2 Reyes 21 - Li Santil hu

¹ Cablaju chihab cuan re laj Manasés nak qui-oc chokꞌ rey. Ut oꞌlaju roxcꞌa̱l chihab quicuan chokꞌ rey aran Jerusalén. Lix naꞌ laj Manasés, xHepsiba xcꞌabaꞌ.

² Laj Manasés quima̱cob chiru li Dios xban nak quixba̱nu li ma̱usilal li queꞌxba̱nu li tenamit li queꞌisi̱c saꞌ li naꞌajej aꞌan xban li Dios nak queꞌoc laj Israel.

³ Laj Manasés quilajxyi̱b cuiꞌchic eb li naꞌajej najt xteram re xlokꞌoninquileb li jalanil dios. Aꞌan eb li naꞌajej li quilajxjuqꞌui laj Ezequías lix yucuaꞌ. Quixxakab li artal re xlokꞌoninquil laj Baal li jalanil dios. Quixyi̱b ajcuiꞌ lix jalam u̱ch lix Asera lix dioseb joꞌ quixba̱nu laj Acab li quicuan chokꞌ xreyeb laj Israel. Ut quixlokꞌoniheb ajcuiꞌ li chahim, li po ut li sakꞌe.

⁴ Ut aran saꞌ lix templo li Ka̱cuaꞌ quixyi̱b li artal re xlokꞌoninquil li jalanil dios saꞌ li naꞌajej li quixye li Dios nak caꞌaj cuiꞌ aꞌan ta̱lokꞌoni̱k aran Jerusalén.

⁵ Ut saꞌ li cuib chi neba̱l re li templo laj Manasés quixyi̱beb li artal re xlokꞌoninquileb li chahim.

⁶ Quixcꞌat li ralal chokꞌ xmayej chiruheb li yi̱banbil dios. Ut naxic riqꞌuineb laj kꞌe ut riqꞌuineb laj tu̱l chixpatzꞌbal cꞌaꞌru tixba̱nu. Cꞌajoꞌ nak quichal xjoskꞌil li Dios xban li ma̱usilal quixba̱nu.

⁷ Quixqꞌue lix jalam u̱ch li yi̱banbil dios xAsera saꞌ lix templo li Ka̱cuaꞌ. Li Dios quixye chi joꞌcaꞌin reheb laj David ut laj Salomón li ralal: —La̱in tinqꞌue lin cꞌabaꞌ chi junelic saꞌ li templo aran Jerusalén saꞌ li naꞌajej li xinsicꞌ ru saꞌ xya̱nkeb chixjunil lix naꞌajeb li cablaju xte̱paleb li ralal xcꞌajol laj Israel. Saꞌ li naꞌajej aꞌan la̱in tinlokꞌoni̱k chi junelic.

⁸ Ut incꞌaꞌ chic tincanabeb laj Israel chi isi̱c saꞌ li naꞌajej li xinqꞌue reheb lix xeꞌto̱nil yucuaꞌeb, cui teꞌxba̱nu chixjunil li xinye reheb ut cui teꞌxba̱nu li cꞌaꞌru naxye saꞌ li chakꞌrab li xinqꞌue re laj Moisés laj cꞌanjel chicuu, chan li Ka̱cuaꞌ.

⁹ Abanan eb aꞌan incꞌaꞌ queꞌxba̱nu li cꞌaꞌru quixye li Ka̱cuaꞌ. Laj Manasés quicꞌamoc be chiruheb chixba̱nunquil li ma̱usilal. Kꞌaxal cuiꞌchic yibru queꞌxba̱nu chiru li queꞌxba̱nu eb li jalan tenamit li queꞌisi̱c saꞌ eb li naꞌajej aꞌan xban li Dios nak queꞌoc laj Israel.

¹⁰ Joꞌcan nak eb li profetas queꞌxye li cꞌaꞌru quiyeheꞌ reheb xban li Ka̱cuaꞌ.

¹¹ Queꞌxye: —Cꞌajoꞌ li ma̱usilal quixba̱nu li rey Manasés. Kꞌaxal yibru chiru li ma̱usilal queꞌxba̱nu eb laj amorreo li queꞌcuan saꞌ li naꞌajej aꞌin junxil. Aꞌan xcꞌamoc be chiruheb laj Judá chixlokꞌoninquileb li jalanil dios.

¹² Xban li ma̱usilal queꞌxba̱nu, la̱in tintakla li raylal saꞌ xbe̱neb laj Jerusalén ut saꞌ xbe̱neb laj Judá. Ta̱rahokꞌ saꞌ xxiqueb chixjunileb li teꞌabi̱nk re resil li raylal teꞌxcꞌul, chan li Ka̱cuaꞌ lix Dioseb laj Israel.

¹³ La̱in tinqꞌueheb chixtojbal xma̱queb laj Jerusalén joꞌ xinba̱nu reheb laj Samaria ut eb li ralal xcꞌajol laj Acab. La̱in tincuisi li ma̱usilal aran Jerusalén. Chanchan chꞌajbil tinba̱nu reheb joꞌ nak nachꞌajeꞌ junak li secꞌ tzꞌaj ru ut nahupuba̱c.

¹⁴ La̱in tintzꞌekta̱naheb li tenamit li incꞌaꞌ teꞌsachekꞌ ruheb. Tincanabeb saꞌ rukꞌeb li xicꞌ nequeꞌiloc reheb. Teꞌnumta̱k saꞌ xbe̱neb ut teꞌxchap chokꞌ reheb lix naꞌajeb ut li cꞌaꞌru cuan reheb.

¹⁵ La̱in tinqꞌue li raylal aꞌin saꞌ xbe̱neb xban nak eb lin tenamit xeꞌma̱cob chicuu. Queꞌxchikꞌ injoskꞌil chalen nak queꞌel chak Egipto lix xeꞌto̱nil xyucuaꞌeb ut toj chalen anakcuan, chan li Dios.

¹⁶ Kꞌaxal cuiꞌchic nabaleb li ma̱cꞌaꞌeb xma̱c quixcamsi laj Manasés. Chanchan nak quinujac li tenamit Jerusalén chi quicꞌ. Ut quixcꞌameb ajcuiꞌ xbeheb laj Judá chi ma̱cobc chiru li Ka̱cuaꞌ.

¹⁷ Chixjunil li quilajxba̱nu laj Manasés nak cuan chokꞌ rey joꞌ ajcuiꞌ li ma̱usilal quixba̱nu, tzꞌi̱banbil retalil saꞌ li hu Crónicas li tzꞌi̱banbil cuiꞌ retalil li quilajeꞌxba̱nu lix reyeb laj Judá.

¹⁸ Laj Manasés quicam ut quimukeꞌ saꞌ lix naꞌaj li utzꞌuꞌuj re laj Uza nachꞌ riqꞌuin li palacio. Ut aꞌ chic laj Amón li ralal qui-oc chokꞌ rey chokꞌ re̱kaj.

¹⁹ Cuib xcaꞌcꞌa̱l chihab cuan re laj Amón nak qui-oc chokꞌ rey. Cuib chihab quicuan chokꞌ rey aran Jerusalén. Lix naꞌ, aꞌan lix Mesulemet lix rabin laj Haruz. Jotba xtenamit.

²⁰ Laj Amón quixba̱nu li ma̱usilal chiru li Ka̱cuaꞌ joꞌ quixba̱nu laj Manasés lix yucuaꞌ.

²¹ Joꞌ quixba̱nu lix yucuaꞌ, joꞌcan ajcuiꞌ quixba̱nu laj Amón. Quixlokꞌoni li yi̱banbil dios li quixlokꞌoni lix yucuaꞌ ut quicꞌanjelac chiruheb.

²² Quixtzꞌekta̱na li Ka̱cuaꞌ, lix Dioseb lix xeꞌto̱nil yucuaꞌ. Ut quixkꞌet li chakꞌrab li quiqꞌueheꞌ reheb xban li Ka̱cuaꞌ.

²³ Eb li nequeꞌtenkꞌan re laj Amón queꞌxcꞌu̱b ru chanru nak teꞌxba̱nu ut queꞌxcamsi laj Amón saꞌ li palacio.

²⁴ Chirix chic aꞌan eb laj Judá queꞌxcamsiheb li queꞌcꞌu̱ban ru xcamsinquil li rey Amón. Ut aꞌ chic laj Josías li ralal quixakaba̱c chokꞌ rey chokꞌ re̱kaj.

²⁵ Chixjunil li quixba̱nu laj Amón nak cuan chokꞌ rey tzꞌi̱banbil retalil saꞌ li hu Crónicas li tzꞌi̱banbil cuiꞌ retalil li quilajeꞌxba̱nu lix reyeb laj Judá.

²⁶ Laj Amón quicam ut quimukeꞌ saꞌ lix naꞌaj li utzꞌuꞌuj re laj Uza nachꞌ riqꞌuin li palacio. Ut aꞌ chic laj Josías li ralal qui-oc chokꞌ rey chokꞌ re̱kaj.