̱ jun sut queꞌxba̱nu li ninkꞌe aꞌin chi tzꞌakal re ru toj saꞌ eb li cutan aꞌin chalen nak eb laj rakol a̱tin queꞌcꞌamoc be chiruheb, chi moco queꞌxba̱nu nak queꞌcuan li rey aran Israel ut Judá.

²³ Ac yo̱ chic xcuakxaklaju chihab roquic chokꞌ rey laj Josías nak queꞌxninkꞌei cuiꞌchic li Pascua aran Jerusalén re xlokꞌoninquil li Ka̱cuaꞌ Dios.

²⁴ Ut laj Josías quirisiheb ajcuiꞌ laj tu̱l ut eb laj kꞌe li cuanqueb Jerusalén ut saꞌ chixjunil li naꞌajej Judá. Quirisiheb ajcuiꞌ li yi̱banbil dios saꞌ eb li junju̱nk chi cab, joꞌ ajcuiꞌ li jalam u̱ch ut chixjunil li cꞌaꞌak re ru li quicꞌanjelac re xlokꞌoninquil li jalanil dios. Quixba̱nu chi joꞌcan re nak ta̱tzꞌaklok ru xba̱nunquil chixjunil li chakꞌrab li tzꞌi̱banbil saꞌ li hu li quixtau laj Hilcías laj tij saꞌ lix templo li Ka̱cuaꞌ.

²⁵ Ma̱ jun chic rey quicuan joꞌ li rey Josías, chi moco junxil chi moco mokon. Ma̱ ani chic quixkꞌaxtesi rib chi tzꞌakal chiru li Dios joꞌ quixba̱nu laj Josías. Chi anchal xchꞌo̱l, chi anchal ra̱m, ut chi anchal xmetzꞌe̱u quicꞌanjelac chiru li Dios joꞌ tzꞌi̱banbil saꞌ li chakꞌrab li quiqꞌueheꞌ re laj Moisés.

²⁶ Abanan li Ka̱cuaꞌ toj yo̱ ajcuiꞌ xjoskꞌil saꞌ xbe̱neb laj Judá xban li ma̱usilal li quixba̱nu laj Manasés nak quixchikꞌ xjoskꞌil li Dios.

²⁷ Joꞌcan nak li Ka̱cuaꞌ quixye: —La̱in tinsach ruheb laj Judá joꞌ nak xinsach ruheb laj Israel. Tintzꞌekta̱na li tenamit Jerusalén li sicꞌbil ru inban. Tintzꞌekta̱na li templo usta xinye nak aran tinlokꞌoni̱k chi junelic, chan li Dios.

²⁸ Chixjunil li quixba̱nu li rey Josías tzꞌi̱banbil retalil saꞌ li hu Crónicas, li tzꞌi̱banbil cuiꞌ retalil li cꞌaꞌru quilajeꞌxba̱nu lix reyeb laj Judá.

²⁹ Nak laj Josías cuan chokꞌ xreyeb laj Judá laj Necao lix reyeb laj Egipto co̱ saꞌ li nimaꞌ Éufrates chi pletic riqꞌuin lix reyeb laj Asiria. Li rey Josías co̱ chi pletic riqꞌuin laj Necao. Nak laj Necao quiril laj Josías, ticto quixcamsi aran Meguido.

³⁰ Eb li nequeꞌcꞌanjelac chiru li rey Josías queꞌxxoc li camenak ut queꞌxqꞌue saꞌ jun carruaje re teꞌxcꞌam Jerusalén ut aran queꞌxmuk. Ut eb li tenamit queꞌxxakab laj Joacaz li ralal chokꞌ rey chokꞌ re̱kaj laj Josías lix yucuaꞌ.

³¹ Oxib xcaꞌcꞌa̱l chihab cuan re laj Joacaz nak qui-oc chokꞌ rey. Oxib po quicuan saꞌ xcuanquil aran Jerusalén. Lix naꞌ, aꞌan lix Hamutal lix rabin laj Jeremías. Libna xtenamit.

³² Laj Joacaz quixba̱nu li ma̱usilal chiru li Ka̱cuaꞌ joꞌ queꞌxba̱nu lix xeꞌto̱nil yucuaꞌ li queꞌcuan chokꞌ rey junxil.

³³ Li rey Necao quixchap laj Joacaz ut quixqꞌue chi pre̱xil aran Ribla li cuan saꞌ xcue̱nt Hamat. Quixba̱nu chi joꞌcan re nak laj Joacaz incꞌaꞌ chic ta̱takla̱nk aran Jerusalén. Ut laj Necao quixpuersiheb laj Judá chi xtojbal numenak cuuklaju xca̱cꞌa̱l quintal (72) li plata ut caꞌchꞌin chic ma̱ oxib arroba li oro.

³⁴ Ut li rey Necao quixxakab chokꞌ xreyeb laj Judá laj Eliaquim chokꞌ re̱kaj laj Josías lix yucuaꞌ. Quixjal xcꞌabaꞌ laj Eliaquim. Aj Joacim chic quixqꞌue chokꞌ xcꞌabaꞌ. Laj Necao quixcꞌam toj Egipto laj Joacaz ut aran quicam.

³⁵ Laj Joacim quixtoj re li rey Necao li plata ut li oro li quixpatzꞌ. Quixpuersiheb li tenamit chixtojbal aꞌan, aꞌ yal joꞌ qꞌuial lix naꞌajeb cuan. Li junju̱nk queꞌxqꞌue li joꞌ qꞌuial li queꞌyeheꞌ re ut laj Joacim quixqꞌue li plata ut li oro re li rey.

³⁶ O̱b xcaꞌcꞌa̱l chihab cuan re laj Joacim nak qui-oc chokꞌ xreyeb laj Judá. Junlaju chihab quicuan chokꞌ rey aran Jerusalén. Lix naꞌ, aꞌan lix Zebuda lix rabin laj Pedaías. Ruma xtenamit.

³⁷ Ut li rey Joacim quixba̱nu li ma̱usilal chiru li Dios joꞌ queꞌxba̱nu lix xeꞌto̱nil yucuaꞌ li queꞌcuan chokꞌ rey junxil.