2 Reyes 19 - Li Santil hu

¹ Nak quirabi li cꞌaꞌru queꞌxye, li rey Ezequías quixpej li rakꞌ ut quixqꞌue li kꞌes ru tꞌicr chirix retalil lix rahil xchꞌo̱l ut co̱ saꞌ lix templo li Ka̱cuaꞌ.

² Ut quixtaklaheb laj Eliaquim li na-iloc re li palacio rochben laj Sebna laj tzꞌi̱b ut eb li nequeꞌcꞌamoc be saꞌ xya̱nkeb laj tij riqꞌuin li profeta Isaías, li ralal laj Amoz. Cuan li kꞌes ru tꞌicr chirixeb nak queꞌco̱eb.

³ Queꞌxye re laj Isaías: —Aꞌan aꞌin li naxye laj Ezequías. Chiru li cutan aꞌin yo̱co chi cꞌuluc raylal xban li ma̱c xkaba̱nu. Yo̱queb chikamajecuanquil li xicꞌ nequeꞌiloc ke ut yo̱queb chikahobbal. Chanchano jun li ixk oc re chi qꞌuira̱c, ut ma̱cꞌaꞌ chic xmetzꞌe̱u.

⁴ Lix reyeb laj Asiria quixtakla laj Rabsaces li nim xcuanquil chixhobbal li yoꞌyo̱quil Dios. Ma̱re xrabi ajcuiꞌ li Ka̱cuaꞌ la̱ Dios li hoboc ut tixqꞌue taxak chixtojbal xma̱c li ani xhoboc re. Chattijok chirixeb li katenamit li joꞌ qꞌuial chic xeꞌcana.—

⁵ Queꞌxye re laj Isaías li cꞌaꞌru quixye laj Ezequías.

⁶ Laj Isaías quixtakla xyebal re laj Ezequías chi joꞌcaꞌin: —Li Ka̱cuaꞌ naxye a̱cue nak incꞌaꞌ tatxucuak xban li cꞌaꞌru nequeꞌxye e̱re. Matxucuac xban li cꞌaꞌru xeꞌxye re inmajecuanquil eb li nequeꞌcꞌanjelac chiru lix reyeb laj Asiria.

⁷ La̱in tintakla jun esilal. Nak lix reyeb laj Asiria ta̱rabi, ta̱xucuak ut ta̱xic cuiꞌchic saꞌ xtenamit. Nak ac cua̱nk chic aran, ta̱camsi̱k chi chꞌi̱chꞌ, chan li Ka̱cuaꞌ.

⁸ Nak quisukꞌi saꞌ xtenamit laj Rabsaces, quirabi resil nak li rey ma̱ ani Laquis. Co̱ ut quixtau li rey nak yo̱ chi pletic riqꞌuineb laj Libna.

⁹ Li rey Senaquerib quirabi resil nak laj Tirhaca lix reyeb laj Etiopía quichal chi pletic. Joꞌcan nak quixtakla cuiꞌchic lix takl riqꞌuin laj Ezequías ut quixye reheb:

¹⁰ —Joꞌcaꞌin te̱ye re laj Ezequías lix reyeb laj Judá, “Li Dios li cꞌojcꞌo cuiꞌ a̱chꞌo̱l quixye a̱cue nak incꞌaꞌ textꞌanekꞌ saꞌ cuukꞌ. Abanan ma̱qꞌue a̱cuib chi balakꞌi̱c xban.

¹¹ Nacanau cꞌaꞌru nequeꞌxba̱nu lix reyeb laj Asiria. Nequeꞌxsach ruheb chi junaj cua chixjunileb li tenamit li nequeꞌpletic riqꞌuin. ¿Ma texcolekꞌ ta biꞌ la̱ex saꞌ rukꞌ aꞌan?

¹² Eb lin xeꞌto̱nil yucuaꞌ queꞌxsach ruheb li tenamit Gozán, Harán, Resef, joꞌ eb ajcuiꞌ li ralal xcꞌajol laj Edén li queꞌcuan Telasar. ¿Ma queꞌcoleꞌ ta biꞌ li tenamit aꞌan xban lix dioseb?

¹³ ¿Ma cuanqueb ta biꞌ xcuanquil lix reyeb laj Hamat, lix reyeb laj Arfad, lix reyeb laj Sefarvaim, Hena ut Iva?” chan laj Senaquerib.

¹⁴ Nak ac xcꞌul li hu riqꞌuineb lix takl lix reyeb laj Asiria, laj Ezequías quiril xsaꞌ. Chirix aꞌan co̱ saꞌ li templo ut quixhel ru li hu chiru li Ka̱cuaꞌ.

¹⁵ Quitijoc ut quixye: —At Ka̱cuaꞌ, la̱at li kaDios la̱o aj Israel. La̱at li cuancat saꞌ xyi li querubines. Caꞌaj cuiꞌ la̱at li Dios. La̱at cuan a̱cuanquil saꞌ xbe̱neb li xni̱nkal ru tenamit li cuanqueb saꞌ ruchichꞌochꞌ. La̱at catyi̱ban re li choxa ut li ruchichꞌochꞌ.

¹⁶ Abi, at Ka̱cuaꞌ, li cꞌaꞌru nequeꞌxye. Ut chacuil taxak li cꞌaꞌru nequeꞌxba̱nu. Chacuabi li a̱tin li xtakla xyebal laj Senaquerib re a̱majecuanquil, la̱at li yoꞌyo̱quil Dios.

¹⁷ At Ka̱cuaꞌ, ya̱l nak eb laj Asiria queꞌxsach ruheb li tenamit joꞌ ajcuiꞌ lix naꞌajeb.

¹⁸ Queꞌxcꞌat lix dioseb xban nak moco tzꞌakal dioseb ta. Yal pec ut cheꞌ yi̱banbil xbaneb li cui̱nk. Joꞌcan nak queꞌsacheꞌ ruheb.

¹⁹ At Ka̱cuaꞌ, at kaDios, choa̱col taxak saꞌ rukꞌ lix reyeb laj Asiria re nak chixjunileb li xni̱nkal ru tenamit li cuanqueb saꞌ ruchichꞌochꞌ teꞌxqꞌue retal nak caꞌaj cuiꞌ la̱at li Ka̱cuaꞌ li tzꞌakal Dios, chan laj Ezequías.

²⁰ Li profeta Isaías, li ralal laj Amoz, quixtakla xyebal re laj Ezequías: —Aꞌan aꞌin li naxye a̱cue li Ka̱cuaꞌ li kaDios la̱o aj Israel. “La̱in xcuabi li cꞌaꞌru xatzꞌa̱ma chicuu chirix laj Senaquerib lix reyeb laj Asiria.

²¹ Aꞌan aꞌin li quixye li Ka̱cuaꞌ Dios chirix lix reyeb laj Asiria: Li tenamit Jerusalén chanchan jun li tukꞌ ixk yo̱ cha̱seꞌenquil ut yo̱ cha̱tzꞌekta̱nanquil, at Senaquerib. Li tenamit Jerusalén narecꞌasi lix jolom cha̱hobbal nak yo̱cat chi e̱lelic chiru.

²² ¿Ani li xahob ut ani li xamajecua? ¿Ani li xataksi a̱cua̱tin saꞌ xbe̱n ut xakꞌetkꞌeti a̱cuib chiru? ¿Ma ma̱cuaꞌ ta biꞌ chiru li Dios Santo reheb laj Israel?

²³ Xataklaheb la̱ takl chixhobbal li Dios ut xaye: Riqꞌuin lin qꞌuila carruaje re pletic xintakeꞌ saꞌ eb li ni̱nki tzu̱l. Toj saꞌ xbe̱neb li tzu̱l re Líbano li najt xteram xintakeꞌ. Xinyocꞌ li ni̱nki cheꞌ chacalteꞌ, li najt rok, ut xintꞌaneb ajcuiꞌ li ciprés li raro xbaneb. Xincuulac toj saꞌ li qꞌuicheꞌ li cꞌajoꞌ xchꞌinaꞌusal.

²⁴ Xinbec xjulel li haꞌ saꞌ jalan tenamit ut xcuucꞌ li haꞌ x-el aran. Riqꞌuin li cuok xinqꞌueheb chi chakic li nimaꞌ li cuanqueb Egipto, chancat.

²⁵ ¿Ma incꞌaꞌ ta biꞌ nacanau nak la̱in li Ka̱cuaꞌ? La̱in quincꞌoxlan re chixjunil li ta̱uxma̱nk. Najter kꞌe cutan la̱in quincꞌu̱b chak ru chanru ta̱cꞌulma̱nk. Ut anakcuan la̱in xatincanab chixsachbal ruheb li tenamit li cauheb rib chi pletic. Tu̱btu aj chic xacanabeb nak xapoꞌeb.

²⁶ Eb li tenamit li cuanqueb aran ma̱cꞌaꞌeb xmetzꞌe̱u. Nequeꞌxucuac ut sachso̱queb xnaꞌleb. Chanchaneb chic li pim li cuan saꞌ cꞌaleba̱l. Chanchaneb li raxi pim. Chanchaneb li pim li namok saꞌ xbe̱neb li cab ut nachakic nak toj ma̱jiꞌ nache̱coꞌ.

²⁷ La̱in ninnau chanru nak cuancat. Ninnau chixjunil li cꞌaꞌru nacaba̱nu. Ut ninnau ajcuiꞌ nak cꞌajoꞌ la̱ joskꞌil cuiqꞌuin.

²⁸ Xban nak ninnau nak yo̱ a̱joskꞌil ut xakꞌetkꞌeti a̱cuib chicuu, joꞌcan nak la̱in tinram la̱ be. Chanchan nak tinqꞌue jun li chꞌi̱chꞌ saꞌ la̱ cuuꞌuj ut jun li chꞌi̱chꞌ saꞌ a̱cue ut tatinqꞌue cuiꞌchic chi sukꞌi̱c saꞌ li be li xatchal cuiꞌ chak,” chan li Ka̱cuaꞌ.

²⁹ Ut laj Isaías quixye re laj Ezequías: —Aꞌan aꞌin li retalil li cꞌaꞌru ta̱cꞌulma̱nk. Saꞌ li chihab aꞌin ut saꞌ li chihab ta̱cha̱lk la̱ex te̱tzaca li ru li trigo li namok yal xjunes. Abanan saꞌ li rox chihab la̱ex tex-a̱uk ut texkꞌolok re nak textzaca̱nk. Te̱rau le̱ uvas ut te̱tzaca li ru li naxqꞌue.

³⁰ Eb li ralal xcꞌajol laj Judá li incꞌaꞌ teꞌca̱mk teꞌta̱mk cuiꞌchic. Chanchanakeb li acui̱mk li naxchap xxeꞌ ut naxqꞌue li ru chi nabal.

³¹ Cuanqueb li ralal xcꞌajol laj Judá li teꞌcana̱k aran Jerusalén. Saꞌ li tzu̱l Sión teꞌcana̱k. Joꞌcan ta̱cꞌulma̱nk xban nak joꞌcan naraj li Ka̱cuaꞌ xban xnimal xrahom.

³² Li Ka̱cuaꞌ Dios naxye chi joꞌcaꞌin chirix lix reyeb laj Asiria, “Li cui̱nk aꞌan incꞌaꞌ ta̱oc saꞌ li tenamit Jerusalén chi pletic chi moco riqꞌuin tzimaj, chi moco riqꞌuin chꞌi̱chꞌ, chi moco tixyi̱b lix takleba̱l re ta̱oc saꞌ li tenamit.

³³ Saꞌ li be li xchal cuiꞌ, aran cuiꞌchic ta̱sukꞌi̱k. Incꞌaꞌ ta̱oc saꞌ li tenamit Jerusalén. La̱in li Ka̱cuaꞌ ninyehoc re aꞌin.

³⁴ La̱in tin-ilok re li tenamit ut la̱in ajcuiꞌ tincolok re. Tinba̱nu aꞌin saꞌ incꞌabaꞌ la̱in ut saꞌ xcꞌabaꞌ laj David li quicꞌanjelac chicuu,” chan li Ka̱cuaꞌ.—

³⁵ Saꞌ ajcuiꞌ li kꞌojyi̱n aꞌan jun x-ángel li Dios quicuulac saꞌ xmuheba̱leb laj Asiria ut quixcamsi jun ciento riqꞌuin o̱b roxcꞌa̱l mil (185,000) chi soldado aj Asiria. Joꞌ cuulajak chic nak quisake̱u ac camenakeb chic chixjunil.

³⁶ Ut laj Senaquerib lix reyeb laj Asiria, quirisi lix muheba̱leb. Quisukꞌi Nínive saꞌ xnaꞌaj ut aran quicana.

³⁷ Saꞌ jun li cutan laj Senaquerib yo̱ chixlokꞌoninquil lix dios Nisroc xcꞌabaꞌ saꞌ lix templo. Queꞌcuulac laj Adramelec ut laj Sarezer, li cuib chi ralal. Queꞌxcamsi chi chꞌi̱chꞌ ut queꞌe̱lelic. Queꞌco̱eb saꞌ li naꞌajej Ararat. Ut aꞌ chic laj Esar-hadón li ralal qui-oc chokꞌ rey chokꞌ re̱kaj laj Senaquerib.