2 Reyes 2 - Li Santil hu

Laj Elías quicꞌameꞌ saꞌ choxa

¹ Quicuulac xkꞌehil nak laj Elías ta̱cꞌamekꞌ saꞌ choxa xban li Dios saꞌ li ikꞌ li naxsuti rib. Laj Elías rochben laj Eliseo queꞌel chak saꞌ li tenamit Gilgal.

² Laj Elías quixye re laj Eliseo: —Cana̱kat cuan arin la̱at, xban nak li Ka̱cuaꞌ Dios xinixtakla Bet-el, chan. Abanan laj Eliseo quixye: —Saꞌ xcꞌabaꞌ li Ka̱cuaꞌ Dios ut saꞌ a̱cꞌabaꞌ la̱at, la̱in ninye a̱cue nak incꞌaꞌ tatincanab a̱junes, chan. Ut queꞌco̱eb xcabichaleb Bet-el.

³ Eb li profeta li cuanqueb Bet-el queꞌco̱eb chixcꞌulbal laj Eliseo ut queꞌxye re: —¿Ma nacanau nak anakcuan li Ka̱cuaꞌ ta̱risi cha̱cuu laj Elías laj tzolol a̱cue? chanqueb. Laj Eliseo quixye reheb: —Ninnau. Abanan canabomak a̱tinac, chan.

⁴ Ut laj Elías quixye cuiꞌchic re laj Eliseo: —Cana̱kat cuan arin. La̱in tento nak tinxic Jericó xban nak li Ka̱cuaꞌ xinixtakla aran, chan. Laj Eliseo quixye re: —Saꞌ xcꞌabaꞌ li Ka̱cuaꞌ ut saꞌ a̱cꞌabaꞌ ajcuiꞌ la̱at, la̱in ninye a̱cue nak incꞌaꞌ tatincanab a̱junes, chan. Ut queꞌco̱eb Jericó xcabichaleb.

⁵ Eb li profeta li cuanqueb Jericó queꞌel chak chixcꞌulbal laj Eliseo ut queꞌxye re: —¿Ma nacanau nak chiru li cutan aꞌin li Ka̱cuaꞌ ta̱risi cha̱cuu laj tzolol a̱cue? chanqueb. Ut laj Eliseo quixye reheb: —Ninnau, abanan canabomak a̱tinac, chan.

⁶ Mokon chic laj Elías quixye re laj Eliseo: —Anakcuan tatcana̱k arin. Li Ka̱cuaꞌ xinixtakla saꞌ li nimaꞌ Jordán, chan. Ut laj Eliseo quixye re: —Saꞌ xcꞌabaꞌ li Ka̱cuaꞌ ut saꞌ a̱cꞌabaꞌ ajcuiꞌ la̱at, la̱in ninye a̱cue nak incꞌaꞌ tatincanab a̱junes, chan. Ut queꞌco̱eb cuiꞌchic xcabichaleb toj saꞌ li nimaꞌ Jordán.

⁷ Laje̱b roxcꞌa̱l li profeta queꞌco̱eb chirixeb toj saꞌ li nimaꞌ Jordán. Laj Elías ut laj Eliseo queꞌxakli chire li nimaꞌ ut eb li profeta queꞌxakli ajcuiꞌ nachꞌ chiruheb.

⁸ Ut laj Elías quirisi li tꞌicr li cuan chirix. Quixbas ru ut chiru aꞌan quixsacꞌ li haꞌ. Ut li nimaꞌ quixjach rib. Laj Elías ut laj Eliseo queꞌnumeꞌ jun pacꞌal li nimaꞌ ut chaki li chꞌochꞌ li queꞌnumeꞌ cuiꞌ.

⁹ Nak cuanqueb jun pacꞌal li nimaꞌ Jordán, laj Elías quixye re laj Eliseo: —Ye cue cꞌaꞌru ta̱cuaj tinqꞌue a̱cue nak toj ma̱jiꞌ nincꞌameꞌ xban li Ka̱cuaꞌ, chan. Ut laj Eliseo quixye re: —Chiqꞌuehekꞌ taxak cue la̱ cuanquilal. Nacuaj raj xcꞌulbal cuib sut li cuanquilal li cuan a̱cuiqꞌuin, chan. Ut laj Elías quixye re:

¹⁰ —Chꞌaꞌaj xsumenquil xqꞌuebal li cꞌaꞌru xatzꞌa̱ma. Abanan cui la̱at ta̱ru̱k ta̱cuil nak tincꞌamekꞌ ta̱cꞌul li cꞌaꞌru xatzꞌa̱ma. Cui ut incꞌaꞌ ta̱ru̱k ta̱cuil, incꞌaꞌ ajcuiꞌ ta̱cꞌul li cꞌaꞌru xatzꞌa̱ma, chan.

¹¹ Yo̱queb chi xic ut yo̱queb chi a̱tinac chi ribileb rib. Saꞌ junpa̱t quichal jun li carruaje chanchan xam ut quelonbil xbaneb li cacua̱y chanchaneb xam. Li carruaje quinumeꞌ saꞌ xyiheb ut laj Elías quicꞌameꞌ saꞌ choxa saꞌ jun li ikꞌ yo̱ chixsutinquil rib.

¹² Laj Eliseo quiril li quicꞌulman ut quixjap re chi cau ut quixye: —At inyucuaꞌ, at inyucuaꞌ, at Elías, la̱at chanchanat li kayucuaꞌ, la̱o aj Israel, chan. Ut incꞌaꞌ chic quiril ru laj Elías. Xban xrahil xchꞌo̱l laj Eliseo quixchap li rakꞌ li cuan chirix ut quixpej. Cuib jachal qui-el.

¹³ Chirix aꞌan quixxoc lix tꞌicr laj Elías li quitꞌaneꞌ chiru ut co̱ cuiꞌchic chire li nimaꞌ Jordán.

¹⁴ Quixsacꞌ li haꞌ riqꞌuin lix tꞌicr laj Elías ut quixye: —¿Bar cuan li Ka̱cuaꞌ lix Dios laj Elías? chan. Nak ac xsacꞌ li haꞌ riqꞌuin lix tꞌicr laj Elías, li haꞌ quixjach rib ut laj Eliseo quinumeꞌ jun pacꞌal li nimaꞌ.

¹⁵ Nak qui-ileꞌ xbaneb li profeta li cuanqueb jun pacꞌal li nimaꞌ saꞌ li tenamit Jericó, eb aꞌan queꞌxye: —Li cuanquilal li quiqꞌueheꞌ re laj Elías xqꞌueheꞌ re laj Eliseo, chanqueb. Queꞌco̱eb chixcꞌulbal laj Eliseo ut queꞌxcuikꞌib ribeb chiru.

¹⁶ Queꞌxye re: —La̱o cuanco laje̱b roxcꞌa̱l ut cau kib. La̱o toxic chixsicꞌbal li profeta Elías, laj tzolol a̱cue. Ma̱re quicꞌameꞌ xban lix musikꞌ li Ka̱cuaꞌ, ut ma̱re quitzꞌekeꞌ toj saꞌ junak tzu̱l malaj ut saꞌ junak ru takꞌa, chanqueb. Abanan laj Eliseo quixye reheb: —Ma̱ ani ta̱xic, chan.

¹⁷ Queꞌxpuersi laj Eliseo toj retal quixcanabeb chi xic chixsicꞌbal li profeta Elías. Eb li laje̱b roxcꞌa̱l chi profeta queꞌco̱eb chixsicꞌbal. Oxib cutan queꞌxsicꞌ, abanan ma̱ bar queꞌxtau.

¹⁸ Eb aꞌan queꞌsukꞌi cuiꞌchic Jericó riqꞌuin laj Eliseo. Ut laj Eliseo quixye reheb: —La̱in xinye e̱re nak incꞌaꞌ texxic, chan.

Li sachba chꞌo̱lej li quilajxba̱nu laj Eliseo

¹⁹ Eb li cuanqueb saꞌ li tenamit Jericó queꞌxye re laj Eliseo: —At xprofeta li Dios, li katenamit cha̱bil joꞌ yo̱cat chirilbal. Caꞌaj cuiꞌ li haꞌ incꞌaꞌ us. Ut incꞌaꞌ na-el li acui̱mk saꞌ li chꞌochꞌ aꞌin, chanqueb.

²⁰ Li profeta Eliseo quixye reheb: —Qꞌuehomak li atzꞌam saꞌ junak secꞌ toj acꞌ ut cꞌamomak chak cue, chan. Ut queꞌxba̱nu joꞌ quiyeheꞌ reheb.

²¹ Nak queꞌxqꞌue li secꞌ re, laj Eliseo quixcꞌam cuan cuiꞌ li yuꞌam haꞌ. Quixcut li atzꞌam saꞌ li haꞌ ut quixye: —Li Ka̱cuaꞌ Dios quixye chi joꞌcaꞌin, “La̱in xinban li haꞌ aꞌin. Ma̱cꞌaꞌ chic xyajel. Incꞌaꞌ chic teꞌca̱mk li teꞌucꞌak re li haꞌ aꞌin, ut eb li yaj aj ixk teꞌyoꞌla̱k chic lix cꞌulaꞌaleb,” chan.—

²² Ut chalen anakcuan li haꞌ aꞌan cha̱bil chic joꞌ quixye li profeta Eliseo.

²³ Chirix aꞌan laj Eliseo qui-el Jericó ut co̱ toj Bet-el Ut nak yo̱ chi xic, eb li sa̱j al queꞌel saꞌ li tenamit ut queꞌxhob li profeta Eliseo ut queꞌxye: —Ayu la̱at, at tꞌuruꞌ saꞌ a̱jolom, ayu la̱at at tꞌuruꞌ saꞌ a̱jolom, chanqueb.

²⁴ Li profeta Eliseo quixsukꞌisi rib ut quirileb. Ut saꞌ xcꞌabaꞌ li Ka̱cuaꞌ Dios quixtzꞌa̱ma ma̱usilal saꞌ xbe̱neb. Ut cuib li joskꞌ aj xul oso xcꞌabaꞌ queꞌel saꞌ li qꞌuicheꞌ ut queꞌxcamsiheb cuib roxcꞌa̱l li sa̱j al. Pedasinbil queꞌxba̱nu reheb.

²⁵ Ut li profeta Eliseo co̱ saꞌ li tzu̱l Carmelo ut chirix aꞌan quisukꞌi cuiꞌchic Samaria.