2 Reyes 18 - Li Santil hu

¹ Yo̱ rox chihab roquic chokꞌ xreyeb laj Israel laj Oseas li ralal laj Ela nak laj Ezequías li ralal laj Acaz qui-oc chokꞌ xreyeb laj Judá.

² O̱b xcaꞌcꞌa̱l (25) chihab cuan re laj Ezequías nak qui-oc saꞌ xcuanquil. Bele̱b xcaꞌcꞌa̱l (29) chihab quicuan chokꞌ rey aran Jerusalén. Lix naꞌ, aꞌan lix Abi, lix rabin laj Zacarías.

³ Laj Ezequías quixba̱nu li us chiru li Dios joꞌ quixba̱nu laj David lix xeꞌto̱nil yucuaꞌ.

⁴ Laj Ezequías quixjuqꞌui li naꞌajej najt xteram li nequeꞌxlokꞌoni cuiꞌ li yi̱banbil dios. Quixjori li ni̱nki jalam u̱ch Asera xcꞌabaꞌ. Ut quixpuqꞌui li yi̱banbil dios. Ut quixjori ajcuiꞌ li cꞌantiꞌ yi̱banbil riqꞌuin bronce li quixyi̱b laj Moisés xban nak eb laj Israel yo̱queb chixcꞌatbal lix incienso chiru. Nehustán quiqꞌueheꞌ chokꞌ xcꞌabaꞌ li cꞌantiꞌ aꞌan.

⁵ Laj Ezequías quixcꞌojob xchꞌo̱l riqꞌuin li Ka̱cuaꞌ Dios li nequeꞌxlokꞌoni eb laj Israel. Saꞌ xya̱nkeb chixjunileb li rey li queꞌcuan Judá ma̱ jun ti̱c xchꞌo̱l joꞌ laj Ezequías, chi moco li queꞌcuan xbe̱n cua chi moco li queꞌcuan mokon.

⁶ Chi anchal xchꞌo̱l quixpa̱b li Dios ut ma̱ jun sut quixkꞌet li ra̱tin. Quixba̱nu ban chixjunil li quixye saꞌ li chakꞌrab li quiqꞌueheꞌ re laj Moisés xban li Ka̱cuaꞌ.

⁷ Li Ka̱cuaꞌ cuan riqꞌuin ut quirosobtesi. Ut us qui-el chixjunil li quixba̱nu. Laj Ezequías incꞌaꞌ quixqꞌue rib rubel xcuanquil lix reyeb laj Asiria chi moco quixba̱nu li cꞌaꞌru quixye.

⁸ Ut quinumta saꞌ xbe̱neb laj filisteo ut quire̱chani chixjunil lix naꞌajeb. Quire̱chani li naꞌajej li naticla cuan cuiꞌ li tenamit Gaza ut nacuulac toj saꞌ lix nuba̱l li naꞌajej Judá li cuanqueb cuiꞌ li cab li queꞌxyi̱b re xcolbaleb rib joꞌ ajcuiꞌ li cab najt xteram li queꞌxcꞌacꞌale cuiꞌ lix tenamiteb.

⁹ Ac yo̱ chic xcuuk chihab roquic chokꞌ xreyeb laj Israel laj Oseas li ralal laj Ela nak quicuulac chi pletic riqꞌuineb laj Salmanasar lix reyeb laj Asiria. Queꞌxsut li tenamit Samaria ut queꞌoc chi pletic riqꞌuineb. Aꞌin quicꞌulman nak yo̱ xca̱ chihab roquic chokꞌ rey laj Ezequías aran Judá.

¹⁰ Oxib chihab quixpleti rix li tenamit Samaria toj retal quire̱chani. Yo̱ chic xbele chihab roquic laj Oseas chokꞌ xreyeb laj Israel nak laj Salmanasar quire̱chani li tenamit Samaria. Aꞌin quicꞌulman nak ac yo̱ chic xcuak chihab roquic laj Ezequías chokꞌ rey aran Judá.

¹¹ Ut eb laj Israel queꞌchapeꞌ ut queꞌcꞌameꞌ Asiria. Cuan li quixcanabeb saꞌ li naꞌajej Halah ut cuan ajcuiꞌ li quixcanabeb saꞌ li naꞌajej Habor li cuan nachꞌ riqꞌuin li nimaꞌ Gozán. Ut cuan ajcuiꞌ li quixcanabeb saꞌ eb li tenamit li cuanqueb Medo.

¹² Joꞌcaꞌin queꞌxcꞌul laj Israel li cuanqueb Samaria xban nak incꞌaꞌ queꞌxba̱nu li quixye li Ka̱cuaꞌ Dios. Queꞌxkꞌet ban li contrato. Incꞌaꞌ queꞌxpa̱b li cꞌaꞌru quixye laj Moisés laj cꞌanjel chiru li Dios, chi moco queꞌxba̱nu li cꞌaꞌru quixye.

¹³ Yo̱ ca̱laju chihab roquic chokꞌ xreyeb laj Judá laj Ezequías nak laj Senaquerib lix reyeb laj Asiria qui-oc chi pletic riqꞌuineb laj Judá saꞌ eb li tenamit li cuanqueb cuiꞌ li cab li nequeꞌxcol cuiꞌ ribeb. Laj Senaquerib quire̱chaniheb li tenamit aꞌan saꞌ li ple̱t.

¹⁴ Joꞌcan nak laj Ezequías lix reyeb laj Judá quixtakla xyebal re lix reyeb laj Asiria li cuan saꞌ li tenamit Laquis: —Incꞌaꞌ us xinba̱nu la̱in. Chex-e̱lk saꞌ li katenamit ut la̱in tintoj a̱cue joꞌ nimal ta̱patzꞌ, chan. Ut lix reyeb laj Asiria quixye re laj Ezequías nak tixtakla cuib ciento quintal li plata ut junmay quintal li oro.

¹⁵ Ut li rey Ezequías quixtakla chixjunil li plata li cuan saꞌ lix templo li Ka̱cuaꞌ ut quixtakla ajcuiꞌ li cuan saꞌ li rochoch li rey.

¹⁶ Ut quirisi ajcuiꞌ li oro li quixletz chiruheb lix puertil lix templo li Ka̱cuaꞌ joꞌ ajcuiꞌ li oro li quixletz chiru lix marquileb li puertas. Ut li oro aꞌan quixtakla re lix reyeb laj Asiria.

¹⁷ Lix reyeb laj Asiria quixtaklaheb oxibeb li cui̱nk ni̱nkeb xcuanquil aran Jerusalén chi pletic riqꞌuin laj Ezequías. Aꞌaneb aꞌin: laj Tartán, laj Rabsaris ut laj Rabsaces. Ut quixtaklaheb ajcuiꞌ jun chꞌu̱tal li soldado chirixeb. Nak queꞌcuulac Jerusalén, queꞌcana saꞌ li be li nequeꞌcꞌanjelac cuiꞌ eb laj puchꞌunel. Li naꞌajej aꞌan cuan chire li rok haꞌ li nanumeꞌ cuiꞌ li haꞌ li nachal saꞌ li pila li cuan toj takecꞌ.

¹⁸ Eb li oxib chi cui̱nk li ni̱nkeb xcuanquil queꞌxtakla xbokbal li rey Ezequías. Oxib li cui̱nk li nequeꞌtenkꞌan re laj Ezequías queꞌco̱eb chi a̱tinac riqꞌuineb. Aꞌaneb aꞌin li oxib chi cui̱nk: laj Eliaquim, li ralal laj Hilcías, li na-iloc re li palacio; laj Sebna laj tzꞌi̱b; ut laj Joa, li ralal laj Asaf, li najolomin re li nequeꞌxococ re li hu.

¹⁹ Laj Rabsaces quixye reheb: —Joꞌcaꞌin ta̱ye re li rey Ezequías: “Aꞌan aꞌin li naxtakla xyebal a̱cue lix reyeb laj Asiria li nim xcuanquil: ¿Ani aj iqꞌuin cꞌojcꞌo a̱chꞌo̱l?

²⁰ Ma̱re nacacꞌoxla nak riqꞌuin a̱tinac naru ta̱col a̱cuib chicuu. ¿Ma aꞌan ta̱qꞌuehok xcacuil a̱chꞌo̱l nak nacacꞌoxla? ¿Ani aj iqꞌuin cau a̱chꞌo̱l nak incꞌaꞌ nacatxucuac chicuu?

²¹ La̱o nakanau nak la̱at cꞌojcꞌo a̱chꞌo̱l saꞌ xbe̱neb laj Egipto. Eb laj Egipto moco cauheb ta rib. Chanchaneb li caxlan ajl. Cui ta̱chap chokꞌ re a̱xukꞌ, tixhop la̱ cuukꞌ. Li ani tixcꞌojob xchꞌo̱l saꞌ xbe̱n laj faraón, lix reyeb laj Egipto, ra tixcꞌul.

²² Ma̱re la̱ex te̱ye cue nak cꞌojcꞌo e̱chꞌo̱l riqꞌuin li Ka̱cuaꞌ le̱ Dios. ¿Ma incꞌaꞌ ta biꞌ isinbil saꞌ e̱ya̱nk chixjunileb li artal xban li rey Ezequías? ¿Ma ma̱cuaꞌ ta biꞌ aꞌan quiyehoc reheb laj Judá ut laj Jerusalén nak chiru jun ajcuiꞌ li artal teꞌlokꞌoni̱nk aran Jerusalén?

²³ Joꞌcan nak la̱in nintzꞌa̱ma che̱ru nak takacꞌu̱b ru junak li naꞌleb. La̱in tinqꞌue e̱re cuib mil li cacua̱y ut la̱ex te̱ril ma te̱tau li ani te̱taklaheb chirixeb.

²⁴ La̱at incꞌaꞌ ta̱cuy pletic riqꞌuin jun reheb lin soldado usta aꞌan incꞌaꞌ cau rib. ¿Ma nequecꞌoxla nak laj faraón tixqꞌue e̱carruaje ut tixqꞌueheb li soldado li teꞌxic chirix cacua̱y?

²⁵ ¿Ma ma̱cuaꞌ ta biꞌ li Ka̱cuaꞌ xtaklan chak cue saꞌ li naꞌajej aꞌin chi pletic? ¿Ma xinchal ta biꞌ chixsachbal ru yal injunes?” chan.

²⁶ Tojoꞌnak laj Eliaquim li ralal laj Hilcías ut laj Sebna ut laj Joa queꞌxye re laj Rabsaces: —Nakatzꞌa̱ma cha̱cuu nak toa̱cua̱tina saꞌ li a̱tinoba̱l arameo xban nak la̱o nakatau ru li a̱tin aꞌan. Moa̱cua̱tina saꞌ li ra̱tinoba̱leb laj Judá xban nak chixjunileb li tenamit li cuanqueb saꞌ xbe̱n li tzꞌac yo̱queb chirabinquil li yo̱cat chixyebal, chan.

²⁷ Abanan laj Rabsaces quixye reheb: —La̱in incꞌaꞌ xintakla̱c chak chi a̱tinac caꞌaj cuiꞌ riqꞌuin le̱ rey, chi moco caꞌaj cuiꞌ e̱riqꞌuin la̱ex. Xintakla̱c ban chi a̱tinac riqꞌuineb li cuanqueb saꞌ xbe̱n li tzꞌac. Ta̱cuulak xkꞌehil nak eb aꞌan joꞌ ajcuiꞌ la̱ex te̱lou e̱cꞌot ut te̱rucꞌ le̱ chuꞌ, chan.

²⁸ Ut chirix aꞌan, quixakli ut quixjap re chixyebal saꞌ li ra̱tinoba̱leb laj Judá: —Abihomak che̱junilex li cꞌaꞌru naxye e̱re lix reyeb laj Asiria, li nim xcuanquil.

²⁹ Joꞌcaꞌin xtakla chak xyebal e̱re li rey li nim xcuanquil: Me̱qꞌue e̱rib chixbalakꞌi laj Ezequías. Aꞌan incꞌaꞌ ta̱ru̱k texcol saꞌ cuukꞌ la̱in.

³⁰ Ma̱re laj Ezequías tixye e̱re, “Cꞌojobomak e̱chꞌo̱l riqꞌuin li Ka̱cuaꞌ. Relic chi ya̱l li Ka̱cuaꞌ ta̱colok ke. Aꞌan incꞌaꞌ toxkꞌaxtesi saꞌ rukꞌ lix reyeb laj Asiria” chaꞌak e̱re. Me̱pa̱b li cꞌaꞌru tixye e̱re nak texkꞌunbesi.

³¹ Me̱pa̱b li ra̱tin laj Ezequías. Aꞌan aꞌin li naxye e̱re lix reyeb laj Asiria, “Cꞌamomak e̱rib saꞌ usilal cuiqꞌuin. Cui te̱cꞌam e̱rib saꞌ usilal cuiqꞌuin, chi ju̱nkal te̱tzaca li ru le̱ uvas ut te̱tzaca li ru le̱ higo ut naru ajcuiꞌ te̱rucꞌ li haꞌ li na-el saꞌ le̱ jul haꞌ,

³² toj retal nak texincꞌam chi cua̱nc saꞌ junak chic naꞌajej kꞌaxal cha̱bil joꞌ le̱ naꞌaj. Aran na-el nabal li uvas ut na-el nabal li trigo. Cua̱nk e̱vino ut cua̱nk e̱caxlan cua. Cua̱nk nabal li olivos ut li aceite joꞌ ajcuiꞌ li xyaꞌal cab. Cui te̱ba̱nu li cꞌaꞌru ninye la̱in, sa chic texcua̱nk ut incꞌaꞌ texca̱mk. Me̱pa̱b li cꞌaꞌru naxye laj Ezequías xban nak yo̱ che̱balakꞌinquil nak naxye e̱re nak li Ka̱cuaꞌ ta̱colok e̱re.

³³ ¿Ma cuan ta biꞌ junak dios quixcol ta lix tenamit saꞌ rukꞌ lix reyeb laj Asiria?

³⁴ ¿Bar cuan lix dioseb li tenamit Hamat ut Arfad? ¿Bar cuan lix dioseb li tenamit Sefarvaim ut Hena ut Iva? ¿Ma queꞌxcol ta biꞌ li tenamit Samaria saꞌ cuukꞌ la̱in?

³⁵ ¿Ma cuan ta biꞌ junak dios saꞌ li naꞌajej aꞌin li quixcuy xcolbal lix tenamit saꞌ cuukꞌ la̱in? ¿Chanru nak li Ka̱cuaꞌ Dios tixcol li tenamit Jerusalén saꞌ cuukꞌ?” chan li rey.—

³⁶ Eb laj Judá ma̱ jun a̱tin queꞌxye xban nak li rey quixye reheb nak incꞌaꞌ teꞌsume̱nk.

³⁷ Ut laj Eliaquim, li ralal laj Hilcías, li na-iloc re li palacio ut laj Sebna laj tzꞌi̱b joꞌ ajcuiꞌ laj Joa li ralal laj Asaf, li najolomin reheb li nequeꞌxococ re li hu, queꞌxpej li rakꞌeb ut queꞌco̱eb riqꞌuin laj Ezequías ut queꞌxye re chixjunil li quixye laj Rabsaces.