2 Reyes 22 - Li Santil hu

¹ Cuakxakib chihab cuan re laj Josías nak qui-oc chokꞌ rey. Junlaju xcaꞌcꞌa̱l chihab quicuan saꞌ xcuanquil aran Jerusalén. Lix naꞌ xJedida xcꞌabaꞌ. Ut lix Jedida, aꞌan xrabin laj Adaía. Boscat xtenamit.

² Laj Josías cha̱bil xnaꞌleb nak quicuan chokꞌ rey. Quixba̱nu li ti̱quilal chiru li Ka̱cuaꞌ Dios. Quixba̱nu li us chi anchal xchꞌo̱l joꞌ quixba̱nu laj David lix xeꞌto̱nil yucuaꞌ ut incꞌaꞌ quixcanab xba̱nunquil li us.

³ Yo̱ cuakxaklaju chihab roquic chokꞌ rey laj Josías nak quixtakla laj Safán laj tzꞌi̱b saꞌ lix templo li Ka̱cuaꞌ. Laj Safán, aꞌan li ralal laj Azalía ut laj Azalía, aꞌan li ralal laj Mesulam. Li rey Josías quixye re laj Safán:

⁴ —Ayu riqꞌuin laj Hilcías li xbe̱nil aj tij. Ta̱ye re nak tixchꞌutub chixjunil li tumin li nequeꞌxqꞌue li tenamit reheb li nequeꞌcꞌacꞌalen saꞌ li oqueba̱l re li templo.

⁵ Ta̱ye re laj Hilcías nak tixqꞌue li tumin reheb li cui̱nk li nequeꞌjolomin re li xyi̱banquil li templo. Li tumin aꞌan ta̱cꞌanjelak chiruheb re xtojbal li yo̱queb chi cꞌanjelac.

⁶ Teꞌxqꞌue xtojbal eb laj pechꞌ, ut eb laj tzꞌac ut eb li nequeꞌjolomin re li cꞌanjel. Ut chiru ajcuiꞌ li tumin aꞌan teꞌxtoj li cheꞌ ut li pec li ta̱cꞌanjelak re xyi̱banquil li templo.

⁷ Eb li cui̱nk li yo̱queb chi jolomi̱nc re li cꞌanjel cha̱bileb xnaꞌleb. Joꞌcan nak incꞌaꞌ te̱bir rix li joꞌ qꞌuial teꞌxsach, chan laj Josías.

⁸ Saꞌ jun li cutan laj Hilcías li xbe̱nil aj tij quixye re laj Safán: —La̱in xintau saꞌ lix templo li Ka̱cuaꞌ li hu li tzꞌi̱banbil cuiꞌ lix chakꞌrab li Dios, chan. Laj Hilcías quixqꞌue li hu re laj Safán ut laj Safán quiril xsaꞌ.

⁹ Chirix aꞌan laj Safán laj tzꞌi̱b quixcꞌam li hu ut co̱ riqꞌuin li rey Josías ut quixye re: —Eb laj cꞌanjel cha̱cuu queꞌxchꞌutub li tumin li cuan saꞌ li templo ut queꞌxqꞌue reheb li nequeꞌjolomin re li cꞌanjel, chan.

¹⁰ Ut laj Safán quixye ajcuiꞌ re li rey: —Laj Hilcías laj tij quixqꞌue cue li hu aꞌin, chan ut laj Safán quiril xsaꞌ li hu chiru li rey.

¹¹ Nak li rey Josías quirabi li chakꞌrab li tzꞌi̱banbil saꞌ li hu aꞌan, quixpej li rakꞌ.

¹² Ut quixtaklaheb laj Hilcías laj tij ut laj Ahicam li ralal laj Safán, ut laj Acbor li ralal laj Micaías ut laj Safán laj tzꞌi̱b joꞌ ajcuiꞌ laj Asaías laj cꞌanjel chiru li rey.

¹³ Quixye reheb: —Ayukex ut patzꞌomak re li Ka̱cuaꞌ chicuix la̱in ut chirixeb li tenamit ut chirixeb laj Judá. Patzꞌomak cꞌaꞌru takaba̱nu riqꞌuin li cꞌaꞌru tzꞌi̱banbil saꞌ li hu aꞌin. Li Ka̱cuaꞌ yo̱ xjoskꞌil saꞌ kabe̱n xban nak eb li kaxeꞌto̱nil yucuaꞌ incꞌaꞌ queꞌxba̱nu li cꞌaꞌru tzꞌi̱banbil saꞌ li hu aꞌin, chan li rey Josías.

¹⁴ Laj Hilcías laj tij, rochbeneb laj Ahicam, laj Acbor, laj Safán ut laj Asaías queꞌco̱eb riqꞌuin lix Hulda chi patzꞌoc. Lix Hulda, aꞌan jun xprofeta li Dios. Aꞌan rixakil laj Salum. Laj Salum, aꞌan li ralal laj Ticva. Laj Ticva, aꞌan li ralal laj Harhas. Laj Salum, aꞌan li na-iloc re li akꞌej li nacꞌanjelac saꞌ li templo. Lix Hulda cuan rochoch Jerusalén saꞌ li naꞌajej li quiyi̱ba̱c mokon. Eb li cui̱nk queꞌa̱tinac riqꞌuin.

¹⁵ Lix Hulda quixye reheb li cui̱nk: —Joꞌcaꞌin xye li Ka̱cuaꞌ lix Dioseb laj Israel. Ye re li ani xtaklan chak e̱re,

¹⁶ “Joꞌcaꞌin xye li Ka̱cuaꞌ Dios. La̱in tintakla chak raylal saꞌ xbe̱n li tenamit Jerusalén ut saꞌ xbe̱neb chixjunileb li cuanqueb aran. Tinba̱nu chixjunil li tzꞌi̱banbil retalil saꞌ li hu li quiril xsaꞌ lix reyeb laj Judá.

¹⁷ Xinteneb li raylal aꞌin saꞌ xbe̱neb xban nak xineꞌxtzꞌekta̱na ut xeꞌxcꞌat li incienso chiruheb li jalanil dios. Xeꞌxchikꞌ injoskꞌil nak xeꞌxyi̱b riqꞌuin rukꞌeb li jalanil dios ut xeꞌxlokꞌoni. Yo̱ injoskꞌil saꞌ xbe̱neb laj Jerusalén. Incꞌaꞌ ta̱numekꞌ lin joskꞌil cui incꞌaꞌ tinba̱nu li cꞌaꞌru xinye,” chan li Dios.

¹⁸ Joꞌcaꞌin te̱ye re lix reyeb laj Judá li xtaklan chak e̱re chixsicꞌbal cꞌaꞌru nacuaj. Aꞌan aꞌin li naxye li Ka̱cuaꞌ lix Dios eb laj Israel, “La̱at xaqꞌue xcuanquil li tzꞌi̱banbil saꞌ li hu.

¹⁹ Xyotꞌeꞌ a̱chꞌo̱l ut xacubsi a̱cuib chicuu nak xacuabi nak tintakla raylal saꞌ xbe̱n Jerusalén joꞌ eb ajcuiꞌ li tenamit. Xacuabi nak xinye nak tinsach ruheb ut tinpoꞌ lix naꞌajeb. Xapej la̱ cuakꞌ xban xrahil a̱chꞌo̱l ut xatya̱bac chicuu. La̱in xcuabi li cꞌaꞌru xaye.

²⁰ La̱in incꞌaꞌ tinqꞌueheb chixtojbal xma̱queb nak toj yoꞌyo̱kat. La̱at incꞌaꞌ ta̱cuil li raylal li tintakla saꞌ xbe̱neb. Tatca̱mk ut toxa̱tauheb la̱ xeꞌto̱nil yucuaꞌ. Ut tatmukekꞌ saꞌ xya̱lal,” chan li Dios.— Ut eb li takl queꞌsukꞌi riqꞌuin li rey Josías ut queꞌxye re li cꞌaꞌru quixye li Dios.