2 Reyes 20 - Li Santil hu

¹ Saꞌ eb li cutan aꞌan quiyajer laj Ezequías. Nak nim xyajel quicuulac li profeta Isaías li ralal laj Amoz riqꞌuin ut quixye re: —Joꞌcaꞌin xye a̱cue li Ka̱cuaꞌ. Ta̱yi̱b ru li cꞌaꞌru tento ta̱yi̱b ru saꞌ la̱ cuochoch xban nak ca̱mc a̱cue. Incꞌaꞌ chic tatqꞌuira̱k, chan.

² Laj Ezequías quixsukꞌisi rib saꞌ lix chꞌa̱t ut quitijoc chiru li Ka̱cuaꞌ Dios ut quixye:

³ —La̱in nintzꞌa̱ma cha̱cuu, at Ka̱cuaꞌ Dios, chijulticokꞌ taxak a̱cue nak la̱in xincꞌanjelac cha̱cuu chi anchal inchꞌo̱l ut xinba̱nu li us joꞌ nacuulac cha̱cuu, chan. Ut quiya̱bac chi kꞌaxal ra saꞌ xchꞌo̱l.

⁴ Toj ma̱jiꞌ ajcuiꞌ na-el laj Isaías saꞌ li neba̱l re li rochoch li rey nak quia̱tinac cuiꞌchic li Ka̱cuaꞌ riqꞌuin. Ut quixye re:

⁵ —Sukꞌin riqꞌuin laj Ezequías, li nacꞌamoc be chiruheb lin tenamit. Ut ta̱ye re, “Joꞌcaꞌin xye li Ka̱cuaꞌ, lix Dios laj David la̱ xeꞌto̱nil yucuaꞌ: La̱in xcuabi la̱ tij ut xinqꞌue retal nak yo̱cat chi ya̱bac. Anakcuan tatinqꞌuirtesi. Ut saꞌ oxib cutan naru chic tatxic saꞌ lin templo.

⁶ Ut oꞌlaju chihab chic tatcua̱nk saꞌ ruchichꞌochꞌ. La̱in tincolok a̱cue la̱at ut la̱in ajcuiꞌ tincolok reheb lin tenamit saꞌ rukꞌ lix reyeb laj Asiria. Tincoleb lin tenamit re xcolbal rix lin lokꞌal ut xban ajcuiꞌ nak quinra laj David li quicꞌanjelac chicuu,” chan li Ka̱cuaꞌ.

⁷ Ut laj Isaías quixye reheb: —Te̱yi̱b caꞌchꞌinak li higo, chan. Ut queꞌxyi̱b li higo ut queꞌxqꞌue chiru lix ra li rey ut quiqꞌuira.

⁸ Ut laj Ezequías quixye re laj Isaías: —¿Cꞌaꞌru li retalil ta̱qꞌue re nak tinnau nak li Ka̱cuaꞌ tinixqꞌuirtesi ut re ajcuiꞌ nak tinnau nak saꞌ oxib cutan naru tinxic cuiꞌchic saꞌ lix templo li Ka̱cuaꞌ? chan.

⁹ Ut laj Isaías quixye re laj Ezequías: —Aꞌan aꞌin li retalil li tixqꞌue li Ka̱cuaꞌ re nak ta̱nau nak tixba̱nu li quixye: ¿Ma ta̱cuaj nak ta̱numekꞌ chi ubej li sakꞌe o̱bak o̱r malaj ut ta̱cuaj nak ta̱sukꞌi̱k chirix o̱bak o̱r? chan.

¹⁰ Ut laj Ezequías quixye: —Moco chꞌaꞌaj ta nak li sakꞌe ta̱xic chi ubej o̱bak o̱r, abanan nak ta̱sukꞌi̱k chirix o̱bak o̱r, aꞌan chꞌaꞌaj, chan.

¹¹ Ut li profeta Isaías quixtzꞌa̱ma chiru li Dios nak tixqꞌue li retalil. Ut li Dios quixqꞌue li sakꞌe chi sukꞌi̱c chirix o̱b o̱r joꞌ naxcꞌut saꞌ lix relo̱j laj Acaz, li naxbis cuiꞌ li o̱r riqꞌuin li sakꞌe.

¹² Saꞌ eb li cutan aꞌan laj Merodac-baladán lix reyeb laj Babilonia quirabi resil nak quiyajer laj Ezequías. Joꞌcan nak quixtakla xhu ut quixtakla ajcuiꞌ lix ma̱tan. (Laj Merodac-baladán, aꞌan li ralal laj Baladán.)

¹³ Laj Ezequías quixcꞌuleb saꞌ xya̱lal lix takl laj Merodac-baladán ut quixcꞌut chiruheb lix plata, lix oro, lix especias ut li sununquil ban. Quixcꞌut ajcuiꞌ chiruheb lix chꞌi̱chꞌ re pletic. Chixjunil li cꞌaꞌru cuan re saꞌ lix naꞌaj quixcꞌut chiruheb. Ma̱cꞌaꞌ cꞌaꞌru re li rey Ezequías incꞌaꞌ ta quixcꞌut chiruheb lix takl laj Merodac-baladán.

¹⁴ Laj Isaías quicuulac riqꞌuin li rey Ezequías ut quixye re: —At rey, ¿bar xeꞌchal chak eb li cui̱nk aꞌan? Ut, ¿cꞌaꞌru xeꞌxye a̱cue? chan. Ut li rey Ezequías quixye re: —Toj Babilonia xeꞌchal chak saꞌ xnajtil tenamit, chan.

¹⁵ Quixye cuiꞌchic laj Isaías: —¿Cꞌaꞌru xeꞌril saꞌ li palacio?— Ut laj Ezequías quixye re: —Xeꞌril chixjunil li cꞌaꞌru cuan saꞌ li cuochoch joꞌ ajcuiꞌ li cuan saꞌ eb li naꞌajej li naxocman cuiꞌ li cꞌaꞌak re ru. Ma̱cꞌaꞌ cꞌaꞌ re ru cue incꞌaꞌ ta xincꞌut chiruheb, chan.

¹⁶ Ut laj Isaías quixye re: —Abi li cꞌaꞌru xye li Ka̱cuaꞌ.

¹⁷ “Ta̱cuulak xkꞌehil nak chixjunil li cuan saꞌ la̱ cuochoch ta̱cꞌamekꞌ aran Babilonia. Chixjunil li cꞌaꞌak re ru li queꞌxxoc eb la̱ xeꞌto̱nil yucuaꞌ toj chalen anakcuan ta̱cꞌamekꞌ. Ma̱cꞌaꞌ chic ta̱cana̱k.”

¹⁸ Ut teꞌcꞌamekꞌ la̱ cualal a̱cꞌajol aran Babilonia. Eb aꞌan teꞌcua̱nk chokꞌ eunucos saꞌ li rochoch lix reyeb laj Babilonia, chan li Ka̱cuaꞌ.

¹⁹ Laj Ezequías quixye re laj Isaías: —Sa rabinquil li ra̱tin li Dios li xaye cue, chan. Quixye chi joꞌcan xban nak quixcꞌoxla nak joꞌ najtil toj yoꞌyo̱k ta̱cua̱nk li tuktu̱quil usilal ut ma̱cꞌaꞌ tixcꞌul.

²⁰ Chixjunil li quixba̱nu laj Ezequías nak cuan saꞌ xcuanquil chokꞌ rey, tzꞌi̱banbil retalil saꞌ li hu Crónicas li tzꞌi̱banbil cuiꞌ retalil li quilajeꞌxba̱nu lix reyeb laj Judá. Tzꞌi̱banbil ajcuiꞌ retalil chanru nak quixyi̱b li pila ut li rok haꞌ li quinumeꞌ cuiꞌ li haꞌ saꞌ li tenamit.

²¹ Ut laj Ezequías quicam ut coxtauheb lix xeꞌto̱nil yucuaꞌ. Ut aꞌ chic laj Manasés li ralal qui-oc chokꞌ rey chokꞌ re̱kaj.